Read Ngowili Yekpei Numu Kpɛlɛɛ Va 2 PITA 1 Bible Online

2 PITA 1 - Ngowili Yekpei Numu Kpɛlɛɛ Va bible

2 PITA 1

¹Nya Saimɔn Pita, Yesu Kristi yengemɔ a nge kɛɛ tomɔ, nya mia ngi kɔlɛi ji yoyoma, wu kpɛlɛɛ gama wua wu lanaya majɔɔnga kia mua vulii mu ndɛi na jifa mu Yewɔɛi kɛɛ mu Bawomɔi Yesu Kristi wɔnangɔ;

²Ngewɔ yauwandei kɛɛ ngi liilɛli wu gama maa i yɛ a to tuuŋ jifa wu Ngewɔ gɔnga tia mu Lemɔi Yesu Kristi.

³Ngewɔ gbayei lɔ Yesu Kristi hu tawao i hani gbi venga mu wɛ mu gbewengɔ fa kɔɔ mu yɛ a jia a Ngewɔ liima welei jifa mu Kristi gɔɔlɔ vulii pandawanda, Kristi na i mu lolini aako i mu gɔ ngi nda wɔlɔyei hu kɛɛ ngi gbekpeyii.

⁴Ji kpɛlɛɛ yeehuvɛi lɔ a ji i hani baa gbangɔ wai nasia venga mu wɛ i Lahei wumbuni fa aako mu bawo numu yafei jukulu hinda nyamui nasia yeya nungaa ti maningɔ ma dunyei hu, tawao wu yɛyii i wie kia Ngewɔ yɛyii i na.

⁵Sabui ji vulii va, a lapi a wu sɛmbɛi gbi wu wu layii a Kristi mato a hinda yekpe wiela, wu wu hinda yekpe wielei mato a Ngewɔ liima hindei gɔɔla;

⁶wu wu Yewɔ liima hindei gɔlɛi mato a joowila wu liima hinda nyamuisia ma, wu wu joowilɛi wu liima hinda nyamuisia ma mato a gula hinda gbɔugbɔu bu, wu wu gulɛi hinda gbɔugbɔu bu mato a Ngewɔ liima hindei wiela.

⁷Mahoungɔ wu yɛ a ndoma gɛ a wu mbaa Kristimableisia kpɛlɛɛ, tawao mahoungɔe wu lo a numui gbi.

⁸Mahoungɔe makɛi jisia ti yɛ wu hu tawao ti yɛngaa a mato wu hu, ta pielɔ wu gu a mu Lemɔi Yesu Kristi gɔɔla pandawanda.

⁹Kɛɛ Kristimamɔi na makɛi jisia tii ngi hu ngi wiengɔe kia numui na i na pumui i ngi yaama ɛɛ hinda lɔ, tawao i lemanga kɛ Kristi i ngi jumbu wovei gbi wuanga fo ngi ma.

¹⁰Faale, nya mbaa Kristimableisia, a lapi a wu sɛmbɛi gbi wu wu lolilei kɛɛ wu wumbulei yɛ a hinda waa; wu na wiengaa wuɛɛ gbe a lala a Kristi.

¹¹Wu lapingaa a wu sɛmbɛi gbi wu kɛ wu luvayii gbi hu kɛ Ngewɔ vulii lɔ i wu lolini i wu wumbu, Ngewɔ a lumalɔ wu wɛ liva mia mu Lemɔi kɛɛ mu Bawomɔi i mahayɛi ma na kunafɔ va.

¹²Faale, nga yɛlɔ a hindei jisia hitɛ wu wɛ watii gbi kia bɛɛ wu ti gɔɔngɔ tawao wu hɛlɛngɔ a tɔnyɛi na ti wu gaani la.

¹³Nya langɔ la mahoungɔe nya va ngi yɛ a pie waa lema hindei jisia ma a ji nga yɛ a ti hitɛ wu nɛmahu kia lɛ ndɛvui i nya hokpala.

¹⁴Ngi kɔɔlɔ kɛ nya haala hugutungɔe naa kia mu Lemɔi Yesu Kristi i ndeni la nya ma leiŋ.

¹⁵Nga nya sɛmbɛi gbi wielɔ pieva hindei jisia ti gu a hitɛla wu wɛ kpema gbi lekee nya haangɔi wooma.

¹⁶Gbamaile ndɛɛ dɔmingaa ii le mua hugbatɛ nɛmahu maa kpua wu wɛ ji mu hugɛni a wue muɛɛ mu Lemɔi Yesu Kristi a yamalɔ mbei a kpaya waa. Mua mu ngi wɔlɔyei hulɔilɔ a yaama.

¹⁷ Mu yɛ nalɔ mu Kɛkɛ Ngewɔ i ngi wɔlɔyii kɛɛ ngi gabandeyii gɛni kɛɛ ji ngoi i gbuani Ngewɔ gama ngelegoohu i wani ngi gama yɛ, “Nya liima Hindoloi lɔ, ngi hinda i nya liilɛlingɔ waa!”

¹⁸Mua vulii mu ngoi ji mɛniilɔ i gbuani ngelegoohu ji mua tieni mu yɛ Ngewɔ nda yiyei na hu.

¹⁹Faale mu lailɔ na vulii waa a ngowili na kpɛlɛɛ Ngewɔ lutuisia ti ndeni. A yɛ a kpɔma lɔ wu va ji wa la a ngowili nasia Ngewɔ lutuisia ti ndeni ajifa ti wiengɔe kia lamboi na a lo voma kpindi-kpindimɛi haaŋ ngele i wo, Kristi voofoi na yeesawulɛi a ngenda lumbekei i voo wu liisia hu.

²⁰Na hu gbi, na tewengɔ hindei gbi ma ta lɔ a ji: numu gbi ɛɛ gu aa Ngewɔ lutuisia ti laayiɛi na fasai i Ngewɔ Gɔlɛi hu a ngi wuma wee ina Ngewɔ Yafei ii gbɔni ngi ma.

²¹Ajifa Ngewɔ lutuisia tii ti wuma yɛpɛ lɔ leni, kɛlee Ngewɔ wowili na ngi Yafei i yɛ pu ti lii hu ndeva.