Read Ngowili Yekpei Numu Kpɛlɛɛ Va 2 PITA 2 Bible Online

2 PITA 2 - Ngowili Yekpei Numu Kpɛlɛɛ Va bible

2 PITA 2

¹Kɛɛ ndɛɛ Yewɔ lutuisia ti yɛlɔ a gbɔku wɔɔ Isrɛlbleisia lia kia lɔɔ ndɛɛ kaamɔisia ti wama gbɔkuma wu lia. Ta wu gaalɔ a hindangaa bi tɔaa bɛɛ tɔnyɛi mia kɔlooni Ngewɔ ma kɛɛ tii lɔnyani kulo bɛɛ tawao ta gulɔ a piela nungaa ti la a hindei nasia tii lɔnyani kɔloongɔ Ngewɔ ma; tawao ta gbelelɔ Kaamɔɛi Yesu Kristi vulii bɛɛ ma na i ti wumawoni tawao ji a pielɔ ti jukulu fulo.

²Na hu gbi, yeemanɔhɔ luvei nasia ndɛɛ kaamɔisia ta pie Kristimabla gboto ta pookɔɔlɔ tawao ti wiehindei na a pielɔ nasia tii lani a Kristi ti njia nyamungaa le Ngowili Yekpei na ma.

³Jifa ndɛɛ kaamɔi jisia ti hanimaningɔ, ta ndɛisia lɔ guala wu wɛ kɔɔ ti gbatɛ wu hu. Ngewɔ i ti lɛɛnga wɔɔ kpɔɔ tawao i hugbatɛnga wɔɔ kpɔɔ ti waava. Ngewɔ ɛɛ yii tawao kpaalɛi na i ndeni yɛ a nda ti ma, hu ɛɛ nyani.

⁴Mu kɔɔlɔ kɛ Ngewɔ ii manuni malikei nasia ma ti jumbu hinda wieni; i ti wiliilɔ jahama, jɔwɔi gulangɔ ti ma ti heini kpindi hu ta Kpɛmbo Volei mawulo.

⁵ Mu kɔɔlɔ kɛ Ngewɔ ii manuni wɔɔwɔɔmablɛi nasia bɛɛ ma tii yɛ ngi gɔɔ, i njave waa yeilɔ ti ma i ti gbi waa; nasia lekee i ti bawoni tia mia a Noa kɛɛ numu weka wɔfila, Noa na i yɛ a pɔɔna welei na gɛ Ngewɔ longɔ nungaa ti jia la.

⁶ Mu kɔɔlɔ kɛ Ngewɔ i taa waawa fele, Sɔdɔm kɛɛ Gomɔra, lɛɛlɔ i ti mɔ kpae a ngɔmbui, i ti yɛ a tɔmaseli kɛva gbɔɔ i wama peima a nasia tii lani a ngie.

⁷ Mu kɔɔlɔ kɛ Ngewɔ i Lɔt bawoilɔ yeengɔmbui na hu; numu yekpe lɔ wɔɔ a ngie tawao folo gbi ngi lii i yɛ nyanilɔ waa tuva nyamui nasia va nungei nasia tɛɛ sawa hou ti yɛ pie.

⁸Numu yekpei na i yɛ heini ti lia lɔ, tawao folo gbi ngi lii i yɛlɔ a nyani waa ti hinda nyamui nasia va i yɛ hulɔ kɛɛ na i yɛ humɛni.

⁹Ji kpɛlɛɛ a kɛlɔ kɛ nasia ti langɔ a Kristi, Ndemɔi bɛɛngɔe a ti bawola ti hinda gbɔugbɔisia hu; kɛɛ a numu nyamuisia liima belɔ kpindi-wɛlei bu haaŋ Kpɛmbo Volei i hiti,

¹⁰kakayee nungei nasia puegbuala gɛwɛ hindei na a numu nɔhɔ Ngewɔ yaama gungɔ ti hu, ti lɛɛngɔ Ngewɔ lemayɛi hu. Ndɛɛ kaamɔi nasia ti yaama bengɔi tawao ti yongangɔ, tii baa gɔɔ malika gbayangɔi nasia ma ti ngelegoohu; kia taa baa gɔɔ ti ma, ta ti bɛlɛ lɔ nyani.

¹¹Malikeisia vulii bɛɛ, kia bɛɛ ti wɔlɔngɔ tawao ti gbayangɔ tewengɔ yeendɛɛ kaamɔi nasia ma, tɛɛ ti bɛlɛ nyani ji ta ti lɛɛ Ndemɔi gulɔ.

¹²Kɛɛ ndɛɛ kaamɔi jisia ti yɛngaa hinda gbi wiema tɛɛ gili, ti wiengɔe kia ndɔgbɔ huangɛisia ti na, ta ti le lekee ti houva ti ti waa; yeendɛɛ kaamɔɛi jisia ta baa gbualɔ hinda gbi ma tii yeembui gɔɔ. Ta ti waalɔ kia nungaa ta ndɔgbɔ huangɛisia waa la,

¹³tawao ti pawɛi a yɛ a kpaalɛ lɔ a la ti ma kpaalɛi na va ti ndanga nungaa ma. Ti liima hindei lɔ a hinda gbi weila foofo hu a ti luwui liilɛli; ti hinda mawufengɔe tawao mbɛlɛnyani le ji wua tieni wa loko hitɛ wu mɛhɛɛi hu, ti goohu nɛngɔ jifa ta wu wɛlɛ.

¹⁴Ti longɔ nyaha gbi ta tɔ tia tieni ti la; jumbu wie-manii ɛɛ gu a tie. Ta pielɔ nungei nasia ti layii a Kristi ii gbayani ti yaka ti wili jumbui hu. Hanimani lewengɔe ti hu tawao ti bɛɛngɔ waa le a na majɔɔla ti longɔ la. Ngewɔ i ti jondunga tawao ta jukululɔ huɛɛŋ.

¹⁵Ti gbuanga pelei yeepɔnɛi ma ti yakanga; ti na lɔ wieni tutui Belam, Biɔ hindoloi, i pieni. Belam lumɛilɔ jumbu wuliva aako i navoo majɔɔ.

¹⁶Kɛɛ ngi jakasi i ngi lahouilɔ yɛ aa kpowa hinda wie. Fuuhani na i yɛpɛilɔ kia nuuvu, i yia Belam ma ngi jumbui va.

¹⁷Ndɛɛ kaamɔi jisia ti wiengɔe kia njɛi na a bɛɛli, ɔɔ njagbili na viivii a lewe la; Ngewɔ i hinda gbatɛnga ti va kpindi yeenilinilii hu.

¹⁸Ta ndawo waawaangaa lɔ wie gbama ngeleya, ta kpowa yɛpɛngaa le, tawao kia tɛɛ sawa hou, ta lapilɔ pieva nasia ti tɔɔtonga a wounvela jumbui nasia ma ti heini ndia, ti gbɔma ti wokɔɔ ti luwui liilɛli hinda nyamuisia wiela hu kɛɛ puegbua gɛwɛ hindei.

¹⁹Yeendɛɛ kaamɔi jisia ta Lahei wumbulɔ tɛɛ ta pielɔ yeenungeisia ti gbua jumbui luwɔyɛi hu kɛɛ tia vulii nduwɔngaa lɔ a tie jumbui nasia bu ta numu yafei jukulu gbamaile hinda gbi lekee i wɛlɛni numu maahu, ngi luwɔ mia a yeenumui na.

²⁰Mu Lemɔi kɛɛ mu Bawomɔi Yesu Kristi gɔɔla i piengaa nungaa ti bawo jumbui nasia yeya ta numu yafei jukulu, na wooma yeejumbui nasia ti gbɔma wɛlɛ ti maahu, yeenungɛi nasia ti yɛyii a yɛ nyamuni kɛlɛmɛi i lewe tɔɔtomɛi ma.

²¹Aa fesalɔ polouŋ ti va ina tii yɛ pelei wɔɔni na gɔɔni Ngewɔ longɔ mu jia la, i lewe ji ma ti kɔɔngɔ ti wounvenga Ngewɔ jawei nasia ma ti kɛni a wue.

²²Na i ti wieni a kɛlɔ kɛ tɔnya lɔ a salei nasia ti ndeni tɛɛ, “Ngilɛi lɔ yamama gbɔma hani na gama i balini la” kɛɛ “Ndondɛi na ti nguanga fo, taa yamama gendebelema patɛi hu.”