Read Ngowili Yekpei Numu Kpɛlɛɛ Va 1 JƆN 2 Bible Online

1 JƆN 2 - Ngowili Yekpei Numu Kpɛlɛɛ Va bible

1 JƆN 2

¹Nya leengeisia, nyaa kɔlɛi ji nyɛima wu gama aako waa jumbu hinda wie; numu gbi i jumbu hinda wiengaa, pɔɔnamɔi Yesu Kristi lɔ mu yeya a Kɛkɛi manɛnɛ mu va.

²Tawao Kristi vulii lɔ i yɛni a sabu Ngewɔ i manuni mu jumbuisia ma, tawao mu jumbuisia lekee ii le, dunyablaa kpɛlɛɛ ti jumbuisia bɛɛ.

³Mu Ngewɔ jaweisia houngaa kɛ mu langa la kɛ mu ngi gɔɔlɔ.

⁴Numu i ndengaa yɛ, “Ngi ngi gɔɔlɔ,” kɛɛ ɛɛ ngi jaweisia hou, ndɛɛ gualamɔ mia a yeenumui na tawao tɔnyagbi ii ngi hu.

⁵Kɛɛ numu gbi lekee a Ngewɔ laayiɛi hou, ta lɔ ngi layii a Ngewɔ ndavengɔ. Ji lɔ a pie mu gu mu la la kɛ mua Ngewɔ-ni mu wilingɔe hu:

⁶numu gbi lekee a nde yɛ taa Ngewɔ ti wilingɔe hu, mahoungɔi i jia kia lɔɔ Yesu i jiani la.

⁷ Nya liima ndiamɔisia, sawa nina ii le ngaa yɛ nyɛima wu gama; sawa wovei na le wu majɔɔni i hiye tɔto-gbelei ma. Sawa wovei lɔ ngowili na le mu humɛnini.

⁸Na hu gbi, sawei ji ngi nyɛima wu gama ninangɔe, tawao numu a ngi lɔnyala gɔɔ Kristi luvayii lɔ ma kɛɛ wua bɛɛ wu ndɛi. Ajifa kpindi lɔ gbɔyɔma, tawao fofoi yeekpekpei lɔ na vooma.

⁹Numu gbi lekee a nde yɛ taa fofoi na hu kɛɛ ngi lolongɔ a ngi ndewei, kɛ taa kpindi hu kiahuna bɛɛ.

¹⁰Numu gbi lekee ngi longɔ a ngi ndewei kɛ taa fofoi hu, tawao kɛ hinda gbi ii ngi hu a pie numu weka i jumbu hinda wie.

¹¹Kɛɛ numu gbi lekee ngi lolongɔ a ngi ndewei, taa kpindi hu; a jia yeekpindii hu lɔ tawao ii kɔɔ mia i lima na ajifa kpindi i pumui wɛlɛnga ngi yaama.

¹²Nyaa kɔlɛi ji nyɛima wu gama, nya leengeisia, ajifa Ngewɔ i wu jumbuisia lufenga Kristi sabui hu.

¹³Nyaa kɔlɛi ji nyɛima wu gama, kɛkɛ-ni, ajifa wu numui na gɔɔngɔ i yɛ na wɔɔ i hiye hindei gbi lɔto-gbelei ma. Nyaa kɔlɛi ji nyɛima wu gama, kɔɔngɛisia, ajifa wu temaya majɔɔnga Seitana maahu.

¹⁴Nyaa kɔlɛi ji nyɛima wu gama, nya leengeisia, ajifa wu Kɛkɛi gɔɔngɔ. Nyaa kɔlɛi ji nyɛima wu gama, kɛkɛ-ni, ajifa wu numui na gɔɔngɔ i na wɔɔ gba i hiye hindei gbi lɔto-gbelei ma. Nyaa kɔlɛi ji nyɛima wu gama, kɔɔngɛisia, ajifa wu gbayangɔ; Ngewɔ laayiɛi lɔ wu hu fɔ tawao wu temaya majɔɔnga Seitana maahu.

¹⁵Waa wu lii wu dunyei yeehindei hu ɔɔ hanii gbi lekee i yeedunyei ji hu. Wu longaa a dunyei, kɛ ndoma ii wu lii hu Kɛkɛi va.

¹⁶Hanii gbi lekee i dunyei ji hu na jumbubleisia ti haamingɔ fa, na nungaa ta tɔ ti lo la kɛɛ hanii kpɛlɛɛ lekee i dunyei ji hu nungaa ta mata gbua la, yeengila bɛɛ ii gbuani Kɛkɛi gama, kpɛlɛɛ a gbɔku dunyei ji hu lɔ.

¹⁷Dunyei kɛɛ hanii gbi nungaa ti hamingɔ fa ti gbɔyɔmaa; kɛɛ numui na a Ngewɔ liima hindei wie a yɛlɔ na kunafɔ va.

¹⁸Nya leengeisia, hanii gbi ti gɛlɛmɛi i lukpenga kpla. Ti hugɛnga a wue kɛ Yesu juwui a walɔ; tawao kiahuna na Yesu juwu gboto ti wilanga bɛɛ a gbuala nga, faale mu kɔɔlɔ kɛ hanii gbi ti gɛlɛmɛi i lukpenga kpla.

¹⁹Nungɛi jisia tii yɛ vulii mu lia a ti lii, na vamia ti vayani mu ma; kiaa mua tieni yɛla ti yɛ lolɔ mu lia. Kɛɛ ti vayɛilɔ mu ma aako i gɛ leiŋ kɛ ti yilayee bɛɛ ii yɛ mu ma.

²⁰Kɛɛ wua, Kristi i Ngewɔ Yafei yeinga wu ma, famia wu gbi wu tɔnyɛi gɔɔngɔ.

²¹Nyaa kɔlɛi ji nyɛima wu gama ajifa tii yɛma wuii tɔnyɛi gɔɔ, kɛɛ jifa wu kɔɔngɔ, tawao gbɔma wu kɔɔngɔ kɛ ndɛɛ yiɛi ɛɛ gbua tɔnyɛi hu.

²²Ye lɔ na hɔɔ ndɛɛ gualamɔi le? Tamia a numui na a nde yɛ Yesu ii le aa yɛ a Ngewɔ Maha Heingɔi. Kristi juwui mia a yeenumui ji ngi gbelengɔe Kɛkɛi tia ngi Hindoloi veenjɔɔ kpɛlɛɛ ma.

²³Gbamaile numu gbi lekee a gbele Ngewɔ Hindoloi ma, i gbeeleni Kɛkɛi bɛɛ lɔ ma; numu gbi lekee a loko hei Kɛkɛi Hindoloi bu, i loko heinga Ngewɔ bɛɛ lɔ bu.

²⁴A tɔ vulii ngowili na wu majɔɔni tɔtomɛi i yɛ wu liisia hu. Na wu mɛnini tɔtomɛi ina wu ndama gbatɛilɔ wu liisia hu wa yɛlɔ ngoyila hu wua Ngewɔ Hindoloi-ni kɛɛ Kɛkɛi.

²⁵Tawao ji lɔ Kristi vulii i Lahei wumbuni feva mu wɛ kunafɔ lɛɛvui.

²⁶Nyaa kɔlɛi ji nyɛima wu gama kɔloongɔ nasia ma ti lapima wu yakava.

²⁷Kɛɛ wua, Kristi i ngi Yafei yeinga wu ma. Ina lekee ngi Yafei lɔ wu hu, wuii gbeweni numu gbi va wu gaava. Ajifa ngi Yafei lɔ a wu gaa kɔlooni hinda gbi ma, tawao na a wu gaa la tɔnya le, ndɛɛ ii le. A golo hɔɔ Ngewɔ Yafei gaai bu, wu yɛ Kristi hu.

²⁸Hii i na, nya leengeisia, a yɛ ngi hu, aako ndiilo waa i yɛ mu wɛ ji a gbuanga, maa lɔwu ngi ma a ngufe folei na ma a wa.

²⁹Wu kɔɔlɔ kɛ Kristi wɔnangɔe; mahoungɔe hɔɔ wu kɔɔ kɛ numui na lekee a pɔɔna hindei wie Ngewɔ loi mia a ngie.