Read Ngowili Yekpei Numu Kpɛlɛɛ Va 1 JƆN 3 Bible Online

1 JƆN 3 - Ngowili Yekpei Numu Kpɛlɛɛ Va bible

1 JƆN 3

¹ A ndomɛi na lɔ lɛɛ Ngewɔ piengɔ a mue! Ngi lomɛi wɔlɔngɔ waa le na hii ta mu loli a Ngewɔ leengeisia, tawao a tɔnya hii mu na. Sabui na va dunyei ii mu gɔɔ, tamia a ji ii yaa Ngewɔ gɔɔni.

²Nya liima ndiamɔisia, Ngewɔ leengeisia lɔ naa a mue, kɛɛ ii yaa gɛni lɛ leiŋ mu wama yɛma a gbɔɔ. Kɛɛ ma kɔɔlɔ kɛ watii na Kristi a gbuanga ma gbualɔ a ngie, ajifa ma ngi lɔlɔ kia i na vulii.

³Numu gbi lekee a liilo hii Kristi ma, a ta yekpe yɛlɔ sɛwɛ kia Kristi sɛwɛsɛwɛngɔ.

⁴Numu gbi lekee i jumbu hinda wiengaa, kɛ ngi lɛɛ le Ngewɔ jawei nyaniva; ajifa sawei nyanila lɔ jumbui le.

⁵ Wu kɔɔlɔ kɛ Kristi i wailɔ dunyei hu aako i nuuvuisia ti jumbuisia gbua ti ma, tawao ta vulii jumbu gbi ii ngi ma.

⁶Faale numu gbi lekee i Kristi hu ɛɛ nɔɔ jumbu hinda wiela ma; kɛɛ numu gbi lekee a nɔɔ jumbu hinda wiela ma ii yaa Kristi lɔni tawao ii ngi gɔɔ.

⁷Numu gbi aa wu wɛlɛ, nya leengeisia! Numu gbi lekee a pɔɔna hindei wie, pɔɔnamɔ lɔ a ngie, kia lɔɔ Kristi wɔnangɔ la.

⁸Numu gbi lekee ngi nɔɔngɔ jumbu hinda wiela ma, Seitana wolɔ a ngie, ajifa Seitana i jumbu hinda wienga wɔɔ kpɔɔ i hiye hanii gbi ti lɔto-gbelei ma. Ngewɔ Hindoloi i wani sabui ji vulii lɔ va, aako i Seitana yenge lokoisia hunyani.

⁹Numu gbi lekee Ngewɔ loo a ngie ɛɛ nɔɔ jumbu hinda wiela ma, ajifa Ngewɔ yɛyii vulii lɔ ngi hu, tawao gbɔma jifa Ngewɔ lɔ ngi Kɛkɛ le, ɛɛ nɔɔ jumbu wiela ma.

¹⁰Nduahugɛ lokeloke gbe Ngewɔ leengeisia luahu kɛɛ Seitana ndɛisia: numu gbi lekee ɛɛ pɔɔna hinda wie ɔɔ ii loni a ngi ndewei, Ngewɔ loo yaa a ngie.

¹¹ Ji lɔ ngowili le wu mɛnini i hiye tɔto-gbelei ma kɛ mahoungɔe mu lo a mu nyɔunyɔ,

¹² maa wie kia Ken i yɛ na wɔɔ, Seitana woo a ngie, i ngi gbɔugbɔu ndewei waa. Tawao gbɛva lɔ i ngi waani? Ajifa ngi wiehindeisia ti nyamungɔ yɛla, kɛɛ ngi ndewei wiehindeisia ti wɔnangɔ.

¹³Faale aa guala wu ma, nya mbaa Kristimableisia, ina dunyei i loleilɔ a wue.

¹⁴Mu kɔɔlɔ kɛ mu gbuanga hee hu mu wilinga ndɛvuihu, ajifa mu longɔ a mu ndeengɛisia. Numu gbi lekee ndoma ii ngi lii hu i haa hu lɔ lɛ.

¹⁵Numu gbi lekee ngi lolongɔ a ngi ndewei, numu waamɔ lɔ a ngie; tawao wu kɔɔlɔ kɛ kunafɔ lɛɛvui ii numu waamɔ hu.

¹⁶Hii ma kɔɔ gbɔɔ ndomɛi le: ji Kristi i ngi lɛɛvui veni mu va. Mahoungɔe mua bɛɛ mu mu lɛɛvuisia ve mu ndeengɛisia va!

¹⁷Numu gbatɛngɔ yɛngaa la, i ngi ndewei lɔ hinda gbɔungɔ ngi laa, i liilo i yeendewei na goma, a yee gu i nde yɛ ndoma lɔ ngi lii hu Ngewɔ va?

¹⁸Nya leengeisia, mu lomɛi aa yɛ a lahu layia gbama lekee kɛɛ njɛpɛ, mahoungɔ i yɛ a ndomɛi yeetɔnyangɔi na a ta yekpe gɛ mu wiehindei hu.

¹⁹Hii ma kɔɔ kɛ tɔnyɛi gungɔe mu hu, hii mu liisia ti gbangɔ a yɛla Ngewɔ gɔɔbu.

²⁰Mu lii i mu lɛɛngaa, mu kɔɔ kɛ Ngewɔ i leweni mu lii ma, tawao kɛ i hindei gbi hugɔɔlɔ.

²¹Faale, nya liima ndiamɔisia, mu lii ii mu lɛɛlɔ, ma ndiigba majɔɔlɔ Ngewɔ gɔɔbu.

²²Na gbi lekee ma fɛli ngi ma, ma majɔɔlɔ, ajifa ma ngi jaweisia hou, ma na wie a nɛɛ ngi wɛ.

²³ Ngi jawei lɔ a ji: yɛ mu la a ngi Hindoloi Yesu Kristi biyɛi, tawao mu lo a mu nyɔunyɔ, kia lɔɔ Kristi i feni mu wɛ a sawa.

²⁴Numu gbi lekee a Ngewɔ jaweisia hou, i Ngewɔ hu lɔ, tawao Ngewɔ i ngi hu. Tawao hii ma kɔɔ kɛ Ngewɔ lɔ mu hu: ma kɔɔlɔ ngi Yafei na va i fenga mu wɛ.