Read Ngowili Yekpei Numu Kpɛlɛɛ Va 1 JƆN 4 Bible Online

1 JƆN 4 - Ngowili Yekpei Numu Kpɛlɛɛ Va bible

1 JƆN 4

¹Nya liima ndiamɔisia, waa la a numui kpɛlɛɛ ta nde tɛɛ Ngewɔ Yafei lɔ ti hu, kɛɛ a ti jɔgbɛ tɔva ina ngafei na i ti hu i gbuani Ngewɔ gama lɔ. Ajifa ndɛɛ Yewɔ lutu gboto ti vayanga hu gbi.

²Hii wa gu a kɔɔla ina Ngewɔ Yafei mia: numu gbi lekee a nde gbalauŋ yɛ Yesu Kristi i wailɔ dunyei hu nuuvuya hu, kɛ ngafei na i ngi hu i gbuani Ngewɔ gama lɔ.

³Kɛɛ numu gbi lekee a ji hou a mawali Yesu va, ngafei na i ngi hu ii gbuani Ngewɔ gama. Ngi nda yafei i gbuani Yesu Juwui gama lɔ; wu mɛniilɔ kɛ a walɔ, tawao taa na bɛɛ mbei dunyei hu.

⁴Kɛɛ Ngewɔ woo lɔ a wue, nya leengeisia, tawao wu temaya majɔnga ndɛɛ lutuisia maahu; ajifa Ngafei na i wu hu i gbayani i lewe ngafei na ma i nasia hu dunyei woo a tie.

⁵Ta dunyama hindeisia yeenjɛpɛi lɔ hugɛ tawao dunyamablaa ta wololɔ ti ma ajifa dunyei woo lɔ a tie.

⁶Kɛɛ mua, Ngewɔ woo lɔ a mue. Numu gbi lekee i Ngewɔ gɔɔngɔ a wololɔ mu ma; numu gbi lekee Ngewɔ woo yaa a ngie ɛɛ wolo mu ma. Hii ma gu a kɔɔla kia tɔnya Yafei i yee yɛni gba ndɛɛ yafei ma.

⁷Nya liima ndiamɔisia, a mu lo a mu nyɔunyɔ ajifa ndomɛi a gbua Ngewɔ gama lɔ. Numu gbi lekee ndoma i ngi lii hu i yɛni a Ngewɔ loo lɔ tawao kɛ i Ngewɔ gɔɔlɔ.

⁸Numu gbi lekee ndoma ii ngi lii hu ii Ngewɔ gɔɔ ajifa ndoma lɔ kungɔ Ngewɔ hu.

⁹Hii Ngewɔ i ndomɛi na gɛni i piengɔ a mue, i ngi Hindolo yakpei yoyeilɔ dunyei hu aako mu ndɛvu majɔɔ ngi sabui hu.

¹⁰Ji lɔ ndoma le; ii wieni bɛɛ mua lɔ mu longa a Ngewɔ, ta lɔ i loni a mue, i ngi Hindoloi yoyo yɛva a sabu mu manuma majɔɔ mu jumbuisia va.

¹¹Nya liima ndiamɔisia, ina Ngewɔ i loilɔ a mue hii, kɛ mahoungɔ mu lo a mu nyɔunyɔ.

¹² Numu gbi ii yaa wɔɔ gba a Ngewɔ lɔni; ina mu loilɔ a mu nyɔunyɔ, Ngewɔ a yɛlɔ mu hu kɛ ngi lomɛi laa i venga mu hu.

¹³Ji lɔ a pie mu la la kɛ mu Ngewɔ hu lɔ, ta bɛɛ i mu hu ajifa i ngi Yafei venga mu wɛ.

¹⁴Tawao mu tɔnga, mu konanga nungaa wekɛisia ma kɛ Kɛkɛi i ngi Hindoloi yoyeilɔ yɛva a dunyabawomɔi.

¹⁵Numu gbi lekee a nde leiŋ yɛ Yesu i yɛni a Ngewɔ Hindoloi lɔ, kɛ Ngewɔ lɔ ngi hu, ta bɛɛ i Ngewɔ hu.

¹⁶Tawao mua vulii mu kɔɔlɔ tawao mu langɔ a ndomɛi na Ngewɔ piengɔ a mue. Ndoma lɔ kungɔ Ngewɔ hu tawao numu gbi lekee ndoma i ngi lii hu i Ngewɔ hu lɔ, Ngewɔ i ngi hu.

¹⁷Ndomɛi ji laavengɔe mu hu aako mu ndiigba majɔɔ Kpɛmbo Volei ma; tawao ma yeendiigbɛi majɔlɔ ajifa mu jiayii dunyei ji hu tia Yesu ndɛi ti yakpe.

¹⁸Nduwa gbi ii ndoma hu; ndomɛi yeendavengɔi a nduwɛi gbi gbɛlɔ. Faale naa, numui na a luwa, ndomɛi laavengɔ ii le ngi hu, a luwalɔ ajifa i kɔɔlɔ kɛ kpalɛ a lalɔ ngi ma.

¹⁹Ndoma a yɛlɔ mu lii hu ajifa Ngewɔ yese i loni a mue.

²⁰Numu i ndengaa yɛ, “Nya longɔe a Ngewɔ,” kɛɛ ngi lolongɔ a ngi ndewei, ndɛɛ gualamɔ lɔ a ngie. Ajifa ɛɛ gu i lo a Ngewɔ na ii yaa tɔni, ina ii loni a ngi ndewei, na i tɔnga.

²¹Ji lɔ hɔɔ sawei le Kristi feni mu wɛ, kɛ numui na ngi longɔ a Ngewɔ kpa le ngi ma lova a ngi ndewei bɛɛ.