Read Ngowili Yekpei Numu Kpɛlɛɛ Va 1 JƆN 5 Bible Online

1 JƆN 5 - Ngowili Yekpei Numu Kpɛlɛɛ Va bible

1 JƆN 5

¹Numu gbi lekee ngi langɔ la kɛ Yesu lɔ Ngewɔ Maha Heingɔi le, i yɛni a Ngewɔ loo lɔ, tawao numu gbi lekee ngi longɔ a ndoo le kɛi a lolɔ a ndoi.

²Ji lɔ a pie mu kɔɔ kɛ mu longɔe a Ngewɔ leengeisia, ji ma lo a Ngewɔ, mu ngi jaweisia hou.

³ Ajifa mu lola a Ngewɔ a ji lɔ ma ngi jaweisia hou. Tawao ngi jaweisia tii kpaukpauni waa mu va ti houva.

⁴Gbamaile Ngewɔ loo gbi a gulɔ i temaya majɔɔ dunyei maahu; tawao pelei na ma temayɛi majɔɔ la dunyei maahu tamia a mu lalei a Ngewɔ.

⁵Ye lɔ a gu i temaya majɔɔ dunyei maahu? Numui na lekee ngi langɔ la kɛ Ngewɔ Hindoloi mia a Yesu.

⁶Yesu Kristi lɔ numui na le i wani; ji i wani ti ngi wuailɔ a Ngewɔ yɛi tawao ji i haani ngi ŋamɛi wuilɔ. Ii wani a njɛi lekee, i wailɔ a njɛi kɛɛ ŋamɛi. Tawao Ngewɔ Yafei vulii lɔ selima kɛ tɔnya lɔ a ji, jifa tɔnyɛi lɔ kungɔ Ngewɔ Yafei hu.

⁷Seli sawangaa mia ti na:

⁸Ngewɔ Yafei, njɛi kɛɛ ŋamɛi; tawao ti jaangɔɔ kpɛlɛɛ ti woo i yila.

⁹Wu langɔe a seli na nuuvungaa ta nguaa, kɛɛ seli na Ngewɔ a nguaa i gbayani na ma polouŋ, tawao seli ji lɔ Ngewɔ i nguanga kɔlooni ngi Hindoloi ma.

¹⁰Faale numu gbi lekee ngi langɔ a Ngewɔ Hindoloi, seli ji lɔ ngi lii hu; kɛɛ numu gbi lekee ii lani a Ngewɔ, i Ngewɔ wotenga a ndɛɛ gualamɔ, ajifa ii yaa lani a na Ngewɔ i ndenga ji i seli wuaanga kɔlooni ngi Hindoloi ma.

¹¹ Seli wuaangɔi a ji lɔ kɛ Ngewɔ i kunafɔ lɛɛvui venga mu wɛ, tawao yeendɛvui ji i ngi Hindoloi lɔ hu.

¹²Numu gbi lekee taa Ngewɔ Hindoloi ti wilingɔ hu, ndɛvui ji lɔ ngi hu; numu gbi lekee taa Ngewɔ Hindoloi ti wilingɔ ii le hu, ndɛvu ii ngi hu.

¹³Wua wu langɔ a Ngewɔ Hindoloi biyɛi, wua lɔ ngi kɔlɛi ji nyɛima wu gama aako wu kɔ kɛ wu kunafɔ lɛɛvui majɔnga.

¹⁴Ndiigba lɔ mu wɛ Ngewɔ gɔɔbu ajifa mu langɔe la vulii kɛ a mu woo mɛnilɔ ji ma ngi vɛli a hani gbi a nɛɛ ngi wɛ.

¹⁵A mu woo mɛnilɔ watii gbi lekee ma ngi vɛli; kia mu kɔɔngɔ kɛ tɔnya lɔ a ji, mu kɔɔlɔ gbɔma kɛ a na velɔ mu wɛ ma ngi vɛli fa.

¹⁶Numu gbi i ngi ndewei lɔnga a jumbu hindei na wie ɛɛ wa a hee ngi maahu, mahoungɔ i hɛɛ Ngewɔ ma, a ndɛvui velɔ ngi wɛ. Ngi ji lema nungei nasia lɔ va ti jumbui ɛɛ wa a hee ti maahu. Kɛɛ jumbui lɔ na a wa a hee tawao ngii yɛma wu Ngewɔ vɛli yeejumbui ta ngi va.

¹⁷Hinda nyamu gbi wiela jumbu le, kɛɛ jumbui lɔ na ɛɛ wa a hee numu maahu.

¹⁸Mu kɔɔlɔ kɛ Ngewɔ loo gbi ii na aa nɔɔ jumbu wiela ma jifa Ngewɔ Hindoloi a ngi mahugbe tawao Seitana ɛɛ gu aa hinda nyamu wie a ngie.

¹⁹Mu kɔlɔ kɛ Ngewɔ woo lɔ a mue kia bɛɛ dunyei gbi i Seitana gbayei bu.

²⁰Mu kɔɔlɔ kɛ Ngewɔ Hindoloi i wanga, tawao i mu gɔnga a nɛmahulewe, na hii mu tɔnya Yewɔɛi gɔnga. Mu lɛɛvuisia ti tɔnya Yewɔɛi hu lɔ ngi Hindoloi Yesu Kristi hu. Tɔnya Yewɔɛi lɔ a ji, tawao kunafɔ lɛɛvu lɔ a ji.

²¹Nya leengeisia, a wua yekpe maguha a ndɛɛ yewɔɛisia.