Read Ngowili Yekpei Numu Kpɛlɛɛ Va 3 JƆN 1 Bible Online

3 JƆN 1 - Ngowili Yekpei Numu Kpɛlɛɛ Va bible

3 JƆN 1

¹ Nya Kpakolei a nge, nya mia ngi kɔlɛi ji nyɛima nya liimamɔi Gayɔs gama na nya longɔ la vulii a tɔnya.

²Nya liima ndiamɔi, nyaa Ngewɔ vɛlima aako hindei gbi hu i gbatɛ bi gama, tawao bi yɛ kaahugbua hu, kia ngi kɔɔngɔ bi yafei gaahu gbuangɔ la.

³Nya goohu i nɛɛilɔ waa ji mu ndeengɛisia lɛɛngaa ti wani mbei ti hugɛ tɛɛ bi hɛlɛngɔ waa le a tɔnyɛi, kia lɔɔ tɔnyɛi gungɔ bi hu watii gbi.

⁴Hinda gbi ɛɛ nya goohu nɛɛ aa lewe ji nga mɛni tɛɛ nya leengeisia ti hɛlɛngɔe a tɔnyɛi.

⁵Nya liima ndiamɔi, na mahoungɔ bi pie tamia bi piema ji ba ngenge gbi wie mu ndeengɛisia wɛ, ti yɛ bɛɛ a hotangaa.

⁶Ti bi lomɛi hugɛnga a Kristimablei nasia ti mbei. Kɔnɛɛ gbɔ ti ma ti jiei hu a pelei na a nɛɛ la Ngewɔ wɛ.

⁷Ajifa ta ti jiei wumbulɔ Kristi yengei wieva tɛɛ loko hei hani gbi bu nasia tii lani a Ngewɔ ta fe.

⁸Mahoungɔe hɔɔ, mua Kristimableisia a mue, mu gbɔ ti ma aako mu gbɛɛ ti ma ngengei na hu ti piema tɔnyɛi va.

⁹Ngi kɔlɔ gutu nyɛilɔ Sɔsiibleisia gama, kɛɛ Dayotɛfis na ndongɔ a tokulɔyei, ɛɛ woolo kulo bɛɛ na ma nga nde.

¹⁰Ngi wangaa, yeewatii na mia nga ngi wiehindei kpɛlɛɛ wu ngitiya; njɛpɛ maluwangɔi nasia a nde mu va kɛɛ ndɛi nasia a kuala! Kɛɛ na lekee ii guni a ngie; ɛɛ loko hei mu ndeengɛisia bu ji ta wa, tawao a nasia mabalilɔ ti longɔ a yɛla ti loko hei ti bu, a lapi yɛ i ti gbɛ sɔsii hu.

¹¹Nya liima ndiamɔi, baa hinda nyamu wokɔɔ, kɛɛ na wokɔɔ kpekpengɔ. Numu gbi lekee a kpekpe wie Ngewɔ woo lɔ a ngie. Numu gbi lekee a na wie nyamungɔ, ii yaa Ngewɔ lɔni.

¹²Numui kpɛlɛɛ lɔ Dɛmitɔs yɛpɛ yekpe lema; tawao tɔnyɛi vui bɛɛ lɔ ngi jeli wua ma. Mua seli wuaama i gbɛɛ ti ndɛisia ma, tawao bi kɔɔlɔ kɛ na ma nde tɔnya le.

¹³Hinda gboto lɔ na ndeva bi ma kɔlɛi ji hu kɛɛ maa ii houni ngi nyɛi kɔlɔ hu;

¹⁴nya lii lɔ bi lɔla ma hugutungɔ tawao ma gulɔ mu hei yaama mu yɛpɛ.

¹⁵Ndiilɛli i yɛ bi ma. Bi ndiamɔisia gbi ta va bi ma. Va mu ndiamɔisia kpɛlɛɛ ma a ngila-ngila.