Read Ngowili Yekpei Numu Kpɛlɛɛ Va HINDEI MAGƐNI A JƆN 11 Bible Online

HINDEI MAGƐNI A JƆN 11 - Ngowili Yekpei Numu Kpɛlɛɛ Va bible

HINDEI MAGƐNI A JƆN 11

¹ Kɛ ti haka huma wului venga nya wɛ, kpuangɔ a tikpɔi, tɛ nya ma, “Hiye bi li bi Ngewɔ wɛlei huma kɛɛ yeesaagbuamɛi, tawao bi nasia bɛɛ gbawa ta hɛɛ na.

² Kɛɛ baa yeekata yitisia yahuma ajifa na mia na vengɔ kafilisia wɛ ti yɛma looni kayema laawai maahu ngawu nuu fele gbɔyɔngɔ mahu fele va.

³Nga nya lutu felengaa loolɔ ngɔwoma gulɛi ti ma, tawao ta kulɔma yia lelɔ folo tauji yila njii hɔndɔ fele njii nuu sawa gbɔyɔngɔ.”

⁴Yeetutu felei jisia mia ɔlivi wului feleisia a tie kɛɛ lambo vɛ feleisia ti looni Ndemɔi gulɔ na ngi womia a dunyei.

⁵Numu gbi a lapi kɔɔ i tɔɔya la ti ma, ngɔmbui a gbualɔ ti laa i ti juwuisia nyani; tawao a ji hu we mia numu gbi a lapi ti gbalɛ va ngi da hee a ngi male.

⁶ Kpaya vengɔe gbɔma ti wɛ ngelei gbɔwu va ma aako nja gbi aa wua watii na goohu ta yɛ kulɔma yia le ma. Kpaya lɔ ti yeya njeisia woteva a ŋamɛi kɛɛ fitini yeelasii gboto yeiva pɛpɛɛ dunyei hu kia a nɛɛla ti wɛ.

⁷Ji ta kpɔyɔ a Ngewɔ yie le la, huɛi na a gbua ndɔu yeendowa susuihu a ndapi wɛlɛlɔ ti ma, i ti gbua i ti waa.

⁸ Ti womɛisia ta lolɔ laani tiitiwai ma taawai goohu, mia ta na loli sale hu a Sɔdɔm ɔɔ Ijipt, mia nungeisia ti ti Lemɔi gbakpai na.

⁹Njii sawa kɛɛ yeekutu va, nungɛisia, kɛɛ kɛnyɛisia, kɛɛ layiesia, kɛɛ ndɔleisia ta yeepomɛisia lɔlɔ, tawao ta gangalɔ a yeepoomɛisia gbɔwula.

¹⁰Koohunɛ a dunyableisia houlɔ jisia feleisia ti haalɛi maahu. Ta komɛ gulalɔ ta ti nyɔunyɔ jamba a hakeisia, gbamaile kulɔma yialeblaa felei nasia ti yɛ tɔɔya gboto lɔ lani nungeisia ma ti dunyei hu.

¹¹Kɛɛ njii sawa lewengɔ woma kɛɛ yeekutu, Ngewɔ i ndɛvu vɛfɛi wuailɔ ti hu ti hiye ti loo; nasia kpɛlɛɛ ti ti lɔni nduwɛi yeehulewengɔ wa ti houilɔ.

¹²Kɛ tutu feleisia ti ngoo lakpawa mɛninga a gbua ngelegoohu yɛ ti ma, “A lɛ mbeindo!” Ti juwuisia ti loilɔ ti gbema lugbui i ti magboli kɛ ti lɛnga ngelegoohu.

¹³Ngaama dunyei gbɛlilɔ jiwijiwi kɛ taawai yeekaka yila wolonga gbo kaka puu goohu, numu tauji wɔfla ti haa ndɔlei va i gbɛlini. Nduwa hulewengɔ wa i nungeisia houilɔ ti lɛɛvui gbuani hu, tawao ti ngɔlɔya waa veilɔ Ngewɔ wɛ na ngelegoohu.

¹⁴Masube yeefelei i lewenga; kɛɛ kpelɛ na! Yeesawei lɔ pelei hu wama hugutungɔ.

¹⁵Nawooma malikei yeewɔflei i ngi bulii vɛilɔ kɛ sɔlɛ gboto wa i wungahu ngelegoohu, ta nde tɛ, “Kpaya vengɔi na mu Lemɔi wɛ kɛɛ ngi Maha Hengɔi yɛva dunyei maahu, tawao a yɛlɔ maahu kunafɔ taa ngi nda kunafɔ.”

¹⁶Kɛ kpakolo nuu gbɔyɔngɔ mahu naanisia ti heini ti heimisia Ngewɔ gulɔ ti vombonga ndɔmɛi ta Ngewɔ vɛli,

¹⁷tɛ: “Ndemɔi Wai, mu siɛgbua bi ma, bia bi na haa kɛɛ bi na wɔɔ gbaa, bi gbaya wai wumbuva ba ngayenge!

¹⁸Nungɛi nasia tii lani a bie ti liilewengɔi; gbamaile watii hitinga ma bi liilewei gɛva a tie, kɛɛ haableisia ti gbɛmbova. Watii hitinga ma bi yengebleisia pawa va, bi lutuisia, kɛɛ bi nungeisia kpɛlɛɛ, nasia gbi ta luwa bi ma, i nuwaa hu ɔɔ nuwulo. Watii hitinga ma nasia nyani va ta dunyei nyani!”

¹⁹ Ngewɔ wɛlei na ngelegoohu i lawoilɔ, kɛ ngi hinda yangilingɔ gaŋaa lɔnga i heini yeepɛleibu. Maimai teweilɔ hu, ngelei i baahugbua a yia, dunyei a gbɛli jiwijiwi, kɛ hakɔi wunga hulewengɔ gboŋ.