Read Ngowili Yekpei Numu Kpɛlɛɛ Va HINDEI MAGƐNI A JƆN 12 Bible Online

HINDEI MAGƐNI A JƆN 12 - Ngowili Yekpei Numu Kpɛlɛɛ Va bible

HINDEI MAGƐNI A JƆN 12

¹Nawooma kɛ kanako wa i gɛnga ngeleima. Nyahɛi yɛlɔ na, foloi yilingɔ ngi ma a kulei, ngi gɔwɔisia ti looni ngawui maahu maha bɔlei ngi wumba tumbeka puu mahu fele wɛpɛngɔ ma.

²Ngi lole gbeli magutungɔ yɛla, tawao ndole goohu gbalei kɛɛ yeendimɔnɛi ngi houngɔ yɛla a yele gula.

³ Kanako weka gbɔma gɛilɔ ngeleima. Ndamba gali wai yɛlɔ na nguisia ti wɔfla ngi ma maha bɔleisia ti wɛpɛɛngɔ maahu kɛɛ ngi wumba lowoisia ti puu.

⁴I ngi wolii wumbuilɔ a ngi botima we i tumbekeisia kaka sawa kpɛlɛɛ kɛ i yeekaka yila ngombonga la ngeleima i pili vaa dunyei hu. Kɛ i gbekpanga nyapoi gula na ndo lemɛi yɛ ngi ma, aako ndoi lengɔ lekee kɛ i mɛnga ngi yeya.

⁵ Nyapoi i hindolo leilɔ, na a yɛ mahayahu kɔɔli likpɔi houni ngi yeya i looni ndɔleisia kpɛlɛɛ maahu. Kɛɛ Ngewɔ i pielɔ yeendoi i gbua pu i lɛ yakpe ngi gama mia ngi maha heimi.

⁶Kɛ nyapoi i wilanga a lewela a piimɛ i li ndɔgbɔ lambɛi ma, mia hinda yɛ na Ngewɔ i na gbatɛnga ngi va yɛva na ta ngi mahugbe folo tauji yila, njii hɔndɔ fele, njii nuu sawa gbɔyɔngɔ va.

⁷Nawooma koe laleweilɔ ngelegoohu. Maikɛl taa ngi Malikeisia ti ndapi wɛlɛlɔ ndamba ngali wai ma, kɛ ta bɛɛ taa ngi da malikeisia ti hiyenga ti gɔ a tie;

⁸kɛɛ koe i ndamba ngali wai gbuɛilɔ ti baa gbɛlɛɛŋ a heimi na i yɛ ti yeya ngelegoohu.

⁹ Ti ndamba gali wai gbuɛilɔ ti pili pɔ mbui — kali wova wai ta toli a Ngafei ɔɔ Seitana, na i dunyei kpɛlɛɛ wɛlɛnga. Ti pililɔ vaa dunyei hu, taa ngi malikeisia kpɛlɛɛ.

¹⁰Kɛ ngi ngoo lakpawa mɛninga a nde ngelegoohu yɛ, “Kiahuna mia Ngewɔ mbawoyei i hitia ma! Kiahuna mia Ngewɔ i ngi gbayei gɛma a mahayɛi hu we! Kiahuna mia ngi Maha Heingɔ i ngi mahayɛi gɛma! Gbamaile Seitana na a nyamu loo mu ndewengeisia ma, a nyamu loo ti ma a folo kɛɛ kpindi Ngewɔ gulɔ, ti kpuanga ti pilinga mbui.

¹¹Mu ndewengeisia ti temaya mɛnga ngi maahu a Mbalaloi Ŋamɛi ngi lɔɔmɛi hu we kɛɛ a tɔnyɛi woma we ti guni ti kpuani ngitiya; tawao ti lumailɔ ti ti lɛɛvuisia la ti haa.

¹²Faale a goohunɛɛ wua kpɛlɛɛ wu ngelegoohu tawao heima i na wu yeya! Kɛɛ a nyamui kpa dunyableisia va kɛɛ gboyei! Gbamaile Seitana i yeinga mia wu maahu, tawao ndiilewei ngi lavengɔe kpauŋ, ajifa i kɔɔlɔ kɛ ngi watii hugutungɔi i longa.”

¹³Ji ndamba gali wai i liiheima kɛ ti ngi wilinga pɔ dunyei hu, i teweilɔ hu a piimɛ i too nyapoi woma na yɛ ndo lenga a hindoloi.

¹⁴Nyapoi i kowɛi yeekpaki waawaa felengaa majɔɛilɔ ti vɔwa ngi ma ta gu ti pie i ngowo i li ngi yɛmɛi ndɔgbɔ lambɛi ma, miando a yɛ na ta ngi mahugbe foo sawa kɛɛ yeekutu va, ngi mabawongɔ seitana labai yeya.

¹⁵Seitana i gbeilɔ palii waa ma a ngi laahu we i ndajia nyapoi woma aako fumbui i li a nyapoi i lo hu.

¹⁶Kɛɛ ndɔlei i kpɔma yelɔ nyapoi ma a lawola njei kpɛlɛɛ i fɔfuɛɛŋ na gbuani ndamba gali laa.

¹⁷Kɛ ndamba gali wai liilewenga gboŋ nyapoi ma, i gindɛ i li koe wɛlɛva ngi goohu leengeisia kpɛlɛɛ ma ti longa, nasia kpɛlɛɛ ta Ngewɔ jaweisia hou tawao liiloma ti yeya tɔnyɛi ma Yesu i magɛni.

¹⁸Kɛ i ya i loo gboya ŋanyakpaama.