Read Ngowili Yekpei Numu Kpɛlɛɛ Va HINDEI MAGƐNI A JƆN 13 Bible Online

HINDEI MAGƐNI A JƆN 13 - Ngowili Yekpei Numu Kpɛlɛɛ Va bible

HINDEI MAGƐNI A JƆN 13

¹ Kɛ ngi fula hua yila lɔnga a gbua gboyei hu, Ndowoisia ti ngi ma puu kɛɛ ngi wui i wɔfla, a bɔlei pɛlɛngɔ yeendowoi yeengila gbi lee maahu, bagbuama biyeisia nyɛingɔ yeenguisia yeengila gbi lee ma.

²Ngi huɛi lɔilɔ kpuangɔ a kɔli, ngi gɔwɔisia ti wiengɔ kia fula huɛi yeendakpa waa na ta toli a biaa, kɛɛ ngi laa gamɛi kia njalɛi laa gamɛi na. Ndamba gali wai i ngi gbayei taa ngi mahayɛi kɛɛ temayei kpɛlɛɛ veilɔ yeehuɛi ji wɛ.

³Yeehuɛi ji ngi wui yeengila maahu wiengɔ yɛla bɛ ti na ŋɔnangɔ lɔ na bawonga. Ji i dunyableisia kpɛlɛɛ gɔwɔ gbɛlilɔ kɛ ti hiyenga ti to fula huɛi woma.

⁴Nunga kpɛlɛɛ ti liilɔ ti gula Ndamba gali wai gɔɔbu ta ngi vɛli jifa i ngi gbayei wumbuni i feni huɛi wɛ. Ti gulailɔ fula huɛi bɛɛ gɔɔbu ta ngi vɛli tɛ, “Yelɔ kpaya ngi wɛ kia fula huɛi na? Yemia pɛiŋ a gu i ndapi loo ngi gulɔ?”

⁵Nawooma fula huɛi i kpaya jɔɛilɔ njia nyamunga leva hulewengɔ gboŋ tawao ti lumɛilɔ i kpaya yayenge ngawu nuu-fele gbɔyɔngɔ mahu fele va.

⁶I lagbuailɔ i Ngewɔ yɛli, i ngi heimi yɛli i kpɛli nasia kpɛlɛɛ ma ti ngelegoohu.

⁷I kpaya majɔɛilɔ koe wɛlɛva Ngewɔ mableisa ma i ti gbua. Tawao i mahaya jɔɛilɔ ndɔleisia gbi maahu, kɛnyɛbleisia maahu, nungeisia maahu, layiesia mahu, kɛɛ kɛnyɛi gbi lekee.

⁸ Dunyableisia kpɛlɛɛ ti ngeebu ta ngi vɛlilɔ, nasia kpɛlɛɛ ti biyɛi nyɛingɔ ii le ndɛvu gɔlɛi hu i Mbalaloi yeya na wɔɔ ti paani a dunyei ngi gbatɛ gbeli.

⁹“Faale, numu na ngoli ngi ma njia mɛniva, i woolo!

¹⁰ Numu gbi lee kungɔ ti bii hou, na-o-na i wie ta bi houlɔ; numui kungɔ bi haa bowei ya, na-o-na i wie ba haangalɔ. Ji yeembui mia a gula hinda gbɔugbɔu bu taa lanaya yekpe ma Ngewɔ mableisia hu.”

¹¹Nawooma ngi fula huɛi yeefeleyei lɔilɔ a gbua ndɔu. Ngi wumba lowoi yɛ fele kia mbala lɔgbɛi wumba lowoisia na, tawao ngi yia woi gbuangɔ yɛla a ndamba gali wai.

¹²I haala huɛi gbayei houilɔ i yengela ngi yaama. I gbɔndailɔ dunyableisia kpɛlɛɛ ma ti dunyei hu yɛ ti haala huɛi vɛli, na ngele nyamui wai yɛ bawonga ngi ma.

¹³Fula huɛi yeefeleyei ji i kabande hinda wawangaa wielɔ, i pie ngɔmbui i gbua ngelegoohu i gbuja dunyei hu numui gbi yaama.

¹⁴A kabande hinde nasia kpaya wuaani ngi hu i guni i yɛ ti wie a haala huɛi jɔngɔi, poma lɔ i dunyablaa kpɛlɛɛ wɛlɛni. I ndeilɔ nungeisia kpɛlɛɛ ma dunyei hu yɛ ti haala huɛi ngi gbuaye gbatɛ, na wɔɔ ti ŋɔnani a bowei kɛɛ ii haani, ta ya bagɔɔma vembɛ.

¹⁵Fula huɛi yeefeleyei i kpaya jɔɛilɔ i ndɛvu vɛfɛi wuaa haala huɛi ngi gbuayei gbatɛngɔi hu, na i guni i yɛpɛ i nasia kpɛlɛɛ waa ti gangani a ngi vɛlila.

¹⁶I gbɔndailɔ nungaa kpɛlɛɛ ma, bi yɛni a nu walɔ ɔɔ nu wulo, kpatɛmɔ mia a bie ɔɔ nyanimɔ, bi yɛni a nduwɔ lɔ ɔɔ bii yɛni la, aako ti kpɔ wu ti yejama lokoisia ya kɛɛ ti lawaasia.

¹⁷Kpaya gbii yɛ nuu wɛ feegɔva ɔɔ feemanjiava ina kpɔi ji ii wuni ngi lawaa, na looni yeehuɛi ji ngi biyei va lɔ taa jikei na looni ngi va.

¹⁸Nɛmahulewe kɔdi gbuala lɔ nyandengɔ ji yeembui gɔlɔva. Numui gbi lee hinda hugɔɔmɔ le a gulɔ a jikei na yeembui gɔɔla i huɛi na ma, ajifa yeejikei looni numu la lɔ va. Yeejikei mia a weita weita weita.