Read Ngowili Yekpei Numu Kpɛlɛɛ Va HINDEI MAGƐNI A JƆN 16 Bible Online

HINDEI MAGƐNI A JƆN 16 - Ngowili Yekpei Numu Kpɛlɛɛ Va bible

HINDEI MAGƐNI A JƆN 16

¹Kɛ ngi ngoo lakpawa mɛninga a gbua a hɛɛ wɛleibu we yɛ malika wɔfleisia ma, “A li yakpe wu bola wɔflei nasia wumbu Ngewɔ liilewei fendangɔ wu huwo mia dunyei hu!”

² Kɛ malikei yeehaalayei i ngi bolei yapɛɛnga dunyei hu. Kpalɛma nyamu yagbalɛngɔisia ti gbuɛilɔ nasia ma fula huɛi maiki wungɔ yɛla ti ma tia nasia ti yɛ ngi gbuaye gbatɛngɔi vɛli.

³Kɛ malikei yeefeleyei bɛɛ i ngi bolɛi yapɛɛnga gboyei hu. Kɛ yeenjei i wotenga i wie kia ŋamɛi na a yɛ poomɛi hu, i fuuhanisia gbi ti waa ti boyei hu.

⁴ Kɛ malikei yeesawayei i ngi bolɛi yapɛɛnga njei yeisia hu kɛɛ nja lokeisia hu ta gbua ndɔu, kɛ ti wotea a ŋamɛi.

⁵Kɛ ngi nja maahu malikei woo mɛninga a nde yɛ, “Bi wɔnangɔi kpɛmboisia hu bi ti wuaanga, O Kayemamɔi, bia bi na kiahuna kɛɛ bi na wɔɔ gba!

⁶Gbamaile pienyamubleisia ti ŋama wunga bi nungeisia ma tia bi lutuisia tao famia bi wotea bi ti gɔnga a yeeŋamɛi kpoliva kia mahoungɔ la ti va.”

⁷Kɛ ngi ngoo mɛninga a gbua a saa gbuamɛi yaka we yɛ, “Ndemɔi Ngewɔ Wa! Bi gbɛmboisia ti lɔnyangɔ kpa tawao ti wɔnani kpa!”

⁸Kɛ malikei yeenaaniyei ngi bolei yapɛlɛnga foloi maahu, kɛ foloi kpaya majɔnga a nungeisia mɔ a ngi maloindoi gbandii.

⁹Yeemaloindoi na i nungaa mɔilɔ hulewengɔ gboŋ kɛ tia Ngewɔ biyei gbafama na fitini jisia yeekpayei ngi yeya, tawao tii lumani wounve va ti hinda nyamuisia ma taa ngɔlɔya ve Ngewɔ wɛ.

¹⁰Kɛ malikei yeelɔɔluyei i ngi bolei yapɛlɛnga mia fula huɛi maha heimi yɛ na, kɛ ngi mahawui hugbindinga nilinili; nungeisia ti yɛlɔ a ti nɛisia yamɛ a yeekpalɛi,

¹¹ta lagbua a Ngewɔ na ngelegoohu ta ngi yɛli kpalɛisia taa kpalɛmɛisia va ti gbuani ti ma. Kɛɛ tii lumani ta wounve ti hinda nyamuisia ma.

¹²Kɛ malikei yeeweitayei bɛɛ i ngi bolei yapɛlɛnga Yufletisi yawai hu. Yeenjei i bɛlilɔ yewe pelei i la kohu mahangeisia va ta gbua a foloi ngi hiye welei hu we.

¹³Nawooma ngi ngafa nyamu sawangaa lɔilɔ ti gbuangɔ a jiibɛisia, ta gbua ndamba gali wai lahu, a fula huɛi lahu we kɛɛ ndɛɛguala lutui.

¹⁴Tia lɔ jiina yafangaa a tie ta kabande hindeisia wie. Yeengafa sawei jisia mia kɛyia ta li mahangeisia kpɛlɛɛ gama ti dunyei maahu ti ti yandɔɔ koe va too voo wai ma kɛyila Ngewɔ wa gama.

¹⁵“A woolo! Nyaa wama kia humamɔ! Koohunɛɛ lɔ numui ma ngi yaama bengɔ yewe tawao a ngi magulɛisia hou pandawanda, aako aa gbua a ngi mahaka gbamɛi kɛ i wufenga faha lia!”

¹⁶ Nawooma ngafangeisia ti mahangeisia yandɔilɔ a lenga mia ta toli Hibu yiɛi hu a Amagɛdɔn.

¹⁷Kɛ malikei yeewɔflei i ngi bolei yapɛlɛnga fofoi hu. Ngo lakpawa i gbuɛilɔ hɛɛ wɛleibu a maha heimi we, kɛ i ndea yɛ, “I gbɔyɔnga ma!”

¹⁸Kɛ maimai tewia hu, ngelei i baahugbua kɛ i yianga, kɛ dunyei gbɛlinga jiwijiwi. Yee dunya gbii yaa wɔɔ gbaa gbɛlini i hiye nuuvu gbatɛngɔi hu ma!

¹⁹Taa lakpawai Babilɔn i blailɔ kaka sawa, kɛ taawaisia gbi ti ndɔleisia hu ti wolonga. Ngewɔ i gililɔ a ndɔlɔwai Babilɔn i ndɔɔ ve ngi wɛ a ndiilewe hulewengɔ wa ngi bolei hu i kpoli.

²⁰Tiisia kpɛlɛɛ ti gbɔyɔilɔ, ngiye jɛmbɛisia gbi ti lohu yeeŋ.

²¹ Hakɔ gɔtii jɛmbɛisia, yeengila gbi ngi miniyii a lo te i gu a pauŋ hɔndɔ yila, ti gbuɛilɔ ngeleima ta gula nungaa ma. Kɛ nungeisia lɔ lagbuama a Ngewɔ ta ngi yɛli jifa i fitina yeini ti ma a hakɔi, gbɛva yeefitini ji nyɔkɔ ta nyamungɔ yɛla huwungɔ kpu.