Read Ngowili Yekpei Numu Kpɛlɛɛ Va HINDEI MAGƐNI A JƆN 17 Bible Online

HINDEI MAGƐNI A JƆN 17 - Ngowili Yekpei Numu Kpɛlɛɛ Va bible

HINDEI MAGƐNI A JƆN 17

¹Nawooma, malika wɔflei nasia ti bola wɔfleisia woteni, yeengila wailɔ nya gama kɛ i ndea nya ma yɛ, “Wa mbei ngi hugɛ a bie kia puegbua nyaha wai, na heini njawaisia gblanga, yee wama nimisa hulɔma la.

² Dunyama mahangeisia ti pue nyamu gbuanga a ngie, tawao i ndɔ veilɔ dunyamableisia wɛ kpoli va i ti hou ti puegbua a ngie.”

³ Kɛ Ngafei nya huvenga malikei i nya wumbu kɛ i ya a nge ŋanya lɔlei hu. Nalɔ ngi nyahɛi maleni na i heini fula huɛi maahu kpɔgbɔungɔ mbiyɛ nyamuisia nyɛingɔ ngi luwuima; ngu wɔfla mia ti yɛ yeehuɛi ma kɛɛ ngi lowoisia ti puu.

⁴Yee nyahɛi kula manyinyingɔi taa yee kpɔgbɔu mia ti yɛ ngi ma, kanigbɔluisia ti wɛpɛngɔ maahu, kpɛlingɔ kɔtu baagbangɔisia ma kɛɛ kɔtu goweisia. Ngi lokoi ya, kanigbɔu bolei yɛlɔ na ndavengɔ kpauŋ a hani mayolangɔisia kɛɛ manɔhɔ wuegbua hanisia.

⁵Ngi lawaa nda nyɛingɔi yɛlɔ na yeembui hulɔwungɔ: “Babilɔn Lawai, puegbua nyahangɛisia kpɛlɛɛ ti nje kɛɛ nasia nguhu nyaniblaa a tie dunyei hu.”

⁶Kɛ ngi yee nyapoi lɔnga Ngewɔ mableisia ti ŋamɛi ngi houngɔ tɛngɔ ngi yaama, kpɛlingɔ nasia bɛɛ ti ŋamɛi ma ti yɛ ti waani wɔɔ jifa Yesu hindei lewengɔ yɛla ti lii woma. Ji ngi yaama wɛlɛni ngi ma, nya wuhu wuilɔ kpu.

⁷Kɛ malikei nya mɔlinga yɛ, “Gbe ji a bi wuhu wu? Gbɛɛ ngi hinda lɔwungɔi yeembui gɛ a bie kɔloongɔ nyapoi ji ma kɛɛ huɛi na ma a hei maahu, na ngu wɔfla ngi ma kɛɛ ndowo puu.

⁸Fula huɛi na bi tɔni yɛlɔ wɔɔ fuuyahu, kɛɛ ii yaa ndɛvuhu kulo bɛɛ; i longa kulo te i gbua ndɔu kɛ i ya jangata i la ngi ma. Dunyamablei nasia ti lɛisia ii wuni wɔɔ ndɛɛvu gɔlɛi hu a dunyei ngi gbatɛ gbelei a yɛ ti ma a kualama lɔ ji ta yaama wɛlɛ fula huɛi ma. Ngi vulungɔ yɛla wɔɔ; kiahuna ii yaa fuuyahu, na hu gbi ngi walɛi lɔ hu gbɔma.

⁹“Nɛmahulewe kɔndi gbuala kɛɛ hinda hugɔɔla lɔ nyandengɔ ji yeembui gɔɔva. Ngu wɔfleisia ti ngiye wɔfleisia lɔ va nyahɛi heini maahu. Gbɔma ti looni maha wɔfleisia lɔ va.

¹⁰Ti lɔɔlu ti gulanga, yila lɔ mahayɛi hu, kɛɛ yeepekei ii yaa wani lɛ; kɛɛ tawao ngi wangɔi hu, ngi mahayɛi hugutungɔ a yɛla.

¹¹Kɛ fula huɛi na wɔɔ yɛna, kɛɛ ii yaa na kiahuna, tamia mahɛi yeewayakpei a ngie kpɛlingɔ maha wɔfleisia ma ta yakpe a li jangata hu.

¹² “Ndowo puisia bi tɔni yɛni a maha puisia lɔ tii yaa tɔtoi lɛ a ti yengei, kɛɛ ti wama kpaya jɔma yɛva a mahangaa ti yenge hawa yila va tia fula huɛi-ni.

¹³Ti puii na ti lii lamɛi yakpe tawao ti gbayei kɛɛ ti mahayɛi ta felɔ fula huɛi wɛ.

¹⁴Ta kɔ wɛlɛlɔ Mbalaloi ma, kɛɛ Mbalaloi, ngi gbɛlingɔ nasia ma ti lolingɔ, ti huwɔyɔngɔ tawao ngi womablaa lɔnyangɔisia a tie, taa ti gbualɔ, ajifa ta lɔ ndemɔisia ti Lemɔi a ngie kɛɛ mahangeisia ti Mahɛi.”

¹⁵Kɛ malikei gbɔma ndea nya ma yɛ, “Njei nasia bi yɛ ngalɔni puegbua nyahɛi yɛ heini maahu ti yɛni a ndɔleisia lɔ, kɛɛ nungeisia, kɛɛ kɛnyɛbleisia, kɛɛ layiesia.

¹⁶Ndowo puisia bi tɔni, kpɛlɛngɔ fula huɛi ma, ta lololɔ a puegbua nyahɛi. Ngi yeya hanisia gbi ta kpualɔ ngi yeya ti ngi lo a ngi yeya haka gbami; ta ngi luwuima mɛlɔ ti ngi mɔ ngɔmbui hui.

¹⁷Gbamaile Ngewɔ i ngi liima hinda wiela wuilɔ ti liihu, a piela ti hei woma yila ti ti maha gbayei wumbu kɛ ti fenga fula huɛi wɛ, i lo haaŋ ngayenge ma i lo hu Ngewɔ layieisia laa i hou.

¹⁸“Nyahɛi na bi ngi lɔni yɛni a tawaa lɔ i looni mahangeisia kpɛlɛɛ maahu ti dunyei hu.”