Read Ngowili Yekpei Numu Kpɛlɛɛ Va HINDEI MAGƐNI A JƆN 18 Bible Online

HINDEI MAGƐNI A JƆN 18 - Ngowili Yekpei Numu Kpɛlɛɛ Va bible

HINDEI MAGƐNI A JƆN 18

¹Ji kpɛlɛɛ lewengɔ wooma ngi malika weka lɔilɔ gbuama ngelegoohu a yei. Kpaya wa yelɔ ngi yeya tawao ngi nɔlɛi dunyei houngɔ ngafongɔ fa.

² Kɛ i ndenga ngoo lakpawa hu yɛ, “I wolonga gbo, ndɔlɔ wai Babilɔn wolonga! I wotea a tombo ngafangeisia tia jiina nyamuisia va, a tombo njoola ŋɔningɛisia kpɛlɛɛ va.

³ I pienga nuuvuisia kpɛlɛɛ ti ndɔi yeehubɔnɔyei gbolinga a ngi wuegbuala hu we. Dunyama mahangeisia ti puegbuanga a ngie, tawao yee feegɔbleisia ti gbatɛnga ngi wuegbua mani yeehulewengɔi hu.”

⁴Kɛ ngi ngoo weka mɛninga a gbua ngelegoohu yɛ, “Nya nungeisia, a gule wu gbua ngi hu! Waa loma kɛ wu ngi jumbuisia wulia; waa loma ngi nimisesia taa yei wua bɛɛ ma!

⁵Gbamaile ngi jumbuisia ti yandɔnga yeegungei fonga fa ngelegoohu, tawao ngi wiehinda nyamuisia ti hitɛnga Ngewɔ wɛ.

⁶ A nda ngi ma kia lɔɔ i ndaila nungaa wekeisia ma; wu ngi pawa heiheingɔ ma kpoto ngi wiehindeisia va. A ndɔ gbayangɔ ve ngi wɛ bola yakpei na goohu i huwaa na kpayangɔ i feni wu wɛ.

⁷A mɔnɛ ta tɔɔya hulewengɔ yei ngi ma hitingɔ sɔ ngɔlɔyɛi kɛɛ nɛnɛɛ va i tɛni tayekpe ma. Gbamaile ta lewema a ndawɔɔ yɛpɛ le ngi liihu yɛ: ‘Nyaa heingɔi a nyaha mahɛi! Poonyaha yaa nge, tao ndiinyani ɛɛ nya hou kunafɔ!’

⁸Yonga lewela valɔ fitinangaa ti wama yeima ngi ma a heegbɛ, ndiinyani, kɛɛ ndɔlɛi, Tawao a mɔlɔ ngɔmbui ya, gbamaile Ndemɔi Ngewɔ ngi gbɛmbomɔi, wɔlɔngɔi.”

⁹Dunyama mahangeisia ti puegbuani a ngie tawao ti ngi nafa humɛni, ta wɔɔlɔ ta gbala ji taalakpawai a mɔ ndulii a gbuahu.

¹⁰Ta loolɔ kuhama polouŋ nduwɛi ti houngɔ mɔnɛi va a yɛ hu, ta wɔlɔ ta nde tɛ, “Aa kpa! Aa kpa, taalakpawai Babilɔn, ndɛmɛwai vuii gbelɛ hawa yakpe googu ngi nde gbɔyɔa ma!”

¹¹ Dunyama veegɔblaa kɛɛ yeemajiablaa ta wɔɔlɔ ndiinyani i ti hou ngi gbuhɛi va, ajifa numu gbi ɛɛ jɔɔ ti veeisia yeya va ti ma;

¹² numu ɛɛ yaa jɔɔ ti ganigbɔli yeya va, kɛɛ kanigolei, kɛɛ kɔtu baagbangɔisia, kɛɛ kula nyande lasi gbi lekee, kia linii na, siki kɛɛ wulii; i gbɛli ngulu lasi gbi yeemagunɛngɔ ma, hakei nasia ta kpatɛ a heleyɔngɔi, kɛɛ hani baagbangɔisia kpatɛngɔ a blasi, kɔlii, kɛɛ mabui;

¹³taa hani gunɛnɛngaa kia sinamɔn na, spaisi na, flakinsɛnsi kɛɛ siminjii, gbɛsɛi, kpɛlingɔ ndoe ma kɛɛ ngulɔi, mba vukangɔi ma tia nyui, nikangɛisia ma tia kɔhousia.

¹⁴Feegɔblaa ta ndelɔ ngi ma tɛ, “Hani yekpeisia kpɛlɛɛ bi hamingɔ yɛla fa malewenga kpe bi yeya, tawao bi gbatei i gbɛli nɛnɛɛ ma bi yɛ hu gbii ya bi longa kunafɔ bɛɛ yaa ti majɔɔ!”

¹⁵Feegɔblei nasia ti gbatɛni a veela ngi hu ta loolɔ kuhama polouŋ nduwa ti huvengɔ mɔnɛi va a yei ngi ma. Ngaya a yeilɔ ti ma ta lewe a gbala,

¹⁶tao ta nde tɛ, “Aa kpa! Ndɛmɛ vuii gbelɛ Babilɔn! A ngi mayili wɔɔ a fɛmgbɛ lɔ, hunyɛingɔ ngahunpungɔ a kpɔlu, i kani gbɔluisia gula ngi ma kɛɛ kɔti baagbangɔisia kɛɛ ngeya nyandeisia!

¹⁷Kɛɛ hawa yakpe goohu gbe, i baanga a ngi gbatɛ wai kpɛlɛɛ!” Ndɛndɛ mahubleisia kpɛlɛɛ tia njaya heibleisia, kpɛlingɔ ndɛndɛ wulibleisia ma kɛɛ nasia gbi ma ti nafɛi wuaangɔ njaya yengei hu ta loolɔ polouŋ kuhama,

¹⁸kɛ tia wɔɔma ji ta tɔ taawai a mɔ ndulii a gbua koohu a lɛ, tɛ, “Milɔ dunyei hu kpɛlɛɛ taa weka wa a hiye i wie kia tawai ji nyɔkɔ yɛ na?”

¹⁹Ta flofloi jɛsialɔ ti wumbeisia, ta wɔɔ tao ta gbala tɛɛ, “Aa kpa! I nyamui kpa taawai Babilɔn va mia nasia gbi ndɛndɛngaa ti ti yeya na wɔɔ njaya ti gbatei na ngi hu! Kɛɛ hawa yakpe goohu gbelɛ i baanga a kpɛlɛɛ!”

²⁰ A koohunɛɛ jɔlɛ wie, wua wu ngelegoohu, Babilɔn wololei va! A goohunɛɛ Ngewɔ nungeisia, tobleisia, kɛɛ tutuisia! Gbamaile Ngewɔ lɔ i ngi gbɛmbonga hindeisia va i ndani wu ma!

²¹Kɛ malika wa yila i kɔti lakpawa wumbua piengɔ kia nyɔ vuka gɔtii na, i pili vaa gboyei hu kɛ i ndea yɛ, “Himia Ngewɔ a Babilɔn lawai wumbula i pili a tawao numu ɛɛ yaa kunafɔ yaama wɛlɛma gbɔma.

²²Kɔninga lewebleisia ti wule woi kɛɛ guleyaableisia, koko vɛwoi taa bulii vɛwoi kulo hii va tɛɛ yaa mɛni bi hu. Kunafɔ kaa yenge wiemɔ yeelasii gbi lekee ɛɛ yaa gbua ngi hu, tawao nyɔ vukawo kalɛ yila bɛɛ tɛɛ yaa mɛni ngii hu!

²³Tɛɛ yaa lambo vofo lɔ bi hu, tawao kɔli nyahɛi taa ngi hini ti jɔlewoi tɛɛ yaa mɛni kulo bɛɛ va bi hu. Feegɔbleisia ti gbuani ngi hu ti yɛni wɔɔ a nuwawangaa lɔ ti dunya, tawao ngi likɔtɛi lɔ wieni i guni i nungeisia gbi wɛlɛni ti dunyei hu.”

²⁴Nimisa lailɔ Babilɔn ma ajifa Ngewɔ lutuisia kɛɛ ngi nungeisia ti ŋamɛi i lɛilɔ ngi wumba, kpɛlingɔ nasia kpɛlɛɛ ti ŋamɛi ma i ti waani dunyei hu.