Read Ngowili Yekpei Numu Kpɛlɛɛ Va HINDEI MAGƐNI A JƆN 2 Bible Online

HINDEI MAGƐNI A JƆN 2 - Ngowili Yekpei Numu Kpɛlɛɛ Va bible

HINDEI MAGƐNI A JƆN 2

¹“Malikei gama Ɛfisɔs sɔsii maahu, kɔlɛi nyɛi bɛ: “Ngowili lɔ i gbuama numui gama tumbeka wɔfleisia ti ngi yejama lokoi ya, na a ŋia lambo vɛ wɔfleisia lia.

²Ngi jiahuisia kpɛlɛɛ gɔɔlɔ wu kama; i gbɛli mɔnɛ hulewengɔi ma a la wu ma kɛɛ wu gulɛi hinda gbɔugbɔu bu. Ngi kɔɔlɔ kɛ wuɛɛ loko hei pienyamubleisia bu, tawao wu nasia hugɔnga ta tia yekpe loli a tobla, kɛɛ i gbuanga ke wu yaama kɛ ndɛɛ gulablaa gbama mia a tie, tii yɛni a tobla.

³Ndiihoublaa mia a wue tawao kpalɛ hulewengɔ gbotoa langɔe wu ma nya biyɛi woma, na hu gbi, wuii gbeni a tola nya woma nava.

⁴Kɛɛ ji mia wu hinda gbalɛngɔ la nya ma: Wuii loni a nge kiahuna kia haalei yɛ na.

⁵I yɛ wu nɛmahu kɛ wu yakanga huguhangɔ! A wounve wu jumbuisia ma wa ya hindei nasia wie haalɛi hu wu yɛ pie. Wuii wounveilɔ wu jumbuisia ma, nga waa wu maahu ngi wu lambo vɛi gbua ngi loomɛi.

⁶Kɛɛ gbɔɔ wu hinda nɛngɔ la mbɛ yɛni a jilɔ: Wu lolongɔe a tuve nasia ti Nikolati woomableisia hu, kia nya bɛɛ nya lolongɔ a tie fa.

⁷ “Numui na ngoli i ngi ma njia mɛniva, i woolo gbɔɔ Ngewɔ Yafei ndema sɔsiisia ma! “Nasia ta temaya mɛ nga kpaya wuaalɔ ti hu mɛliva ndɛvu wuliya i looni Ngewɔ gatei hu.”

⁸ “Malikei gama Simana sɔsii maahu, kɔlɛi nyɛi bɛ: “Ngowili lɔ i gbuama numui gama yeetɔtoomɛi a ngie kɛɛ yeekɛlɛmɛi, na wɔɔ i haani kɛ i yamaa i vulu.

⁹Ngi ndii nyani gɔɔlɔ wu houngɔ kɛɛ hani vɛli na hugbi wu gbatɛngɔi! Ngi njɛpɛ-a-ngie niwi nasia gɔɔlɔ lema kɔloongɔ wu ma a nasia ta tia yekpe loli a Juublaa, kɛɛ tii yɛni la kulobɛɛ, ti yɛni a seitana mablɛisia lɔ!

¹⁰Gbɛogbɛ aa yɛ wu gama a huluwa i wama lama wu ma. A woolo! Seitana lɔ wama wu lɛnga gɔlɛma a pie i la a sabu ti wu lɛnga wili kpindi wɛlei bu; ndiinyani gboto a yɛlɔ wu ma haaŋ jii puu va. A lii loo nya ma, ti yɛ bɛɛ wu waama, nga maha bɔlɔ velɔ wu wɛ na yɛni a ndɛvu yekpe.

¹¹“Numui na ngoli i ngi ma njia mɛniva, i woolo gbɔɔ Ngewɔ Yafei ndema sɔsiisia ma!” “Nasia ta temaya mɛ, hee yeepomayee ɛɛ gu kulo bɛɛ ti ma.”

¹²“Malikei gama Paagamɔm sɔsii maahu, kɔlɛi nyɛi bɛ: “Ngowili lɔ i gbuama numui gama bowa mɛɛ houngɔ laama felei ngi yeya.

¹³Ngi hugɔɔlɔ kɛ mia wu heini na, nalɔ Seitana i heima gbatea na. Wu lɔnyangɔe a nge, tawao wuii gbeni a la la a nge ji ti Antipas waani na yɛ seli yia yekpe le kɔloongɔ nya ma mia seitana i hei na.

¹⁴ Kɛɛ hinda lɛnga lɔ na na piengɔ wu hinda ii nɛɛni bɛ: Nungaa lɛnga lɔ bi ma ti tongɔ Balam gaaisia woma, na i Balak gaani a Isrɛlbleisia wuhu nyanila jumbu wuliva nda mɛhɛɛ wooma ta kpua a saa nɔmɔliisia ma, kɛɛ gbɔma a pue nyamu gbualei.

¹⁵Hii lɔɔ bɛɛ nungaa gbɔma ti na wu lia ti toongɔ Nikolatibleisia ti gaa woma.

¹⁶Faale a wounve wu jumbuisia ma! Wuii wounveilɔ, nga waa wu maahu hugutungɔ ndapi wɛlɛva yeenungɛi nasia ma a bowei na a gbua a nya laa we.

¹⁷“Numui na ngoli i ngi ma njia mɛniva, i woolo gbɔɔ Ngewɔ Yafei ndema sɔsiisia ma! “Nasia ta temaya mɛ, nga luba mɛhɛɛ kulo wɛndɛlɔ ma ngi fe ti wɛ. Nga gbɔma kɔtii gowei ngila ngila velɔ ti gbi wɛ nda nina nyɛingɔ ma, na numu weka gbi ɛɛ kɔɔ kɛlee numui na a ngi lokoi yahɛi i mbumbu.

¹⁸“Malikei gama Tayatira sɔsiibleisia maahu, kɔlɛi nyɛi bɛ: “Ngowili lɔ i gbuama Ngewɔ Hindoloi gama, ngi yaamɛi a voo dauŋ kia ngɔmbui na, ngi gɔwɔisia ti maa a voo kia blasi gɔli na mayiangɔ fo.

¹⁹Ngi jiahuisia gbi gɔɔlɔ wu kama. Ngi domɛi yɛyii gɔɔlɔ wu hu, wu lanayei, wu yengeisia, kɛɛ wu gula hinda gbɔugbɔu bu. Ngi kɔɔlɔ kɛ wu wiehindeisia ti fesani poloŋ ti lewe haalei huma.

²⁰Kɛɛ ji mia wu hinda nya lii houngɔ fa: Wu loko heingɔi nyapoi na bu Jɛsɛbɛ, na i tayekpe lolima a Ngewɔ lutui. Taa nya yengebleisia gaama a pie ta yaka ta lewe a pue nyamu gbualei tao ta mɛhɛɛ mɛ kpuangɔ a saa fengɔ nɔmɔliisia wɛ.

²¹Ngi ngi gɔnga a lɔwɔ wounve va ngi jumbuisia ma, kɛɛ ii yaa kuluni ji ma.

²²Faale nya piema i la heegbɛ yalema mia tia nasia ti yɛ pue gbua a ngie ta gbalɛ na hulewengɔ. Ngi ji wiemaa hugutungɔ kɛlee ti wounve yeenyamu hulewengɔi jisia ma.

²³Nga nasia bɛɛ waalɔ ti toongɔ ngi woma, kɛ nawooma lɔ sɔsiisia kpɛlɛɛ ta lii hei ma kɛ nya mia ngi nuuvuisia ti nɛmahu giliyeisia gɔɔngɔ kɛɛ ti hamiisia. Nga numui gbi pawalɔ kia ba yengela.

²⁴“Kɛɛ wua kpɛlɛɛ wu Tayatira wu toongɔ ii le yeekaa nyamui ji woma, tawao wuii yaa gaani a na ta toli a ‘Seitana hinda mbulɔwungɔi,’ ngɛɛ yɛma nga kaha weka wulɔ wu wumba.

²⁵Kɛɛ a hou kpauŋ na ma wu yeya i too lɔwɔi ma nga wa.

²⁶Nasia ta temaya mɛ, ti lo na wiema nɛngɔ bɛ i to fa too voloi ma, nga kpaya yakpei na velɔ ti wɛ nya kɛkɛ feni bɛ: Nga kpaya wuaalɔ ti yeya yɛva ndɔleisia maahu, ta mahaya yenge wie ti maahu a kɔlu vomɛi ti huwongolo va ti gbukpulu kia pɔlɔvɛi a gbukpuula. Nga gbɔma ti gɔlɔ a ngenda lumbekei.

²⁹“Numui na ngoli ngi ma njia mɛniva, i woolo gbɔɔ Ngewɔ Yafei ndema sɔsiisia ma!”