Read Ngowili Yekpei Numu Kpɛlɛɛ Va HINDEI MAGƐNI A JƆN 4 Bible Online

HINDEI MAGƐNI A JƆN 4 - Ngowili Yekpei Numu Kpɛlɛɛ Va bible

HINDEI MAGƐNI A JƆN 4

¹Ji wooma ngi henga weka wielɔ, ngi dui lɔ kulangɔ ma gba ngelegoohu. Kɛ ngoi yeehaalayei wɛi na haa ngi mɛnini kpuangɔ a bulu vɛ wo ndenga nya ma yɛ, “Lɛ mbeindo ngi hugɛ a bie gbɔɔ wama wiema ji wooma.”

² Ngaama kɛ Ngewɔ Yafei nya huvenga, kɛ ngi hinda lɔnga ngelegoohu numui heni yeemaha heimei.

³Ngi yambu yɛlɔ a voo kia lee jasipa gɔtii nɔmingɔi na kɛɛ kanɛlia gɔtii gbɔugbɔi na, tawao yee maha heimei galangɔ yɛla a niginangei a voo dauŋ kia ɛmiladi gɔtii na.

⁴Mia maha-heima wai yɛ na maha gblanga gbakoleisia ti jika gungɔ a nuu gbɔyɔngɔ mahu naani ti na galangɔ yɛla ti na gomɛngɔ fio ti mayilingɔ a fɛmgbei, kanigbɔlu bɔleisia ti ti wumba.

⁵ Gbuama a maha heimi yaka we maimai yɛlɔ a tewehu, ngelei a baahugbua a yia. Yee maha heimei gulɔ, hɛmuvo loongɔnga wɔfla ti yɛlɔ na, nasia ngafa wɔfleisia a tie ta Ngewɔ magbee gbua.

⁶Mia gbɔma maha heimi gulɔ yaka, hani yɛlɔ na kia njeiyɛi na, dokengɔ kana kia mɛmɛɛ goohu na. Ndɛvu vuhani naani mia ti yɛ yeemaha heimi galangɔ a yee tɔɔhuisia we, ti yaamɛisia ti jiangɔ gbi ti luwuma a ti gulɔ we kɛɛ ti woma we.

⁷Yee haala vuhani gbuangɔ yɛla a sugbui; yee feleyei gbuangɔ a nika hini; yeesawayei gbuangɔ a nuuvui; kɛɛ na yeenaaniyei gbuangɔ a kowɛi gowoma.

⁸ Yeendɛvu vuhani naani nasia yeeyilayee gbi kpaki weita mia yɛ ngi ma tawao ti yaamɛisia ti jiangɔ yɛla kpɛlɛɛ ti luwuma a ti gulɔ kɛɛ ti woma we. A folo kɛɛ kpindi, ti yɛlɔ a gule yaa ta hugbawa tɛ: “Kayemamɔ, kayemamɔ, kayemamɔ mia a Ndemɔi Ngewɔ waa, na i na wɔɔ gbaa, i na kiahuna, kɛɛ ngi walɛi hu.”

⁹Yeendɛvu vuhani naani jisia ti ye gbi yɛ gɔlɔya kɛɛ mbɛlɛya kɛɛ siɛgbua wuleisia yaani numui gama i heini maha heimi, na i na kunafɔ ta ngi da kunafɔ,

¹⁰kpakolo nuu gbɔyɔngɔ mahu-naanisia ta gulalɔ ngi gɔɔbu maha heimi ta ngi vɛli, na i na kunafɔ ta ngi da kunafɔ. Ta maha bɔleisia gbualɔ wumba ti kula maha heimi gɔɔbu, ta wule tɛ,

¹¹“Mu Lemɔi kɛɛ mu Yewɔɛi, bɛngɔ bi ma nungaa ti gɔlɔya kɛɛ tato lɛ bi ma bi gbayei va. Ajifa bia lɔ bi hani gbi gbatɛni, tawao a bi nyɛkɛ le bi ti gbatɛni bi ndɛvu wuaa ti hu!”