Read Ngowili Yekpei Numu Kpɛlɛɛ Va HINDEI MAGƐNI A JƆN 6 Bible Online

HINDEI MAGƐNI A JƆN 6 - Ngowili Yekpei Numu Kpɛlɛɛ Va bible

HINDEI MAGƐNI A JƆN 6

¹Kɛ ngi Mbalaloi lɔnga i kɔlɔ wɔfleisia yeehaalayei laama nyani i ndawo, kɛ ngi fuuhani naanisia yeengila wo mɛninga, ngi woi kia lee ngelei a baahugbuaa, a nde yɛ, “Wa!”

² Kia ngi na gbeni tiiŋ kɛ ngi soi yeekowei lɔnga looni, ndikpei houni yeesiamɔi yeya; maha bɔlei wuaangɔ lekee ngi yeya kɛ i gbuanga pu i li kia kugba a yɛ lima kɔ gɔma.

³Kia Mbalaloi i kɔlɛi yeefelei laama nyanini i ndawo, kɛ ngi mɛninga fuuhani yeefeleyei i nde yɛ, “Wa!”

⁴Kɛ soi yeepekei kpɔlungɔ jeele i gbuanga. Ngewɔ i kpaya wuailɔ yeesiamɔi hu pieva ndiilɛli i baa dunyeihu, aako nuuvungaa ti ya ti nyɔunyɔu waa; ti kɔ-bowei yeendakpa wa wuailɔ ngi yeya.

⁵Mbalaloi i kɔlɛi yeesawayei laama nyanilɔ i ndawo; kɛ ngi na gbenga, humia ngi soi yeetɛli lɔni, yeesiamɔi hani huma-hakeisia ti houni ngi yeya.

⁶Kɛ ngoo i gulanga nya wolihu kpuangɔ a numu woi a gbua a mia yaka we fuuhani naanisia ti yɛ na, a nde yɛ, “Mbangaa kɔpu yila lɔ na folo yila yenge va, kɛɛ kete ngɛlɛ kɔpu sawa folo yila yengei va. Kɛɛ ɔlivi wuloi taa ndɔi baa hunyani.”

⁷Kia Mbalaloi i kɔlɛi yeenaani laama nyanini i ndawo, ngi fuuhani yeenaaniyei wo mɛnilɔ i nde yɛ, “Wa!”

⁸ Ngi na gbeilɔ kɛ ngi soi lɔnga maa ya puulu, numui heini maahu ngi laa a Hee, yeepekei heini poma ngi laa a ndɔu. Ti kpaya majɔɛilɔ yɛva dunyei yeekaka yila maahu kaka naani goohu, kɔɔ ti yeenungeisia waa a kɔ wɛlɛla ti ma, kɛɛ ndɔlei, kɛɛ heegbei yeelasii gbi, kɛɛ na a fula huangɛisia wilila ti ma.

⁹Kia Mbalaloi i kɔlɔ gotongɔi yeelɔɔluyei laama nyanini i ndawo, kɛ ngi nasia wɔɔ ti ti waani ti yɛ Ngewɔ yie le tawao ta nde tɔnya ma, ti yafeisia lɔnga ti heini saagbuamɛi gɔɔbu.

¹⁰Kɛ ti ndea yele lakpawa hu tɛ, “Aa Ndemɔ wai, kayemamɔi kɛɛ tɔnyamɔi a bialɔ! Hu yeelɛmbima pɛiŋ baa yaa dunyableisia gbɛmbo bi jangata yei ti ma mu waa va?”

¹¹Kɛ ti ti gbi gɔnga bombani gowei hu a ngila ngila; kɛ malikei i ndenga ti ma yɛ ti lɛɛvu lɛ kulo haaŋ i lohu ti ti mbaa ngengebleisia kɛɛ ndewengeisia ti wama ti waama ti jikei i gu i ndave a tia bɛɛ ti nde wɔɔ.

¹² Kia Mbalaloi i kɔlɔ gotongɔi yeeweitayei laama nyanini i ndawo, ndɔlei i gbɛlilɔ jiwijiwi, foloi i lɛlikpi i gbindi kia kɔndi gula lɛilɛi yeekpɔtui na, kɛ ngalui bɛɛ i gbɔlunga jeele kia ŋamɛi na.

¹³Tumbekeisia ti gbɛkpɛilɔ ngeleima ta gula dunyei hu kia lekee ngului na na ngi wuɛisia tii yaa hitini ta gbɛkpɛla ji viivii vɛfɛi a gula.

¹⁴Kɛ ngelei i blanga fa i gotoma i wie kia kɔlɔ gotongɔi na, tawao ngiyei gbi lekee kɛɛ tiisia gbi lekee ti guleilɔ ti yɛmɛisia.

¹⁵Kɛ dunyama mahangeisia, tomableisia, kɔ-gugbeisia, kpatɛbleisia, kpayableisia, kɛɛ na nungaa wekangaa kpɛlɛɛ i gbɛlɛ nduwɔ ma kɛɛ numu ma nduwɔ yaa ngie, ti ya ti lɔwu puisia hu kɛɛ fawa waawaisia bu ti heini ngiyeisia maahu.

¹⁶Tɛ ngiyeisia ma taa fawa waawaisia, “kɔnɛ a gula mu mahu wu mu lɔwu numui na yaamɛisia ma i heini maha heimi kɛɛ Mbalaloi bɛɛ ngi liilewe hulewengɔi ma!

¹⁷Gbamaile, folo wai i hitea ma ti liilewei gɛ va, tawao yelɔ a gu i loonga?”