Read Ngowili Yekpei Numu Kpɛlɛɛ Va HINDEI MAGƐNI A JƆN 7 Bible Online

HINDEI MAGƐNI A JƆN 7 - Ngowili Yekpei Numu Kpɛlɛɛ Va bible

HINDEI MAGƐNI A JƆN 7

¹ Ji lewengɔ woma, ngi malikangaa naani lɔilɔ ti looni dunyei yeesɔku naanisia hu ta dunyei yeefɛfɛ naanisia huhou aako fɛfɛ gbi aa wa a dunyei hu we, gboyei maahu we kɛɛ nguluisia.

²Kɛ ngi malika weka lɔnga a gbua a foloi hiye welei hu we, Ngewɔ lokoi yeekpɔ wu hakei houni ngi yeya. I gbandɛilɔ malika naanisia la Ngewɔ kpaya veni ti wɛ dunyei nyani va kɛɛ gboyei.

³Yɛ ti ma, “Waa dunyei kɛɛ gboyei kɛɛ nguluisia ti nyani lɛ kɛ lee ma Ngewɔ lokoi yeekpɔi wu pɛiŋ ngi yengebleisia ti lawaa.”

⁴Na wooma ngi mɛnilɔ kɛ nasia Ngewɔ lokoi yeekpɔi wuni ti ma ti jika guilɔ a: numu tauji hɔndɔ yia kalɛ nuu fele gbɔyɔngɔ mahu naani, ti kpɛlɛɛ ta gbua Isrɛel gɛnyɛi hu.

⁵Gbuama Juda gɛnyɛi hu, numu taujii mahu puu mahu fele mia wuni ti ma. Gbuama Lubɛn gɛnyɛi hu, numu tauji mahu puu mahu fele. Gbuama Gad gɛnyɛi hu, numu tauji mahu puu mahu fele.

⁶Gbuama Asa gɛnyɛi hu, numu tauji mahu puu mahu fele. Gbuama Naftali gɛnyɛi hu, numu tauji mahu puu mahu fele. Gbuama Manasɛ gɛnyɛi, numu tauji mahu puu mahu fele.

⁷Gbuama Simiɔn gɛnyɛi hu, numu tauji mahu puu mahu fele. Gbuama Livai gɛnyɛi hu, numu tauji mahu puu mahu fele.

⁸Gbuama Jɛbulɔn gɛnyɛi hu, numu tauji mahu puu mahu fele. Gbuama Josɛfi gɛnyɛi hu, numu tauji mahu puu mahu fele, kɛɛ gbuama Bɛnjami gɛnyɛi hu, numu tauji mahu puu mahu fele.

⁹Ji lewengɔe woma, ngi fahawa lɔilɔ nya gulɔ ndalewengɔ ma gbo — numu gbii yɛ gu aa yeenungeisia gbawala. Ti gbuɛilɔ kɛnyɛi gbi hu dunyei hu kɛ ti loonga maha heimi gɔɔbu kɛɛ Mbalaloi. Ti mayilingɔ yɛla a bombani gowei, tawao tɔkpɔ yaseisia ti yɛlɔ houni ti gbi yeya.

¹⁰Kɛ ti gulanga a yele lakpawa tɛ: Mbawoya a gbua mu Yewɔɛi gama lɔ, na heini maha-heimɛi, kɛɛ Mbalaloi!

¹¹Malikeisia kpɛlɛɛ ti yɛ looilɔ ti maha heimi galangɔ tia kpakoleisia kɛɛ fuuhani naanisia. Kɛ ti mawɛlɛnga ti ti wombisia gbakpa maha-heimɛi gulɔ ti Ngewɔ vɛli,

¹²tɛ, “Amiina! Tato, gɔlɔya, nɛmahulewe, sɛnɛwo, mbɛlɛhei, kpaya, kɛɛ juujuu i yɛ mu Yewɔɛi ma kunafɔ ta ngi da kunafɔ! Amiina!”

¹³Kɛ kpakoloi yeengila nya mɔlinga yɛ, “Yemia a nungei jisia bombani gowei ji ti ma, tawao ti yeegbuaa?”

¹⁴Kɛ ngi potenga ngɛ, “Maada, ngii kɔ kɛ lee bia.” Kɛ i ndea nya ma yɛ, “Jisia mia nungaa a tie ti masuba gbundɛwai huvonga. Ti ti bombanisia lɔ wuanga fo ti kolenga Mbalaloi ŋamɛi hu.

¹⁵Na vamia ti looni Ngewɔ maha heimi gulɔ ngi magbee gbuava ngi wɛleibu a folo kɛɛ kpindi. Tawao numui na heini Maha heimi a ti mahugbelɔ.

¹⁶ Kunafɔ tɛɛ yaa gbɔma lɔɔlɛ tawao ti bolohu ɛɛ yaa be. Folo ɛɛ yaa ti mɔ ɔɔ yee duinduin gbandi;

¹⁷ gbamaile Mbalaloi na i heini maha heima yeendiahu a yɛlɔ a ti mahugbemɔi, a hou ti ma a li a tie nja loke sɛɛsɛɛ gama. Tawao Ngewɔ a ngaya yialɔ fo ti yaama.”