Read Ngowili Yekpei Numu Kpɛlɛɛ Va HINDEI MAGƐNI A JƆN 8 Bible Online

HINDEI MAGƐNI A JƆN 8 - Ngowili Yekpei Numu Kpɛlɛɛ Va bible

HINDEI MAGƐNI A JƆN 8

¹Kia lekee Mbalaloi i kɔlɔ gotongɔi yeewɔflei huvuloni, kɛ hu yalooŋ ngelegoohu hawa hugutu va.

²Ngi tɔilɔ malika wɔfleisia ta yɛ looni Ngewɔ gulɔ, ti ti gɔ a bulu wɔfla.

³ Malika weka liilɔ i loo miando saa a gbua na, a kanigbɔlu-vei houni ngi yeya. Numu wailɔ i ngi gɔ a hani gunɛnɛ gbotoa, kɔɔ i gahupu a hɛi nasia Ngewɔ mablaa kpɛlɛɛ ta pie kanigbɔlu jaa gbuama gbatɛngɔi mia Ngewɔ gulɔ.

⁴Yee hani gunɛnɛ mɔngɔi yeendulii hukpɔngɔ a Ngewɔmablaa ti hɛɛsia i lɛilɔ a gbua malikei na yeya i looni Ngewɔ gulɔ.

⁵ Kɛ malikei i hani gunɛnɛ vei wumbunga, i ndave kpauŋ a ngɔmbui na yɛ saa gbuamɛi i pili vaa dunyei hu. Ngelei baahu gbuɛilɔ kɛ i yianga, maimai a tewehu, kɛ dunyei gbɛlinga jiwijiwi.

⁶Kɛ malika wɔfleisia ti ti magbatea wa va bulii wɔfleisia vɛma.

⁷Kia haala malikei i ngi nda bulii vɛni, kɛ hakɔi taa ngɔmbui, gahupungɔ a ŋamɛi ti jundua dunyei hu. Dunyei yeekaka sawa yeengila i mɔilɔ ŋao i gbɛlɛ nguluisia ma kɛɛ tuhani gbi lee ma ti yɛ yeekakei na ma.

⁸Kɛ Malikei yeefeleyei i bulii vɛnga. Hani gbuɛilɔ kia ngiye lakpawa ngɔmbui looni ma i gula gboyei hu. Kɛ gboyei yeekaka sawa yeengila i wotea a ŋamɛi;

⁹fuuhanisia kaka sawa yeengila ti haailɔ gboyei hu, kɛ njaya lɛndɛisia kaka sawa yeengila ti nyaninyaninga.

¹⁰Nawooma malikei yeesawayei i bulii vɛilɔ. Tumbekei yeendakpa waa a voo kia hɛmu voi na i gbuɛilɔ ngeleima i gula njɛi yeekaka saweisia hu kɛɛ nja loke sɛwɛsɛwɛisia.

¹¹(Yee tumbekei na biyɛi mia a “Ŋɔnaŋɔnɛi”) Njei yeekaka saweisia yeengila i ŋɔnailɔ tawao numu gboto ti kpɔlini ti haailɔ ngi ŋɔnayii va.

¹² Kɛ malikei yeenaaniyei i bulii vɛnga. Hani i gbanjilɔ foloi yeekaka sawa yeekaka yila hu, ngawui yeekaka sawa kaka yilama, tumbekei yeekaka sawa kaka yila ma, kɛ ti gbi ti gaka yila kaka sawei maa i gbindinga. Foloi ii yaa guni a gbua folo gɔlɛma sawa yee yakpe bɛɛ va, tawao ngawui kɛɛ tumbekeisia tii yaa voni kpindi gɔlɛma sawa yeekaka yakpe bɛɛ va.

¹³Nawooma ngi nya wui wumbuilɔ ngi tɛ kɛ ngi kowɛi lɔnga tɛngɔ poloŋ ngeleima a gowo a li a hee la yɛ, “I nyamui kpa! I nyamui kpa! A nyamu hulewengɔ kpa nasia kpɛlɛɛ va ti dunyei hu ji malika saweisia ti longa poma ti wama bulii vɛma!”