Read Fɨso Fi Matiù 10 Bible Online

Matiù 10 - Fɨso Fi bible

Matiù 10

¹Yeso nyaʼa tɔŋ mbi mə̀mə̀ə̀nɨ̀-ɨnû mbe wum chɔ̀b rɨ̀be əsɨ ni, əne nàʼ ɨka əmbɨ mɨ̀mə̌d ni mbɨ chɨ ɨzwî rɨbɔ̀ŋ, vɨ̀ ɨwɔn jìm bə̀ vɨ̀ ɨnɔʼɔ jìm.

²Tɔ̂ yɨ rɨkum bə̂d tom mbe wum chɔ̀b rɨ̀be: Wɨ rɨtu yɨə Saimòn nɨ mbɨ nyaʼə bə̀ tɔŋ ənɨ Pità mbɨ Andrù nɨ nyaʼə aŋgɔb məd; Jems wan Zebèdiî mbɨ Jɔ̌n nɨ nyaʼə aŋgɔb məd;

³Filip mbɨ Bàtòlòmiù; Tomas mbɨ Matiù we nɨ nyaʼə əfetɨ mɨ̀tagsɨ̀; Jems nɨ nyaʼə wan Alfaùs mbɨ Tàdiòs;

⁴Saimòn nɨ nyaʼə mɨ̀taku mbɨ Judàs Iskàriɔ̀t we nɨ nyaʼa fen ə Yeso.

⁵Yeso nyaʼa tom bə̂d mbɔ̂ wum chɔ̀b rɨ̀be ghà əmbɨ mɨ̀mə̌d ni, “Tɨ mbə̀ wo əwən əkaʼ bə̂d mbe nɨ kaʼi mɨ̀Jû, kɨ̀ bè wò nyɨ ɨŋga əsɨ ə mɔʼɔ ə Sàmàriyà.

⁶Mbə̀ wo yeʼ əsɨ mɨ̀Izre. Mbɨ yɨ ɨghabɨ ə njɨ̀g te nɨ nimɨ.

⁷Ənɨ mbə̀ə wòə̀, mbə yènə̀ ghà ɨŋgam Ŋwiə̀ əmbɨ ə bə̂d ni, 'Ənû ɨfɔ̀n rɨkaŋ ə fə tiinɨ.'

⁸Mbə̀ vɨ bə̂d əwɔn, zwemnɨ ɨvɨ bə̂d, vɨ bə̂d əpabɨ bə̀ chɨ̀ ɨzwî rɨbɔ̀ŋ. Mə fə nàʼ ɨka wɔ̂ ɨ nən əko, əne mbə̀ bə ghɨ̀ ɨnû mbɔ̂ əko.

⁹Tɨ mbə̀ yim ə ɨkab gôl, ɨkab sɨrɨvà, kɨ̀ ɨkab kɔpà ɨŋga mbə ɨ̀bàmɨ̀.

¹⁰Tɨ mbə̀ nɨŋ ə ə̀bàm ɨghanɨ, kɨ̀ ngywɨ̌ cherə, kɨ̀ ɨtabɨ, kɨ̀ mbàŋ. Zɨə kùʼ ni bə̂d jə wə̀d ə̀fàʼì.

¹¹“Mbə mɨ nyɨ ɨŋga əsɨ ə kyeŋ kɨ̀ ɨŋga əsɨ ə kwa, mbə̀ kəb wə̀d mɔʼɔ we nɨ kuʼnɨ ɨŋga əsɨ ze, chubɨ mbɨ məd pè ənɨ mbə̀ nɔʼ rɨŋga əsɨ ze.

¹²Mbə mɨ nyɨ ɨŋga nəb ze, mbə̀ chaʼrɨ bə̂d mbe nɨ yeʼ ɨŋga nəb ze ni, 'Ŋwìə̀ zɨ əbɔrəbɔd ɨgwɨ nən.'

¹³Bə̂d mbe rɨŋga nəb ze mɨ nɨŋ əwən, ə əbɔrəbɔd ə bɨrɨ tən ɨŋga nəb ze. À mɨ yeʼ ni chəi mbɨ nɨŋ əwən, njɨ ə əbɔrəbɔd ə bɨrɨ wɨrɨ tən i ɨ nən.

¹⁴À mɨ yeʼ nɨ chəi wə̀d mɔʼɔ nɨŋ əwən, kɨ̀ bè zu ənû ze nɨ mbə̀ə ghàə̀, mbə̀ kud əgywɨ rɨ ənɨ mbə ɨwu ənɨ mbə̀ə jwɨ̀ rɨŋga nəb ze kɨ̀ rɨŋga əsɨ ze.

¹⁵Mə ghà rəsìʼ ɨ nən ni, à bɨrɨ sɨ əni ze nɨ Ŋwìə̀ ə sob mɨsaʼi, wɨ̀ bɨrɨ diirɨ bə̂d mbe rɨ ə Sodòm bə̀ dììrɨ̀ mbe rɨ ə Gòmorà chè ɨchî nɨ wɨ̀ bɨrɨ diirɨ bə̂d mbe rɨŋga əsɨ ze.

¹⁶“Mbə̀ zə, mə wɨə chà əwən ɨsɨg ɨghabɨ ə njɨ̀g əkaʼ ɨfɔ̂n. Mbə̀ we ɨghabɨ jɔ, bə̀ bɔtɨ ɨghabɨ mbɨ̀rə̀bəŋə.

¹⁷Mbə̀ we əwən mbɨ ə bə̂d, ɨmbə̀ʼ ɨghəm nɨ mbɨ bɨrɨ yim əwən wò naʼ əmbɨ mə̀saʼ əbeŋ. Mbɨ bɨrɨ bɨ te əwən ɨŋga nəb tɨ ə̀kàtɨ̀ tɨ mɨ̀mə̌d.

¹⁸Mbɨ bɨrɨ suŋ əwən wò ɨfě mɨ̀gɔmnà bə̀ fɔrɨ ɨfě mɨfɔ̀n dè əmɨ. Əze ə bɨrɨ ghɨ̀ ni mbə̀ berɨ əpan nɨ ghà ɨkə̂n chɔ̀m əmbɨ mɨ̀mə̌d bə̀ fɔrɨ əmbɨ ə bə̂d mbe nɨ kaʼi mɨ̀Jû.

¹⁹Ənɨ mbɨ mɨ yim əwən, tɨ mbə̀ nwìʼ ə ɨnyod ɨmbə̀ʼ ənû ze nɨ mbə̀ bɨrɨ ghà, kɨ̀ ɨmbə̀ʼ ɨchî nɨ mbə̀ bɨrɨ ghàm. Nyùmə̀ we mɨ kùʼ i, Ŋwìə̀ bɨrɨ ghɨ ni mbə̀ kyerɨ ənû nɨ ghà,

²⁰ɨmbə̀ʼ ɨghəm kaʼi mbə̀nə bɨrɨ ghàm. À yɨ Əzwî ə Mbǎʼ ə bɨrɨ che ənjìm nən ghàm.

²¹“Aŋgɔb bɨrɨ fen wi aŋgɔb ni mbɨ zwiirɨ, mbǎʼ bə̀ fen i wan ni mbɨ zwiirɨ. Bɔn bɨrɨ beŋ ətu əbɔʼ mbə mɨ̀mbǎʼ bə̀ beŋ əbɔʼ mbə mɨ̀nɨ̌ŋ əne ghɨ̀ ni mbɨ zwiirɨ mɨ̀mə̌d.

²²Bə̂d mɨ̀jìm bɨrɨ ban əwən ɨmbə̀ʼ əmɨ, àyɨə wə̀d we nɨ nyiʼi wò pè ənɨ ɨnwǐ, Ŋwìə̀ bɨrɨ chɨ əməd rəŋgəʼ.

²³Ənɨ mbɨ nwendɨ tə rɨkyerɨ-ɨwu ɨŋga əsɨ ə mɔʼ, mbə̀ norə wò ɨŋga əsɨ ə cherə. Mə ghà rəsìʼ ɨ nən ni, Wan Wə̀d bɨrɨ wɨrɨ yeʼe bɔŋ mbə̀ sɨə kad ɨsɨ jìm ɨŋga Izre.

²⁴“Chəi ə̀mə̀ə̀nɨ̀-ɨnû che wə̀d we nɨ chwi ɨnû ɨ bɔ. Chəi wan ə̀fàʼì bə chè i mbǎʼ ə̀fàʼì.

²⁵Zɨə kùʼ əmbɨ ə̀mə̀ə̀nɨ̀-ɨnû ni wɨ̀ yeʼ ɨghabɨ wə̀d we nɨə chwi ɨnû ɨ bɔ, bə̀ kùʼ ni wan ə̀fàʼì bə yeʼ ɨghabɨ i mbǎʼ ə̀fàʼì. Mbɨ mɨ fə tɔŋ mbǎʼ əkwɨ ənɨ ə Belzebùl, [7] njɨ mbɨ bɨrɨ tɔŋ bə̂d rɨŋga nəb məd ənɨ rɨkum nɨ bə̌ chè.

²⁶“Əne tɨ mbə̀ bɔ ə mɨ̀mə̌d. Chəi əghɨ ə mɔʼɔ nɨ mbɨ kubrɨ nɨ chəi mbɨ bɨrɨ fìʼ, kɨ̀ ənɨ mbɨ nəmɨ nɨ chəi bə̂d bɨrɨ kyerɨ.

²⁷Ɨnû mbe nɨ mə gha ɨ nən ɨŋga ɨsɨ firɨ, mbə̀ gha ənɨ ɨsɨ ə zeŋə. Ɨnû mbe nɨ mə ghà ɨ nən əchùmə, mbə̀ təm rɨ ɨdom nəb saʼ.

²⁸Tɨ̀ mbə̀ bɔ ə bə̂d mbe nɨə zwiirɨə nyamnyod, àyɨə chəi ənɨ tɨ̀ mbɨ zwiirɨ əzwî. Mbə̀ bɔ yeʼ məd we nɨ tɨ̀ wɨ̀ nimnɨ nyamnyod bə̀ nimnɨ əzwî ɨŋga əsɨ ɨchə.

²⁹Ɨmbə̀ʼ ɨ mbɨə fènə̀ tɨcherɨ be ənɨ akə ɨkab ə? Àyɨə ə Mbǎʼ mɨ rɨ benɨ i, chəi fɨ mɔʼ bɨrɨ feŋ ə si.

³⁰Ka àbei nyôŋ te nɨ yeʼ ɨgun mbə ɨtu, Ŋwìə̀ fə taŋgɨ rɨjìm.

³¹Əne tɨ mbə̀ bɔ ə. Mbə̀ yɨ ɨghɨ əka ɨnùn chè tɨcherɨ nɔnɔʼ!

³²“Wə̀d jìm we nɨ ben ɨfě bə̂d ni tə kyerɨ əmɨ, mə bɨrɨ bɨ ben ɨfě mɨ Mbǎʼ we nɨ yeʼ ɨkaŋ ni mə kyerɨ əməd.

³³Àyɨə wə̀d mɔʼɔ we nɨ ton ɨfě bə̂d ni chəi tə kyerɨ əmɨ, mə bɨrɨ bɨ ton ɨfě mɨ Mbǎʼ we nɨ yeʼ ɨkaŋ ni chəi mə̀ kyerɨ əməd.

³⁴“Tɨ mbə̀ kɔndɨ əwən ni mə fə yeʼe ɨmbə̀ʼ naʼ əbɔrəbɔd ɨgwɨ ə si. Chəi mə̀ nyaʼa yeʼe ɨ naʼ əbɔrəbɔd. Mə nyaʼa yeʼe yeʼ ni bə̂d chɔb.

³⁵Mə nyaʼa yeʼe ɨ ghɨ ni wan mbaŋə̀ goŋ ətu mbɨ i mbǎʼ, wan əyi goŋ ətu mbɨ i nɨŋ, fɔrɨ ni ɨwi wan goŋ ətu mbɨ ɨŋgɔb nom.

³⁶Bə̂d pə̀n wə̀d bɨrɨ yeʼ bə̂d rɨŋga nəb məd.

³⁷“Wə̀d mɔʼɔ we nɨ ghaʼ i mbǎʼ kɨ̀ i nɨŋ chè əmɨ, rɨka kùʼ i nɨ yeʼ mɨ ə̀mə̀ə̀nɨ̀-ɨnû. Wə̀d mɔʼɔ we nɨ ghaʼ i wan mbaŋə̀ kɨ̀ i wan əyi chè əmɨ, rɨka kùʼ i nɨ yeʼ mɨ ə̀mə̀ə̀nɨ̀-ɨnû.

³⁸Wə̀d mɔʼɔ we nɨ chəi wɨ̀ beʼ e əzed ə baʼnɨ beenɨ əbɔʼ num, rɨka kùʼ i nɨ yeʼ mɨ ə̀mə̀ə̀nɨ̀-ɨnû.

³⁹Wə̀d mɔʼɔ we nɨ kə̀b nuŋ i ɨ̀tènɨ̀ bɨrɨ sam ɨ̀tènɨ̀ we. We nɨ sam i ɨ̀tènɨ̀ ɨmbə̀ʼ əmɨ bɨrɨ wɨrɨ jɨg ɨ̀tènɨ̀ we.

⁴⁰“Wə̀d mɔʼɔ we nɨ nɨŋ əwən, fə bə̀ nɨŋ əmɨ. Wə̀d mɔʼɔ we nɨ nɨŋ əmɨ, fə bə̀ nɨŋ wə̀d we nɨ nyaʼa tom əmɨ.

⁴¹Wə̀d mɔʼɔ we nɨ nɨŋ wə̀d ɨ̀kə̀n Ŋwìə̀ ɨmbə̀ʼ ɨghəm nɨ məd yɨə wə̀d ɨ̀kə̀n Ŋwìə̀, bɨrɨ nɨŋ ɨchɔʼ ə̀fàʼì wə̀d ɨ̀kə̀n Ŋwìə̀. Wə̀d mɔʼɔ we nɨ nɨŋ wə̀d we nɨə ghɨ̀ ɨnû nɨ kuʼnɨ ɨmbə̀ʼ ɨghəm nɨ məd wɨə ghɨ̀ ɨnû nɨ kuʼnɨ, bɨrɨ nɨŋ ɨchɔʼ ə̀fàʼì wə̀d nɨə ghɨ̀ ɨnû nɨ kuʼnɨ.

⁴²Wə̀d mɔʼɔ we nɨ naʼ ka àbei toʼ mɨnib zwɨrɨ-zwɨrɨ əmbɨ wɨ kwa mɔʼɔ rəbɔʼ mbɔ̂ ɨmbə̀ʼ ɨghəm nɨ məd yɨ mɨ ə̀mə̀ə̀nɨ̀-ɨnû, njɨ mə ghà rəsìʼ ɨ nən ni, ka wɨ bɨrɨ nim i i ɨchɔʼ ə̀fàʼì.”