Read Fɨso Fi Matiù 14 Bible Online

Matiù 14 - Fɨso Fi bible

Matiù 14

¹À nyaʼa ənɨ ə nyùmə̀ we, Herɔ̀d we nɨ nyaʼə tùmbɨ̀ ə Galiliî nyaʼa zu mɨkâ Yeso.

²Wɨ̀ nyaʼa zu əne ghà əmbɨ mbi bə̂d ə̀fàʼì ni, “Mbaŋə̀ zɔ̂ yɨə Jɔ̌n we nɨ nyaʼə nàʼ mɨnib nɨ fə zwemə. À yɨ əton nɨ wɨ̀ berɨ ɨka nɨ ghɨ ɨnû yiirɨ.”

³Herɔ̀d nyaʼa kɔndɨ əne ɨmbə̀ʼ ɨghəm nɨ wɨ̀ nyaʼa ghɨ̀ ni mbɨ gywɨ̀ ə Jɔ̌n, kod, wò zɨ̀ ə ndəŋ dè ə Hèrɔdiàs. Hèrɔdiàs yɨə nyaʼə ɨwi Filip, nɨ nyaʼə aŋgɔb Herɔ̀d, àyɨə Herɔ̀d nyaʼa nɨŋ əməd ənɨ i ɨwi.

⁴Jɔ̌n wɨə nyaʼə kɨə ghà əmbɨ Herɔ̀d ni, “Chəi ta rɨkə chwiə ni à nam ə Hèrɔdiàs.”

⁵Əne Herɔ̀d wɨə nyaʼə kə̀bə̀ ni njɨ tə zwiirɨ əməd, àyɨə ɨ wɨə nyaʼə bɔə bə̂d, ɨmbə̀ʼ ɨghəm nɨ mbɨ nyaʼa ben ni Jɔ̌n yɨə nyaʼə wə̀d ɨ̀kə̀n Ŋwìə̀.

⁶À nyaʼa ɨgwɨ əni ze nɨ mbɨ nyaʼa gywɨ ə Herɔ̀d, wan əyi Hèrɔdiàs nyaʼa bin ɨfě bə̂d mɨ̀jìm mbe nɨ nyaʼa ənɨ ənû ze. Əze ə nyaʼa ghɨ̀ ni fîŋ Herɔ̀d bɔŋ əku.

⁷Əne wɨ̀ nyaʼa kàn bə̀ kàʼ wan əyi we ni tə bɨrɨ naʼ əghɨ ze nɨ wɨ̀ biirɨ.

⁸Ɨŋgɔb məd nyaʼa nyèŋ əməd ni wɨ̀ wo ghà əmbɨ Herɔ̀d ni, “Mə kə̀b ni à naʼ ətu ə Jɔ̌n we nɨə nàʼə̀ mɨnib ɨ num əgha tɨ̀nîn ɨŋga əjeenɨ əkaŋ.”

⁹Ɨfɔ̂n we nyaʼa kàŋ kə̀nə̀, àyɨə ɨchî nɨ wɨ̀ fə kəʼ kàn ɨfě bə̂d mbe nɨ nyaʼa əŋgu, wɨ̀ nyaʼa ghà ni mbɨ naʼ ətu ze ɨ bɔ.

¹⁰Əne wɨ̀ nyaʼa chà bə̂d ni mbɨ wo sob ətu ə Jɔ̌n ə nəb ndəŋ,

¹¹zɨ̀ ɨŋga əjeenɨ əkaŋ wò nàʼ əmbɨ wan əyi we. Wɨ̀ nyaʼa nɨŋ wò nàʼ əmbɨ i nɨŋ.

¹²Mə̀mə̀ə̀nɨ̀-ɨnû Jɔ̌n nyaʼa zu ənû ze, wò nɨŋ tɨ̀gùm əməd wò tweŋɨ. Mbɨ nyaʼa tweŋ əne wò ghà əmbɨ Yeso.

¹³Ənɨ Yeso nyaʼa zu ənû ze nɨ mbɨ nyaʼa ghɨ̌ ənɨ Jɔ̌n, wɨ̀ nyaʼa nɔ̀ʼ rɨ əsɨ ze ɨŋga əbaŋ ɨgyɨ̀, wò rə̀zìʼ wi əsɨ nɨ chə nyaʼa i bə̂d əŋgu. Ənɨ mɨnɔ̂n bə̂d mbe nyaʼa zu ni wɨ̀ fə nɔ̀ʼ rɨ əsɨ ze, mbɨ nyaʼa bə̀ nɔ̀ʼ rɨŋga mbə ɨsɨ beenɨ əbɔʼ məd ɨwu.

¹⁴Ənɨ wɨ̀ nyaʼa jwɨ rɨŋga əbaŋ ɨgyɨ̀ ze wò əsaŋ, wɨ̀ nyaʼa zə bə̂d kwàʼ mɨ̀nɔnɔʼ. Ə̀kə̀n ə nyaʼa swi ɨŋga fîŋ məd ɨmbə̀ʼ bə̂d mbe, əne wɨ̀ nyaʼa vɨ̀ mbe nɨ nyaʼə wɔ̀nə̀.

¹⁵À nyaʼa sɨ ɨkwirɨ kwirɨ, mə̀mə̀ə̀nɨ̀-ɨnû mbe nyaʼa wò əsɨ məd pè ghà ɨ bɔ ni, “Nyùmə̀ fə kən chè əku, chəi bə̂d ə bə̀ chub əgha. Əne gha mɨnɔ̂n bə̂d mbɔ̂ wo əwən, ɨmbə̀ʼ ɨ mbe tɨ mbɨ wo zon ɨghɨjɨg ɨŋga ɨsɨ mbe nɨ yeʼ ɨban ɨban.”

¹⁶Yeso nyaʼa wììrɨ̀ ni, “Chəi əton nɨ mbɨ bɨrɨ wò. Mbə̀ naʼ əghɨ ə mɔʼɔ əmbɨ mɨ̀mə̌d ni mbɨ jɨg!”

¹⁷Mbɨ nyaʼa wììrɨ̀ ni, “Tɨ̀ berɨ àmei chiŋ ŋgə̀ŋ rɨ̀tân mbɨ əgwi ə be.”

¹⁸Yeso nyaʼa ghà ni, “Mbə̀ nɨŋ yeʼe naʼ ɨ num əgha.”

¹⁹Wɨ̀ nyaʼa nɨŋ əne ghà əmbɨ mɨnɔ̂n bə̂d mbe ni mbɨ chub ɨgwɨ ɨfu. Ənɨ mbɨ nyaʼa chubɨ, wɨ̀ nyaʼa nɨŋ chiŋ ŋgə̀ŋ te rɨ̀tân mbɨ əgwi ze əbe, neŋ ɨkaŋ, kɔŋgɨ ə Ŋwiə̀, bəʼrɨ, nàʼ əmbɨ mbi mə̀mə̀ə̀nɨ̀-ɨnû ni mbɨ naʼ əmbɨ mɨnɔ̂n bə̂d mbe.

²⁰Mbɨ nyaʼa nɨŋ nàʼ, əne mɨ̀mə̌d mɨjìm nyaʼa jɨg kod. Mə̀mə̀ə̀nɨ̀-ɨnû mbe nyaʼa fetɨ tɨkə te nɨ nyaʼa buʼu, tɨ swi mbɨ̀rɨkaʼ wum chɔ̀b rɨ̀be.

²¹Mbaŋə̀ te nɨ nyaʼa jɨgɨ yɨə nyaʼa ɨghabɨ ə chuʼ rɨ̀tân, nɨ chəi mbɨ nyaʼa taŋ məyi fɔrɨ bɔn.

²²Mbɨ nyaʼa mɨ jɨg ə jɨgɨ màànɨ̀, Yeso nyaʼa ghà əmbɨ mbi mə̀mə̀ə̀nɨ̀-ɨnû ni mbɨ nyɨ əbaŋ ɨgyɨ̀ bè baanɨ wò ɨmbì ɨ bɔ ɨnjin wə. Wɨ̀ nyaʼa tə̀n ənjìm ɨ ghɨ ni mɨnɔ̂n bə̂d mbe wo əwən.

²³Ənɨ wɨ̀ nyaʼa fə ghɨ ni mbɨ wò əwən, wɨ̀ nyaʼa kɔʼ wò ɨkaŋ ɨwum ɨ kɔŋgɨ ə Ŋwiə̀ tə̀zìʼ wi. À nyaʼa sɨ ɨkwirɨ ɨkwirɨ, ɨ wɨə nyaʼa kɨrɨ əŋgu tə̀zìʼ wi,

²⁴àyɨə əbaŋ ze ə nyaʼa fə wò əgha ə se ɨŋga ɨgyɨ̀. Əfim nɨ nyaʼə yeʼe əba ɨfě nyaʼə tinə mɨnib mbɨ nun əbaŋ ze.

²⁵À nɨə sɨ ənjɨtuʼ, Yeso nyaʼə yèn ɨgwɨ ə sà ze wò əsɨ mbi mə̀mə̀ə̀nɨ̀-ɨnû.

²⁶Ənɨ mə̀mə̀ə̀nɨ̀-ɨnû mbe nyaʼa zə əməd ənɨ wɨə nyaʼə yèn ɨgwɨ ə sà ze, mbɨ nyaʼa bindɨ kwàʼ rɨŋgəʼ, əne ghà ni, “À yɨə wə̀d əfub!” Mbɨ nyaʼa kyeŋ ɨmbə̀ʼ ɨghəm nɨ mbɨ nyaʼə bɔə.

²⁷Yeso nyaʼa ghà əmbɨ mɨ̀mə̌d àmei əwu əwən ni, “Mbə̀ yim fîŋ! À yɨə mɔ̌. Tɨ mbə̀ bɔ ə!”

²⁸Pità nyaʼa ghà ɨ bɔ ni, “Ə̀nùŋɨ̀sɨg, à mɨ yeʼ àwɔ̀, ghǎ ni mə̀ yen ɨgwɨ ə sà yeʼe əsɨ ne.”

²⁹Yeso nyaʼa ghà ni, “Yeʼe!” Əne Pità nyaʼa jwɨ̀ rɨŋga əbaŋ ɨgyɨ̀, yèn ɨgwɨ ə sà ze wò əsɨ Yeso.

³⁰Àyɨə ənɨ wɨ̀ nyaʼa zə əfim ze, ənum ə nyaʼa san əməd, wɨ̀ kɔ nim əton ə sà ze. Əne, wɨ̀ nyaʼa kyeŋ ghà ni, “Ə̀nùŋɨ̀sɨg, chɨ əmɨ rəŋgəʼ.”

³¹Àmei əwu əwən, Yeso nyaʼa chà əbɔ, yim əməd, ghà ɨ bɔ ni, “E ɨbenɨ ə kə ɨmbə̀ʼ ə yè ə? À bid ɨmbə̀ʼ ə yè ə?”

³²Ənɨ mbɨ nyaʼa nyɨ əbaŋ ɨgyɨ̀ ze, əfim ze ə nyaʼa sobə.

³³Bə̂d mbe nɨ nyaʼa ɨŋga əbaŋ ɨgyɨ̀ ze nyaʼa wumnɨ əməd, ghàə̀ ni, “À yɨ rəsìʼ ni àwɔ̀ yɨə kàŋ ə Wan Ŋwiə̀.”

³⁴Ənɨ Yeso mbɨ mbi mə̀mə̀ə̀nɨ̀-ɨnû nyaʼa baanɨ ə sà ze, mbɨ nyaʼa wò təm ə Gènesarèt.

³⁵Ənɨ bə̂d mbe rɨŋga əsɨ ze nyaʼa zə əməd kyerɨ, mbɨ nyaʼa chà ɨŋgam ɨŋga ɨsɨ jìm mbe nɨ nyaʼa ɨban ɨban, əne bə̂d nyaʼa nɨŋ mbə bə̂d əwɔn mɨjìm wò əsɨ məd.

³⁶Mbɨ nyaʼa buʼ ɨbɔ ɨ bɔ ni wɨ̀ saŋ bə̂d əwɔn mbe betɨ kaʼ àmei əchəŋ ə ngywɨ̌ əməd. Bə̂d mɨ̀jìm mbe nɨ nyaʼa betɨ ngywɨ̌ məd nyaʼa bɔtɨ.