Read Fɨso Fi Matiù 16 Bible Online

Matiù 16 - Fɨso Fi bible

Matiù 16

¹Mɨ̀Farisiî mbɨ mɨ̀Sadusiî nyaʼa wò əsɨ Yeso kə̀b kwaʼnɨ əməd. Əne mbɨ nyaʼa ghà ɨ bɔ ni wɨ̀ ghɨ ənû ə yiirɨ nɨ chwi ni à yɨə Ŋwìə̀ naʼ ɨka ɨ bɔ.

²Wɨ̀ nyaʼa wììrɨ̀ əmbɨ mɨ̀mə̌d ni, “À mɨ sɨ ɨkwirɨ kwirɨ, mbə mbɨə ghàə̀ ni, 'Ɨsɨ bɨrɨ bɔ̀ŋ, ɨmbə̀ʼ ɨghəm nɨ əton ɨkaŋ ə zɨə bàŋə̀.'

³À nɨə sɨ ɨsɔsɔ, mbə mbɨə ghàə̀ ni, 'Əfim ə bɨrɨ chè, ɨmbə̀ʼ ɨghəm nɨ əton ɨkaŋ ə zɨə bàŋə̀ ndwìʼnə̀.' Mbə kyerɨ ɨchî nɨ toʼrɨ ɨnû ɨmbə̀ʼ əton ɨkaŋ, àyɨə chəi mbə̀ kyerɨ ɨchî nɨ toʼrɨ ɨnweenɨ mbɔ̂ nɨə jwɨ̀ rɨ̀nîn.

⁴Ɨghəm bə̂d wɔ̂ rɨ̀nîn nɨə ghɨ̀ ɨnû rɨbɔ̀ŋ, nɨ chəi mbɨə nùŋə̀ tə fîŋ ɨgun ə Ŋwiə̀. Ɨ mbɨə kə̀bə̀ ni mə̀ ghɨ ənû ə yiirɨ, àyɨə chəi ənû ə yiirɨ ə mɔʼɔ nɨ mə̀ bɨrɨ ghɨ̀ chè rɨ ənɨ ənû ə yiirɨ ze nɨ nyaʼa ghɨ̌ ənɨ Jonà.” Wɨ̀ nyaʼa ghà əne, nɔ̀ʼ sàŋ mɨ̀mə̌d wo i.

⁵Ənɨ mə̀mə̀ə̀nɨ̀-ɨnû mbe nyaʼa pe ɨnjin ə sà ze, mbɨ nyaʼa zə ni mbɨ kəʼ nèb nɨ nɨŋ ŋgə̀ŋ.

⁶Yeso nyaʼa ghà əmbɨ mɨ̀mə̌d ni, “Mbə̀ chub ɨkyèʼe we əwən, ɨmbə̀ʼ ɨfuʼ mɨ̀Farisiî mbɨ wɨ mɨ̀Sadusiî we nɨə ghɨ̀ ni ŋgə̀ŋ kɔʼ.”

⁷Mbɨ nyaʼa kɔ ghǎ mbənə mbənə ni, “Ɨ wɨə ghà əne ɨmbə̀ʼ ɨghəm nɨ chəi tɨ̀ kəʼ nɨŋ ŋgə̀ŋ.”

⁸Yeso nyaʼa kyerɨ ənû ze nɨ mbɨ nyaʼə ghàə̀, əne wɨ̀ nyaʼa ghà ni, “Ə ɨbenɨ ə kàŋ kə! Mbə̀ kɨə ghà ɨmbə̀ʼ ɨchî nɨ chəi mbə̀ berɨ ŋgə̀ŋ ɨmbə̀ʼ ə yè ə?

⁹Chə wa kɨrɨ i ɨwe ətu ɨ nən ə? Chəi mbə̀ wɨrɨ kɔndɨ chiŋ ŋgə̀ŋ te rɨ̀tân nɨ mə̀ nyaʼa jə mbaŋə̀ chuʼ rɨ̀tân əŋgu ə? Mbə nyaʼa fetɨ tɨkə te nɨ nyaʼa buʼu, tɨ jwɨ̀ mbɨ̀rɨkaʼ səʼ ə?

¹⁰Chəi mbə̀ bə wɨrɨ kɔndɨ chiŋ ŋgə̀ŋ te sambe nɨ mə̀ nyaʼa jə mbaŋə̀ chuʼ rɨ̀kwè əŋgu ə? Mbə nyaʼa fetɨ tɨkə te nɨ nyaʼa buʼu, tɨ jwɨ̀ mbɨ̀rɨkaʼ səʼ ə?

¹¹À kɨə ye sɨ ghɨ̀ nɨ chəi mbə̀ kyerɨ ni kaʼi ɨmbə̀ʼ ə ŋgə̀ŋ nɨ mə̀ kɨə kə̀ʼə̀ ghàm ə? Mbə̀ we əwən ɨmbə̀ʼ ɨfuʼ mɨ̀Farisiî mbɨ wɨ mɨ̀Sadusiî we nɨə ghɨ̀ə̀ ni ŋgə̀ŋ kɔʼ!”

¹²Ənɨ wɨ̀ nyaʼa gha əne, ɨtu mɨ̀mə̌d nyaʼa sɨ zeŋ ni chəi wɨə kə̀ʼə̀ ghàm ɨ nən ɨmbə̀ʼ ɨfuʼ we nɨə ghɨ̀ ni ŋgə̀ŋ kɔʼ. Wɨ̀ kə̀ʼ ghàmə̀ yeʼ ɨmbə̀ʼ ɨnû mbe nɨ mɨ̀Farisiî mbɨ mɨ̀Sadusiî ə chwiə.

¹³Ənɨ Yeso nyaʼa wo əbà əbeŋ ze rɨ ə Kàisàriyà Filipì, wɨ̀ nyaʼa biirɨ əmbɨ mbi mə̀mə̀ə̀nɨ̀-ɨnû ni, “Bə̂d kɨə ghàə̀ ni Wan Wə̀d yɨə we ə?”

¹⁴Mbɨ nyaʼa wììrɨ̀ ni, “Bə̂d mɔʼɔ mbɨə ghàə̀ ni àwɔ̀ yɨə Jɔ̌n we nɨ nyaʼə nàʼ mɨnib. Mbɨ cherə mbɨə ghàə̀ ni àwɔ̀ yɨə Èlaijà. Mbɨ cherə ghàə̀ ni àwɔ̀ yɨə Jèrèmià, kɨ̀ wə̀d ɨ̀kə̀n Ŋwìə̀ cherə.”

¹⁵Wɨ̀ nyaʼa biirɨ əmbɨ mɨ̀mə̌d ni, “À yeʼ mbə̀nə, mbə̀ ghà ni mɔ̌ yɨə we ə?”

¹⁶Saimon Pità nyaʼa wììrɨ̀ ni, “Àwɔ̀ yɨə Wə̀d we nɨ Ŋwiə̀ zɔʼɔ, yeʼ Wan Ŋwìə̀ we nɨ yeʼ ɨkǎ.”

¹⁷Yeso nyaʼa ghà ɨ bɔ ni, “Ŋwìə̀ zɨ əbɔrəbɔd ɨgwɨ ne, kyɨə Saimòn, wan Jɔ̌n! ɨmbə̀ʼ ɨghəm nɨ kaʼi wə̀d mɨ̀sɔŋɨchù chwiə ənû zɔ̂ ɨ ne. À yɨ mɨ Mbǎʼ we nɨ yeʼ ɨkaŋ chwi ɨ ne.

¹⁸Əne mə ghà ɨ ne ni, àwɔ̀ yɨə Pità, [9] mə bɨrɨ bɔm mɨ ɨfetɨ ɨgun ɨwɔ̌ wɔ̂, ɨchî nɨ ka àbei ɨvɨ, ka wɨ bɨrɨ nimnɨ i ɨfetɨ we.

¹⁹Mə bɨrɨ naʼ əfiʼ tɨ ənɨ ənû ɨfɔ̀n rɨkaŋ ɨ ne. Ənû ze nɨ à ton ɨgwɨ ə si, Ŋwìə̀ bɨrɨ bɨ ton ɨkaŋ. Ənû ze nɨ à ben ɨgwɨ ə si, Ŋwìə̀ bɨrɨ bɨ ben ɨkaŋ.”

²⁰Ənɨ wɨ̀ nyaʼa gha əne, wɨ̀ nyaʼa sɨ jeŋgɨ patɨ mə̀mə̀ə̀nɨ̀-ɨnû mbe ni tɨ mbɨ tɔ gha əmbɨ wə̀d mɔʼɔ ni tə yɨə Wə̀d we nɨ Ŋwiə̀ zɔʼɔ.

²¹Ɨ kɔ rɨ ənɨ ə nyùmə̀ we, Yeso nyaʼa kɔ ghǎ əmbɨ mbi mə̀mə̀ə̀nɨ̀-ɨnû ni tə berɨ wò ə Jèrusalèm pè jeŋgɨ zə ŋgəʼ ɨŋga rɨkyerɨ-ɨbɔ bə̂d kyeŋ mbe rɨŋga əbeŋ, ɨŋga rɨkyerɨ-ɨbɔ bə̂d kyeŋ mbe rɨ ə mbàn Ŋwìə̀ bə̀ fɔrɨ ɨŋga rɨkyerɨ-ɨbɔ məchwiə̀ rɨ̀kə̌. Mbɨ bɨrɨ zwiirɨ əməd. À sɨ ɨgwɨ ɨni tad, Ŋwìə̀ zwemnɨ əməd.

²²Pità nyaʼa nɨŋ əməd kɔ ghàm əbɔʼ əməd ghàə̀ ni, “Chǎʼ! Tɨ Ŋwìə̀ ben i, kyɨ Ə̀nùŋɨ̀sɨg! Ka ɨkwɨ ənû wɔ̂ bɨrɨ ghɨ i ənɨ ə ne.”

²³Àyɨə wɨ̀ nyaʼa bèŋ ghà əmbɨ Pità ni, “Àwɔ̀ Satàn, nɔʼ e rɨ ɨban num! À wɨə kən ɨnə̂njɨ̀ ɨ num, ɨmbə̀ʼ ɨghəm nɨ chəi à nuŋ e ɨkɔndɨ ɨgun ɨghɨ mbe nɨ Ŋwìə̀ kəbɨ. À nùŋ yeʼ ɨgun mbe nɨ bə̂d mɨ̀sɔŋɨchù kəbɨ.”

²⁴Yeso nyaʼa ghà əmbɨ mbi mə̀mə̀ə̀nɨ̀-ɨnû ni, “Wə̀d mɔʼɔ mɨ kə̀b yeʼe əbɔʼ num, wɨ̀ ton ɨnû mɔʼɔ mbe nɨ nyamnyod məd ə feenɨə, bèʼ e əzed ə baʼnɨ, beenɨ əbɔʼ num,

²⁵ɨmbə̀ʼ ɨghəm nɨ wə̀d mɔʼɔ we nɨə kə̀b nuŋ i ɨ̀tènɨ̀ bɨrɨ sam ɨ̀tènɨ̀ we. We nɨ sam i ɨ̀tènɨ̀ ɨmbə̀ʼ əmɨ, bɨrɨ wɨrɨ jɨg ɨ̀tènɨ̀ we.

²⁶Njìm nɨ wə̀d bɨrɨ jɨg əwù ze nɨ wɨ̀ berɨ ɨsɨg wɔ̂ jìm əne sam i ɨ̀tènɨ̀ kɨə yè? Kɨ̀ wə̀d bɨrɨ naʼ ye ɨ kob ɨ̀tènɨ̀ we əŋgu ə?

²⁷Wan Wə̀d bɨrɨ yeʼe mbɨ mbi mbɨ̀aŋgɨrə̀ mbɨ ɨka we nɨ Mbǎʼ məd naʼ ɨ bɔ. Wɨ̀ bɨrɨ pè chɔʼ ə̀fàʼì wə̀d mɔʼ mɔʼ ɨchî nɨ wɨ̀ fàʼi.

²⁸Mə ghà rəsìʼ ɨ nən ni chəi bə̂d mɔʼɔ rəbɔʼ mbɔ̂ nɨ təmbɨ əgha bɨrɨ kwɨ ə zɨ rɨ tɨ̀ mbɨ zə Wan Wə̀d nɨə yeʼe ɨghabɨ ɨfɔ̀n.”