Read Fɨso Fi Matiù 22 Bible Online

Matiù 22 - Fɨso Fi bible

Matiù 22

¹Yeso nyaʼa bə̀ yì ghà ɨnû mɨgɨ əmbɨ mɨ̀mə̌d ni,

²“Ənû ɨfɔ̀n rɨkaŋ yɨ ɨghabɨ ɨchî nɨ ɨfɔ̀n mɔʼɔ nyaʼa kaʼ əchwɨ̂ ɨnamɨ əmbɨ i wan mbaŋə̀.

³Wɨ̀ nyaʼa tom mbi bə̂d ə̀fàʼì ni mbɨ wo tɔŋ bə̂d mbe nɨ wɨ̀ kəʼ won ənɨ ɨnamɨ we. Bə̂d ə̀fàʼì mbe nyaʼa wò tɔŋə, àyɨə chəi mbɨ nyaʼa yeʼe.

⁴Wɨ̀ nyaʼa yì tom bə̂d ə̀fàʼì cherə ghà ni, 'Mbə̀ gha əmbɨ ə bə̂d mbe nɨ mə̀ won ni nyùmə̀ fə kùʼ i. Mə fə wàd ɨjɔʼrɨ pɔ̀ŋ bə̀ wàd mbɨ̀rɨkun mbe nɨ mə̀ jə mbɨ jeŋgɨ faŋ. Ɨghɨjìm fə sɨ ə si. Mbə̀ sɨ yeʼe jɨg ɨnamɨ we.'

⁵Bə̂d mbe nyaʼa zu ənû ze, àyɨə chəi mbɨ nyaʼa tɔŋ ənɨ ənù. Mbɨ nyaʼa jwɨ̀ ə. Mbɨ mɔʼɔ nyaʼa wò əwən ə mbeŋ, mbɨ cherə nyaʼa wò əwən ənɨ mbə əsɨ ɨwin.

⁶Ə̀bùʼ ə bə̂d ə nyaʼa gywɨ̀ bə̂d ə̀fàʼì mbe som kwàʼ ɨchî rɨbɔ̀ŋ, zwiirɨ.

⁷Ɨfɔ̂n we nyaʼa sə ɨtəm, əne wɨ̀ nyaʼa chà mbi mɨ̀sɔgyɨ̀ ni mbɨ wò nimnɨ bə̂d mbe nɨ nyaʼa zwiirɨ mbi bə̂d ə̀fàʼì mbe, bə̀ tɔ̀n əsɨ mɨ̀mə̌d ze.

⁸Wɨ̀ nyaʼa ghà əmbɨ mbi bə̂d ə̀fàʼì ni, 'Nyùmə̀ nɨ jɨg əchwɨ̂ ɨnamɨ zɔ̂ fə kùʼ i, àyɨə chəi bə̂d mbe nɨ mə̀ kəʼ won nyaʼa kùʼ nɨ jɨg əchwɨ̂ zɔ̂.

⁹Mbə̀ wo ɨtu ɨzib, won bə̂d mɨjìm mbe nɨ mbə̀ zə, ɨmbə̀ʼ mbɨ yeʼe jɨg əchwɨ̂ zɔ̂.'

¹⁰Əne bə̂d ə̀fàʼì mbe nyaʼa wò ɨtu ɨzib, pè fetɨ bə̂d mɨ̀jìm mbe nɨ mbɨ nyaʼa zə, əne yɨ mbe nɨ nyaʼə ghɨ̀ ɨnû nɨ kuʼnɨ fɔrɨ mbe nɨ nyaʼə ghɨ̀ ɨnû rɨbɔ̀ŋ. Bə̂d mbe nɨ mbɨ nyaʼa won nyaʼa wò nyɨ ɨŋga ɨ̀chàm, wɨ swi.

¹¹“Ənɨ ɨfɔ̂n we nyaʼa wò nyɨ ɨŋga ɨ̀chàm we ɨ neŋ bə̂d mbe nɨ nyaʼa yeʼe ənɨ əchwɨ̂ ɨnamɨ ze, wɨ̀ nyaʼa zə mbaŋə̀ mɔʼɔ nɨ chəi wɨ̀ nyaʼa zɨ ngywɨ̌ ɨnamɨ.

¹²Əne wɨ̀ nyaʼa biirɨ ɨ bɔ ni, 'Mɨ sə̀ʼ! À chè rɨ yè nyɨ ɨŋga nəb əgha nɨ chəi à zɨ̌ ngywɨ̌ ɨnamɨ ə?' Chəi mbaŋə̀ ze nyaʼa berɨ ənû nɨ ghà.

¹³Əne ɨfɔ̂n we nyaʼa ghà əmbɨ mbi bə̂d ə̀fàʼì ni, 'Mbə̀ kod əməd, ɨbɔ fɔrɨ ɨwu, màʼ ɨsɨg ɨŋga ɨsɨ firɨ, nɨ yeʼ əsɨ nɨ bə̂d bɨrɨ sɨə zə̀ʼə̀ kud əsɔŋ.'

¹⁴Ŋwìə̀ wɨə tɔŋə bə̂d mɨ̀nɔnɔʼ, àyɨə ɨ wɨə chɔʼ àmei mbɨ rɨpiî.”

¹⁵Mɨ̀Farisiî nyaʼa jwɨ̀ wò taŋ ɨchî nɨ mbɨ bɨrɨ zɨ ətam ɨ bɔ ənɨ ɨŋgam məd.

¹⁶Əne mbɨ nyaʼa tom mbə mə̀mə̀ə̀nɨ̀-ɨnû mbɨ ə bə̂d mbe nɨ nyaʼə tìmbɨ̀ ə Herɔ̀d əsɨ məd ni mbɨ wo ghà ɨ bɔ ni, “Əchwiə̀-ɨnû, tɨ̀ kyerɨ ni à wɨə ghà rəsìʼ, fɔrɨ ni à wɨə chwi ɨnû rəsìʼ ɨmbə̀ʼ ɨchî nɨ Ŋwìə̀ kəbɨ ni bə̂d chubɨ. Chəi àwɔ̀ ə bɔə bə̂d ɨmbə̀ʼ ɨghəm nɨ chəi àwɔ̀ ə ghɨ̀ ɨghə.

¹⁷Gha ɨ na rɨ̀nîn, e ɨkɔndɨ kɨ ni yè ə? Tɨkə ə wa chwiə ni tɨ̀ maʼ mɨ̀tagsɨ̀ əmbɨ Kaisà, kɨ̀ chə ə?”

¹⁸Yeso nyaʼa kyerɨ mɨnaŋ mbe nɨ mbɨ nyaʼa taŋɨ, əne wɨ̀ nyaʼa ghà ni, “Mbə yɨ ɨbekɨ bə̂d! Mbə̀ kɨə kə̀b kwaʼnɨ əmɨ ɨmbə̀ʼ ə yè ə?

¹⁹Mbə̀ chwi ɨkab we nɨ bə̂d ə màʼə̀ tagsɨ̀ əŋgu ɨ num!” Mbɨ nyaʼa nàʼ ɨkab ətənɨ ɨ bɔ.

²⁰Əne wɨ̀ nyaʼa biirɨ əmbɨ mɨ̀mə̌d ni, “Ɨfě wɔ̂ mbɨ ɨkum wɔ̂ kɨ wɨ we ə?”

²¹Mbɨ nyaʼa wììrɨ̀ ni, “À yɨ wɨ Kaisà.” Əne wɨ̀ nyaʼa ghà əmbɨ mɨ̀mə̌d ni, “Mbə̀ nàʼ ɨghɨ Kaisà əmbɨ Kaisà, bə̀ nàʼ ɨghɨ Ŋwiə̀ əmbɨ ə Ŋwiə̀.”

²²Ənɨ mbɨ nyaʼa zu ənû ze, mbɨ nyaʼa yiirɨ, əne sàŋ əməd wò əwən.

²³Àmei əni ze, mɨ̀Sadusiî, nɨ nyaʼə ghàə̀ ni chəi bə̂d bɨrɨ zwemə, nyaʼa wò əsɨ Yeso pè biirɨ ɨ bɔ ni,

²⁴“Əchwiə̀-ɨnû, Mose nyaʼa ghà ni, 'Mbaŋə̀ mɨ kwɨ nɨ chəi wɨ̀ berɨ bɔn, aŋgɔb məd berɨ nam ɨku əyi we ɨmbə̀ʼ gywɨ bɔn mbɨ məd nɨ bɨrɨ yeʼ mbɨ aŋgɔb məd we nɨ nyaʼa kwɨ.'

²⁵Tɨ̀nîn, bɔŋgɔb mɔʼɔ sambe nyaʼa əkaʼ na. Wɨ rɨtu nyaʼa nam kwɨ nɨ chəi wɨ̀ berɨ bɔn, əne aŋgɔb məd nyaʼa nam ɨku əyi we.

²⁶À yɨ ɨchî nɨ zɨ nyaʼa ghɨ ənɨ aŋgɔb we nɨ nyaʼa beenɨ, bə̀ fɔrɨ ənɨ we nɨ nyaʼa pe ənɨ mbɨ mɨtad, əne əne wò pè ənɨ mbɨ sambe.

²⁷Əyi we nyaʼa bə̀ sɨ nwìə̀ kwɨ i.

²⁸Ənɨ bə̂d bɨrɨ zwemə, əyi we kɨə wo yeʼ ɨwi we rəbɔʼ bɔŋgɔb mbɔ̂ sambe, ɨchî nɨ mɨ̀mə̌d mbe mɨjìm nyaʼa nam əməd ə?”

²⁹Yeso nyaʼa wììrɨ̀ əmbɨ mɨ̀mə̌d ni, “Mbə fə fèbə̀, ɨmbə̀ʼ ɨghəm nɨ chəi mbə̀ kyerɨ ənû ze nɨ yeʼ ɨŋga Ə̀ŋwàʼnɨ̀ ə Ŋwiə̀, kɨ̀ bè kyerɨ ɨka Ŋwiə̀.

³⁰Ənɨ bə̂d bɨrɨ zwemə, chəi mbɨ bɨrɨ wɨrɨ nam, chəi mbɨ bɨrɨ wɨrɨ naʼ bɔn ə nəb ɨnamɨ. Bə̂d bɨrɨ sɨ ɨghabɨ mbɨ̀aŋgɨrə̀ mbe nɨ yeʼ ɨkaŋ.

³¹À yeʼ ɨmbə̀ʼ ənû nɨ zwemə, chəi mbə̀ kɨrɨ foŋ ənû ze nɨ Ŋwiə̀ nyaʼa gha ɨ nən ə? Wɨ̀ nyaʼa ghà ni,

³²'Mɔ̌ yɨə Ŋwìə̀ Abràham, Ŋwìə̀ Aizìk mbɨ Ŋwìə̀ Jakɔ̂b.' Kaʼ məd yɨ i Ŋwìə̀ ɨvɨ bə̂d. Məd yɨə Ŋwìə̀ bə̂d mbe nɨ yeʼ ɨkǎ.”

³³Ənɨ mɨnɔ̂n bə̂d mbe nyaʼa zu ənû ze, mbɨ nyaʼa yiirɨ ɨnû mbe nɨ wɨ̀ nyaʼə chwiə.

³⁴Ənɨ mɨ̀Farisiî nyaʼa zu ni Yeso fə kubrɨ ɨchû mɨ̀Sadusiî, mbɨ nyaʼa fetɨ wò əsɨ məd.

³⁵Wɨ mɔʼɔ rəbɔʼ mɨ̀mə̌d nɨ nyaʼə əchwiə̀ rɨ̀kə̌ nyaʼa biirɨ ɨŋgam ɨ bɔ ɨmbə̀ʼ kwaʼnɨ əməd. Wɨ̀ nyaʼa biirɨ ni,

³⁶“Əchwiə̀-ɨnû, ɨkə we nɨ che tɨkə rɨjìm kɨ wi?”

³⁷Yeso nyaʼa wììrɨ̀ ɨ bɔ ni, “À berɨ ghaʼ Ə̀nùŋɨ̀sɨg e Ŋwìə̀ ənɨ e fîŋ jìm, ənɨ e ɨ̀tènɨ̀ jìm bə̀ fɔrɨ ənɨ te rɨkɔndɨ rɨjìm.

³⁸Ɨkə wɔ̂ yɨ we nɨ che tɨkə rɨjìm. À yɨə bə̀ wɨ rɨtu.

³⁹We nɨ beenɨ wɨ əndəŋ əndəŋ ni, 'À berɨ ghaʼ wə̀d we nɨ tindɨ ɨban ne ɨchî nɨ à ghaʼ e nyamnyod.'

⁴⁰Tɨkə rɨjìm mbɨ ɨnû jìm mbe nɨ bə̂d ɨ̀kə̀n Ŋwiə̀ nyaʼa ŋwaʼnɨ yɨ rɨ ənɨ tɨkə tɔ̂ rɨ̀be.”

⁴¹Ənɨ mɨ̀Farisiî nyaʼa fetɨ əsɨ ə fibɨ̀, Yeso nyaʼa biirɨ əmbɨ mɨ̀mə̌d ni,

⁴²“Mbə̀ kɔn əzən ni ye ɨmbə̀ʼ Wə̀d we nɨ Ŋwiə̀ zɔʼ ə? À kɨə wan tɨ ənɨ əghaŋ ə we ə?” Mbɨ nyaʼa wììrɨ̀ ni, “À yɨə wan tɨ ənɨ əghaŋ ə Dèvîd.”

⁴³Yeso nyaʼa biirɨ əmbɨ mɨ̀mə̌d ni, “Zɨə nyaʼa sɨ chè rɨ ye, Əzwî ə Ŋwiə̀ ə ŋwè ə Dèvîd, wɨ̀ tɔŋ əməd ənɨ Ə̀nùŋɨ̀sɨg ə? Dèvîd nyaʼa ghà ni,

⁴⁴'Ə̀nùŋɨ̀sɨg nyaʼa ghà əmbɨ mɨ Ə̀nùŋɨ̀sɨg ni, chub ənɨ mɨ əbɔ ə jɨgɨ, pè ənɨ mə̀ nuŋ mbe bə̂d pə̀n əton mbe ɨwu.'

⁴⁵Dèvîd mɨ yeʼə tɔŋ əməd ənɨ Ə̀nùŋɨ̀sɨg, wɨ̀ sɨ wɨrɨ yeʼ wan tɨ ənɨ əghaŋ əməd rɨ ye ə?”

⁴⁶Chəi wə̀d nɨ tɨ̀ wɨ̀ nyaʼa wììrɨ̀ ənû ze nɨ wɨ̀ nyaʼa biirɨ. Ɨ kɔ rɨ əni ze, chəi wə̀d nɨ tɨ̀ wɨ̀ nyaʼa wɨrɨ yim fîŋ biirɨ ənû ə mɔʼɔ ɨ bɔ.