Read Fɨso Fi Matiù 25 Bible Online

Matiù 25 - Fɨso Fi bible

Matiù 25

¹“Ənɨ ə nyùmə̀ we nɨ Kristo bɨrɨ wɨrɨ yeʼe, ənû ɨfɔ̀n rɨkaŋ bɨrɨ yeʼ ɨghabɨ ɨchî nɨ bɔn məyi wum nɨ nyaʼa nɨŋ mbə ɨnam jwɨ̀ wo bòm ɨnom ɨgən.

²Mbɨ mɨtân nyaʼa fundə. Mbɨ mɨtân nyaʼa berɨ ɨwe.

³Mbe nɨ nyaʼa fundə nyaʼa nɨŋ mbə ɨnam, àyɨə chəi mbɨ nyaʼa nɨŋ mɨwud ə̀nàm cherə.

⁴Mbe nɨ nyaʼa berɨ ɨwe nyaʼa nɨŋ mbə ɨnam bə̀ yim mɨwud ə̀nàm cherə.

⁵Ɨchî nɨ ɨnom ɨgən we nyaʼa tan nɨ yeʼe, mɨ̀mə̌d mbe mɨ̀jìm nyaʼa kɔ chiŋ ŋgwenɨ əne feŋgɨ ə ŋgwenɨ.

⁶“À nɨə sɨ ɨzimɨ ka, wə̀d mɔʼɔ nyaʼa kyeŋ rɨ̀kǎ ghà ni, 'Ɨnom ɨgən we fə yeʼe i, mbə̀ jwɨə wò bòm əməd!'

⁷Ənɨ bɔn məyi mbe nyaʼa zu ənû ze, mbɨ nyaʼa nɔ̀ʼ kɔ̀ʼrɨ tə ngywɨ̌ rɨ ɨnam.

⁸Mbe nɨ nyaʼa fundə nyaʼa ghà əmbɨ mbe nɨ nyaʼa berɨ ɨwe ni, 'Tɨ̀ buʼ ɨbɔ, mbə̀ naʼ mɨwud ə̀nàm mɔʼɔ ɨ na. Mba ɨnam mbɨə sɨə nimə.'

⁹Àyɨə mbe nɨ nyaʼa berɨ ɨwe nyaʼa wììrɨ̀ ni, 'Ɨghə̀m ka mbɨ bɨrɨ kuʼ i ɨ na bə̀ fɔrɨ ɨ nən. Mbə̀ wo zon mbən tɨ əmbɨ ə bə̂d mbe nɨə fènə̀.'

¹⁰Ənɨ mbɨ nyaʼa wo zon, ɨnom ɨgən we nyaʼa yeʼe. Mbe nɨ nyaʼa fə tekɨ ə ɨnyod nyaʼa wò nyɨ ə nəb mbɨ məd ɨ jɨg əchwɨ̂ ɨnamɨ ze. Mbɨ nyaʼa nyɨ əne wùb ɨchû nəb.

¹¹“Ənɨ əmad ə nyaʼa zombɨ, bɔn məyi mbə̂ nyaʼa bə̀ yeʼe pè kɔ gha ni, 'Masà! Masà! Fiʼ nəb ɨ na!'

¹²Wɨ̀ nyaʼa wììrɨ̀ ni, 'Mə ghà rəsìʼ ɨ nən ni chəi mə̀ kyerɨ əwən.'

¹³“Əne mbə̀ chub ɨkyèʼe, ɨmbə̀ʼ ɨghəm nɨ chəi mbə̀ kyerɨ əni ze kɨ̀ ə nyùmə̀ we nɨ Wan Wə̀d bɨrɨ wɨrɨ yeʼe.

¹⁴“Ənɨ ə nyùmə̀ we nɨ Kristo bɨrɨ wɨrɨ yeʼe, ənû ɨfɔ̀n rɨkaŋ bɨrɨ yeʼ ɨghabɨ ɨchî nɨ mbaŋə̀ mɔʼɔ nɨ nyaʼa kə̀b wò i ɨghanɨ nyaʼa tɔŋ mbi bə̂d ə̀fàʼì, əne zɨ̀ mbi ɨghɨ ɨŋga tɨkyerɨ-ɨbɔ mɨ̀mə̌d.

¹⁵Wɨ̀ nyaʼa nàʼ ɨ̀bàm ɨkab gôl tân əmbɨ wɨ fìbɨ̀, nàʼ ɨbe əmbɨ wɨ cherə, bə̀ nàʼ əmɔʼ mbɨ wɨ cherə. Wɨ̀ nyaʼa nàʼ ɨ̀bàm ɨkab gôl mbe əmbɨ mɨ̀mə̌d ɨgwɨ ɨchî nɨ tɨ̀ wə̀d mɔʼ mɔʼ rəbɔʼ mɨ̀mə̌d fàʼ mbɨ mbɨwən. Ənɨ wɨ̀ nyaʼa nàʼ əne, wɨ̀ nyaʼa nɔ̀ʼ wò i ɨghanɨ.

¹⁶Wə̀d ə̀fàʼì we nɨ nyaʼa nɨŋ ɨ̀bàm ɨkab gôl tân nyaʼa wò ghɨ̀ ɨwin, jɨg njìm ɨ̀bàm cherə tân.

¹⁷Əne bə̂, we nɨ nyaʼa nɨŋ ɨ̀bàm ɨkab gôl be, nyaʼa bə̀ jɨg njìm ɨ̀bàm cherə be.

¹⁸Àyɨə we nɨ nyaʼa nɨŋ ə̀bàm ɨkab gôl əmɔʼ nyaʼa wò toŋ ɨbɨgɨ, nə̀m ɨkab mbǎʼ ə̀fàʼì məd we ɨŋga.

¹⁹“Ənɨ əgha ə nyaʼa saarɨ, mbǎʼ ə̀fàʼì mɨ̀mə̌d we nyaʼa bə̀ndɨ̀ rɨ ɨghanɨ, pè kɔ nwendɨ i ɨkab mbɨ mɨ̀mə̌d.

²⁰Wə̀d ə̀fàʼì we nɨ nyaʼa nɨŋ ɨ̀bàm ɨkab gôl mbe tân, nyaʼa wò nyɨ mbɨ ɨ̀bàm cherə tân, pè ghà ɨ bɔ ni, 'Masà, à nyaʼa nàʼ ɨ̀bàm ɨkab gôl ɨ num tân. Zə, mə fə jɨg njìm ɨ̀bàm cherə tân.'

²¹Mbǎʼ ə̀fàʼì məd we nyaʼa ghà ɨ bɔ ni, 'À fə ghɨ̀ ɨchî chɔ̀m, kyɨə wə̀d ə̀fàʼì chɔ̀m nɨə fàʼ ənɨ i fîŋ jìm. Ɨchî nɨ à fàʼ ənɨ e fîŋ jìm mbɨ ɨghɨ rɨpiî, mə bɨrɨ nuŋ əwe ɨgwɨ ɨghɨ nɔnɔʼ. Nyɨ ə nəb tɨ̀ ghɨ ɨghaʼi!'

²²“Wə̀d ə̀fàʼì we nɨ nyaʼa nɨŋ ɨ̀bàm ɨkab gôl mbe be nyaʼa wò nyɨ ghà ɨ bɔ ni, 'Masà, à nyaʼa nàʼ ɨ̀bàm ɨkab gôl ɨ num ɨbe. Zə, mə fə jɨg njìm ɨ̀bàm cherə be.'

²³Mbǎʼ ə̀fàʼì məd we nyaʼa ghà ɨ bɔ ni, 'À fə ghɨ̀ ɨchî chɔ̀m, kyɨə wə̀d ə̀fàʼì chɔ̀m nɨə fàʼ ənɨ i fîŋ jìm. Ɨchî nɨ à fàʼ ənɨ e fîŋ jìm mbɨ ɨghɨ rɨpiî, mə bɨrɨ nuŋ əwe ɨgwɨ ɨghɨ nɔnɔʼ. Nyɨ ə nəb tɨ̀ ghɨ ɨghaʼi!'

²⁴“Wə̀d ə̀fàʼì we nɨ nyaʼa nɨŋ ə̀bàm ɨkab ə gôl ze əmɔʼ nyaʼa wò nyɨ ghà ɨ bɔ ni, 'Masà! Mə kəʼ kyerɨ ni e fîŋ ə kà, bə̀ kyerɨ ni à wɨə kwə̀ŋ ɨghɨ rɨ əsɨ ze nɨ chəi à konɨ, bə̀ fetɨ rɨ əsɨ ze nɨ chəi à jaŋ əghɨ əŋgu.

²⁵Mə nyaʼa bɔ ni mə bɨrɨ nimnɨ e ɨkab, əne mə nyaʼa wò nə̀m ɨŋga si. Zə, à yɨ e ə̀bàm ɨkab ə gôl ze ə zɔ̂.'

²⁶“Mbǎʼ ə̀fàʼì məd we nyaʼa wììrɨ̀ ɨ bɔ ni, 'Àwɔ̀ yɨə wə̀d ə̀fàʼì rɨbɔ̀ŋ, bə̀ yeʼ ɨgwed! Ɨmbə̀ʼ à nyaʼa kàŋ kyerɨ e ni mə wɨə kwə̀ŋ ɨghɨ rɨ əsɨ ze nɨ chəi mə̀ nyaʼa konɨ, bə̀ fetɨ rɨ əsɨ ze nɨ chəi mə̀ nyaʼa jaŋ ɨghɨ əŋgu ə?

²⁷Njɨ à kə̀ʼ wò nuŋ mɨ ɨkab ɨŋga nəb nɨ mbɨə nùŋ ɨkab, ɨmbə̀ʼ mə mɨ bə̀ndɨ̀, mə nɨŋ ətu ɨkab bə̀ nɨŋ njìm.

²⁸Mbə̀ nɨŋ ə̀bàm ɨkab ə gôl ze rɨ bɔ nàʼ əmbɨ wə̀d ə̀fàʼì we nɨ berɨ ɨ̀bàm wum,

²⁹ɨmbə̀ʼ ɨghəm nɨ wə̀d jìm we nɨ berɨ ɨghɨ, mbɨ bɨrɨ naʼ mbɨ cherə ɨ bɔ, wɨ̀ sɨ berɨ mbɨ nɔʼ chè. Àyɨə we nɨ chəi wɨ̀ berɨ ɨghɨ, ka àbei ɨkə we nɨ wɨ̀ berɨ, mbɨ bɨrɨ nɨŋ rɨ bɔ.

³⁰À yeʼ ɨmbə̀ʼ wə̀d ə̀fàʼì ndɔ̀n wɔ̂, mbə̀ maʼ əməd ɨŋga əsɨ firɨ, nɨ yeʼ əsɨ nɨ bə̂d bɨrɨ sɨə zə̀ʼə̀ kud əsɔŋ.'

³¹“Ənɨ Wan Wə̀d wɨrɨ yeʼe ɨghabɨ ɨfɔ̀n mbɨ mbɨ̀aŋgɨrə̀ mɨ̀jìm mbɨ məd, wɨ̀ bɨrɨ chub ɨgun e ətən ɨfɔ̀n.

³²Ɨbeŋ jìm bɨrɨ wo naanɨ ɨfě məd. Əne wɨ̀ bɨrɨ ghabrɨ bə̂d ɨba be, ɨchî nɨ ənə̂ŋgɨ̀-njɨ̀g ə ghàbrɨ̀ə̀ njɨ̀g rəbɔʼ ə gywɨ.

³³Wɨ̀ bɨrɨ nuŋ njɨ̀g ənɨ e əbɔ ə jɨgɨ, bə̀ nùŋ gywɨ ənɨ e əbɔ ə tweŋ.

³⁴Əne ɨfɔ̂n we bɨrɨ gha əmbɨ ə bə̂d mbe nɨ yeʼ əbɔ ə jɨgɨ ni, 'Mbə̀ yeʼe, kyɨə mbə̀n mbe nɨ mɨ Mbǎʼ fə zɨ əbɔrəbɔd ɨgwɨ nən. Mbə̀ yeʼe jɨg ənû ɨfɔ̀n ze nɨ mɨ Mbǎʼ nyaʼa fə tekɨ nùŋ ɨ nən tɨ ənɨ wɨ̀ nyaʼa tekɨ ɨsɨg.

³⁵Mə ghà ni mbə̀ yeʼe jɨg ənû ɨfɔ̀n ɨmbə̀ʼ ɨghəm nɨ njì rɨ nyaʼə zaŋ əmɨ, mbə nàʼ əghɨjɨg ɨ num, ədɔʼ ə nyaʼə ne əmɨ, mbə nàʼ mɨnib ɨ num, mə nyaʼə wə̀d rɨ̀sɔ̀ʼɔ̀, mbə nɨŋ əmɨ ɨŋga tə nəb,

³⁶mə nyaʼə rɨ̀sɔ̀ʼ ɨkyerɨ, mbə zɨ̀ ngywɨ̌ ɨgwɨ num, mə nyaʼə wɔ̀nə̀, mbə nèŋgɨ̀ əmɨ, mə nyaʼa ə nəb ndəŋ, mbə yeʼe neŋ əmɨ.'

³⁷“Bə̂d mbe nɨə ghɨ̀ ɨnû nɨ kuʼnɨ bɨrɨ wììrɨ̀ ɨ bɔ ni, 'Ə̀nùŋɨ̀sɨg, à kɨ əwù zi nɨ tɨ̀ nyaʼa zə e ənɨ njì rɨ nyaʼə zaŋ əwe, tɨ̀ nàʼ əghɨjɨg ɨ ne, kɨ̀ ənɨ ədɔʼ ə nyaʼə ne əwe, tɨ̀ nàʼ mɨnib ɨ ne ə?

³⁸À kɨ əwù zi nɨ tɨ̀ nyaʼa zə e nɨ à nyaʼə wə̀d rɨ̀sɔ̀ʼɔ̀, tɨ̀ nɨŋ əwe ɨŋga ta nəb, kɨ̀ nɨ nyaʼə rɨ̀sɔ̀ʼ ɨkyerɨ, tɨ̀ zɨ̀ ngywɨ̌ ɨgwɨ ne ə?

³⁹À kɨ əwù zi nɨ tɨ̀ nyaʼa zə e ənɨ à nyaʼə wɔ̀nə̀, kɨ̀ ənɨ à nyaʼa ə nəb ndəŋ, tɨ̀ yeʼe neŋ əwe ə?'

⁴⁰Ɨfɔ̂n we bɨrɨ wììrɨ̀ əmbɨ mɨ̀mə̌d ni, 'Mə ghà rəsìʼ ɨ nən ni, ɨchî nɨ mbə̀ nyaʼə ghɨ̀ ɨnû mbɔ̂ ənɨ wɨ kwa mɔʼɔ rəbɔʼ bɔŋgɔb mbɔ̂ num, əne mbə̀ nyaʼa ghɨ yeʼ ənɨ ə num.'

⁴¹“Wɨ̀ bɨrɨ gha əmbɨ ə mbe nɨ yeʼ əbɔ ə tweŋ əməd ni, 'Mbə̀n bə̂d ndɔ̀n, mbə̀ nɔʼ rɨ ɨban num wò nyɨ ɨŋga ɨwid rɨ nìmə nɨ mɨ Mbǎʼ nyaʼa fə tekɨ əmbɨ Debɨ̀rə̀ mbɨ mbɨ̀aŋgɨrə̀ məd.

⁴²Mə wɨə ghà əne ɨmbə̀ʼ ɨghəm nɨ ənɨ njì rɨ nyaʼə zaŋ əmɨ, chəi mbə̀ nyaʼa naʼ əghɨjɨg ɨ num, ənɨ ədɔʼ ə nyaʼə ne əmɨ, chəi mbə̀ nyaʼa naʼ mɨnib ɨ num.

⁴³Ənɨ mə nyaʼə wə̀d rɨ̀sɔ̀ʼɔ̀, chəi mbə̀ nyaʼa nɨŋ əmɨ ɨŋga tə nəb, ənɨ mə nyaʼə rɨ̀sɔ̀ʼ ɨkyerɨ, chəi mbə̀ nyaʼa naʼ ngywɨ̌ ɨ num, ənɨ mə nyaʼə wɔ̀nə̀ bə̀ fɔrɨ ənɨ mə nyaʼa nyɨ ə ndəŋ, chəi mbə̀ nyaʼa yeʼe nèŋ əmɨ.'

⁴⁴“Mbɨ bɨrɨ bɨ wììrɨ̀ ni, 'Ə̀nùŋɨ̀sɨg, à kɨ əwù zi nɨ tɨ̀ nyaʼa zə e ənɨ njì rɨ nyaʼə zaŋ e, kɨ̀ ənɨ ədɔʼ ə nyaʼə ne e, kɨ̀ ənɨ à nyaʼə rɨ̀sɔ̀ʼ ɨkyerɨ, kɨ̀ ənɨ à nyaʼə wɔ̀nə̀, kɨ̀ ənɨ à nyaʼa ə nəb ndəŋ, nɨ chəi tɨ̀ nyaʼa weerɨ əwe ə?'

⁴⁵Wɨ̀ bɨrɨ wiirɨ əmbɨ mɨ̀mə̌d ni, 'Mə ghà rəsìʼ ɨ nən ni, ɨchî nɨ chəi mbə̀ nyaʼa ghɨ ɨnû mbɔ̂ ənɨ wɨ kwa mɔʼɔ rəbɔʼ mbɔ̂, əne chəi mbə̀ nyaʼa bə̀ ghɨ̀ ənɨ ə num.'

⁴⁶Əne mbɨ bɨrɨ wò nyɨ ɨŋga ɨchə rɨ nɔ mì, àyɨə bə̂d mbe nɨə ghɨ̀ ɨnû nɨ kuʼnɨ bɨrɨ jɨg ɨ̀tènɨ̀ rɨ mì.”