Read Fɨso Fi Matiù 27 Bible Online

Matiù 27 - Fɨso Fi bible

Matiù 27

¹À nyaʼa ɨsɔsɔ, bə̂d kyeŋ mbe rɨ ə mbàn Ŋwìə̀ mbɨ ə bə̂d kyeŋ mbe rɨŋga əbeŋ nyaʼa yim ɨfetɨ əne taŋ ɨchî nɨ mbɨ bɨrɨ zwiirɨ ə Yeso.

²Mbɨ nyaʼa taŋ əne, kod əməd, nɨŋ wò nàʼ əmbɨ Pailèt nɨ nyaʼə gɔmnà.

³Ənɨ Judàs we nɨ nyaʼa fen ə Yeso, nyaʼa zə ni mbɨ fə sob ni mbɨ zwiirɨ əməd, wɨ̀ nyaʼa beŋ i fîŋ wɨrɨ wò wì ɨkab mɨ̀sɨrɨvà mbe ɨwum tad əmbɨ ə bə̂d kyeŋ mbe rɨ ə mbàn Ŋwìə̀ mbɨ ə bə̂d kyeŋ mbe rɨŋga əbeŋ.

⁴Wɨ̀ nyaʼa nàʼ əne ghà ni, “Mə fə ghɨ̀ ənû rɨbɔ̀ŋ ɨchî nɨ mə̀ fen wə̀d nɨ chəi wɨ̀ gu ənû.” Mbɨ nyaʼa wììrɨ̀ ni, “Əze ə berɨ ənû ə ye nɨ ghɨ̀ mbɨ nà ə? À yɨ e ɨsaʼi!”

⁵Judàs nyaʼa zu əne, màʼ ɨkab we ɨŋga mbàn Ŋwìə̀, jwɨ̀ wò swen ə.

⁶Bə̂d kyeŋ mbe rɨ ə mbàn Ŋwìə̀ nyaʼa gwe ɨkab we ghà ni, “Wɔ̂ yɨ ɨkab ənəm, əne chəi ta tɨkə chwiə ni tɨ̀ zɨ ɨkab wɔ̂ əbɔʼ ɨkab we rɨ ə mbàn Ŋwìə̀.”

⁷Mbɨ nyaʼa ghà əne, yim ɨfetɨ, əne nɨŋ ɨkab we wò zon si ze nɨ mbɨ nyaʼə tɔŋ ənɨ Si əbɔm rɨkyiŋ, nɨ mbɨ bɨrɨ sɨə tweŋə bə̂d rɨ̀sɔ̀ʼɔ̀ əŋgu.

⁸À yɨ əton nɨ ɨ pè rəchɔ̀ŋ, bə̂d mbɨə kɨrɨ tɔŋ əsɨ ə si ze ənɨ Si Ənəm.

⁹Əne ənû ze nɨ Jèrèmià, nɨ nyaʼə wə̀d ɨ̀kə̀n, nyaʼa ŋwaʼnɨ ə nyaʼa jwɨ̀ ənɨ rəsìʼ ni, “Mbɨ nyaʼa nɨŋ ɨkab mɨ̀sɨrɨvà ɨwum tad, nɨ yeʼ ɨnun ɨkab we nɨ mɨ̀Izre nyaʼa ben ni mbə bɨrɨ nàʼ ɨgwɨ ətu əməd,

¹⁰wò zon Si əbɔm rɨkyiŋ, ɨchî nɨ Ŋwìə̀ nyaʼa gha ɨ num.”

¹¹Yeso nyaʼa təm ɨfě gɔmnà, əne gɔmnà we nyaʼa biirɨ ɨ bɔ ni, “Àwɔ̀ kɨ ɨfɔ̂n mɨ̀Jû ə?” Yeso nyaʼa wììrɨ̀ ni, “À fə ghà əne.”

¹²Àyɨə ənɨ bə̂d kyeŋ mbe rɨ ə mbàn Ŋwìə̀ mbɨ ə bə̂d kyeŋ mbe rɨŋga əbeŋ nyaʼa zɨ ɨnû ɨgwɨ məd, chəi wɨ̀ nyaʼa wiirɨ.

¹³Əne Pailèt nyaʼa biirɨ ɨ bɔ ni, “Chəi à zu ɨnû mbɔ̂ jìm nɨ mbɨ zɨ ɨgwɨ ne ə?”

¹⁴Àyɨə chəi Yeso nyaʼa wiirɨ, ka àbei nɨ wiirɨ ənû ə mɔʼɔ ə mɔʼ. Əne ənû ze ə nyaʼa chè ə gɔmnà we.

¹⁵Ɨŋga ɨghəm ɨwu jìm, əne yɨ ɨgwɨ ɨni mbe nɨ mɨ̀Jû nyaʼə jɨg Əchwɨ̂ ə Che-ɨgun, gɔmnà nyaʼə kɨə chɨ̀ə̀ wə̀d ndəŋ fìbɨ̀ sàŋə̀, yeʼ we nɨ ɨnɔ̂n bə̂d də̀bɨ.

¹⁶À nyaʼa ənɨ ə nyùmə̀ we, mbaŋə̀ mɔʼɔ nyaʼə nəb ndəŋ nɨ ɨnɔ̂n bə̂d we nyaʼa kyerɨ əməd ɨmbə̀ʼ ɨnû rɨbɔ̀ŋ mbe nɨ wɨ̀ nyaʼə ghɨ̀ə̀. Ɨkum məd yɨə nyaʼə Barabas.

¹⁷Ənɨ ɨnɔ̂n bə̂d we nyaʼa fetɨ, Pailèt nyaʼa biirɨ əmbɨ mɨ̀mə̌d ni, “Wə̀d we nɨ mbə̀ kəb ni mə̀ chɨə sàŋ ɨ nən kɨ wi ə? À kɨə Barabas kɨ̀ Yeso we nɨ mbɨə tɔŋ ənɨ Wə̀d we nɨ Ŋwìə̀ zɔʼ ə?”

¹⁸Wɨ̀ nyaʼa biirɨ əne ɨmbə̀ʼ ɨghəm nɨ wɨ̀ nyaʼa kyerɨ ni mɨ̀Jû nyaʼa yim ə Yeso yeʼe nàʼ ɨ ni ɨmbə̀ʼ ə̀dìì.

¹⁹Ənɨ wɨ̀ nyaʼa chub ɨgun ətən ze nɨ wɨ̀ nyaʼə chub ɨgun sobə mɨsaʼi, ɨwi məd nyaʼa chà ɨkə̂n ɨ bɔ ni: “Tɨrə̀ berɨ e ənû ə mɔʼɔ nɨ ghɨ̀ mbɨ mbaŋə̀ zɔ̂, ɨmbə̀ʼ ɨghəm nɨ chəi wɨ̀ gu ənû ə mɔʼɔ. Mə wɨə ghà əne ɨmbə̀ʼ ɨghəm nɨ mə kàŋ zə ŋgəʼ əku ə njə̀m ɨzimɨ wɔ̂ ɨmbə̀ʼ əməd.”

²⁰Bə̂d kyeŋ mbe rɨ ə mbàn Ŋwìə̀ mbɨ ə bə̂d kyeŋ mbe rɨŋga əbeŋ nyaʼa no bə̂d mbe ni mbɨ gha Pailèt chɨ ə Barabas sàŋɨ̀, əne zwiirɨ ə Yeso.

²¹Pailèt nyaʼa yì biirɨ əmbɨ mɨ̀mə̌d ni, “Tɨ əbɔʼ mbaŋə̀ tɔ̂ rɨ̀be, we nɨ mbə̀ kəb ni mə̀ chɨ ə sàŋ ɨ nən kɨ wi ə?” Mbɨ nyaʼa wììrɨ̀ ni, “Chɨ ə Barabas.”

²²Pailèt nyaʼa biirɨ əmbɨ mɨ̀mə̌d ni, “Mə̀ sɨ ghɨ̀ ənû ə ye mbɨ Yeso we nɨ mbɨə tɔŋ ənɨ Wə̀d we nɨ Ŋwìə̀ zɔʼ ə?” Mɨ̀mə̌d mɨjìm nyaʼa wììrɨ̀ ni, “Kombɨ əməd əzed ə baʼnɨ.”

²³Pailèt nyaʼa biirɨ ni, “Wɨ̀ ə gu ənû ə ye ə?” Mbɨ nyaʼa màànɨ̀ yì kyeŋ rɨ̀kǎ ghà ni, “Kombɨ əməd əzed ə baʼnɨ!”

²⁴Ənɨ Pailèt nyaʼa zə ni chəi ənû ə mɔʼɔ nɨ tɨ̀ rə nyaʼa wɨrɨ ghɨ̀, àmei ni tə mɨ wò ɨmbì, əchɔb ə bɨrɨ gù, wɨ̀ nyaʼa nɨŋ mɨnib sò mbi ɨbɔ ɨfě ɨnɔ̂n bə̂d we ghà ni, “Chəi mə berɨ əbɔ ənɨ ɨvɨ mbaŋə̀ zɔ̂! Ɨsaʼi yɨ wən!”

²⁵Bə̂d mbe mɨ̀jìm nyaʼa wììrɨ̀ ni, “Ndɔ̀n ɨmbə̀ʼ ɨchî nɨ mbɨ zwiirɨ əməd nyɨ ɨgwɨ na bə̀ nyɨ ɨgwɨ mba bɔn!”

²⁶Əne Pailèt nyaʼa chɨ̀ ə Barabas sàŋ əmbɨ mɨ̀mə̌d. Ənɨ wɨ̀ nyaʼa fə gha mbɨ te ə Yeso ənɨ ə ŋgwad, wɨ̀ nyaʼa nàʼ əməd ni mbɨ wò kòmbɨ̀ əzed ə baʼnɨ.

²⁷Mɨ̀sɔgyɨ̀ Pailèt nɨ nyaʼə gɔmnà nyaʼa nɨŋ ə Yeso mbɨ wò ɨŋga tɔʼ gɔmnà. Mbɨ nyaʼa pè fetɨ mɨ̀sɔgyɨ̀ jìm, mbɨ kad əməd.

²⁸Mbɨ nyaʼa chɨ̀ ngywɨ̌ rɨ məd, əne nɨŋ ngywɨ̌ ɨfɔ̀n zɨ̀ ɨgwɨ məd.

²⁹Mbɨ nyaʼa ghɨ̀ əne, nɨŋ ɨ̀jə̀ŋɨ̀ kad ɨghabɨ ɨdəm ɨfɔ̀n zɨ̀ ətu ɨ bɔ. Mbɨ nyaʼa bə̀ zɨ̀ fɨzed ɨŋga əbɔ ə jɨg əməd, əne chìndɨ̀ ɨtu ɨnywɨ ɨfě ɨ bɔ kɔ baʼrɨ əməd ghàə̀ ni, “Mbèè! Ŋgə̀ə̀! Tɨ̀ chàʼrɨ̀ əwe, kyɨ ɨfɔ̂n mɨ̀Jû!”

³⁰Mbɨ nyaʼa ched mad ənɨ məd bə̀ nɨŋ fɨzed fe rɨ bɔ buʼ ətu əməd əŋgu.

³¹Ənɨ mbɨ nyaʼa fə baʼrɨ əməd màànɨ̀, mbɨ nyaʼa chɨ̀ ngywɨ̌ ɨfɔ̀n ze, wɨrɨ zɨ̀ ngywɨ̌ rɨ məd ɨbòm ɨ bɔ. Mbɨ nyaʼa ghɨ̀ əne, nɨŋ əməd ɨ wò kombɨ əzed ə baʼnɨ.

³²Ənɨ Yeso mbɨ mɨ̀sɔgyɨ̀ mbe nyaʼə jwɨ̀ rɨŋga Jèrusalèm yènə̀ wòə̀, mbɨ nyaʼa pè ɨnə̂njɨ̀ bòmnɨ̀ mbaŋə̀ mɔʼɔ nɨ nyaʼa rɨ ə Sìrin nɨ ɨkum məd nyaʼə Saimòn. Mɨ̀sɔgyɨ̀ mbe nyaʼa nyèŋ əməd ni wɨ̀ nɨŋ əzed ə baʼnɨ ze rɨ əmbɨ Yeso bèʼ.

³³Mbɨ nyaʼa yèn wò pè əsɨ ze nɨ mbɨ nyaʼə tɔŋ ənɨ Golgotà. (Golgotà yɨ ni “Tɨmbin Ɨwɔʼ-ətu”).

³⁴Ənɨ mbɨ nyaʼa pè əŋgu, mbɨ nyaʼa nàʼ mɨ̀noʼ nɨ mbɨ nyaʼa nyamɨ mbɨ ə̀nywɨ̀-ə̀nywɨ̂ ni wɨ̀ nɔ. Àyɨə ənɨ wɨ̀ nyaʼa zweʼrɨ, wɨ̀ nyaʼa ton nɨ nɔ.

³⁵Ənɨ mbɨ nyaʼa fə kòmbɨ̀ əməd əzed ə baʼnɨ, mbɨ nyaʼa sɔ̀ŋ mbaŋ ghàpɨ̀ ngywɨ̌ rɨ məd əkaʼ mɨ̀mə̌d.

³⁶Ənɨ mbɨ nyaʼa ghɨ̀ əne, mbɨ nyaʼa chub ə si əsɨ ze ɨmbə̀ʼ nəŋgɨ əməd.

³⁷Mbɨ nyaʼa ŋwàʼnɨ̀ ɨsaʼi we nɨ mbɨ nyaʼa zɨ ɨgwɨ məd kòmbɨ̀ əzed ə baʼnɨ ze ɨgwɨ ətu əməd. Mbɨ nyaʼa ŋwàʼnɨ̀ ni: “Wɔ̂ yɨə Yeso, ɨfɔ̂n mɨ̀Jû.”

³⁸Mbɨ nyaʼa bə̀ kòmbɨ̀ mɨjɨ be mbɨ Yeso, wɨ fìbɨ̀ əbà əbɔ ə jɨgɨ, wɨ fìbɨ̀ əbà əbɔ ə tweŋ.

³⁹Bə̂d mbe nɨ nyaʼə chè ɨban əsɨ ze mbɨə nyaʼə baʼrɨ əməd bə̀ mə̀ʼə̀ mbə ɨtu

⁴⁰ghàə̀ ni, “Àwɔ̀ we nɨ bɨrɨ saʼ mbàn Ŋwìə̀ wɨrɨ nɨŋ ɨni tad kod, kaŋ jwɨ̀ e rəŋgəʼ! Àwɔ̀ mɨ kàŋ yeʼ Wan Ŋwìə̀, swiʼ e tɨ əzed ə baʼnɨ ze.”

⁴¹À yɨə bə̀ əndəŋ əndəŋ nɨ bə̂d kyeŋ mbe rɨ ə mbàn Ŋwìə̀ mbɨ məchwiə̀ rɨ̀kə̌ fɔrɨ bə̂d kyeŋ mbe rɨŋga əbeŋ nyaʼa bə̀ baʼrɨ əməd ghàə̀ ni,

⁴²“Ɨ wɨə nyaʼə chɨ̀ə̀ bə̂d cherə rəŋgəʼ, àyɨə chəi ənɨ tɨ̀ məd ziə jwɨ̀ rəŋgəʼ! Məd yɨ ɨfɔ̂n mɨ̀Izre! Wɨ̀ swiʼ rɨ əzed ə baʼnɨ ze, əne tɨ̀ bɨrɨ ben ni məd yɨ ɨfɔ̂n!

⁴³Wɨ̀ nyaʼa nuŋ i fîŋ ɨgun ə Ŋwiə̀, əne Ŋwìə̀ sɨ chɨ əməd rəŋgəʼ tɨ̀nîn əwù ze nɨ wɨ̀ kəb əməd, ɨmbə̀ʼ ɨghəm nɨ ɨ wɨə nyaʼə ghà ni, 'Mɔ̌ yɨə Wan Ŋwìə̀.'”

⁴⁴Mɨjɨ mbe nɨ mbɨ nyaʼa bə̀ kòmbɨ̀ mbɨ məd nyaʼa bə̀ zɔ̀m əməd àmei əndəŋ əndəŋ.

⁴⁵Ɨ kɔ rɨ ənɨ mɨ̀nyùmə̀ wum chɔ̀b rɨ̀be əziə, ɨsɨ nyaʼa fin əbeŋ ə jìm. Mbɨ nyaʼa fin əne wò pè ənɨ mɨ̀nyùmə̀ tad.

⁴⁶À nyaʼa ɨghabɨ mɨ̀nyùmə̀ tad, Yeso nyaʼa kyeŋ rɨ̀kǎ ghà ni, “Èli Èli!, lama sabaktanì?” əne yɨ ni, “Mɨ Ŋwìə̀, mɨ Ŋwìə̀, à waʼ əmɨ ɨmbə̀ʼ ə yè ə?”

⁴⁷Bə̂d mɔʼɔ rəbɔʼ mbe nɨ nyaʼa təmbɨ ɨban ɨban nyaʼa zu əne ghà ni, “Mbaŋə̀ zɔ̂ zɨə tɔŋə Èlaijà ni wɨ̀ yeʼe wèèrɨ̀ əwi.”

⁴⁸Àmei əwu əwən, wɨ mɔʼɔ rəbɔʼ mɨ̀mə̌d nyaʼa nòrə̀ wò nɨŋ jûʼ, chùb ɨŋga twàŋ tɨ mɨnòʼ, fàm ətu fɨzed, wò nàʼ ɨ bɔ ni wɨ̀ sɔɔrɨ.

⁴⁹Àyɨə mbɨ cherə nyaʼa ghà ni, “Be wòm tɨ̀ zə ni Èlaijà wa bɨrɨ yeʼe ɨ chɨ̀ əməd rəŋgəʼ ə.”

⁵⁰Yeso nyaʼa yì kyeŋ rɨkǎ, sɨ mèndɨ̀.

⁵¹Àmei əwu əwən, ngywɨ̌ ze nɨ mbɨ nyaʼa tam ɨŋga mbàn Ŋwìə̀ nyaʼa san ɨba be kɔ rɨ ətu wò pè əton. Si nyaʼa wùd, tɨkôb bə̀ nùmə̀.

⁵²Mɨsî nyaʼa fìʼə̀, əne Ŋwiə̀ nyaʼa zwemnɨ bə̂d məd mbe nɨ nyaʼa fə kwɨ.

⁵³Ənɨ Yeso nyaʼa zwemə, mbɨ nyaʼa jwɨ rɨŋga mɨ̀sì mbe wò nyɨ ɨŋga əsɨ ə zeŋɨ (əne yɨə Jèrusalèm). Bə̂d mɨ̀nɔnɔʼ nyaʼa zə mɨ̀mə̌d əŋgu.

⁵⁴Ənɨ ətu ɨgwɨ mɨ̀sɔgyɨ̀ mbɨ mɨ̀sɔgyɨ̀ mbe nɨ nyaʼə nə̀ŋgɨ ə Yeso, nyaʼa zə ɨchî nɨ si nyaʼa wùrɨ bə̀ zə ɨnû jìm mbe nɨ nyaʼa ghɨ̌, mbɨ nyaʼa bɔ kwàʼ rɨŋgəʼ, əne ghà ni, “À yɨ rəsìʼ ni mbaŋə̀ zɔ̂ yɨ kə̀ʼ ə Wan Ŋwìə̀!”

⁵⁵Məyi mɨ̀nɔnɔʼ nyaʼa əŋgu. Mbɨ nyaʼa təm rɨ əsà əgha ɨ nèŋ. Mbɨ nyaʼə beenɨ əbɔʼ ə Yeso nɔ̀ʼ tɨ rɨ ə Galiliî yènə̀ wèèrɨ̀ əməd.

⁵⁶Mbɨ mɔʼɔ rɨ əbɔʼ mɨ̀mə̌d yɨə nyaʼə Mèri Màgdàlen, Mèri ɨŋgɔb Jems mbɨ Jòsêf, mbɨ ɨŋgɔb bɔn Zebèdiî.

⁵⁷À nyaʼa ɨkwirɨ kwirɨ, wə̀d mbɔ̂n mɔʼɔ rɨ ə Àrɨmateà nyaʼa yeʼe. Ɨkum məd yɨə nyaʼə Jòsêf. Wɨ̀ yɨə nyaʼə bə̀ wɨ mɔʼɔ rəbɔʼ mə̀mə̀ə̀nɨ̀-ɨnû Yeso.

⁵⁸Wɨ̀ nyaʼa yeʼe əne wò əsɨ Pailèt, pè ghà ɨ bɔ ni wɨ̀ naʼ əvɨ ə Yeso ɨ ni. Pailèt nyaʼa ghà ni mbɨ naʼ əvɨ ze ɨ bɔ.

⁵⁹Jòsêf nyaʼa nɨŋ əvɨ ze, nib ɨŋga ngywɨ̌ rɨ̀fɨ nɨ nyaʼa zɨ fi,

⁶⁰əne wò boŋ ɨŋga ɨ̀sì məd nɨ nyaʼa wɨ fi, nɨ wɨ̀ nyaʼa chəb ɨŋga ɨwɔ̌. Wɨ̀ nyaʼa boŋ əne, biŋ ɨti kyeŋ kubrɨ ɨchû ɨ̀sì we əŋgu, nɔ̀ʼ wò i.

⁶¹Mèri Màgdàlen mbɨ Mèri cherə wə nyaʼə əŋgu. Mbɨ nyaʼa chub ə si sɨə nèŋ ɨsi we.

⁶²À nyaʼa əni ze nɨ beenɨ, nɨ nyaʼa əni nɨ mɨ̀Jû nyaʼə tekɨ ɨnyod ɨmbə̀ʼ jɨg əni əkwɨ, bə̂d kyeŋ mbe rɨ ə mbàn Ŋwìə̀ mbɨ mɨ̀Farisiî nyaʼa fetɨ wò əsɨ Pailèt.

⁶³Mbɨ nyaʼa pè ghà ɨ bɔ ni, “Masà, tɨ̀ fə wɨrɨ kɔndɨ ənû ze nɨ wə̀d mɨ̀ghab we nyaʼa ghǎ ənɨ wɨ̀ nyaʼa kɨrɨ i ɨkǎ. Wɨ̀ nyaʼa ghà ni, 'Ɨni mɨ chè ɨtad, mə bɨrɨ wɨrɨ zwemə.'

⁶⁴Əne sob ni mbɨ jeŋgɨ nəŋgɨ ɨsi we wò pè ənɨ ɨni mbe tad. À mɨ ton ghɨ e əne, njɨ mə̀mə̀ə̀nɨ̀-ɨnû ɨməd bɨrɨ wo jɨ əvɨ əməd, sɨ ghà əmbɨ ə bə̂d ni, 'Wɨ̀ fə zwemə.' Mɨghab mbɔ̂ nɨ sɨ nwìə̀ bɨrɨ bə chè mɨghab rɨtu.”

⁶⁵Pailèt nyaʼa ghà əmbɨ mɨ̀mə̌d ni, “Mbə̀ nɨŋ mɨ̀sɔgyɨ̀ mbɨ wò nəŋgɨ ɨsi we ɨchî nɨ mbə̀ kəbɨ.”

⁶⁶Əne mbɨ nyaʼa wò zɨ̀ ənweenɨ ɨgwɨ ɨti we nɨ mbɨ nyaʼa kubrɨ ɨchû ɨ̀sì we əŋgu, bə̀ nùŋ mɨ̀sɔgyɨ̀ ni mbɨ nəŋgɨ ɨsi we.