Read Fɨso Fi Matiù 28 Bible Online

Matiù 28 - Fɨso Fi bible

Matiù 28

¹Ənɨ əni əkwɨ mɨ̀Jû nyaʼa yeʼe chè, ənɨ ɨtuʼ nyaʼə chɨg əni ə Sɔndè, Mèri Màgdàlen mbɨ Mèri cherə wə nyaʼa wo neŋ ɨ̀sì we.

²Mbɨ nɨ zə, si nyaʼa sàʼ wùd kwàʼ rɨ̀kǎ. Zɨ̀ nyaʼa wùd ɨmbə̀ʼ ɨghəm nɨ aŋgɨrə̀ Ə̀nùŋɨ̀sɨg nyaʼa swiʼ rɨkaŋ pè biŋ ɨti we rɨ ɨchû ɨ̀sì we, chub ɨgun.

³Ɨnyod məd nyaʼə teə ɨchî nɨ ɨbi mbə̀ŋ ə ŋwàŋə̀. Ngywɨ̌ rɨ məd nyaʼə bə̀ fuə rɨ saaŋ.

⁴Mɨ̀sɔgyɨ̀ mbe nɨ nyaʼə nəŋgɨ ɨsi we nyaʼa zə əməd, bɔ kwàʼ rɨŋgəʼ, əne bindɨ. Mbɨ nyaʼa sɨ yeʼ ɨghabɨ ɨvɨ bə̂d.

⁵Àyɨə aŋgɨrə̀ we nyaʼa ghà əmbɨ məyi mbe ni, “Tɨ mbə̀ bɔ ə. Mə kyerɨ ni mbə mbɨə kə̀b ə Yeso we nɨ mbɨ nyaʼa kombɨ əzed ə baʼnɨ.

⁶Chəi məd əgha. Wɨ̀ fə zwemə àmei ɨchî nɨ wɨ̀ nyaʼa gha ɨ nən. Mbə̀ yeʼe zə əsɨ ze nɨ mbɨ kəʼ boŋ əməd əŋgu.

⁷Əne mbə̀ zambɨ wò ghà əmbɨ mə̀mə̀ə̀nɨ̀-ɨnû ɨməd ni: 'Wɨ̀ fə zwemə, əne ɨ wɨə wò ɨmbì ɨ nən ə Galiliî. Mbə bɨrɨ zə əməd əŋgu.' Tɨ mbə̀ neb ə ənû zɔ̂ nɨ mə̀ gha ɨ nən.”

⁸Məyi mbe nyaʼa kɨ zàmbɨ̀ nɔ̀ʼ rɨ ɨchû ɨ̀sì we. Mbɨ nyaʼə yènə̀ bɔə, àyɨə ɨghaʼi nyaʼa swi ɨŋga fîŋ tɨ mɨ̀mə̌d. Mbɨ nyaʼa nòrə̀ ɨmbə̀ʼ ɨ wò ghà ənû ze əmbɨ mə̀mə̀ə̀nɨ̀-ɨnû ɨməd.

⁹Ənɨ mbɨ nyaʼə nòrə̀ wò əne, mbɨ nɨ zə Yeso sàʼ kumnɨ mɨ̀mə̌d, əne ghà ni, “Mə chàʼrɨ̀ əwən!” Ənɨ wɨ̀ nyaʼa ghà əne, mbɨ nyaʼa wò əsɨ məd, pè yim ɨwu ɨməd bə̀ wumnɨ əməd.

¹⁰Yeso nyaʼa ghà əmbɨ mɨ̀mə̌d ni, “Tɨ mbə̀ bɔ ə. Mbə̀ wo ghà əmbɨ mbɨ bɔŋgɔb ni mbɨ wo ə Galiliî. Mbɨ bɨrɨ zə əmɨ əŋgu.”

¹¹Ənɨ məyi mbe nyaʼə wòə̀, mɨ̀sɔgyɨ̀ mɔʼɔ nyaʼa wò ɨŋga əsɨ ze, pè ghà ɨnû jìm mbe nɨ nyaʼa ghɨ̌ əmbɨ ə bə̂d kyeŋ mbe rɨ ə mbàn Ŋwìə̀.

¹²Ənɨ bə̂d kyeŋ mbe rɨ ə mbàn Ŋwìə̀ mbɨ ə bə̂d kyeŋ mbe rɨŋga əbeŋ nyaʼa fetɨ, mbɨ nyaʼa taŋ ənû nɨ mbɨ bɨrɨ ghɨ̀. Mbɨ nyaʼa taŋ əne, nàʼ ɨkab nɔnɔʼ əmbɨ mɨ̀sɔgyɨ̀ mbe,

¹³ghà ni, “Mbə ghà əmbɨ ə bə̂d ni, 'Mə̀mə̀ə̀nɨ̀-ɨnû ɨməd kə̀ʼ yeʼe jɨ əvɨ əməd ɨzimɨ ənɨ tɨə kə̀ʼə̀ gwenə.'

¹⁴Kaʼ gɔmnà bè zu i, tɨ̀ bɨrɨ kyerɨ ənû nɨ gha ɨ bɔ, əne chɨ̀ əwən rəŋgəʼ.”

¹⁵Mɨ̀sɔgyɨ̀ mbe nyaʼa nɨŋ ɨkab we wò ghɨ̀ àmei ɨchî nɨ mbɨ nyaʼa ghà əmbɨ mɨ̀mə̌d. Əzɔ̂ yɨ ənû ze nɨ fə jaŋ əkaʼ mɨ̀Jû yeʼe pè rə̀chɔ̀ŋ.

¹⁶Mə̀mə̀ə̀nɨ̀-ɨnû Yeso mbe wum chɔ̀b mɔʼ nyaʼa wò ə Galiliî ɨkaŋ ɨwum we nɨ Yeso nyaʼa fə mə̌ əmbɨ mɨ̀mə̌d.

¹⁷Ənɨ mbɨ nyaʼa zə əməd, mbɨ nyaʼa wumnɨ əməd, àyɨə mbɨ mɔʼɔ nyaʼa bìd ni à kɨə kàŋ ə Yeso ə.

¹⁸Yeso nyaʼa wò əsɨ mɨ̀mə̌d pè ghà ni, “Ŋwìə̀ fə nàʼ ɨka jìm ɨ num ni mə̀ tumbɨ ɨkaŋ fɔrɨ si.

¹⁹Əne mbə̀ wo əmbɨ ə bə̂d mɨ̀jìm ɨŋga ɨbeŋ jìm, ghɨ̀ ni mbɨ yeʼ mbɨ mə̀mə̀ə̀nɨ̀-ɨnû. Mbə̀ nàʼ mɨnib əmbɨ mɨ̀mə̌d ənɨ ɨkum Mbǎʼ, ənɨ wɨ Wan bə̀ fɔrɨ ənɨ wɨ Əzwî ə Zeŋɨ.

²⁰Mbə̀ chwi əmbɨ mɨ̀mə̌d ni mbɨ nuŋ rɨkə rɨjìm te nɨ mə̀ fə naʼ ɨ nən. Mbə̀ kyerɨ ni mə wɨ mbɨ nən ɨghəm jìm wò pè ənɨ ɨsɨg bɨrɨ nwìə̀.”