Read Fɨso Fi Matiù 4 Bible Online

Matiù 4 - Fɨso Fi bible

Matiù 4

¹Ənɨ gɨ̂ ze nyaʼa fə ghamɨ màànɨ̀, Əzwî ə Ŋwiə̀ ə nyaʼa ghɨ̀ ni Yeso wò ɨŋga ɨbad rɨkwàʼi ɨmbə̀ʼ ə Debɨ̀rə̀ numbɨ əməd əŋgu.

²Wɨ̀ nyaʼa chub rɨ jɨg ɨzi ɨwum kwè mbɨ əzimɨ ɨwum kwè. Ənɨ ɨni mbe nyaʼa chě, njì rɨ nyaʼa zaŋ əməd.

³Əne Debɨ̀rə̀ we nyaʼa wò ghà ɨ bɔ ni, “Àwɔ̀ mɨ kàŋ yeʼ Wan Ŋwìə̀, ghà əti zɔ̂ ə beŋ ənɨ ə ŋgə̀ŋ.”

⁴Yeso nyaʼa wììrɨ̀ ɨ bɔ ni, “Ə zɨ ɨŋga Ə̀ŋwàʼnɨ̀ ə Ŋwiə̀ ni, 'Kaʼ wə̀d wɨə chub i ɨkǎ àmei ɨmbə̀ʼ ŋgə̀ŋ wən. Ɨ wɨə chub ɨkǎ ɨmbə̀ʼ ɨŋgam jìm we nɨ Ŋwìə̀ ghamɨ.'”

⁵Wɨ̀ nyaʼa ghà əne, Debɨ̀rə̀ we nɨŋ əməd, mbɨ wò əsɨ ə zeŋɨ. [3] Wɨ̀ nyaʼa pè əŋgu ghɨ̀ wɨ̀ kɔʼ təm ɨdom mbàn Ŋwìə̀,

⁶əne, ghà ɨ bɔ ni, “Àwɔ̀ mɨ kàŋ yeʼ Wan Ŋwìə̀, à tòm ə si, ɨmbə̀ʼ ɨghəm nɨ ə zɨ ɨŋga Ə̀ŋwàʼnɨ̀ ə Ŋwiə̀ ni, 'Ŋwìə̀ bɨrɨ ghà əmbɨ mbi mbɨ̀aŋgɨrə̀ ni mbɨ nəŋgɨ əwe', bə̀ ghà ni, 'Mbɨ bɨrɨ nɔ əwe ənɨ mbə ɨbɔ, ɨmbə̀ʼ tɨ à nun əwe e əwu ənɨ ɨti.'”

⁷Yeso nyaʼa wììrɨ̀ ɨ bɔ ni, “Ə zɨə bə̀ ɨŋga Ə̀ŋwàʼnɨ̀ ə Ŋwiə̀ ni, 'Tɨrə̀ numbɨ əwe Ə̀nùŋɨ̀sɨg e Ŋwìə̀.'”

⁸Debɨ̀rə̀ we nyaʼa wɨrɨ yì nɨŋ əməd mbɨ kɔʼ wò ɨkaŋ ɨwum se mɔʼɔ. Wɨ̀ nyaʼa pè chwi ɨbeŋ jìm mbe rɨ ɨŋga ɨsɨg ɨ bɔ bə̀ chwi mbɔ̂n jìm ze nɨ yeʼ ɨŋga ɨbeŋ mbe.

⁹Ənɨ wɨ̀ nyaʼa chwi əne, wɨ̀ nyaʼa ghà ɨ bɔ ni, “Mə bɨrɨ naʼ ɨghɨ mbɔ̂ jìm ɨ ne əwù ze nɨ à gundɨ ə si wumnɨ əmɨ.”

¹⁰Yeso nyaʼa wììrɨ̀ ɨ bɔ ni, “Satàn, nɔʼ əwe rɨ ɨban num! Ə zɨ ɨŋga Ə̀ŋwàʼnɨ̀ ə Ŋwiə̀ ni, 'À berɨ wumnɨ Ə̀nùŋɨ̀sɨg e Ŋwìə̀, bə̀ fàʼ àmei ɨ bɔ.'”

¹¹Ənɨ wɨ̀ nyaʼa ghà əne, Debɨ̀rə̀ we nyaʼa sàŋ əməd, mbɨ̀aŋgɨrə̀ wò nəŋgɨ əməd.

¹²Ənɨ Yeso nyaʼa zu ni mbɨ fə gywɨ̀ ə Jɔ̌n wò zɨ̀ ə ndəŋ, wɨ̀ nyaʼa nɔ̀ʼ wò ə Galiliî.

¹³Àyɨə chəi wɨ̀ nyaʼa pè chub ə Nazàret. Wɨ̀ nyaʼa chè wò chubɨ yeʼ ə Kàpenàhom nɨ nyaʼa ɨban ə sà, əne yɨ ɨŋga ɨba ɨbeŋ mbe rɨ ə Zebulùn fɔrɨ ə Naftalì.

¹⁴Wɨ̀ nyaʼa wò chub əŋgu ɨmbə̀ʼ ənû ze nɨ wə̀d ɨ̀kə̀n Ŋwìə̀, Aizayà nyaʼa ghǎ, ə jwɨ ənɨ rəsìʼ ni:

¹⁵“Əba əbeŋ ə Zebulùn mbɨ əba əbeŋ ə Naftalì, nɨ yeʼ ɨnə̂njɨ̀ we nɨə wò ɨŋga rɨ̀bàà, nɨ mbɨ baanɨ ɨgyɨ̂ Jodàn, Galiliî nɨ yeʼ əsɨ ze nɨ bə̂d mbe nɨ kaʼi mɨ̀Jû ə chub əŋgu!

¹⁶Bə̂d mbe nɨə chub ɨŋga ɨsɨ firɨ, fə zə ɨzeŋɨ zeŋɨ kyeŋ. Ɨzeŋɨ zeŋɨ we bɨrɨ te ɨgun ə bə̂d mbe nɨə chub ɨŋga ɨsɨ mbe nɨ bə̂d ə sɨə wo kwɨ nɨ chəi mbɨ kyerɨ ə Ŋwiə̀.”

¹⁷Ɨ kɔ rɨ ənɨ ə nyùmə̀ we, Yeso nyaʼa kɔ ghà ɨŋgam Ŋwiə̀ ni, “Mbə̀ beŋ tə fîŋ, ɨmbə̀ʼ ɨghəm nɨ ənû ɨfɔ̀n rɨkaŋ ə fə tiinɨ.”

¹⁸Ənɨ Yeso nyaʼə yèn ɨban ə sà ze rɨ ə Galiliî, wɨ̀ nyaʼa zə bɔŋgɔb mɨbe nɨ nyaʼa mə̀gywɨ̀-əgwi. Ɨ mbɨə nyaʼə màʼə̀ kɨ̀ ɨŋga ə sà ze. Ɨkum wɨ fìbɨ̀ yɨə nyaʼə Saimòn nɨ mbɨ nyaʼə bə̀ tɔŋ əməd ənɨ Pità. Ɨkum aŋgɔb məd yɨə nyaʼə Andrù.

¹⁹Ənɨ Yeso nyaʼa zə mɨ̀mə̌d əne, wɨ̀ nyaʼa ghà əmbɨ mɨ̀mə̌d ni, “Mbə̀ beenɨ əbɔʼ num. Mə bɨrɨ ghɨ mbə̀ sɨə ghɨ̀ə̀ ni bə̂d beenɨ əbɔʼ num.”

²⁰Àmei əwu əwən, mbɨ nyaʼa nɔ̀ʼ sàŋ tə kɨ̀ beenɨ əbɔʼ məd.

²¹Wɨ̀ nyaʼa yèndɨ̀ wò ɨmbì rɨpiî, pè zə bɔŋgɔb cherə mɨbe. Mbɨ yɨə nyaʼə Jems wan Zebèdiî mbɨ Jɔ̌n nɨ nyaʼə aŋgɔb məd. Mbɨ nyaʼa baŋgɨə tə kɨ̀ ɨŋga əbaŋ ɨgyɨ̀ mbɨ Zebèdiî nɨ nyaʼə mbǎʼ mɨ̀mə̌d. Yeso nyaʼa bə̀ tɔŋ mɨ̀mə̌d.

²²Àmei əwu əwən, mbɨ nyaʼa nɔ̀ʼ sàŋ əbaŋ ɨgyɨ̀ ze bə̀ sàŋ ə mbǎʼ beenɨ əbɔʼ məd.

²³Yeso nyaʼa ghanə yènə̀ ɨŋga Galiliî jìm. Wɨ̀ nyaʼə yènə̀ chwi ɨnû ɨŋga nəb tɨ ə̀kàtɨ̀ te rɨŋga ɨsɨ mbe, bə̀ yènə̀ ghà ɨkə̂n chɔ̀m ɨmbə̀ʼ ənû ɨfɔ̀n rɨkaŋ. Wɨ̀ nyaʼə bə̀ yènə̀ vɨ̀ə̀ tɨkwɨrɨ əwɔn jìm bə̀ vɨ̀ə̀ tɨkwɨrɨ ɨnɔʼɔ jìm.

²⁴Ɨchî nɨ wɨ̀ nyaʼə ghɨ̀ əne, mɨkâ məd nyaʼa jàŋ ɨŋga Sirià jìm. Əze ə nyaʼa ghɨ̀ ni bə̂d mbe rəŋgu nɨŋ bə̂d mbe nɨ nyaʼə wɔ̀nə̀ tɨkwɨrɨ əwɔn jìm wò əsɨ məd. Wɨ̀ nyaʼa vɨ̀ bə̂d əwɔn mbe mɨjìm. Bə̂d əwɔn mbɔ̂ yɨ mbe nɨ ɨsɨ ɨnyod nyaʼə seə, mbe nɨ ɨzwî rɨbɔ̀ŋ nyaʼa ɨŋga mɨ̀mə̌d, mbe nɨ ə̀fìrɨ̀ ə nyaʼə gywɨ̀ə̀ fɔrɨ mbe nɨ nyaʼa buʼrə.

²⁵Əze ə nyaʼa ghɨ̀ ni mɨnɔ̂n bə̂d nɔʼ rɨ ə Galiliî, nɔ̀ʼ rɨ ə Dèkapolìs, nɔ̀ʼ rɨ ə Jèrusalèm, nɔ̀ʼ rɨ ə Jùdeyà bə̀ nɔ̀ʼ rɨŋga ɨsɨ mbe nɨ nyaʼa ɨnjin ɨgyɨ̂ Jodàn beenɨ əbɔʼ məd.