Read Fɨso Fi Matiù 5 Bible Online

Matiù 5 - Fɨso Fi bible

Matiù 5

¹Ənɨ Yeso nyaʼa zə mɨnɔ̂n bə̂d mbe, wɨ̀ nyaʼa kɔʼ ɨkaŋ ɨwum pè chub ə si. Mə̀mə̀ə̀nɨ̀-ɨnû ɨməd nyaʼa wò əsɨ məd,

²əne wɨ̀ nyaʼa kɔ chwi ɨnû əmbɨ mɨ̀mə̌d ghàə̀ ni:

³“Ŋwìə̀ zɨ əbɔrəbɔd ɨgun ə bə̂d mbe nɨ saŋ mbə ɨnû jìm ɨŋga tɨkyerɨ-ɨbɔ məd, ɨmbə̀ʼ ɨghəm nɨ mbɨ bɨrɨ jɨg ənû ɨfɔ̀n rɨkaŋ.

⁴Ŋwìə̀ zɨ əbɔrəbɔd ɨgun ə bə̂d mbe nɨə dìə̀, ɨmbə̀ʼ ɨghəm nɨ məd ziə bɨrɨ nəərɨ mɨ̀mə̌d.

⁵Ŋwìə̀ zɨ əbɔrəbɔd ɨgun ə bə̂d mbe nɨə bɔtɨ ɨnyod, ɨmbə̀ʼ ɨghəm nɨ mbɨ bɨrɨ jɨg ɨghɨ rɨ ɨgwɨ ə si.

⁶Ŋwìə̀ zɨ əbɔrəbɔd ɨgun ə bə̂d mbe nɨ njì tɨə zaŋə mɨ̀mə̌d, ədɔʼ ə bə̀ neə mɨ̀mə̌d nɨ ghɨ ɨnû nɨ kuʼnɨ, ɨmbə̀ʼ ɨghəm nɨ məd ziə bɨrɨ naʼ ɨghɨ mbe nɨ mbɨ kəbɨ.

⁷Ŋwìə̀ zɨ əbɔrəbɔd ɨgun ə bə̂d mbe nɨə dììrɨ̀ mbɨ cherə, ɨmbə̀ʼ ɨghəm nɨ məd ziə bɨrɨ dììrɨ̀ mɨ̀mə̌d.

⁸Ŋwìə̀ zɨ əbɔrəbɔd ɨgun ə bə̂d mbe nɨ fîŋ tɨ mɨ̀mə̌d zeŋɨ, ɨmbə̀ʼ ɨghəm nɨ mbɨ bɨrɨ zə əməd.

⁹Ŋwìə̀ zɨ əbɔrəbɔd ɨgun ə bə̂d mbe nɨə ghɨ̀ ni bə̂d chub ənɨ əbɔrəbɔd, ɨmbə̀ʼ ɨghəm nɨ wɨ̀ bɨrɨ tɔŋ mɨ̀mə̌d ənɨ mbi bɔn.

¹⁰Ŋwìə̀ zɨ əbɔrəbɔd ɨgun ə bə̂d mbe nɨ bə̂d ə nwèndɨ̀ tɨkyerɨ-ɨwu mɨ̀mə̌d ɨmbə̀ʼ ɨghəm nɨ mbɨə ghɨ̀ ɨnû nɨ kuʼnɨ, ɨmbə̀ʼ ɨghəm nɨ mbɨ bɨrɨ jɨg ənû ɨfɔ̀n rɨkaŋ.

¹¹“Ŋwìə̀ zɨ əbɔrəbɔd ɨgwɨ nən əwù ze nɨ bə̂d ə chàb əwən, nwèndɨ̀ə̀ tə rɨkyerɨ-ɨwu bə̀ ghàə̀ tɨkwɨrɨ ɨnû rɨbɔ̀ŋ mɨghab jìm ɨgwɨ nən ɨmbə̀ʼ əmɨ.

¹²Mbə̀ ghaʼrɨ bə̀ gyendɨ əwən, ɨmbə̀ʼ ɨghəm nɨ Ŋwìə̀ bɨrɨ naʼ ɨneʼe kyeŋ ɨ nən ɨkaŋ. À yɨə bə̀ ɨchî nɨ bə̂d nyaʼə nwèndɨ̀ rɨkyerɨ-ɨwu bə̂d ɨ̀kə̀n Ŋwiə̀ mbe nɨ nyaʼa ɨmbì ɨ nən.

¹³“Mbə yɨ ɨghabɨ fɨ̀ŋgwaŋ əmbɨ ə bə̂d ɨgwɨ ə si. Àyɨə fɨ̀ŋgwaŋ mɨ fə tu i, mbɨ wɨrɨ ghɨ̀ ye mbɨ fɨwən ni fɨ wɨrɨ nə̀m ə? Chəi əghɨ nɨ tɨ̀ mbɨ wɨrɨ ghɨ̀ mbɨ fɨwən, kɨrɨ ənɨ mbɨ waʼ, bə̂d yèn ɨgun.

¹⁴“Mbə yɨ ɨghabɨ ɨzeŋɨ zeŋɨ əmbɨ ɨsɨg. Chəi ənɨ tɨ mbɨ nə̀m əkəm əsɨ ze nɨ yeʼ ɨkaŋ ɨwum.

¹⁵Chəi wə̀d mɔʼɔ əŋgu nɨ wɨ̀ mɨ che ənam wɨ̀ nùŋ yeʼ əton fɨkuʼù. Wɨ̀ mɨ che ənam, wɨ̀ bɨrɨ nuŋ yeʼ ɨgun əsɨ nɨ mbɨə te ənam, ɨmbə̀ʼ zɨə te əmbɨ wə̀d jìm we nɨ yeʼ ɨŋga nəb.

¹⁶À yɨə bə̀ ɨchî nɨ ə ɨzeŋɨ zeŋɨ berɨ te ɨfě bə̂d, ɨmbə̀ʼ mbɨ zə ɨnû chɔ̀m mbe nɨ mbə̀ə ghɨ̀ə̀, əne yiirɨ ə Mbǎʼ we nɨ yeʼ ɨkaŋ.”

¹⁷“Tɨ mbə̀ kɔndɨ əwən ni mə fə yeʼe ɨmbə̀ʼ nimnɨ tɨkə rɨ Mose bə̀ nimnɨ ɨnû mbe nɨ bə̂d ɨ̀kə̀n Ŋwiə̀ nyaʼa ŋwàʼnɨ̀. Mɨ rɨka yeʼe əmɨ ɨ nimnɨ rɨwən. Mə yeʼe ɨ ghɨ ni ɨnû mbɔ̂ jìm jwɨ ənɨ rəsìʼ.

¹⁸Mə ghà rəsìʼ ɨ nən ni, pè ənɨ ɨkaŋ fɔrɨ si fə che, chəi əchəb kɨ̀ ɨghə ə̀ŋwàʼnɨ̀ mɔʼ tɨ ənɨ rɨkə te bɨrɨ nim, kɨrɨ ənɨ mbɨ fə ghɨ̀ ɨnû mbɔ̂ jìm.

¹⁹Mbɨ bɨrɨ tɔŋ wə̀d mɔʼɔ we nɨ gu ɨkə we nɨ yeʼ wɨ kwa rəbɔʼ rɨkə tɔ̂, bə̀ ghà ni bə̂d ghɨ əne ni məd yɨ wɨ kwa ɨŋga ənû ɨfɔ̀n rɨkaŋ. Àyɨə mbɨ bɨrɨ tɔŋ we nɨə nùŋ rɨ̀kə tɔ̂ bə̀ ghà ni bə̂d ghɨ̀ əne ni məd yɨ wɨ kyeŋ ɨŋga ənû ɨfɔ̀n rɨkaŋ.

²⁰Mə ghà ɨ nən ni kɨrɨ ənɨ ɨnû chɔ̀m mbe nɨ mbə̀ə ghɨ̀ə̀ mbɨ che mbɨ məchwiə̀ rɨ̀kə̌ bə̀ chè mbɨ mɨ̀Farisiî, njɨ chəi mbə̀ bɨrɨ nɔ nyɨ ɨŋga ənû ɨfɔ̀n rɨkaŋ.

²¹“Mbə nyaʼa fə zu ni mbɨ nyaʼa ghà əmbɨ ə bə̂d mbɨ rəŋwe ni, 'Tɨrə̀ zwiirɨ e wə̀d', bə̀ zu ni 'wə̀d mɨ zwiirɨ wɨ cherə, mbɨ bɨrɨ saʼ əməd.'

²²Àyɨə mə wɨə ghà ɨ nən ni: Wə̀d mɔʼɔ mɨ sə ɨtəm əbɔʼ wi aŋgɔb, mbɨ bɨrɨ saʼ əməd. Wə̀d mɔʼɔ mɨ zɔ̀m wi aŋgɔb, mbɨ bɨrɨ nɨŋ əməd wò ni mə̀saʼ əbeŋ saʼ əməd. Wə̀d mɨ ghà əmbɨ wi aŋgɔb ni, 'Àwɔ̀ yɨ əneŋ!' mbɨ bɨrɨ maʼ əməd ɨŋga əsɨ ɨchə nɨ chəi ɨwid ə nɔ nìmə.

²³Əne à mɨ wò mbɨ əghɨ ə̀fà ɨkwi ɨjə̀ŋ Ŋwiə̀, əne kɔndɨ ni we aŋgɔb ə berɨ ənû ə mɔʼɔ mbɨ ne,

²⁴nùŋ əghɨ ze ɨfě ɨkwi ɨjə̀ŋ we, bè wò màànɨ̀ tàŋ mbɨ we aŋgɔb, bɔŋ sɨ wò nàʼ.

²⁵“Zambɨ màànɨ̀ tàŋ mbɨ wə̀d we nɨ zɨ ɨsaʼi ɨgwɨ ne ənɨ mbə̀ə kɨrɨ wo ə nəb ɨsaʼi, njɨ wɨ̀ bɨrɨ naʼ əwe əmbɨ əsaʼ mɨ̀sàʼi, əsaʼ mɨ̀sàʼi we nàʼ əwe əmbɨ purɨsɨ̀, purɨsɨ̀ we sɨ wò zɨ̀ əwe ə ndəŋ.

²⁶Mə ghà rəsìʼ ɨ ne ni, chəi à bɨrɨ jwɨ̀ rɨ ə ndəŋ pè ənɨ à fə wǐ ɨkab məd jìm.

²⁷“Mbə nyaʼa fə zu ni mbɨ nyaʼa ghà ni, 'Tɨrə̀ ni e əyi cherə kɨ̀ mbaŋə̀ cherə.'

²⁸Àyɨə mə wɨə ghà ɨ nən ni, wə̀d we nɨ neŋ əyi kɨ̀ mbaŋə̀ feenɨ, fə ni əməd ɨŋga i fîŋ.

²⁹E ɨghə jɨgɨ mɨ ghɨ̀ ni à gù ənû, chɔʼ waʼ. Zɨə bɔ̀ŋ ni à nimnɨ əsɨ ɨnyod ə mɔʼ, chè ɨchî nɨ Ŋwìə̀ bɨrɨ maʼ e ɨnyod jìm ɨŋga əsɨ ɨchə.

³⁰E əbɔ ə jɨgɨ ə mɨ ghɨ̀ ni à gù ənû, sob waʼ. Zɨə bɔ̀ŋ ni à nimnɨ əsɨ ɨnyod ə mɔʼ, chè ɨchî nɨ Ŋwìə̀ bɨrɨ cha e ɨnyod jìm ɨŋga əsɨ ɨchə.

³¹“Mbɨ nyaʼa bə̀ ghà ni, 'Mbaŋə̀ ze nɨ saanɨ ɨnamɨ mbɨ i ɨwi berɨ naʼ ə̀ŋwàʼnɨ̀ ɨ bɔ nɨ chwiə ni mbɨ fə saanɨ ɨnamɨ.'

³²Àyɨə mə wɨə ghà ɨ nən ni, mbaŋə̀ mɔʼɔ mɨ saanɨ ɨnamɨ mbɨ i ɨwi, kɨrɨ ənɨ ɨwi məd we ni mbaŋə̀ cherə, njɨ wɨ̀ fə ghɨ̀ ɨwi məd we ənɨ əyi nɨə niirɨə mbaŋə̀. Mbaŋə̀ ze nɨ nam əyi we nɨ saanɨ ɨnamɨ fə ni əyi cherə.

³³“Mbə nyaʼa fə bə̀ zu ni mbɨ nyaʼa ghà əmbɨ ə bə̂d mbɨ rəŋwe ni, 'Tɨrə̀ kàn e ənû ə mɔʼɔ bɔŋ wɨrɨ ton, àyɨə à berɨ ghɨ ənû ze nɨ à kàn əmbɨ Ə̀nùŋɨ̀sɨg ni tə bɨrɨ ghɨ̀.'

³⁴Àyɨə mə ghà ɨ nən ni, tɨ wə̀d tɔ kàn i ənû ə mɔʼɔ. Tɨ wə̀d tɔ kàn i ənû ə mɔʼɔ tɔŋ ɨkaŋ, ɨmbə̀ʼ ɨghəm nɨ ɨkaŋ yɨ ətən ɨfɔ̀n ə Ŋwiə̀.

³⁵Tɨ wə̀d tɔ kàn i ənû ə mɔʼɔ tɔŋ si, ɨmbə̀ʼ ɨghəm nɨ si yɨ əsɨ ze nɨ Ŋwìə̀ ə teerɨ mbi ɨwu ɨgun. Tɨ wə̀d tɔ kàn i ənû ə mɔʼɔ tɔŋ ə Jèrusalèm, ɨmbə̀ʼ ɨghəm nɨ Jèrusalèm yɨ əsɨ ɨfɔ̂n kyeŋ.

³⁶Tɨ wə̀d kàn i ənû ə mɔʼɔ tɔŋ e ətu, ɨmbə̀ʼ ɨghəm nɨ chəi wə̀d mɔʼɔ əŋgu nɨ tɨ̀ wɨ̀ ghɨ ni nyôŋ ətu mɔʼ fin kɨ̀ ni zɨ fu.

³⁷Mbə̀ gha àmei ni, 'Ee' kɨ̀ ni 'Chə̂'. Ənû ə cherə ze nɨ wə̀d wɨrɨ ghà yɨ rɨ əmbɨ wə̀d rɨ̀bɔ̀ŋ.

³⁸“Mbə nyaʼa fə zu ni mbɨ nyaʼa ghà ni, 'Wə̀d mɨ toʼ ɨghə wə̀d cherə, mbɨ bə̀ toʼ wɨ məd, bə̀ zu ni wə̀d mɨ chɔʼ ɨsɔŋ wə̀d cherə, mbɨ bə̀ chɔʼ wɨ məd.'

³⁹Àyɨə mə wɨə ghà ɨ nən ni, tɨ mbə̀ nod əwən tɨ ənɨ ə wə̀d nɨə ghɨ̀ ɨnû rɨbɔ̀ŋ. Wə̀d mɔʼɔ mɨ nìb e ɨnwa jɨgɨ, à bèŋ wɨ tweŋ chwi ɨ bɔ.

⁴⁰Wə̀d mɔʼɔ mɨ wò putɨ əwe ɨmbə̀ʼ nɨŋ e ngywɨ̌ maʼi, saŋ wɨ̀ nɨŋ fɔrɨ e ngywɨ̌ bòm.

⁴¹Wə̀d mɔʼɔ mɨ nyèŋ e ni à beʼ mbi ɨghɨ yèn ə kilometà fìbɨ̀, beʼ ɨghɨ mbe yèn mɨ̀kilometà mɨ̀be.

⁴²Wə̀d mɔʼɔ mɨ nɔn əghɨ rɨ ne, naʼ ɨ bɔ. Wə̀d mɔʼɔ mɨ kə̀b chɔʼ əghɨ rɨ ne, tɨrə̀ ton e.

⁴³“Mbə nyaʼa fə zu ni mbɨ nyaʼa ghà ni, 'Ghaʼ we aŋgɔb, bàn e wə̀d pə̀n.'

⁴⁴Àyɨə mə ghà ɨ nən ni, mbə̀ ghaʼ mbə bə̂d pə̀n bə̀ kɔŋgɨ ə Ŋwiə̀ ɨgun ə bə̂d mbe nɨə nwèndɨ̀ tə rɨkyerɨ-ɨwu,

⁴⁵ɨmbə̀ʼ mbə̀ yeʼ bɔn ə Mbǎʼ we nɨ yeʼ ɨkaŋ. Mbə̀ ghɨ əne ɨmbə̀ʼ ɨghəm nɨ məd wɨə ghɨ̀ə̀ ni nyùmə̀ te ɨgwɨ ə bə̂d rɨbɔ̀ŋ bə̀ fɔrɨ ɨgwɨ ə bə̂d chɔ̀m. Ɨ wɨə ghɨ̀ə̀ ni mbə̀ŋ nɔ ɨgwɨ ə bə̂d mbe nɨə ghɨ̀ ɨnû nɨ kuʼnɨ bə̀ fɔrɨ ɨgwɨ mbe nɨ chəi mbɨə ghɨ̀ ɨnû nɨ kuʼnɨ.

⁴⁶Mbə mɨ yeʼə ghaʼə àmei bə̂d mbe nɨə ghaʼ əwən, njɨ Ŋwìə̀ kɨə wo chɔʼ ə ə̀fàʼì rɨ ye ə? Ɨmbə̀ʼ əzɔ̂ yɨ ənû nɨ məfetɨ tagsɨ̀ ə bə̀ ghɨ̀ə̀ ə?

⁴⁷Mbə mɨ yeʼə chàʼrɨ̀ àmei mbə bɔŋgɔb, njɨ ənû ze nɨ mbə̀ə ghɨ̀ə̀ nɨ che əzɨ ə bə̂d cherə kɨ əzi ə? Ɨmbə̀ʼ əzɔ̂ yɨ ənû nɨ bə̂d mbe nɨ kaʼi mɨ̀Jû ə ghɨ̀ə̀ ə?

⁴⁸Əne mbə berɨ bɔŋ màànɨ̀ ɨchî nɨ ə Mbǎʼ rɨkaŋ bə̀ bɔ̀ŋ màànɨ̀.