Read Fɨso Fi Matiù 6 Bible Online

Matiù 6 - Fɨso Fi bible

Matiù 6

¹“Mbə̀ we əwən ni tɨ mbə̀ ghɨ ə ɨnû mbe nɨ kuʼnɨ ɨfě bə̂d, àmei ɨmbə̀ʼ mbɨ zə əwən. Mbə mɨ ghɨ əne, njɨ chəi ə Mbǎʼ we nɨ yeʼ ɨkaŋ bɨrɨ chɔʼ ə ə̀fàʼì.

²“Əne ənɨ àwɔ̀ ə nàʼ ɨghɨ əmbɨ wə̀d ŋgəʼ, tɨrə̀ fə e tàŋ ɨchî nɨ ɨbekɨ bə̂d ə ghɨ̀ ɨŋga nəb tɨ ə̀kàtɨ̀ bə̀ ghɨ̀ ɨtu ɨzib. Ɨ mbɨə ghɨ̀ əne ɨmbə̀ʼ bə̂d yiirɨ mɨ̀mə̌d. Mə ghà rəsìʼ ɨ nən ni mbɨ fə berɨ ə ɨchɔʼ ə̀fàʼì.

³Àyɨə ənɨ àwɔ̀ ə nàʼ ɨghɨ əmbɨ wə̀d ŋgəʼ, tɨrə̀ ben e ni əbɔ ə tweŋ ə kyerɨ əghɨ ze nɨ əbɔ ə jɨgɨ ə ghɨ̀ə̀,

⁴ɨmbə̀ʼ àmei àwɔ̀ bɨrɨ kyerɨ. À mɨ ghɨ̀ əne, e Mbǎʼ we nɨə zə ɨnû mbe nɨ àwɔ̀ ə ghɨ̀ ənə̀mə, bɨrɨ chɔʼ e ə̀fàʼì.

⁵“Ənɨ mbə̀ə kɔ̀ŋgɨ̀ ə Ŋwiə̀, tɨ mbə̀ ghɨ ə ɨghabɨ ɨbekɨ bə̂d. Ɨ mbɨə ghaʼə nɨ təm ɨŋga nəb tɨ ə̀kàtɨ̀ bə̀ fɔrɨ ɨban ɨnə̂njɨ̀ bɔŋ kɔŋgɨ ə Ŋwiə̀. Ɨ mbɨə ghɨ̀ əne àmei ɨmbə̀ʼ bə̂d zə mɨ̀mə̌d. Mə ghà rəsìʼ ɨ nən ni mbɨ fə berɨ ə ɨchɔʼ ə̀fàʼì.

⁶Àyɨə ənɨ à kəb kɔŋgɨ ə Ŋwiə̀, nyɨ ɨŋga e ətu ə nəb, wùb ɨchû nəb, kɔ̀ŋgɨ̀ e Mbǎʼ we nɨ yeʼ ənə̀mə. Əne, e Mbǎʼ we nɨə zə ɨnû mbe nɨ àwɔ̀ ə ghɨ̀ ənə̀mə, bɨrɨ chɔʼ e ə̀fàʼì.

⁷“Ənɨ àwɔ̀ ə kɔ̀ŋgɨ̀ ə Ŋwiə̀, tɨrə̀ ghà əwe ɨnû nɔnɔʼ nɨ chəi ɨwe ɨŋga, ɨchî nɨ bə̂d mbe nɨ kaʼi mɨ̀Jû ə ghɨ̀ə̀. Ɨ mbɨə kɔndɨə ni mɨ̀ŋwìə̀ mɨ̀mə̌d bɨrɨ zu ə̀kɔ̀ŋgɨ̀ mɨ̀mə̌d ɨmbə̀ʼ ɨchî nɨ mbɨə ghà ɨnû nɔnɔʼ.

⁸Tɨ mbə̀ ghɨ̀ ə ɨghabɨ mɨ̀mə̌d, ɨmbə̀ʼ ɨghəm nɨ ə Mbǎʼ ə kyerɨ ɨghɨ mbe nɨ mbə̀ kwaŋɨ bɔŋ mbə̀ sɨə biirɨə.

⁹Mbə̀ kɔŋgɨ ə Ŋwiə̀ əni: 'A Mbǎʼ nɨ yeʼ ɨkaŋ, ghɨ ni bə̂d wumnɨ e ɨkum.

¹⁰E ənû ɨfɔ̀n ə yeʼe, bə̂d rɨ ɨgwɨ ə si ghɨ ɨnû mbe nɨ à kə̀bɨ ɨchî nɨ mbe nɨ yeʼ ɨkaŋ ə ghɨ̀ə̀.

¹¹Naʼ ɨghɨjɨg nɨ kuʼnɨ ɨ na rə̀chɔ̀ŋ.

¹²Waʼ mba ɨnû rɨbɔ̀ŋ, ɨchî nɨ tɨ̀ fə waʼ ɨnû rɨbɔ̀ŋ bə̂d mbe nɨ gù ɨnû ɨ na.

¹³Tɨrə̀ ben e ni ənû ə mɔʼɔ numbɨ əwa, àyɨə chɨ əwa rɨ ənɨ ɨnû rɨbɔ̀ŋ.' [4] [5]

¹⁴“À mɨ waʼ ɨnû rɨbɔ̀ŋ bə̂d, e Mbǎʼ we nɨ yeʼ ɨkaŋ bɨrɨ bɨ waʼ mbe.

¹⁵À mɨ yeʼ nɨ chəi àwɔ̀ ə waʼ ɨnû rɨbɔ̀ŋ bə̂d, njɨ ka e Mbǎʼ bɨrɨ bɨ waʼ i mbe.

¹⁶“Ənɨ mbə̀ chub rɨ jɨg, tɨ mbə̀ ghɨ ə ɨghabɨ ə bə̂d nɨə kə̀nə̀, ɨchî nɨ ɨbekɨ bə̂d ə ghɨ̀ə̀. Ɨ mbɨə ŋgɨ̀ndɨ̀ tə rɨfě ɨmbə̀ʼ bə̂d zə ni ɨ mbɨə chubə rɨ jɨg. Mə ghà rəsìʼ ɨ nən ni mbɨ fə berɨ ə ɨchɔʼ ə̀fàʼì.

¹⁷À yɨ ənɨ à chub rɨ jɨg, so e ɨfě bə̀ sɔ̀d e ətu,

¹⁸ɨmbə̀ʼ tɨ bə̂d zə ə ni à chub rɨ jɨg. Àmei e Mbǎʼ we nɨ chəi bə̂d ə zəə bɨrɨ zə. À mɨ ghɨ̀ əne, e Mbǎʼ we nɨə zə ɨnû mbe nɨ àwɔ̀ ə ghɨ̀ ənə̀mə bɨrɨ chɔʼ e ə̀fàʼì.

¹⁹“Tɨ mbə̀ nuŋ əwən ə mbɔ̂n ɨgwɨ ə si, nɨ yeʼ əsɨ ze nɨ ɨsəʼɨ fɔrɨ chə̂b bɨrɨ chə̀kɨ̀ nɨ bə̀ yeʼ əsɨ nɨ mɨjɨ bɨrɨ tòʼ.

²⁰Mbə̀ nuŋ ə mbɔ̂n yeʼ ɨkaŋ, nɨ yeʼ əsɨ nɨ ka ɨsəʼɨ kɨ̀ chə̂b bɨrɨ chəkɨ i, bə̀ yeʼ əsɨ nɨ ka mɨjɨ bɨrɨ toʼ ə.

²¹Əne yɨ ɨmbə̀ʼ ɨghəm nɨ əsɨ ze nɨ e mbɔ̂n yeʼ əŋgu, e fîŋ bɨrɨ bɨ yeʼ əŋgu.

²²“Ɨghə yɨ ənam əmbɨ nyamnyod. Əne, e ɨghə mɨ yeʼ wɨ chɔ̀m, e nyamnyod jìm bɨrɨ zeŋ.

²³Àyɨə e ɨghə mɨ yeʼ wɨ rɨ̀bɔ̀ŋ, e nyamnyod jìm bɨrɨ fin. Əne ɨzeŋɨ zeŋɨ we nɨ yeʼ ɨŋga ne mɨ bèŋ ənɨ ɨsɨ firɨ, njɨ ɨsɨ mbe bɨrɨ fin rɨ kììm!

²⁴“Chəi wə̀d mɔʼɔ əŋgu nɨ tɨ̀ wɨ̀ fàʼ əmbɨ mɨ̀mbǎʼ ə̀fàʼì mɨbe, ɨmbə̀ʼ ɨghəm nɨ wɨ̀ bɨrɨ ban wɨ fìbɨ̀ ghaʼ wɨ fìbɨ̀, kɨ̀ wɨ̀ fàʼ əmbɨ wɨ fìbɨ̀ ənɨ i fîŋ jìm tə̀ə̀nɨ̀ wɨ fìbɨ̀. Chəi ənɨ tɨ̀ à fàʼ əmbɨ ə Ŋwiə̀ bə̀ faʼ nɨ berɨ mbɔ̂n əwu əwən.

²⁵“Tɨ mbə̀ nwìʼ ə ɨnyod ɨmbə̀ʼ ə ɨ̀tènɨ̀, ni mbə̀ kɨə wo jɨg yè kɨ̀ ni mbə̀ kɨə wo nɔ yè. Tɨ mbə̀ bɨ nwiʼ ə ɨnyod ɨmbə̀ʼ ə nyamnyod, ni mbə̀ kɨə wo zɨ yè. Ɨ̀tènɨ̀ rɨ wa chè i ɨghɨjɨg ə? Nyamnyod rɨ wa chè i ngywɨ̌ ə?

²⁶Mbə̀ neŋ rɨnən. Chəi tɨə kon ɨghɨ, chəi tɨə bə̀ kwə̀ŋ ɨghɨ chà ɨŋga ŋgə̌n. À yɨ ə Mbǎʼ we nɨ yeʼ ɨkaŋ ə jə mɨ̀mə̌d. Chəi mbə̀ wa che rɨnən ə?

²⁷À kɨə we rəbɔʼ nən nɨə nwìʼ ɨnyod, nɨ tɨ̀ wɨ̀ yì ə awà fibɨ̀ ɨgun ɨni mbe nɨ wɨ̀ bɨrɨ chub ɨŋga ɨsɨg ə?

²⁸Mbə̀ kɨə nwìʼ ə ɨnyod ɨmbə̀ʼ ngywɨ̌ ɨmbə̀ʼ ə yè ə? Mbə̀ neŋ ɨchî nɨ rɨ̀kwě ə kwiə. Chəi tɨə fàʼə̀, chəi tɨə bə̀ baʼə tə ngywɨ,

²⁹àyɨə mə̀ ghà ɨ nən ni ka àbei ɨfɔ̂n Solomòn nɨ nyaʼə fɔ̀ɔ̀nɨ̀ ɨŋga mbɔ̂n, chəi wɨ̀ nyaʼa berɨ ngywɨ̌ nɨ bɔŋ ɨghabɨ ɨ̀kwě mɔʼ rəbɔʼ rɨ̀kwě tɔ̂.

³⁰Ŋwìə̀ mɨ yeʼə zɨ̀ə̀ ngywɨ̌ ənɨ ɨfu nɨ yeʼ ɨkǎ rə̀chɔ̀ŋ, ɨsɔ mbɨ maʼ ɨŋga ɨwid, njɨ ka məd wa bɨrɨ zɨ i ngywɨ̌ ɨgwɨ nən chè ɨchî nɨ wɨ̀ zɨ ənɨ ɨfu ə? Ə ɨbenɨ ə kàŋ kə!

³¹Əne tɨ mbə̀ nwìʼ ə ɨnyod ghà ni, 'Tɨ̀ kɨə wo jɨg yè?' kɨ̀ ni, 'Tɨ̀ kɨə wo nɔ yè?' kɨ̀ ni, 'Tɨ̀ kɨə wo zɨ yè?'

³²Bə̂d mbe nɨ kaʼi mɨ̀Jû mbɨə kə̀b ɨghɨ mbɔ̂ jìm. Ə Mbǎʼ rɨkaŋ ə bə̀ kyerɨ ni mbə kə̀b ɨghɨ mbɔ̂ jìm.

³³Àyɨə mbə̀ be kə̀b yeʼ ənû ɨfɔ̀n əməd bə̀ ghɨ̀ ɨnû nɨ kuʼnɨ, əne wɨ̀ bɨrɨ bɨ naʼ ɨghɨ mbɔ̂ jìm ɨ nən.

³⁴“Əne tɨ mbə̀ nwìʼ ə ɨnyod ɨmbə̀ʼ əni ɨsɔ, ɨmbə̀ʼ ɨghəm nɨ əni ɨsɔ ə berɨ mbi ɨnû. Ɨni jìm ə berɨ i ŋgəʼ.