Read Fɨso Fi Matiù 7 Bible Online

Matiù 7 - Fɨso Fi bible

Matiù 7

¹“Tɨ mbə̀ saʼ e bə̂d cherə, ɨmbə̀ʼ tɨ Ŋwìə̀ bɨ saʼ i əwən.

²Ɨchî nɨ mbə̀ə saʼə bə̂d cherə, yɨə bə̀ ɨchî nɨ Ŋwiə̀ bɨrɨ saʼ əwən. Ŋwìə̀ bɨrɨ nɨŋ ɨchî nɨ mbə̀ saʼ bə̂d cherə saʼ əwən əŋgu.

³Əton nɨ àwɔ̀ ə zə əchəb əghɨ ze nɨ yeʼ ɨŋga ɨghə we aŋgɔb, àyɨə chəi àwɔ̀ ə zə əkwirɨ ɨwəŋ ze nɨ yeʼ ɨŋga e ɨghə kɨ ɨmbə̀ʼ ə yè ə?

⁴Kɨ̀ tɨ à ghà əmbɨ we aŋgɔb ni, 'Sɨ mə chɨ əchəb əghɨ ze nɨ yeʼ ɨŋga e ɨghə', nɨ əkwirɨ ɨwəŋ ə yeʼ ɨŋga we ə?

⁵Àwɔ̀ yɨ əbekɨ ə wə̀d! Fə be chɨ̀ əkwirɨ ɨwəŋ ze nɨ yeʼ ɨŋga e ɨghə, əne à bɨrɨ zə ɨsɨ ɨchî chɔ̀m bɔŋ chɨ əchəb əghɨ ze nɨ yeʼ ɨŋga ɨghə we aŋgɔb.

⁶“Tɨ mbə̀ nàʼ ə ɨghɨ Ŋwiə̀ əmbɨ ə bu, njɨ tɨ bɨrɨ su əbɔʼ nən nombɨ əwən. Tɨ mbə̀ bɨ maʼ ə mbə mɨ̀pə̂l əmbɨ mɨ̀kuŋə, njɨ mbɨ bɨrɨ yen ɨgun.

⁷“Mbə̀ nɔn, Ŋwìə̀ bɨrɨ naʼ ɨ nən. Mbə̀ kəbə, mbə bɨrɨ zə. Mbə̀ goŋgɨ, Ŋwìə̀ bɨrɨ fiʼ ɨ nən.

⁸Ɨmbə̀ʼ ɨghəm nɨ wə̀d jìm we nɨ nɔnɨ, Ŋwìə̀ bɨrɨ naʼ ɨ bɔ, we nɨ kəbɨ bɨrɨ zə, we nɨ goŋgɨ, Ŋwìə̀ bɨrɨ fiʼ ɨ bɔ.

⁹À kɨə we rəbɔʼ nən nɨ wan məd mɨ nɔn ŋgə̀ŋ, wɨ̀ naʼ yeʼ ɨti ɨ bɔ ə?

¹⁰Kɨ̀ nɨ wɨ̀ mɨ nɔn ɨgwi, wɨ̀ nàʼ yeʼ jɔ ɨ bɔ ə?

¹¹Əne mbə̀n mbe nɨə ghɨ̀ ɨnû rɨbɔ̀ŋ mɨ kyerɨ ɨchî nɨ naʼ ɨghɨ chɔ̀m əmbɨ mbə bɔn, njɨ ə Mbǎʼ we nɨ yeʼ ɨkaŋ bɨrɨ kaŋ naʼ ɨghɨ chɔ̀m əmbɨ ə bə̂d mbe nɨ nɔnɨ!

¹²“Əne ənû ze nɨ mbə̀ kəbɨ ni bə̂d cherə ghɨ ənɨ ə nən, mbə̀ bə̀ ghɨ ənɨ mɨ̀mə̌d. Mbɔ̂ yɨ ənû mbe nɨ yeʼ ɨŋga tɨkə rɨ Mose bə̀ fɔrɨ ɨŋga tɨkə te nɨ bə̂d ɨ̀kə̀n Ŋwiə̀ nyaʼə chwiə.

¹³“Mbə̀ nyɨ ɨŋga ənû ɨfɔ̀n ə Ŋwiə̀ ɨchû ɨkam kwa, ɨmbə̀ʼ ɨghəm nɨ ɨchû ɨkam kyeŋ wɨə wò əsɨ ɨchə, ɨnə̂njɨ̀ we nɨə wò əŋgu rɨka bɨ se i nɨ yen ɨgun. Bə̂d mɨ̀nɔnɔʼ mbɨə nyɨ àmei ɨchû ɨkam we.

¹⁴Ɨchû ɨkam we nɨə wò əsɨ ze nɨ bə̂d bɨrɨ jɨg ɨ̀tènɨ̀ yɨ wɨ kwa. Ɨnə̂njɨ̀ we nɨə wò əŋgu ə kàŋ sè nɨ yen ɨgun. Àmei bə̂d rɨpiî mbe ə zə ɨnə̂njɨ̀ we.

¹⁵“Mbə̀ we əwən mbɨ ə bə̂d ɨ̀kə̀n mɨghab. Ɨ mbɨə yeʼe əsɨ nən ɨŋga gôb rɨ njɨ̀g, àyɨə ɨŋga fîŋ tɨ mɨ̀mə̌d mbɨ yɨ ɨghabɨ ɨfɔn nɨ njì tɨə zaŋə.

¹⁶Mbə̀ bɨrɨ kyerɨ mɨ̀mə̌d tɨ ənɨ ɨnû mbe nɨ mbɨə ghɨ̀ə̀. Təŋgwin njəŋ wɨə wa kɔə mɨ̀namsɨ̀ ə? Fə̀kyi fə wa kɔ əkwebɨ ə?

¹⁷Əzed ə chɔ̀m ə zɨə kɔ rɨtam chɔ̀m. Əzɨ rɨbɔ̀ŋ ə bə̀ kɔ rɨtam rɨbɔ̀ŋ.

¹⁸Ka əzed ə chɔ̀m ə bɨrɨ kɔ i rɨtam rɨbɔ̀ŋ. Ka əzed rɨbɔ̀ŋ ə bɨrɨ bɨ kɔ i rɨtam chɔ̀m.

¹⁹Mbɨ bɨrɨ wad əzed ze nɨ chəi zɨə kɔ rɨtam chɔ̀m màʼ ɨŋga ɨwid.

²⁰Əne mbə bɨrɨ kyerɨ mɨ̀mə̌d tɨ ənɨ ɨnû mbe nɨ mbɨə ghɨ̀ə̀.

²¹“Kaʼi wə̀d jìm we nɨə tɔŋ əmɨ ni, 'Ə̀nùŋɨ̀sɨg, Ə̀nùŋɨ̀sɨg,' bɨrɨ nyɨ ɨŋga ənû ɨfɔ̀n rɨkaŋ. Àmei we nɨə ghɨ̀ ɨnû mbe nɨ mɨ Mbǎʼ rɨkaŋ kəbɨ bɨrɨ nyɨ.

²²Bə̂d mɨ̀nɔnɔʼ bɨrɨ gha ɨ num əni ze nɨ Ŋwìə̀ ə sob mɨsaʼi ni, 'Ə̀nùŋɨ̀sɨg, Ə̀nùŋɨ̀sɨg, ɨmbə̀ʼ tɨ̀ nyaʼa ghà ɨkə̂n Ŋwiə̀ ənɨ e ɨkum, bə̀ chɨ̀ ɨzwî rɨbɔ̀ŋ ənɨ e ɨkum, bə̀ ghɨ̀ ɨnû yiirɨ ənɨ e ɨkum ə?'

²³Mbɨ mɨ ghà əne, mə bɨrɨ ghà əmbɨ mɨ̀mə̌d ni, 'Chəi mə kweʼ kyerɨ əwən. Mbə̀ nɔʼ rɨ ɨban num, mbə̀n bə̂d nɨə ghɨ̀ ɨnû rɨbɔ̀ŋ.'

²⁴“Wə̀d jìm we nɨ zu ɨnû mbɔ̂ nɨ mə gha bə̀ ghɨ̀ ɨnû rəŋgu, yɨ ɨghabɨ wə̀d ɨwe nɨ nyaʼa bɔm i nəb ɨgun ɨwɔ̌.

²⁵Mbə̀ŋ nyaʼa nɔ, mɨgyɨ̂ swi gwèə̀, əfim ə chè nun nəb ze, àyɨə chəi zɨ̀ nyaʼa buʼ ə, ɨmbə̀ʼ ɨghəm nɨ mbɨ nyaʼa bɔm ɨgun ɨwɔ̌.

²⁶Àyɨə wə̀d jìm we nɨ zu ɨnû mbɔ̂ nɨ mə ghamɨ əne chəi wɨ̀ ghɨ ɨnû mbe nɨ mə̀ ghǎ yɨ ɨghabɨ əneŋ nɨ nyaʼa bɔm i nəb ɨgwɨ rɨsi.

²⁷Mbə̀ŋ nyaʼa nɔ, mɨgyɨ̂ swi gwèə̀, əfim ə chè nun nəb ze, əne zɨ̀ nyaʼa buʼ ə si rɨ bììm.”

²⁸Ənɨ Yeso nyaʼa fə gha ɨnû mbɔ̂ màànɨ̀, mɨnɔ̂n bə̂d mbe nyaʼa yiirɨ ɨchî nɨ wɨ̀ nyaʼə chwi ɨnû,

²⁹ɨmbə̀ʼ ɨghəm nɨ ɨ wɨə nyaʼə chwiə ɨnû əmbɨ mɨ̀mə̌d ɨghabɨ ə wə̀d nɨ berɨ ɨka nɨ ghɨ əne, kaʼi ɨghabɨ ɨchî nɨ məchwiə̀ rɨ̀kə̌ mɨ̀mə̌d nyaʼə chwiə.