Read Fɨso Fi Mak 1 Bible Online

Mak 1 - Fɨso Fi bible

Mak 1

¹Ɨkɔ rɨ ənɨ ɨkə̂n chɔ̀m ɨmbə̀ʼ ə Yeso Kristo we nɨ yeʼ Wan Ŋwìə̀.

²Wə̀d ɨ̀kə̀n Ŋwìə̀ Aizayà nyaʼa ŋwàʼnɨ̀ ni, “Zə, mə wɨə chà mɨ wə̀d tom ɨmbì ɨ ne. Məd bɨrɨ tekɨ ɨnə̂njɨ̀ ɨ ne.

³Məd yɨ we nɨə kyeŋ ɨŋga ɨbad rɨkwàʼi ghàə̀ ni, 'Mbə̀ tekɨ ɨnə̂njɨ̀ əmbɨ Ə̀nùŋɨ̀sɨg. Mbə̀ tekɨ mɨnə̂njɨ̀ məd mbɨ təm!'”

⁴Jɔ̌n we nɨ nyaʼə nàʼ mɨnib nyaʼa wò ɨŋga ɨbad rɨkwàʼi pè kɔ nàʼ mɨnib bə̀ kɔ gha ɨŋgam Ŋwiə̀ ghàə̀ ni bə̂d beŋ tə fîŋ nɨŋ mɨnib ɨmbə̀ʼ Ŋwìə̀ waʼ ɨnû rɨbɔ̀ŋ mɨ̀mə̌d.

⁵Bə̂d mbe rɨŋga əbà əbeŋ ze rɨ ə Jùdeyà fɔrɨ bə̂d mɨ̀jìm mbe rɨ ə Jèrusalèm nyaʼa jwɨ̀ wò kumnɨ əməd, ben mbə ɨnû rɨbɔ̀ŋ, əne wɨ̀ nyaʼa nàʼ mɨnib əmbɨ mɨ̀mə̌d ɨŋga ɨgyɨ̂ Jodàn.

⁶Jɔ̌n nyaʼə zɨ̀ə̀ ngywɨ̌ nɨ mbɨ nyaʼa tekɨ ənɨ ə nyôŋ rɨ kàmel. Wɨ̀ nyaʼa bə̀ kod ɨ̀kɔ̀bɨ̀ gôb ənɨ i ɨkyerɨ. Wɨ̀ nyaʼə kurə ŋgwèmɨ bə̀ nerə jǔ nɨ mbɨ kəʼ rɨŋga bǔʼ.

⁷Wɨ̀ nyaʼə ghàə̀ ni, “Wə̀d we nɨə yeʼe ənɨ mɨ njìm ə dabə chè əmɨ. Mɨ rɨka kùʼ əmɨ nɨ tɨ̀ mə gundɨ ə si zà mɨniʼ ɨtabɨ məd.

⁸Mə wɨə nàʼ mɨnib ɨ nən, àyɨə məd bɨrɨ cha Əzwî ə Zeŋɨ ɨgwɨ nən.”

⁹À nyaʼa ənɨ ə nyùmə̀ we, Yeso nyaʼa nɔ̀ʼ rɨ ə Nazàret ə Galiliî wò əsɨ Jɔ̌n, əne Jɔ̌n nyaʼa nàʼ mɨnib ɨ bɔ ɨŋga ɨgyɨ̂ Jodàn.

¹⁰Ənɨ Yeso nyaʼə jwɨ̀ rɨŋga ɨgyɨ̀ we, wɨ̀ nyaʼa zə ɨkaŋ nɨ nyaʼa əfìʼə, bə̀ zə Əzwî ə Ŋwìə̀ nɨ nyaʼə swiʼə yeʼe ɨgwɨ məd ɨghabɨ tə̀bə̀ŋə.

¹¹Gɨ̂ mɔʼɔ nyaʼa ghàm rɨkaŋ ghà ni, “Àwɔ̀ yɨ mɨ Wan nɨ mə̀ ghaʼi kwàʼ rɨŋgəʼ. Mɨ fîŋ ə bɔ̀ŋ əku ɨmbə̀ʼ əwe.”

¹²Àmei əwu əwən, Əzwî ə Ŋwìə̀ ə nyaʼa nɨŋ əməd mbɨ wò ɨŋga ɨbad rɨkwàʼi.

¹³Wɨ̀ nyaʼa chub ɨŋga ɨbad rɨkwàʼi we ɨni ɨwum kwè. Satàn nyaʼə numbɨ əməd ənɨ ə nyùmə̀ we. Wɨ̀ nyaʼa mbɨ ə nyam tɔtɔ te rɨŋga ɨbad rɨkwàʼi. Mbɨ̀aŋgɨrə̀ nyaʼə nàʼ ɨghɨ mbe nɨ wɨ̀ kə̀bɨ.

¹⁴Ənɨ mbɨ nyaʼa yim ə Jɔ̌n wò zɨ̀ ə ndəŋ, Yeso nyaʼa wò ə Galiliî pè kɔ gha ɨkə̂n chɔ̀m ɨmbə̀ʼ ənû ɨfɔ̀n ə Ŋwìə̀.

¹⁵Wɨ̀ nyaʼə ghàə̀ ni, “Nyùmə̀ fə kùʼi. Ənû ɨfɔ̀n ə Ŋwìə̀ ə fə tiinɨ. Mbə̀ beŋ tə fîŋ, ben ɨkə̂n chɔ̀m wɔ̂.”

¹⁶Ənɨ Yeso nyaʼə che ɨban ə sà ze rɨ ə Galiliî, wɨ̀ nyaʼa zə mbaŋə̀ rɨ̀be nɨ nyaʼə mə̀gywɨ̀-əgwi. Ɨ mbɨə nyaʼə màʼə̀ kɨ̀ ɨŋga ə sà ze. Mbɨ yɨə nyaʼə Saimòn mbɨ Andrù nɨ nyaʼə aŋgɔb məd.

¹⁷Yeso nyaʼa zə əne ghà əmbɨ mɨ̀mə̌d ni, “Mbə̀ beenɨ əbɔʼ num. Mə bɨrɨ ghɨ mbə̀ sɨə ghɨ̀ə̀ ni bə̂d beenɨ əbɔʼ num.”

¹⁸Àmei əwu əwən, mbɨ nyaʼa nɔ̀ʼ sàŋ tə kɨ̀ beenɨ əbɔʼ məd.

¹⁹Wɨ̀ nyaʼa tindɨ wò ɨmbì rɨpiî, zə ə Jems mbɨ Jɔ̌n nɨ nyaʼə bɔn Zebèdiî. Mbɨ nyaʼa ɨŋga əbaŋ ɨgyɨ̀ baŋgɨə tə kɨ̀.

²⁰Ənɨ wɨ̀ nyaʼa zə mɨ̀mə̌d, wɨ̀ nyaʼa tɔŋə. Mbɨ nyaʼa nɔ̀ʼ sàŋ ə mbǎʼ nɨ nyaʼə Zebèdiî ɨŋga əbaŋ ɨgyɨ̀ ze mbɨ ə bə̂d mbe nɨ wɨ̀ nyaʼa nɨŋ ənɨ ə̀fàʼì. Mbɨ nyaʼa sàŋ əne beenɨ əbɔʼ məd.

²¹Yeso mbɨ mbi mə̀mə̀ə̀nɨ̀-ɨnû nyaʼa wò nyɨ ə Kàpenàhom. À nyaʼa əni əkwɨ mɨ̀Jû ze nɨ nyaʼa beenɨ, wɨ̀ nyaʼa wo nyɨ kɔ chwi ɨnû ɨŋga nəb ə̀kàtɨ̀ ze nɨ nyaʼa əsɨ ze.

²²Bə̂d mbe nɨ nyaʼa zu ɨnû mbe nyaʼa yiirɨ ɨchî nɨ wɨ̀ nyaʼə chwi ɨnû, ɨmbə̀ʼ ɨghəm nɨ ɨ wɨə nyaʼə chwi ɨnû əmbɨ mɨ̀mə̌d ɨghabɨ ə wə̀d nɨ berɨ ɨka nɨ ghɨ əne, kaʼi ɨghabɨ ɨchî nɨ məchwiə̀ rɨ̀kə̌ nyaʼə chwiə.

²³Àmei ənɨ ə nyùmə̀ we, mbaŋə̀ mɔʼɔ nɨ əzwî rɨbɔ̀ŋ ə nyaʼa ɨŋga məd nyaʼa yeʼe ɨŋga nəb ə̀kàtɨ̀ ze.

²⁴Wɨ̀ nyaʼa kɔ kyeŋ rɨ̀kǎ ghàə̀ ni, “Yeso rɨ ə Nazàret! À berɨ ənû ə ye nɨ ghɨ̀ mbɨ nà ə? À wa yeʼe ɨmbə̀ʼ nimnɨ əwa ə? Mə kyerɨ wə̀d we nɨ à yeʼ wɨwən. Àwɔ̀ yɨə Wə̀d Zeŋɨ we nɨ Ŋwìə̀ tomɨ.”

²⁵Yeso nyaʼa ghàm əbɔʼ əzwî rɨbɔ̀ŋ ze ghà ni, “Kəm rəziə, jwɨ̀ rɨŋga məd!”

²⁶Əzwî rɨbɔ̀ŋ ze ə nyaʼa kyeŋ rɨkǎ, chìʼ mbaŋə̀ ze, jwɨ̀ rɨŋga məd.

²⁷Bə̂d mɨ̀jìm mbe nɨ nyaʼa əŋgu nyaʼa yiirɨ, əne mbɨ nyaʼa sɨə biirɨə mbənə mbənə ni, “Əzɔ̂ ə kɨ ə ye ə? À kɨ ɨkwɨ ɨchî fi nɨ chwi ənû ə? Mbaŋə̀ zɔ̂ ə berɨ ɨka nɨ gham nɨ ka àbei əbɔʼ ɨzwî rɨbɔ̀ŋ, mbɨ zuunɨ əməd.”

²⁸Àmei əwu əwən, mɨkâ məd nyaʼa kɔ jaŋ ɨŋga ɨsɨ jìm mbe nɨ nyaʼa kad ə Galiliî.

²⁹Ənɨ Yeso mbɨ mbi mə̀mə̀ə̀nɨ̀-ɨnû nyaʼa jwɨ rɨŋga nəb ə̀kàtɨ̀ ze, mbɨ nyaʼa wò nyɨ ɨŋga nəb ze nɨ Saimòn mbɨ Andrù nyaʼə chub ɨŋga. Jems mbɨ Jɔ̌n nyaʼa bə̀ wò mbɨ mɨ̀mə̌d.

³⁰Nyɔ̂ Saimòn wɨə nyaʼa ɨgun əbaʼ mbɨ ɨfə. Ənɨ Yeso nyaʼa nyɨ ɨŋga nəb ze, mbɨ nyaʼa ghà ɨ bɔ ni ɨ wɨə wɔ̀nə̀.

³¹Yeso nyaʼa wò ɨban məd, pè yim əbɔ əməd nɔ̀, wɨ̀ nɔ̀ʼ chubɨ. Ɨfə we nyaʼa saŋ əməd, wɨ̀ nɔ̀ʼ nàʼ ɨghɨjɨg əmbɨ mɨ̀mə̌d.

³²À nyaʼa ɨkwirɨ ɨkwirɨ we, ənɨ ə nyùmə̀ nyaʼə sɨə wo nyɨ ɨkòb, mbɨ nyaʼa nɨŋ bə̂d əwɔn mɨjìm bə̀ nɨŋ mbe nɨ ɨzwî rɨbɔ̀ŋ nyaʼa ɨŋga mɨ̀mə̌d, wò əsɨ Yeso.

³³Bə̂d mɨ̀jìm rɨŋga əsɨ ze nyaʼa wò fetɨ ɨfě nəb ze.

³⁴Yeso nyaʼa vɨ̀ bə̂d mɨ̀nɔnɔʼ nɨ nyaʼa wɔ̀nə̀ tɨkwɨrɨ ɨwɔn nɔnɔʼ. Wɨ̀ nyaʼa bə̀ chɨ̀ ɨzwî rɨbɔ̀ŋ nɔnɔʼ rɨŋga bə̂d. Chəi wɨ̀ nyaʼa ben ni ɨzwî rɨbɔ̀ŋ mbe ghàmə̀, ɨmbə̀ʼ ɨghəm nɨ mbɨ nyaʼa kyerɨ wə̀d we nɨ wɨ̀ yeʼ wɨwən.

³⁵À nyaʼa ɨsɔsɔ ənɨ chəi ɨtuʼ nyaʼa kɨrɨ jeŋgɨ chɨg, Yeso nyaʼa jwɨ̀ wò əsɨ nɨ chə nyaʼa i bə̂d əŋgu. Wɨ̀ nyaʼa wò kɔŋgɨ ə Ŋwiə̀ tə̀zìʼ wi.

³⁶Saimòn mbɨ ə bə̂d mbe nɨ nyaʼa mbɨ məd nyaʼa jwɨ̀ ɨ wo kəb əməd.

³⁷Ənɨ mbɨ nyaʼa zə əməd, mbɨ nyaʼa ghà ɨ bɔ ni, “Wə̀d jìm wɨə kə̀b əwe.”

³⁸Wɨ̀ nyaʼa ghà əmbɨ mɨ̀mə̌d ni, “Tɨ̀ wo ɨŋga ɨsɨ mbe nɨ yeʼ ɨban ɨban, ɨmbə̀ʼ mə̀ bə ghà ɨŋgam Ŋwiə̀ əŋgu. Əzɔ̂ yɨ əton nɨ mə̀ nyaʼa yeʼe.”

³⁹Wɨ̀ nyaʼa yèn ɨŋga Galiliî jìm, yènə̀ ghà ɨŋgam Ŋwiə̀ ɨŋga nəb rɨ ə̀kàtɨ̀ te nɨ nyaʼa ɨŋga ɨsɨ mbe, bə̀ yènə̀ chɨ̀ ɨzwî rɨbɔ̀ŋ rɨŋga bə̂d.

⁴⁰Mbaŋə̀ mɔʼɔ nɨ nyaʼə wɔ̀nə̀ əpabɨ nyaʼa wò əsɨ Yeso, pè chìndɨ̀ ɨtu ɨnywɨ ə si buʼ ɨbɔ ɨ bɔ ghà ni, “À mɨ ghaʼ, à ghɨ̀ mɨ ɨnyod zeŋ.”

⁴¹Yeso nyaʼa nèŋ əməd kə̀nə̀, əne wɨ̀ nyaʼa sèm e əbɔ bètɨ̀ əməd ghà ɨ bɔ ni, “Mə ghaʼ nɨ ghɨ əne. Ɨnyod, zeŋ!”

⁴²Àmei əwu əwən, əpabɨ ze ə nyaʼa mì i, ɨnyod məd zeŋ.

⁴³Yeso nyaʼa jeŋgɨ patɨ əməd, əne ghà ɨ bɔ wɨ̀ sɨ wò i.

⁴⁴Yeso nyaʼa ghɨ̀ əne ghà ɨ bɔ ni, “Zə ni tɨ à ghà e ənû ə mɔʼɔ əmbɨ ə wə̀d, àyɨə ndə̀ chwi e ɨnyod əmbɨ wə̀d mbàn Ŋwìə̀, nàʼ ɨghɨ ə̀fà ze nɨ Mose nyaʼa sobɨ, ɨmbə̀ʼ bə̂d kyerɨ ni əpabɨ ze ə fə mì rɨ ɨgwɨ ne.”

⁴⁵Àyɨə mbaŋə̀ ze nyaʼa jwɨ̀ kɔ yènə̀ saʼ ənû ze ɨsɨ jìm. Əze ə nyaʼa ghɨ̀ ni tɨ Yeso wɨrɨ nyɨ i ɨŋga əsɨ ə cherə əsaŋ əsaŋ. Wɨ̀ nyaʼa sɨ wò chubɨ yeʼ ɨban əsɨ ze. Bə̂d mbɨə nyaʼə nɔ̀ʼ rɨ ɨsɨ mbe jìm wò kɔɔrɨ ə məd əŋgu.