Read Fɨso Fi Mak 14 Bible Online

Mak 14 - Fɨso Fi bible

Mak 14

¹À nyaʼa sɨ bùʼ ɨni be bɔŋ mɨ̀Jû nyaʼə sɨə jɨg Əchwɨ̂ ə Che-ɨgun mbɨ Əchwɨ̂ ə Ŋgə̀ŋ nɨ chəi ɨfuʼ we nɨə ghɨ̀ ni ŋgə̀ŋ kɔʼ ɨŋga. Əne bə̂d kyeŋ mbe rɨ ə mbàn Ŋwìə̀ mbɨ məchwiə̀ rɨ̀kə̌ nyaʼa kɔ kə̀b ɨnə̂njɨ̀ nɨ yim ə Yeso ənjìm ənjìm ɨmbə̀ʼ zwiirɨ.

²Mbɨ nyaʼa ghà ni, “Àyɨə chəi tɨ̀ bɨrɨ ghɨ əne ənɨ mbɨə jɨg əchwɨ̂, njɨ əchɔb ə bɨrɨ gù.”

³Yeso wɨə nyaʼa ə Betanì ɨŋga nəb Saimòn we nɨ nyaʼa kweʼ wɔ̀n əpabɨ. Ənɨ wɨ̀ nyaʼə jɨgə, əyi mɔʼɔ nyaʼa wò mbɨ mɨwud əka ɨnùn ɨŋga chəŋ àlàbastà. Mɨwud mbe nyaʼa berɨ ɨfɔ chɔ̀m. Mbɨ nyaʼa tekɨ mɨwud mbe àmei ənɨ ə naàd. [4] Wɨ̀ nyaʼa pè sob ətu ə chəŋ ze, tuŋ mɨwud mbe ɨgun ətu ə Yeso.

⁴Bə̂d mɔʼɔ rəbɔʼ mbe nɨ nyaʼa əŋgu nyaʼa sə ɨtəm ghà mbənə mbənə ni, “Wɨ̀ kɨə chə̀kɨ̀ mɨwud mbɔ̂ ɨkwɨ ɨchî wɔ̂ ɨmbə̀ʼ ə ye ə?

⁵Njɨ wɨ kə̀ʼ fèn mɨwud mbɔ̂ ənɨ ɨkab nɨ che mɨ̀fraŋ chuʼ əkɨ ətad, əne nàʼ ɨkab we əmbɨ ə bə̂d ɨkwaŋ.” Mbɨ nyaʼa ghɨ̀ əne gham əbɔʼ əyi we.

⁶Àyɨə Yeso nyaʼa ghà ni, “Mbə̀ saŋ əməd! Mbə kɨə chə əməd ɨmbə̀ʼ ə yè? Wɨ̀ fə ghɨ ənû ə chɔ̀m ənɨ ə num.

⁷Bə̂d ɨkwaŋ mbɨ əkaʼ nən ɨghəm jìm, əne mbə mbe tɨ̀ mbə ghɨ ɨ̀chɔ̀m ənɨ mɨ̀mə̌d ənɨ ə nyùmə̀ we nɨ mbə̀ ghaʼi, àyɨə chəi əmɨ mbɨ nən ɨghəm jìm.

⁸Əyi wɔ̂ fə ghɨ ənû ze nɨ tɨ̀ wɨ̀ ghɨ̀. Wɨ̀ fə zɔʼ mɨ ɨnyod ɨmbə̀ʼ mə mɨ kwɨ, mbɨ sɨ tweŋɨ.

⁹Mə ghà rəsìʼ ɨ nən ni ɨsɨ jìm mbe nɨ mbɨ bɨrɨ ghà ɨkə̂n chɔ̀m wɔ̂ ɨŋga ɨsɨg, mbɨ bɨrɨ ghà ənû ze nɨ əyi wɔ̂ ghɨ̌, əne sɨə kɔndɨ əməd.”

¹⁰Judàs Iskàriɔ̀t, nɨ nyaʼa wɨ mɔʼɔ rəbɔʼ mə̀mə̀ə̀nɨ̀-ɨnû Yeso mbe wum chɔ̀b rɨ̀be, nyaʼa wò əsɨ bə̂d kyeŋ mbe rɨ ə mbàn Ŋwìə̀ ɨmbə̀ʼ fen ə Yeso əmbɨ mɨ̀mə̌d.

¹¹Ənɨ mbɨ nyaʼa zu ənû ze, mbɨ nyaʼa ghaʼ, əne kàʼ ni mbə bɨrɨ naʼ ɨkab ɨ bɔ. Ɨ kɔ rɨ ənɨ ə nyùmə̀ we, wɨ̀ nyaʼa kɔ kəb əpan nɨ ghɨ ni mbɨ gywɨ ə Yeso.

¹²À nyaʼa ɨgwɨ əni rɨtu ze nɨ mbɨ nyaʼə jɨgə ŋgə̀ŋ nɨ chəi mbɨ zɨ ɨfuʼ we nɨə ghɨ̀ ni ŋgə̀ŋ kɔʼ ɨŋga, ənɨ yɨ əni ze nɨ mbɨ nyaʼə kyemə wan njɨ̀g Əchwɨ̂ ə Che-ɨgun, mə̀mə̀ə̀nɨ̀-ɨnû Yeso nyaʼa ghà ɨ bɔ ni, “À kə̀b ni tɨ̀ wo tekɨ əsɨ ɨ ne ə yi nɨ à bɨrɨ jɨg Əchwɨ̂ ə Che-ɨgun ə?”

¹³Ənɨ mbɨ nyaʼa biirɨ əne, wɨ̀ nyaʼa tom mbi mə̀mə̀ə̀nɨ̀-ɨnû mɨ̀be, ghà əmbɨ mɨ̀mə̌d ni, “Mbə̀ wo ɨŋga əsɨ ze nɨ yeʼ ɨmbì ɨ nən, mbaŋə̀ mɔʼɔ nɨ beʼ fɨkyiŋ mɨnib bɨrɨ kɔɔrɨ əwən. Mbə̀ beenɨ əbɔʼ məd.

¹⁴Mbə̀ nyɨ ɨŋga nəb ze nɨ wɨ̀ nyɨ, ghà əmbɨ wə̀d nəb ni, 'Əchwiə̀-ɨnû ə biirɨ ni, Ətu ə nəb ə bə̂d rɨ̀sɔ̀ʼɔ̀ nɨ mə bɨrɨ jɨg Əchwɨ̂ ə Che-ɨgun ɨŋga mbɨ mbɨ mə̀mə̀ə̀nɨ̀-ɨnû ə zi ə?'

¹⁵Wɨ̀ bɨrɨ chwi ətu ə nəb ə kyeŋ ə mɔʼɔ ɨ nən ɨkaŋ nɨ mbɨ fə zɨ ɨghɨ rɨ ə nəb ɨŋga bə̀ tekɨ. Mbə tekɨ ɨghɨjìm ɨ na əŋgu.”

¹⁶Mə̀mə̀ə̀nɨ̀-ɨnû mbe nyaʼa wò ɨŋga əsɨ ze, pè zə ɨghɨjìm àmei ɨchî nɨ Yeso kəʼ ghà əmbɨ mɨ̀mə̌d. Əne mbɨ nyaʼa tekɨ tɨjɨg te əŋgu.

¹⁷À nyaʼa sɨ ɨkwirɨ kwirɨ, Yeso nyaʼa wò ɨŋga əsɨ ze mbɨ mbi mə̀mə̀ə̀nɨ̀-ɨnû mbe wum chɔ̀b rɨ̀be.

¹⁸Ənɨ mbɨ nyaʼə jɨgə, Yeso nyaʼa ghà ni, “Mə ghà rəsìʼ ɨ nən ni wə̀d mɔʼɔ rəbɔʼ nən bɨrɨ fen əmɨ. Təŋgàŋ yɨ we nɨə jɨgə mbɨ num.”

¹⁹Mbɨ nyaʼa zu əne kə̀nə̀, əne kɔ bɨrɨ ɨ bɔ ɨ mɔʼ mɔʼ ni, “À wa kɨə mɔ̌ ə?”

²⁰Wɨ̀ nyaʼa ghà əmbɨ mɨ̀mə̌d ni, “À yɨə wə̀d mɔʼɔ rəbɔʼ mbə̀n mbɔ̂ wum chɔ̀b rɨ̀be. Təŋgàŋ wɨə chùbə̀ ŋgə̀ŋ ɨŋga əkaŋ ə mɔʼ mbɨ num.

²¹Wan Wə̀d bɨrɨ kwɨ ɨchî nɨ mbɨ nyaʼa fə ŋwaʼnɨ ɨmbə̀ʼ əməd, àyɨə ŋgəʼ bɨrɨ nyɨ ɨgun ə wə̀d we nɨ fen əməd! À kɨ nɨ chəi mbɨ nyaʼa kɨrɨ gywɨ əməd, njɨ zɨə bɔŋ.”

²²Ənɨ Yeso mbɨ mbi mə̀mə̀ə̀nɨ̀-ɨnû nyaʼə sɨə jɨgə, wɨ̀ nyaʼa nɨŋ chiŋ ŋgə̀ŋ, kɔŋgɨ ə Ŋwiə̀, bəʼrɨ nàʼ əmbɨ mə̀mə̀ə̀nɨ̀-ɨnû mbe ghà ni, “Mbə̀ nɨŋ, əzɔ̂ yɨ mɨ nyamnyod.”

²³Wɨ̀ nyaʼa bə̀ nɨŋ toʼ mɨ̀nòʼ, kɔŋgɨ ə Ŋwiə̀, nàʼ əmbɨ mɨ̀mə̌d. Mɨ̀mə̌d mɨ̀jìm nyaʼa nɨŋ nɔ.

²⁴Wɨ̀ nyaʼa ghà əmbɨ mɨ̀mə̌d ni, “Əzɔ̂ yɨ mɨ ənəm nɨ Ŋwìə̀ fə nɨŋ san fɨso fi mbɨ nən. Ənəm zɔ̂ yɨ əze nɨ mə̀ chəmnɨ ɨmbə̀ʼ ɨtu ə bə̂d mɨ̀nɔnɔʼ.

²⁵Mə ghà rəsìʼ ɨ nən ni, chəi mə bɨrɨ wɨrɨ nɔ mɨnoʼ pè əni ze nɨ mə bɨrɨ nɨ nɔ ənɨ ɨghəm fi ɨŋga ənû ɨfɔ̀n ə Ŋwiə̀.”

²⁶Ənɨ mbɨ nyaʼa fə kwerɨ ɨkyî, mbɨ nyaʼa jwɨ̀ wò ɨkaŋ Ɨwum mɨ̀Olìf.

²⁷Ənɨ Yeso mbɨ mbi mə̀mə̀ə̀nɨ̀-ɨnû nyaʼa pe ɨkaŋ Ɨwum mɨ̀Olìf we, wɨ̀ nyaʼa ghà əmbɨ mɨ̀mə̌d ni, “Mbə̀n mɨ̀jìm bɨrɨ norə əwən sàŋ əmɨ. Ə zɨ ɨŋga Ə̀ŋwàʼnɨ̀ ə Ŋwiə̀ ni, 'Mə bɨrɨ zwiirɨ ənə̂ŋgɨ̀-njɨ̀g, əne njɨ̀g te bɨrɨ jàŋə̀.'

²⁸Àyɨə ənɨ Ŋwìə̀ fə zwemnɨ əmɨ, mə bɨrɨ wo ɨmbì ɨ nən ə Galiliî.”

²⁹Pità nyaʼa ghà ɨ bɔ ni, “Kaʼ mə̀mə̀ə̀nɨ̀-ɨnû mbə mɨ̀jìm bè nòd əwən sàŋ əwe, chəi mə bɨrɨ nɔ ghɨ əne.”

³⁰Yeso nyaʼa ghà ɨ bɔ ni, “Mə ghà rəsìʼ ɨ ne ni, àmei ɨzimɨ wɔ̂, bɔŋ ɨnoŋgub sɨə tɔŋ ɨghəm be, à bɨrɨ fə ton əmɨ ɨghəm tad.”

³¹Àyɨə Pità nyaʼa ghà kwàʼ rɨ̀kǎ ni, “Kaʼ à bè yeʼ i ənû nɨ mbɨ bɨrɨ zwiirɨ əwe bə̀ zwiirɨ əmɨ, chəi mə̀ bɨrɨ nɔ ton əwe.” Mə̀mə̀ə̀nɨ̀-ɨnû mbe mɨ̀jìm nyaʼa bə̀ ghà àmei əne.

³²Yeso mbɨ mbi mə̀mə̀ə̀nɨ̀-ɨnû nyaʼa wò əsɨ ə mɔʼɔ ze nɨ mbɨ nyaʼə tɔŋ ənɨ ə Gètsemanì. Ənɨ mbɨ nyaʼa pè əŋgu, wɨ̀ nyaʼa ghà əmbɨ mbi mə̀mə̀ə̀nɨ̀-ɨnû ni, “Mbə̀ chub əgha, mə̀ wo kɔŋgɨ ə Ŋwiə̀.”

³³Wɨ̀ nyaʼa ghà əne, nɨŋ ə Pità mbɨ Jems fɔrɨ ə Jɔ̌n mbɨ wò ɨnɔ̂n. Ɨnyod məd nyaʼa kɔ bə, fîŋ bə̀ kɔ tɔb əməd.

³⁴Əne wɨ̀ nyaʼa ghà əmbɨ mɨ̀mə̌d ni, “Ə̀kə̀nɨ̀ ə kàŋ swi ɨŋga mɨ fîŋ, kə̀b zwiirɨ əmɨ. Mbə̀ chub əgha, nəŋgɨ ɨsɨ.”

³⁵Wɨ̀ nyaʼa ghà əne, yèndɨ̀ wò ɨmbì rɨpiî, pè kub ɨfě ə si, kɔ kɔŋgɨ ə Ŋwìə̀ ghà ni, ɨchî mɨ chwiə, wɨ̀ ghɨ̀ ni nyùmə̀ ŋgəʼ we che rɨ ɨgwɨ ni.

³⁶Wɨ̀ nyaʼa ghɨ̀ əne ghà ni, “Əbà [5] mɨ Mbǎʼ! Chəi ənû nɨ tɨ̀ zɨə chè əwe. Chɨ ŋgəʼ zɔ̂ rɨ ɨgwɨ num, àyɨə ghɨ̀ yeʼ ənû ze nɨ à kəbɨ, kaʼi əze nɨ mə̀ kəbɨ.”

³⁷Wɨ̀ nyaʼa bə̀ndɨ̀ wò pè zə mə̀mə̀ə̀nɨ̀-ɨnû mbe ənɨ mbɨ nyaʼə gwenə. Əne wɨ̀ nyaʼa biirɨ əmbɨ Pità ni, “Saimòn, mbə̀ kɨə gwen əwən ə? Chəi ənɨ tɨ̀ mbə chub ɨkyèʼe ənɨ awà fìbɨ ə?

³⁸Mbə̀ chub ɨkyèʼe kɔŋgɨ ə Ŋwiə̀, ɨmbə̀ʼ tɨ əghɨ ə mɔʼɔ ə numbɨ i əwən. Fîŋ zɨə kàŋə̀ kə̀bə̀ ni mbə̀ ghɨ ənû nɨ kuʼnɨ, àyɨə nyamnyod ə bɔd.”

³⁹Wɨ̀ nyaʼa ghà əne, yì wò kɔ̀ŋgɨ̀ ə Ŋwiə̀, ghàə̀ àmei ɨnû mbe nɨ wɨ̀ kəʼ bè ghà.

⁴⁰Wɨ̀ nyaʼa bə̀ yì bə̀ndɨ̀ wò pè zə mɨ̀mə̌d ənɨ mbɨ nyaʼə gwenə. Ɨ mbɨə nyaʼə gwen ɨmbə̀ʼ ɨghəm nɨ ŋgwenɨ nyaʼa fə kən chìŋ mɨ̀mə̌d əku. Əne chəi mbɨ nyaʼa kyerɨ ənû nɨ wiirɨ ɨ bɔ.

⁴¹Wɨ̀ nyaʼa bə̀ yì wò ənɨ ɨghəm nɨ pe tad, pè ghà əmbɨ mɨ̀mə̌d ni, “Mbə̀ kɨə kɨrɨ gwenə bə̀ zwììrɨ̀ əwən ə? Zɨə kuʼ əne. Nyùmə̀ fə kùʼ i. Mbɨ fə fèn Wan Wə̀d əmbɨ ə bə̂d nɨə ghɨ ɨnû rɨbɔ̀ŋ.

⁴²Mbə̀ nɔʼ tɨ̀ kɔ wo. Mbə̀ zə, wə̀d we nɨ fen əmɨ fə sɨ i əgha.”

⁴³Ənɨ Yeso nyaʼə kɨrɨ ghàmə̀, Judàs nɨ nyaʼa wɨ mɔʼɔ rəbɔʼ mə̀mə̀ə̀nɨ̀-ɨnû mbe wum chɔ̀b rɨ̀be nyaʼa yeʼe. Ɨ wɨə nyaʼə yènə̀ mbɨ ɨnɔ̂n bə̂d nɨ nyaʼa yim rɨbi bə̀ yim ɨtum mbàŋ. À yɨə bə̂d kyeŋ mbe rɨ ə mbàn Ŋwìə̀ mbɨ məchwiə̀ rɨ̀kə̌ fɔrɨ bə̂d kyeŋ mbe rɨŋga əbeŋ nyaʼa tom mɨ̀mə̌d.

⁴⁴Wə̀d we nɨ nyaʼa fen ə Yeso nyaʼa fə nàʼ ənweenɨ əmbɨ mɨ̀mə̌d ni, “Mbaŋə̀ ze nɨ mə sɔɔrɨ ndə̀ʼ məd yɨ we nɨ mbɨə kə̀bə̀. Mbə̀ gywɨ əməd nɨŋ wò jeŋgɨ nəŋgɨ.”

⁴⁵Ənɨ Judàs nyaʼa yeʼe, wɨ̀ nyaʼa chè wò əsɨ Yeso əwu əwən pè ghà ni, “Əchwiə̀-ɨnû!” Wɨ̀ nyaʼa ghà əne sɔɔrɨ ndə̀ʼ məd.

⁴⁶Bə̂d mbe nɨ nyaʼa mbɨ məd nyaʼa gywɨ̀ ə Yeso.

⁴⁷Wɨ mɔʼɔ rəbɔʼ mbe nɨ nyaʼa təmbɨ ɨban ɨban nyaʼa chɔʼ fi ɨbi rɨ ə baʼ, ŋwì, wɨ chè kwa ə̀tǒŋ rɨ ətu wə̀d ə̀fàʼì ətu ɨgwɨ ə bə̂d mbàn Ŋwìə̀.

⁴⁸Yeso nyaʼa ghà əmbɨ mɨ̀mə̌d ni, “Mbə̀ sɨ yeʼe ɨ gywɨ əmɨ mbɨ mɨbi fɔrɨ ɨtum mbàŋ ɨghabɨ ni mə yɨ ɨjɨ bagɨ ə?

⁴⁹Mə wɨə nyaʼa mbɨ nən chwi ɨnû ɨŋga mbàn Ŋwìə̀ ɨni jìm, əne chəi mbə̀ nyaʼa gywɨ əmɨ. Àyɨə ənû ze nɨ mbɨ nyaʼa ŋwaʼnɨ ɨŋga Ə̀ŋwàʼnɨ̀ ə Ŋwiə̀ ə berɨ jwɨ ənɨ rəsìʼ.”

⁵⁰Ənɨ wɨ̀ nyaʼa ghà əne, mə̀mə̀ə̀nɨ̀-ɨnû mbe mɨ̀jìm nyaʼa sàŋ əməd nòd əwən.

⁵¹Əjɔŋ ə mɔʼɔ ə zɨə nyaʼə beenɨ əbɔʼ əməd. Wɨ̀ nyaʼa nib àmei əbɔ ə ngywɨ̌ ə linen əbumɨ. Mbɨ nyaʼa bə̀ gywɨ̀ əməd,

⁵²àyɨə wɨ̀ nyaʼa sàŋ əbɔ ə ngywɨ̌ ze, nòd i tɨ̀sɔ̀ʼ ɨkyerɨ.

⁵³Mbɨ nyaʼa nɨŋ ə Yeso wò əkwɨ ətu ɨgwɨ ə bə̂d mbàn Ŋwìə̀. Bə̂d kyeŋ mbe rɨ ə mbàn Ŋwìə̀ mɨ̀jìm mbɨ ə bə̂d kyeŋ mbe rɨŋga əbeŋ fɔrɨ məchwiə̀ rɨ̀kə̌ nyaʼa fə fetɨ əŋgu.

⁵⁴Pità wɨə nyaʼə beenɨ əbɔʼ məd tɨgharɨgha. Wɨ̀ nyaʼa pè nyɨ ɨkye ɨkam ətu ɨgwɨ ə bə̂d mbàn Ŋwìə̀ we əne chubɨ mbɨ Mənə̂ŋgɨ̀ mbàn Ŋwìə̀ ɨ zɔ ɨwid.

⁵⁵Bə̂d kyeŋ mbe rɨ ə mbàn Ŋwìə̀ mbɨ mə̀saʼ əbeŋ mɨ̀jìm nyaʼa kɔ kəb bə̂d nɨ bɨrɨ zɨ ɨnû ɨgwɨ Yeso ɨmbə̀ʼ mbɨ zwiirɨ əməd. Mbɨ nyaʼa kə̀b àyɨə chəi mbɨ nyaʼa zə wə̀d mɔʼɔ.

⁵⁶Bə̂d mɨ̀nɔnɔʼ nyaʼa ghà mɨghab ɨgwɨ məd, àyɨə chəi ɨnû mbe nɨ mbɨ nyaʼa ghǎ nyaʼa bòmnɨ.

⁵⁷Mbɨ mɔʼɔ nyaʼa nɔ̀ʼ təm rətiə əne ghà mɨghab ɨgwɨ məd ni,

⁵⁸“Tɨ̀ nyaʼa zu wɨ̀ ghà ni, 'Mə bɨrɨ saʼ mbàn Ŋwìə̀ zɔ̂ nɨ mbɨ bɔm ənɨ ɨbɔ, wɨrɨ nɨŋ ɨni tad vɨ̀ zɨ cherə nɨ chəi mbɨ bɔm ənɨ ɨbɔ.'”

⁵⁹Ka à bè yeʼi əne, chəi ɨnû mbe nɨ mbɨ nyaʼa ghǎ nyaʼa bòmnɨ.

⁶⁰Ənɨ ətu ɨgwɨ ə bə̂d mbàn Ŋwìə̀ nyaʼa zu ɨnû mbe, wɨ̀ nyaʼa nɔ̀ʼ rətiə əkaʼ mɨ̀mə̌d, biirɨ əmbɨ Yeso ni, “Chəi à berɨ ənû ə mɔʼɔ nɨ wiirɨ ə? Ɨnû mbɔ̂ nɨ mbɨ zɨ ɨgwɨ ne wa kɨ ɨnû rəsìʼ ə?”

⁶¹Yeso nyaʼa kəm rəziə. Chəi wɨ̀ nyaʼa gha ənû ə mɔʼɔ. Əne ətu ɨgwɨ ə bə̂d mbàn Ŋwìə̀ nyaʼa yì biirɨ ɨ bɔ ni, “Àwɔ̀ wa kɨə Wə̀d we nɨ Ŋwìə̀ zɔʼɔ, nɨ bə̀ yeʼ Wan Ŋwìə̀ we nɨ bə̂d ə wumnɨə ə?”

⁶²Yeso nyaʼa wììrɨ̀ ni, “Mə yɨ wɨwən. Əne mbə bɨrɨ zə Wan Wə̀d nɨ chub əbà əbɔ ə jɨg ə Ŋwìə̀ we nɨ berɨ ɨka jìm, bə̀ zə ənɨ wɨə swiʼ ɨŋga pàʼ.”

⁶³Ənɨ wɨ̀ nyaʼa ghà əne, ətu ɨgwɨ ə bə̂d mbàn Ŋwìə̀ we nyaʼa yim ti ngywɨ̌ sèèrɨ̀ ghà ni, “Tɨ̀ kɨə wɨrɨə kə̀b mɨ̀zərɨmbin ɨmbə̀ʼ ə yè ə?

⁶⁴Mbə fə zu ɨchî nɨ wɨ̀ zɔm ə Ŋwiə̀. Mbə sob ni ye ə?” Mɨ̀mə̌d mɨ̀jìm nyaʼa ghà ni zɨə kùʼ ni mbɨ zwiirɨ əməd.

⁶⁵Bə̂d mɔʼɔ nyaʼa kɔ ched mad ɨgwɨ məd. Mbɨ nyaʼa bə̀ kod əghə əməd, som əməd, ghà ɨ bɔ ni, “Kaŋ wə̀d we nɨ som e!” Mənə̂ŋgɨ̀ mbàn Ŋwìə̀ nyaʼa bə̀ nɨŋ əməd som.

⁶⁶Pità nyaʼa chub ɨkye ɨkam we əbà ze rɨ əton, əne wan əyi mɔʼɔ rəbɔʼ bə̂d ə̀fàʼì ətu ɨgwɨ ə bə̂d mbàn Ŋwìə̀ nyaʼa wò əsɨ ze nɨ wɨ̀ nyaʼə əŋgu.

⁶⁷Ənɨ wɨ̀ nyaʼa zə ə Pità ənɨ wɨ̀ nyaʼə zɔ ɨwid, wɨ̀ nyaʼa toŋ əghə ɨgwɨ məd, ghà ni, “Àwɔ̀ bə̂, à wɨə kəʼ mbɨ Yeso we rɨ ə Nazàret.”

⁶⁸Àyɨə wɨ̀ nyaʼa ton i ghà ni, “Chəi mə̀ kyerɨ əməd. Chəi mɨ ətu ə bə kɨrɨ zeŋ ɨmbə̀ʼ ənû ze nɨ àwɔ̀ ə ghàə̀.” Ənɨ wɨ̀ nyaʼa ghà əne, wɨ̀ nyaʼa nɔ̀ʼ wò ɨchû ɨkam. [Àmei əwu əwən, ɨnoŋgub nyaʼa tɔŋə.]

⁶⁹Wan əyi ə̀fàʼì we nyaʼa zə əməd əŋgu, əne yì kɔ gha əmbɨ ə bə̂d mbe nɨ nyaʼa təmbɨ ɨban ɨban ni, “Mbaŋə̀ zɔ̂ yɨ wɨ mɔʼɔ rəbɔʼ mə̀mə̀ə̀nɨ̀-ɨnû Yeso!”

⁷⁰Wɨ̀ nyaʼa bə̀ yi ton i. Əmad ə nɨə zombɨ, bə̂d mbe nɨ nyaʼa təmbɨ ɨban ɨban nyaʼa ghà əmbɨ Pità ni, “À yɨ rəsìʼ ni àwɔ̀ yɨ wɨ mɔʼɔ rəbɔʼ mə̀mə̀ə̀nɨ̀-ɨnû mbe, ɨmbə̀ʼ ɨghəm nɨ àwɔ̀ yɨ rɨ ə Galiliî.”

⁷¹Pità nyaʼa zu əne kɔ zom i ɨnyod bə̀ kɔ kanɨ ghàə̀ ni, “Chəi mə̀ kyerɨ mbaŋə̀ ze nɨ mbɨə ghà ɨmbə̀ʼ əməd.”

⁷²Àmei əwu əwən, ɨnoŋgub nyaʼa yi tɔŋ ənɨ ɨghəm nɨ pe be. Əne Pità nyaʼa kɔndɨ ɨchî nɨ Yeso nyaʼa gha ɨ bɔ ni, “Bɔŋ ɨnoŋgub sɨə tɔŋ ɨghəm be, à bɨrɨ fə ton əmɨ ɨghəm tad.” Wɨ̀ nyaʼa kɔndɨ əne, ɨnyod ɨməd nə̀ŋə̀, wɨ̀ chweŋ mɨsɨ.