Read Fɨso Fi Mak 16 Bible Online

Mak 16 - Fɨso Fi bible

Mak 16

¹Ənɨ əni əkwɨ ə mɨ̀Jû ə nyaʼa fə che i, Mèri Màgdàlen mbɨ Mèri ɨŋgɔb Jems fɔrɨ ə Sàlomè nyaʼa zon tɨtiirɨ, ɨmbə̀ʼ ɨ wo zɔʼ əvɨ ə Yeso əŋgu.

²À nyaʼa ɨsɔsɔ əni ə Sɔndè, ənɨ ə nyùmə̀ nyaʼa fə toʼə, mbɨ nyaʼa wò ətu ɨ̀sì ze.

³Mbɨ nyaʼə yènə̀ ghàə̀ mbənə mbənə ni, “À kɨə we bɨrɨ biŋ ɨti we rɨ ɨchû ɨsì we ə?”

⁴Ənɨ mbɨ nyaʼa tiinɨ ɨban ɨban, mbɨ nyaʼa nèŋ, zə ni mbɨ fə biŋ ɨti we. Ɨti we nyaʼa kàŋ faŋ əku.

⁵Ənɨ mbɨ nyaʼa nyɨ ɨŋga ɨ̀sì we, mbɨ nyaʼa zə əjɔŋ ə mɔʼɔ nɨ nyaʼa chub əbà əbɔ ə jɨgɨ. Wɨ̀ nyaʼa zɨ̀ ngywɨ̌ rɨ̀fɨ. Mbɨ nyaʼa zə əne, ənû ze ə chè mɨ̀mə̌d.

⁶Əjɔŋ ze ə nyaʼa ghà əmbɨ mɨ̀mə̌d ni, “Tɨ mbə̀ yiirɨ əwən ənû zɔ̂. Mbə mbɨə kə̀b ə Yeso we rɨ ə Nazàret, nɨ mbɨ nyaʼa kombɨ əzed ə baʼnɨ. Chəi məd əgha! Wɨ̀ fə zwemə! Mbə̀ zə əsɨ ze nɨ mbɨ nyaʼa boŋ əməd əŋgu.

⁷Àyɨə mbə̀ wò ghà əmbɨ mə̀mə̀ə̀nɨ̀-ɨnû ɨməd bə̀ ghà əmbɨ Pità ni ɨ wɨə wò ɨmbì ɨ nən ə Galiliî. Mbə bɨrɨ zə əməd əŋgu ɨchî nɨ wɨ̀ nyaʼa fə gha ɨ nən.”

⁸Məyi mbe mbɨə nyaʼə bindɨə bə̀ bìdə̀, əne mbɨ nyaʼa jwɨ̀ rɨŋga ɨ̀sì we nòrə̀. Chəi mbɨ nyaʼa ghà ənû ə mɔʼɔ əmbɨ ə wə̀d, ɨmbə̀ʼ ɨghəm nɨ mbɨ nyaʼə bɔə.

⁹Ənɨ Yeso nyaʼa zwemə ɨsɔsɔ əni ə Sɔndè, wɨ̀ nyaʼa bè chwi i ɨnyod əmbɨ Mèri Màgdàlen we nɨ wɨ̀ nyaʼa chɨ ɨzwî rɨbɔ̀ŋ sambe rɨŋga məd.

¹⁰Mèri nyaʼa zə əməd əne, nɔ̀ʼ wò ghà əmbɨ bə̂d mbe nɨ nyaʼa mbɨ Yeso ənɨ mbɨ nyaʼə kə̀nə̀ bə̀ dìə̀.

¹¹Àyɨə ənɨ mbɨ nyaʼa zu ni Yeso wɨ ɨka, bə̀ zu ni Mèri fə zə əməd, chəi mbɨ nyaʼa benɨ.

¹²Ənɨ ə nyùmə̀ mɔʼɔ nyaʼa chè, Yeso nyaʼa chwi i ɨnyod əmbɨ mbi mə̀mə̀ə̀nɨ̀-ɨnû mɨbe ənɨ ɨkwɨ ɨnə̂njɨ̀ cherə, ənɨ mbɨ nyaʼə wò ə mbeŋ.

¹³Ənɨ mbɨ nyaʼa zə ni à yɨə məd, mbɨ nyaʼa wɨrɨ bə̀ndɨ̀ wò ghà əmbɨ mə̀mə̀ə̀nɨ̀-ɨnû mbə, àyɨə chəi mbɨ nyaʼa ben ənû ze nɨ mbɨ nyaʼə ghàə̀.

¹⁴Yeso nyaʼa nwìə̀ chwi i ɨnyod əmbɨ mə̀mə̀ə̀nɨ̀-ɨnû mbe wum chɔ̀b mɔʼ ənɨ mbɨ nyaʼə jɨgə. Wɨ̀ nyaʼa ghàm əbɔʼ mɨ̀mə̌d ɨmbə̀ʼ ɨchî nɨ chəi mbɨ nyaʼa berɨ ɨbenɨ bə̀ fɔrɨ ɨmbə̀ʼ ɨchî nɨ fîŋ tɨ mɨ̀mə̌d nyaʼa tu. Wɨ̀ nyaʼa ghɨ̀ əne ɨmbə̀ʼ ɨghəm nɨ chəi mbɨ nyaʼa ben ɨnû mbe nɨ bə̂d mbe nɨ nyaʼa zə əməd ənɨ wɨ̀ nyaʼa fə zwemə, nyaʼə ghàə̀.

¹⁵Wɨ̀ nyaʼa ghà əmbɨ mɨ̀mə̌d ni, “Mbə̀ wo ɨŋga ɨsɨg jìm, wò ghà ɨkə̂n chɔ̀m əmbɨ ə bə̂d mɨ̀jìm.

¹⁶We nɨ benɨ, nɨŋ mɨnib, bɨrɨ jwɨ̀ rəŋgəʼ. Àyɨə Ŋwìə̀ bɨrɨ zɨ ɨsaʼi ɨgwɨ we nɨ chəi wɨ̀ benɨ.

¹⁷Bə̂d mbe nɨ benɨ bɨrɨ ghɨ ɨnweenɨ-ɨnû mbɔ̂: mbɨ bɨrɨ chɨ ɨzwî rɨbɔ̀ŋ rɨŋga bə̂d ənɨ mɨ ɨkum; mbɨ bɨrɨ gham mɨŋgam rɨsɔ̀ʼɔ̀;

¹⁸mbɨ bɨrɨ yim jɔ ənɨ mbə ɨbɔ; mbɨ mɨ nɔ ɨniʼi, ka wɨ̀ bɨrɨ ghɨ i ənû ə mɔʼɔ ənɨ mɨ̀mə̌d; mbɨ bɨrɨ zab mbə ɨbɔ ɨgun ə bə̂d əwɔn, mbɨ bɔtɨ.”

¹⁹Ənɨ Ə̀nùŋɨ̀sɨg Yeso nyaʼa fə ghàm əmbɨ mə̀mə̀ə̀nɨ̀-ɨnû mbe, Ŋwìə̀ nyaʼa nɨŋ əməd ɨkaŋ, wɨ̀ pè chub əbà əbɔ ə jɨgɨ ə Ŋwiə̀.

²⁰Mə̀mə̀ə̀nɨ̀-ɨnû mbe nyaʼa jwɨ̀ wò ghà ɨkə̂n chɔ̀m we ɨsɨ jìm. Ə̀nùŋɨ̀sɨg nyaʼə fàʼə̀ mbɨ mɨ̀mə̌d. Wɨ̀ nyaʼa bə̀ ben ni ɨnû mbe nɨ mbɨ nyaʼə ghàə̀ yɨ ɨnû rəsìʼ ɨchî nɨ mbɨ nyaʼə ghɨ̀ ɨnû yiirɨ. À yɨ əne.