Read Fɨso Fi Mak 2 Bible Online

Mak 2 - Fɨso Fi bible

Mak 2

¹Ənɨ ɨni mɔʼɔ nyaʼa che, Yeso nyaʼa bə̀ndɨ̀ wo ə Kàpenàhom. Ɨkə̂n nyaʼa jàŋ ni wɨ̀ fə sɨ i ɨnuʼ.

²Bə̂d mɨ̀nɔnɔʼ nyaʼa wò fetɨ ɨŋga nəb ze nɨ wɨ̀ nyaʼə chubə, əne nəb ze nyaʼa swi nɨ chə nyaʼa wɨrɨ i əpan ɨŋga nəb kɨ̀ ɨfě nəb nɨ tɨ̀ bə̂d nyaʼa təmbɨ əŋgu. Yeso nyaʼa zə əne kɔ gha ɨŋgam Ŋwiə̀ əmbɨ mɨ̀mə̌d.

³Mbaŋə̀ rɨkwè nyaʼa bèʼ mbaŋə̀ mɔʼɔ nɨ nyaʼa buʼrə wò əsɨ məd mbɨ wɨwən.

⁴Ənɨ chəi ənɨ tɨ̀ mbaŋə̀ te nyaʼa tindɨ ɨban məd ɨmbə̀ʼ ɨnɔ̂n bə̂d we, mbɨ nyaʼa tòʼ ɨdom nəb ɨgwɨ əsɨ ze nɨ wɨ̀ nyaʼə əŋgu. Ənɨ mbɨ nyaʼa toʼ ɨbɨgɨ, mbɨ nyaʼa swi mbaŋə̀ ze nɨ nyaʼa buʼrə ɨgun ə matə̀ we nɨ mbɨ kəʼ bèʼ əməd ɨgun.

⁵Ənɨ Yeso nyaʼa zə ɨchî nɨ bə̂d mbe nyaʼa nuŋ fîŋ ɨgwɨ ni, wɨ̀ nyaʼa ghà əmbɨ ə mbaŋə̀ ze nɨ nyaʼa buʼrə ni, “Mɨ wan, mə fə waʼ mbe ɨnû rɨbɔ̀ŋ.”

⁶Məchwiə̀ rɨ̀kə̌ mɔʼɔ nɨ nyaʼa chub əŋgu, nyaʼa biirɨ ɨŋga tə fîŋ ni,

⁷“Mbaŋə̀ zɔ̂ kɨə ghàm əni ɨmbə̀ʼ ə yè ə? Ɨ wɨə zɔ̀m ə Ŋwìə̀! À kɨə we nɨ tɨ̀ wɨ̀ waʼ ɨnû rɨbɔ̀ŋ chè rɨ ənɨ ə Ŋwiə̀ tə̀zìʼ wi ə?”

⁸Yeso nyaʼa kyerɨ tɨkɔndɨ tɨ mɨ̀mə̌d àmei əwu əwən, əne wɨ̀ nyaʼa ghà əmbɨ mɨ̀mə̌d ni, “Mbə̀ kɨə kɔndɨə tɨkwɨrɨ ɨnû tɔ̂ ɨŋga tə fîŋ ɨmbə̀ʼ ə yè ə?

⁹À kɨ ənû zi ə zam ə? À kɨ ɨ ghà əmbɨ ə mbaŋə̀ zɔ̂ nɨ buʼrə ni, 'Mə fə waʼ mbe ɨnû rɨbɔ̀ŋ,' kɨ ɨ ghà ni, 'Nɔʼ rətiə, nɨŋ e matə̀ yèn ə?'

¹⁰Àyɨə mə bɨrɨ ghɨ mbə̀ kyerɨ ni Wan Wə̀d ə berɨ ɨka ɨgwɨ ə si nɨ waʼ ɨnû rɨbɔ̀ŋ.” Ənɨ wɨ̀ nyaʼa ghà əne, wɨ̀ nyaʼa ghà əmbɨ ə mbaŋə̀ ze nɨ nyaʼa buʼrə ni,

¹¹“Mə ghà ɨ ne ni nɔʼ rətiə, nɨŋ e matə̀, wò əwe ɨnuʼ.”

¹²Mbaŋə̀ ze nyaʼa nɔ̀ʼ əwu əwən, nɨŋ i matə̀, jwɨ̀ wò i ɨfě mɨ̀mə̌d mɨjìm. Ənû ze ə nyaʼa chè bə̂d mbe mɨ̀jìm, əne mbɨ nyaʼa yiirɨ ə Ŋwiə̀ ghàə̀ ni, “Chəi tɨ̀ kweʼ zə ənû ɨghabɨ ə zɔ̂!”

¹³Yeso nyaʼa wɨrɨ bə̀ndɨ̀ wò ɨban ə sà ze rɨ ə Galiliî. Ɨnɔ̂n bə̂d nyaʼa wò kad əməd, əne wɨ̀ nyaʼa chwi ɨnû əmbɨ mɨ̀mə̌d.

¹⁴Ənɨ wɨ̀ nyaʼə chèə̀, wɨ̀ nyaʼa zə ə Levì, nɨ nyaʼə wan Alfaùs. Wɨ̀ nyaʼa chub ɨŋga nəb ze nɨ wɨ̀ nyaʼə fetɨ mɨ̀tagsɨ̀. Ənɨ Yeso nyaʼa zə əməd əne, wɨ̀ nyaʼa ghà ɨ bɔ ni, “Beenɨ əbɔʼ num.” Levì nyaʼa nɔ̀ʼ beenɨ əbɔʼ məd.

¹⁵Ənɨ Yeso nyaʼa chub ɨ jɨg ɨŋga nəb Levì, məfetɨ mɨ̀tagsɨ̀ nɔnɔʼ, bə̂d nɨə ghɨ̀ ɨnû rɨbɔ̀ŋ mbɨ mə̀mə̀ə̀nɨ̀-ɨnû ɨməd nyaʼa bə̀ wò chubɨ mbɨ məd. Bə̂d mɨ̀nɔnɔʼ nyaʼa kàŋ beenɨ əbɔʼ məd.

¹⁶Məchwiə̀ rɨ̀kə̌ mɔʼɔ nɨ nyaʼə bə mɨ̀Farisiî nyaʼa zə ənɨ Yeso nyaʼə jɨgə mbɨ ə bə̂d nɨə ghɨ̀ ɨnû rɨbɔ̀ŋ bə̀ jɨgə mbɨ məfetɨ mɨ̀tagsɨ̀, əne mbɨ nyaʼa biirɨ əmbɨ mə̀mə̀ə̀nɨ̀-ɨnû ɨməd ni, “Əton nɨ Yeso ə jɨgə mbɨ məfetɨ mɨ̀tagsɨ̀ fɔrɨ mbɨ ə bə̂d nɨə ghɨ̀ ɨnû rɨbɔ̀ŋ kɨ ɨmbə̀ʼ ə yè ə?”

¹⁷Ənɨ Yeso nyaʼa zu ənû zɔ̂, wɨ̀ nyaʼa ghà əmbɨ mɨ̀mə̌d ni, “Chəi bə̂d nɨ yeʼ ɨkǎ ə kə̀bə̀ wə̀d ɨfuʼ. Bə̂d nɨə kə̀bə̀ wə̀d ɨfuʼ yɨ mbe nɨə wɔ̀nə̀. Chəi mə̀ nyaʼa yeʼe ɨ tɔŋ bə̂d mbe nɨə ghɨ̀ ɨnû nɨ kuʼnɨ ni. Mə nyaʼa yeʼe ɨ tɔŋ yeʼ mbe nɨə ghɨ̀ ɨnû rɨbɔ̀ŋ.”

¹⁸Mə̀mə̀ə̀nɨ̀-ɨnû Jɔ̌n mbɨ mɨ̀Farisiî nyaʼə chubə rɨ jɨg. Əne bə̂d mɔʼɔ nyaʼa wò biirɨ əmbɨ Yeso ni, “Əton nɨ mə̀mə̀ə̀nɨ̀-ɨnû Jɔ̌n fɔrɨ mbɨ mɨ̀Farisiî ə chubə rɨ jɨg, àyɨə chəi mbe ə chubə rɨ jɨg kɨ ɨmbə̀ʼ ə yè ə?”

¹⁹Yeso nyaʼa wììrɨ̀ əmbɨ mɨ̀mə̌d ni, “Tɨ̀ bə̂d mbe nɨ wo jɨg ɨgən chub rɨ jɨg ənɨ ɨnom ɨgən kɨrɨ i mbɨ mɨ̀mə̌d ə? Ɨnom ɨgən mɨ kɨrɨ i mbɨ mɨ̀mə̌d, njɨ chəi mbɨ bɨrɨ chub rɨ jɨg.

²⁰Ɨni mbɨə yeʼe nɨ mbɨ bɨrɨ nɨŋ ɨnom ɨgən we rəkaʼ mɨ̀mə̌d. Ɨni mbe mɨ pè, mbɨ kɨ chubɨ rɨ jɨg.

²¹“Ka wə̀d wɨə baŋgɨ i əghɨ ə ngywɨ̌ ə fi ɨgun ə ngywɨ̌ ənun. Wɨ̀ mɨ ghɨ əne, əghɨ ə ngywɨ̌ ə fi ze ə bɨrɨ nurə, ghɨ̀ ɨbɨgɨ we wɨrɨ faŋgɨ.

²²Ka wə̀d wɨə zɨ̀ i mɨnoʼ zwɨ̀ ɨŋga chəŋ ənun. Wɨ̀ mɨ ghɨ̀ əne, mɨnoʼ mbe bɨrɨ zwi chəŋ te, mɨnoʼ mbe chwɨ i, chəŋ te bə̀ bə i. Ɨ mbɨə zɨ mɨnoʼ zwɨ̀ yeʼ ɨŋga chəŋ rɨ fi.”

²³À nyaʼa əni əkwɨ mɨ̀Jû ə mɔʼɔ, Yeso mbɨ mbi mə̀mə̀ə̀nɨ̀-ɨnû nyaʼə che ɨŋga mbeŋ kywɨ-kɔ̀ʼ. Ənɨ mbɨ nyaʼə yènə̀ wòə̀, mə̀mə̀ə̀nɨ̀-ɨnû ɨməd nyaʼa kɔ parɨ kywɨ̀ rɨ mɔʼɔ.

²⁴Mɨ̀Farisiî nyaʼa biirɨ ɨ bɔ ni, “Zə, mbe mə̀mə̀ə̀nɨ̀-ɨnû kɨə ghɨ̀ ɨnû nɨ chəi ta rɨkə chwi ni mbɨ ghɨ əne əni əkwɨ ɨmbə̀ʼ ə yè ə?”

²⁵Yeso nyaʼa wììrɨ̀ əmbɨ mɨ̀mə̌d ni, “Chəi mbə̀ kweʼ foŋ ənû ze nɨ ɨfɔ̂n Dèvîd nyaʼa ghɨ̌ ənɨ wɨ̀ nyaʼa kwaŋ ɨghɨ bə̀ fɔrɨ ənɨ njì rɨ nyaʼa zaŋ əməd bə̀ zaŋə bə̂d mbe nɨ nyaʼa mbɨ məd ə?

²⁶Ənɨ ə nyùmə̀ we nɨ Àbiatà nyaʼə ətu ɨgwɨ ə bə̂d mbàn Ŋwìə̀, wɨ̀ nyaʼa wò nyɨ ɨŋga nəb Ŋwìə̀, əne jɨg ŋgə̀ŋ ze nɨ mbɨ nyaʼa nuŋ ənɨ əghɨ ə̀fà ɨfě Ŋwìə̀, bə̀ nàʼ zɨ mɔʼɔ əmbɨ bə̂d mbe nɨ nyaʼa mbɨ məd, nɨ ta rɨkə chwi ni àmei bə̂d mbàn Ŋwìə̀ mbe tɨ̀ mbɨ nyaʼa jɨg ŋgə̀ŋ ze.”

²⁷Wɨ̀ nyaʼa ghɨ əne, ghà əmbɨ mɨ̀mə̌d ni, “Ŋwìə̀ nyaʼa nùŋ əni əkwɨ ɨmbə̀ʼ ə bə̂d. Chəi wɨ̀ nyaʼa nuŋ bə̂d ɨmbə̀ʼ əni əkwɨ.

²⁸Əne Wan Wə̀d yɨə Ə̀nùŋɨ̀sɨg ka àbei ɨgwɨ əni əkwɨ.”