Read Fɨso Fi Mak 5 Bible Online

Mak 5 - Fɨso Fi bible

Mak 5

¹Yeso mbɨ mbi mə̀mə̀ə̀nɨ̀-ɨnû nyaʼa wò pè ɨnjin ə sà ze rɨ ə Galiliî, əne yɨ ɨŋga əbà əbeŋ ze rɨ ə Gèrasenès.

²Ənɨ Yeso nyaʼa jwɨ rɨŋga əbaŋ ɨgyɨ̀ ze, mbaŋə̀ mɔʼɔ nɨ əzwî rɨbɔ̀ŋ nyaʼa ɨŋga məd nyaʼa jwɨ̀ rɨŋga ɨtu ɨ̀sì nɨ mbɨ nyaʼa chəb ɨŋga ɨwɔ̌ wò kumnɨ əməd.

³Mbaŋə̀ ze nyaʼə chub ɨŋga mɨ̀sì mbe. Chəi wə̀d mɔʼɔ nɨ tɨ̀ wɨ̀ nyaʼa kod əməd, ka àbei ənɨ mɨ̀kàrə̀,

⁴ɨmbə̀ʼ ɨghəm nɨ mbɨ nyaʼə mɨ̀ə̀ kod əməd ənɨ ə ndəŋ bə̀ fɔrɨ ənɨ mɨ̀kàrə̀, àyɨə wɨ̀ nyaʼə tənə mɨ̀kàrə̀ mbe bə̀ təndɨə ndəŋ te tɨkə rɨkə. Chəi wə̀d mɔʼɔ nɨ nyaʼa berɨ ɨka nɨ ghɨ̀ ni wɨ̀ nyeʼ chubɨ.

⁵Ɨ wɨə nyaʼa kɨə yèn əkaʼ mɨ̀sì mbe bə̀ yèn ɨgwɨ rɨwum. Ɨ wɨə nyaʼə ghɨ̀ əne ɨzimɨ mbɨ ɨziə. Ɨ wɨə nyaʼə yènə̀ kyeŋə rɨkǎ bə̀ pɔ̀ndɨ̀ i ɨnyod ənɨ əti.

⁶Ənɨ wɨ̀ nyaʼa zə ə Yeso rɨ əsa əgha, wɨ̀ nyaʼa nòrə̀ wò chìndɨ̀ ɨtu ɨnywɨ ɨfě ɨ bɔ,

⁷kyeŋ ənɨ ə gɨ̂ nɨ kǎ ghà ni, “Yeso, Wan Ŋwìə̀ Ə̀chè-ɨsɨg, à berɨ ənû ə ye nɨ ghɨ̀ mbɨ num ə? Mə buʼ ɨbɔ ɨ ne ənɨ ɨkum Ŋwiə̀ ni tɨrə̀ chə e əmɨ!”

⁸Wɨ̀ nyaʼa ghà əne ɨmbə̀ʼ ɨghəm nɨ Yeso nyaʼa be gha ɨ bɔ ni, “Àwɔ̀ əzwî rɨbɔ̀ŋ, jwɨ e rɨŋga mbaŋə̀ zɔ̂!”

⁹Yeso nyaʼa biirɨ ɨ bɔ ni, “E ɨkum kɨə we?” Mbaŋə̀ ze nyaʼa wììrɨ̀ ni, “Mɨ ɨkum yɨ Ɨnɔ̂n, ɨmbə̀ʼ ɨghəm nɨ tɨ̀ ə kàŋ nɔʼ.”

¹⁰Ɨzwî rɨbɔ̀ŋ mbe nyaʼa jeŋgɨ buʼ ɨbɔ əmbɨ Yeso yì buʼ ni tɨ wɨ̀ chɨ i əwən rɨŋga əbà əbeŋ ze.

¹¹Ɨnɔ̂n mɨ̀kuŋə nɨ nyaʼa kwàʼ wɨ̀ kyeŋ nyaʼə jɨg ɨbom ɨwum əsɨ ze.

¹²Ɨzwî rɨbɔ̀ŋ mbe nyaʼa buʼ ɨbɔ ɨ bɔ ghà ni, “Cha əwa ɨŋga mɨ̀kuŋə mbə.”

¹³Wɨ̀ nyaʼa benɨ. Əne ɨzwî rɨbɔ̀ŋ mbe nyaʼa jwɨ̀ wò nyɨ ɨŋga mɨ̀kuŋə mbe. Ɨnɔ̂n mɨ̀kuŋə we, nɨ nyaʼa ɨghabɨ ə chuʼ rɨ̀be, nyaʼa sù ɨbom bam wò feŋ ɨŋga ə sà ze, koŋ.

¹⁴Bə̂d mbe nɨ nyaʼə nə̀ŋgɨ mɨ̀kuŋə mbe nyaʼa nòrə̀ wò ghà ənû ze əmbɨ ə bə̂d mbe rɨŋga əsɨ ze bə̀ ghà əmbɨ mbe nɨ nyaʼa ɨban əsɨ ze. Bə̂d nyaʼa jwɨ̀ rɨŋga ɨsɨ mbe wò zə ənû ze nɨ nyaʼa ghɨ̌.

¹⁵Mbɨ nyaʼa wò əsɨ Yeso pè zə mbaŋə̀ ze nɨ ɨ̀nyɔrɨ̀ ɨzwî rɨbɔ̀ŋ mbe nyaʼa ɨŋga məd. Mbaŋə̀ ze nyaʼa chub i əŋgu mbɨ ə ngywɨ ɨbom. Ətu əməd ə nyaʼa fə zeŋ i. Mbɨ nyaʼa zə əne bɔ.

¹⁶Bə̂d mbe nɨ nyaʼa zə ənû ze nyaʼa ghà ənû nɨ nyaʼa ghɨ̌ ənɨ ə mbaŋə̀ ze bə̀ fɔrɨ ənɨ mɨ̀kuŋə mbe əmbɨ mbe nɨ nyaʼa yeʼe.

¹⁷Ənɨ bə̂d mbe nyaʼa zu əne, mbɨ nyaʼa buʼ ɨbɔ əmbɨ Yeso ni wɨ̀ saŋ ə əbà əbeŋ.

¹⁸Ənɨ Yeso nyaʼə nyɨ ɨŋga əbaŋ ɨgyɨ̀, mbaŋə̀ ze nɨ ɨzwî rɨbɔ̀ŋ mbe nyaʼa ɨŋga məd nyaʼa buʼ ɨbɔ ɨ bɔ ni wɨ̀ benɨ tə̀ beenɨ əbɔʼ məd.

¹⁹Chəi Yeso nyaʼa benɨ, àyɨə wɨ̀ nyaʼa ghà ɨ bɔ ni, “Wo əwe ɨnuʼ əsɨ mbe bə̂d, pè ghà ənû ə kyeŋ ze nɨ Ə̀nùŋɨ̀sɨg ghɨ̌ ənɨ ə ne, bə̀ ghà ɨchî nɨ wɨ̀ diirɨ əwe.”

²⁰Mbaŋə̀ ze nyaʼa nɔ̀ʼ wò ɨŋga əbà əbeŋ ze nɨ mbɨ nyaʼə tɔŋ ənɨ Dèkapolìs. [1] Wɨ̀ nyaʼa pè əŋgu kɔ saʼ ənû ə kyeŋ ze nɨ Yeso ghɨ̌ ənɨ məd. Bə̂d mɨ̀jìm mbe nɨ nyaʼa zu ənû ze nyaʼa yiirɨ kwàʼ rɨŋgəʼ.

²¹Ənɨ Yeso nyaʼa wɨrɨ yì baanɨ ə sà ze ɨŋga əbaŋ ɨgyɨ̀, ɨnɔ̂n bə̂d kwàʼ wɨ kyeŋ nyaʼa wò fetɨ kad əməd ənɨ wɨ̀ nyaʼa kɨrɨ i əŋgo ə sà ze.

²²Wə̀d kyeŋ mɔʼɔ rɨ əbɔʼ mbe nɨ nyaʼə chà nəb ə̀kàtɨ̀, nɨ ɨkum məd nyaʼa ə Jairùs, nyaʼa zə əməd wò gù ə si ɨban ɨwu məd,

²³buʼ ɨbɔ ɨ bɔ ənɨ i fîŋ jìm ghà ni, “Mɨ wan əyi kwa wɨə wɔ̀nə̀. Ɨ wɨə sɨə wo kwɨ. Mə buʼ ɨbɔ ni à yeʼe zab mbe ɨbɔ ɨgwɨ məd, ɨmbə̀ʼ wɨ̀ bɔtɨ wɨrɨ chub ɨkǎ.”

²⁴Ənɨ Yeso nyaʼa zu əne, wɨ̀ nyaʼa nɔ̀ʼ kɔ wo mbɨ məd. Ɨnɔ̂n bə̂d kwàʼ wɨ kyeŋ nyaʼa beenɨ əbɔʼ məd. Mbɨ nyaʼə yènə̀ fatɨ əməd.

²⁵Əyi mɔʼɔ nyaʼa əbɔʼ mɨ̀mə̌d nɨ nyaʼə wɔ̀n ɨtuʼ. Wɨ̀ nyaʼa fə wɔ̀n ɨghəm ɨwu wum chɔ̀b rɨ̀be.

²⁶Wɨ̀ nyaʼa fə kàŋ zə ŋgəʼ ɨŋga tɨkyerɨ-ɨbɔ bə̂d ɨfuʼ nɔnɔʼ. Wɨ̀ nyaʼa bə̀ chə̀kɨ̀ i ɨkab jìm, àyɨə chəi wɨ̀ nyaʼa bɔtɨ. Əwɔn əməd ze ə nyaʼa rəbə wò i wo ɨmbì.

²⁷Wɨ̀ nyaʼa fə zu ɨŋgam ɨmbə̀ʼ ə Yeso. Əne wɨ̀ nyaʼa wò ənjìm məd ənɨ wɨ̀ nyaʼa əkaʼ ə bə̂d mɨ̀nɔnɔʼ mbe, əne bètɨ̀ ngywɨ̌ məd.

²⁸Wɨ̀ nyaʼa ghà ɨŋga i fîŋ ni, “Mə mɨ bètɨ̀ ka àbei ngywɨ̌ məd, mɨ əwɔn ə bɨrɨ bɔtɨ.”

²⁹Ənɨ wɨ̀ nyaʼa betɨ, ɨtuʼ we nyaʼa sob àmei əwu əwən. Wɨ̀ nyaʼa zu ɨŋga i nyamnyod ni tə fə bɔtɨ rɨ ənɨ əwɔn ze nɨ nyaʼə chə əwi.

³⁰Yeso nyaʼa kyerɨ ɨŋga i nyamnyod àmei əwu əwən ni ɨka fə jwɨ̀ rɨ ənɨ ə ni. Əne wɨ̀ nyaʼa bèŋ əkaʼ ə bə̂d mɨ̀nɔnɔʼ mbe biirɨ ni, “À kɨə we betɨ mɨ ngywɨ̌ ə?”

³¹Mə̀mə̀ə̀nɨ̀-ɨnû ɨməd nyaʼa ghà ɨ bɔ ni, “À zə ɨchî nɨ bə̂d mɨ̀nɔnɔʼ mbɔ̂ ə nyèŋ ɨnyod ənɨ ə ne, əne à kɨrɨ wɨrɨ biirɨ ni, 'À kɨə we betɨ əmɨ ə?'”

³²Yeso nyaʼa nèŋ ɨsɨ ghab ɨmbə̀ʼ zə wə̀d we nɨ betɨ əməd.

³³Əyi we nyaʼa kyerɨ ənû ze nɨ nyaʼa ghɨ̌ ənɨ məd, əne wɨ̀ nyaʼa wò mbɨ ɨbɔɔ yènə̀ bindɨə, pè chìndɨ̀ ɨtu ɨnywɨ ɨfě Yeso, ghà rəsìʼ jìm ɨ bɔ.

³⁴Yeso nyaʼa zu əne ghà ɨ bɔ ni, “Wân, e ɨbenɨ fə ghɨ̀ ni à bɔtɨ e. Ndə̀ əwe ənɨ əbɔrəbɔd, e əwɔn ə fə mì i.”

³⁵Ənɨ wɨ̀ nyaʼə kɨrɨ ghàmə̀, bə̂d mɔʼɔ rɨŋga nəb wə̀d kyeŋ we nɨ nyaʼə chà nəb ə̀kàtɨ̀ nyaʼa wò pè ghà ni, “E wan əyi we fə kwɨ i. À kɨə wɨrɨə chə əchwiə̀-ɨnû ɨmbə̀ʼ ə yè ə?”

³⁶Yeso nyaʼa zu ənû ze, àyɨə chəi wɨ̀ nyaʼa tɔŋ ənɨ ənû. Wɨ̀ nyaʼa ghà əmbɨ wə̀d kyeŋ we nɨ nyaʼə chà nəb ə̀kàtɨ̀ ni, “Tɨrə̀ bɔ e. Ənû àmei ni à benɨ.”

³⁷Chəi Yeso nyaʼa ben ni wə̀d cherə beenɨ əbɔʼ ni chè rɨ ənɨ Pità mbɨ Jems fɔrɨ ə Jɔ̌n nɨ nyaʼə aŋgɔb Jems.

³⁸Ənɨ mbɨ nyaʼa wo pè əkwɨ wə̀d kyeŋ we nɨ nyaʼə chà nəb ə̀kàtɨ̀, Yeso nyaʼa zə bə̂d bə̀ zu ɨchî nɨ bə̂d nyaʼə jùʼə̀, dìə̀ bə̀ tɔ̀ndɨ̀ əwob.

³⁹Ənɨ wɨ̀ nyaʼa nyɨ ə nəb, wɨ̀ nyaʼa ghà əmbɨ ə bə̂d mbe nɨ nyaʼa əŋgu ni, “Mbə kɨə jùʼə̀ bə̀ dì ɨmbə̀ʼ ə yè ə? Chəi wan wɔ̂ kɨrɨ kwɨ. Ɨ wɨə gwen i gwenɨ.”

⁴⁰Ənɨ wɨ̀ nyaʼa ghà əne, bə̂d mbe nyaʼa kɔ chəʼ əməd. Àyɨə wɨ̀ nyaʼa chà bə̂d mbe mɨ̀jìm ɨsɨg, nɨŋ mbǎʼ wan we mbɨ ɨŋgɔb məd bə̀ nɨŋ mə̀mə̀ə̀nɨ̀-ɨnû mbe nɨ nyaʼa mbɨ məd, mbɨ wò nyɨ ɨŋga ətu ə nəb ze nɨ wan we nyaʼa ɨŋga.

⁴¹Ənɨ mbɨ nyaʼa nyɨ, wɨ̀ nyaʼa yim əbɔ ə wan əyi we ghà ɨ bɔ ni, “Talità kumi” əne yɨ ni, “Wan əyi kwa, mə ghà ɨ ne ni nɔʼ rətiə!”

⁴²Àmei əwu əwən, wan əyi we, nɨ nyaʼa ɨghəm ɨwu wum chɔ̀b rɨ̀be, nyaʼa nɔ̀ʼ kɔ yenɨ. Bə̂d mbe nɨ nyaʼa əŋgu nyaʼa zə ənû ze, yiirɨ kwàʼ rɨŋgəʼ.

⁴³Yeso nyaʼa sɨ jeŋgɨ patɨ mɨ̀mə̌d ni tɨ mbɨ tɔ gha əwən ənû ze əmbɨ wə̀d mɔʼɔ. Wɨ̀ nyaʼa bə̀ yì ghà əmbɨ mɨ̀mə̌d ni mbɨ naʼ əghɨ ə mɔʼɔ əmbɨ wan əyi we ni wɨ̀ jɨg.