Read Fɨso Fi Mak 7 Bible Online

Mak 7 - Fɨso Fi bible

Mak 7

¹Mɨ̀Farisiî mbɨ məchwiə̀ rɨ̀kə̌ mɔʼɔ nɨ nyaʼa nɔʼ rɨ ə Jèrusalèm, nyaʼa wò nàànɨ̀ kad ə Yeso.

²Mbɨ nyaʼa zə ni mə̀mə̀ə̀nɨ̀-ɨnû ɨməd mɔʼɔ mbɨə nyaʼə jɨgə nɨ chəi mbɨ so ɨbɔ, əne yɨ nɨ sò ɨchî nɨ zɨə yeʼ ɨŋga rɨkə tɨ mɨ̀Jû.

³(Chəi mɨ̀Farisiî mbɨ mɨ̀Jû mɨ̀jìm nyaʼə jɨgə kɨrɨ ənɨ mbɨ fə sò mbə ɨbɔ beenɨ əbɔʼ mɨchî mbe nɨ mɨ̀mbǎʼ mɨ̀mə̌d rəŋwe nyaʼa nuŋɨ.

⁴Ənɨ mbɨ nyaʼə bə̀ndɨ̀ rɨ ɨwin, chəi mbɨ nyaʼə jɨgə kɨrɨ ənɨ mbɨ fə ghɨ ə ɨnyod zeŋ ɨchî nɨ zɨə yeʼ ɨŋga rɨ̀kə̌. Mɨchî əbeŋ nɔnɔʼ mbɨə nyaʼa əŋgu nɨ mɨ̀mə̌d nyaʼə beenɨ əbɔʼ, ɨghabɨ ənû nɨ so toʼ mbɨ rɨkyiŋ fɔrɨ ənû nɨ so ɨghɨ mbe nɨ mbɨə zɨ ɨghɨ ɨŋga nɨ mbɨ tekɨ ənɨ ə brɔnz.)

⁵Mɨ̀Farisiî mbe mbɨ məchwiə̀ rɨ̀kə̌ mbe nyaʼa biirɨ ɨ bɔ ni, “Əton nɨ chəi mbe mə̀mə̀ə̀nɨ̀-ɨnû ə nùŋ mɨchî əbeŋ mbe nɨ mba mɨ̀mbǎʼ rəŋwe nyaʼa nuŋɨ kɨ ɨmbə̀ʼ ə yè ə? Mbɨ kɨə jɨgə mbɨ ɨbɔ nɨ chəi mbɨ zeŋ ɨchî nɨ zɨə yeʼ ɨŋga rɨ̀kə̌ ɨmbə̀ʼ ə yè ə?”

⁶Wɨ̀ nyaʼa wììrɨ̀ əmbɨ mɨ̀mə̌d ni, “Wə̀d ɨ̀kə̀n Ŋwìə̀ Aizayà nyaʼa ghà ənû nɨ kuʼnɨ ɨmbə̀ʼ əwən, mbən ɨbekɨ bə̂d. Wɨ̀ nyaʼa ŋwaʼnɨ ni, 'Bə̂d mbɔ̂ mbɨə wumnɨ əmɨ àmei ənɨ mbə mɨchù, àyɨə fîŋ tɨ mɨ̀mə̌d tɨ əsa əgha.

⁷Ɨ mbɨə wumnɨ əmɨ ətu ə̀kǒ. Ɨ mbɨə chwi tɨkə rɨ bə̂d ɨghabɨ ni à yɨ tum.'

⁸“Mbə fə sàŋ tɨkə rɨ Ŋwiə̀, sɨ jeŋgɨ yim yeʼ mɨchî bə̂d.”

⁹Wɨ̀ nyaʼa yì ghà əmbɨ mɨ̀mə̌d ni, “Mbə berɨ ɨchî chɔ̀m nɨ ton tɨkə rɨ Ŋwiə̀ ɨmbə̀ʼ nuŋ yeʼ mbə mɨchî əbeŋ!

¹⁰Mose nyaʼa ghà ni, 'Wumnɨ e mbǎʼ mbɨ e nɨ̌ŋ' fɔrɨ ni, 'Wə̀d we nɨ zɔm i mbǎʼ kɨ̀ i nɨ̌ŋ berɨ kwɨ.'

¹¹Àyɨə mbə mbɨə ghàə̀ ni, 'Wə̀d mɨ ghà əmbɨ i mbǎʼ kɨ̀ əmbɨ i nɨŋ ni əghɨ ze ni mə nɨrə wèèrɨ̀ əwe əŋgu yɨə Kobàn' (əne yɨ ni, mə fə nàʼ əmbɨ ə Ŋwìə̀)

¹²əne chəi mbə̀ wɨrɨ ben ni wɨ̀ ghɨ ənû ə mɔʼɔ əmbɨ i mbǎʼ kɨ̀ əmbɨ i nɨŋ.

¹³Ənɨ ɨkwɨ ɨchî wɔ̂, mbə mbɨə nimnɨ ɨŋgam Ŋwiə̀ ənjìm mbə mɨchî əbeŋ mbe nɨ mbə̀ə chwi əmbɨ ə bə̂d. Mbə mbɨə bə̀ ghɨ̀ ɨnû cherə nɔnɔʼ ɨghabɨ mbɔ̂.”

¹⁴Yeso nyaʼa yì tɔŋ ɨnɔ̂n bə̂d we əsɨ ni, ghà əmbɨ mɨ̀mə̌d ni, “Mbə̀n mɨ̀jìm zu ənû zɔ̂ nɨ mɨə ghàə̀, mbə ɨtu zeŋ.

¹⁵Chəi əghɨ ə mɔʼɔ əsaŋ nɨ wə̀d mɨ jɨg kɨ̀ nɨ wɨ̀ mɨ nɔ, nɨ tɨ̀ zɨə ghɨ̀ ni tɨ wɨ̀ zeŋ i. À yɨ əghɨ ze nɨə jwɨ̀ rɨŋga wə̀d ə ghɨ̀ ni tɨ wɨ̀ zeŋ i.”

¹⁶[“Wə̀d we nɨ tɨ̀ wɨ̀ zu ənû, wɨ̀ zu.”]

¹⁷Ənɨ wɨ̀ nyaʼa saŋ bə̂d mbe wò nyɨ ə nəb, mə̀mə̀ə̀nɨ̀-ɨnû ɨməd nyaʼa biirɨ əton ənɨ ənû ə mɨgɨ ze.

¹⁸Wɨ̀ nyaʼa ghà əmbɨ mɨ̀mə̌d ni, “Chəi mbə̀ bə kyerɨ ə? Mbə̀ rɨka zə əwən ni chəi əghɨ ə mɔʼɔ ze nɨ wə̀d ə jɨgə kɨ̀ ənɨ wɨə nɔə nɨ tɨ̀ zɨə ghɨ̀ ni tɨ wɨ̀ zeŋ i ə?

¹⁹Əne yɨ ɨmbə̀ʼ ɨghəm nɨ kaʼ ə zɨə nyɨ i ɨŋga fîŋ. Ə zɨə nyɨə yeʼ ɨŋga fɨbum, əne chèə̀ jwɨ̀ə̀.” (Ɨchî nɨ wɨ̀ nyaʼa ghà ənû zɔ̂, əne wɨ̀ fə sob ni ɨghɨjɨg jìm ə kùʼ nɨ tɨ̀ bə̂d jɨg.)

²⁰Wɨ̀ nyaʼa bə̀ yì ghà ni, “Əghɨ ze nɨə jwɨ̀ rɨŋga wə̀d, ə zɨə ghɨ̀ ni tɨ wɨ̀ zeŋ i.

²¹Əne yɨ ɨmbə̀ʼ ɨghəm nɨ tɨkɔndɨ rɨbɔ̀ŋ ɨ tɨə jwɨ̀ rɨŋga wə̀d bə̀ jwɨ rɨŋga fîŋ wə̀d. Tɨkɔndɨ te tɨə ghɨ̀ ni wə̀d ni məyi kɨ̀ mbaŋə̀ əbəŋ əbəŋ, ni wə̀d jɨ, ni wə̀d zwiirɨ wɨ cherə, ni wə̀d ni ɨwi kɨ̀ ɨnom wə̀d cherə,

²²ni wə̀d feenɨ ɨghɨ bə̂d, ni wə̀d ghɨ ɨnû ɨzɨg, ni wə̀d tam bə̂d, ni wə̀d ghɨ ɨnyamnɨ-ɨnû, ni wə̀d ghɨ ə̀dìì, ni wə̀d chəkɨ rɨkum bə̂d, ni wə̀d nɔ ɨnyod fɔrɨ ni wə̀d fundɨ.

²³Ɨnû rɨbɔ̀ŋ mbɔ̂ jìm ɨ mbɨə jwɨ̀ rɨŋga wə̀d, əne ɨ mbɨə ghɨ̀ ni tɨ wɨ̀ zeŋ i”

²⁴Yeso nyaʼa nɔ̀ʼ rɨ ə Gènesarèt wò əbà əbeŋ ze rɨ ə Taì fɔrɨ ə Sidòn. Wɨ̀ nyaʼa pè nyɨ ɨŋga nəb mɔʼɔ. Chəi wɨ̀ nyaʼa kəb ni wə̀d mɔʼɔ kyerɨ ni tə wɨ ɨŋga nəb ze, àyɨə chəi ɨchî ənɨ tɨ̀ wɨ̀ nyaʼa nə̀mbɨ̀.

²⁵Àmei əwu əwən, əyi mɔʼɔ nɨ əzwî rɨbɔ̀ŋ ə nyaʼa ɨŋga wan məd, wɨ əyi, nyaʼa zu ənû ɨmbə̀ʼ ə Yeso. Əne wɨ̀ nyaʼa wò chìndɨ̀ ɨtu ɨnywɨ ɨfě ɨ bɔ.

²⁶Əyi we yɨə nyaʼə rɨ ə Gris, àyɨə mbɨ nyaʼa gywɨ əməd ə Sàìròfònisià. Wɨ̀ nyaʼa wò chìndɨ̀ ɨtu ɨnywɨ mbe əne, buʼ ɨbɔ əmbɨ Yeso ni wɨ̀ chɨ əzwî rɨbɔ̀ŋ ze rɨŋga i wan.

²⁷Yeso nyaʼa ghà ɨ bɔ ni, “Be sàŋ ni mbɨ jə bɔn, ɨmbə̀ʼ ɨghəm nɨ zɨ rɨka bɔŋ i ni mbɨ nɨŋ ɨghɨjɨg bɔn màʼ əmbɨ ə bu.”

²⁸Àyɨə əyi we nyaʼa wììrɨ̀ ɨ bɔ ni, “À yɨ əne, kyɨə masà, àyɨə ka àbei bu te rɨ əton ə tebrə̀, ɨ tɨə jɨgə tɨkə rɨ ɨghɨ te nɨə feŋ rɨ əmbɨ ə bɔn.”

²⁹Yeso nyaʼa ghà ɨ bɔ ni, “Ɨchî nɨ à gha əne, nɔʼ wò e. Əzwî rɨbɔ̀ŋ ze ə fə sàŋ e wan.”

³⁰Əyi we nyaʼa nɔ̀ʼ wò ɨnuʼ. Wɨ̀ nyaʼa pè zə wan we nɨ nokɨ ɨgun əbàʼ. Əzwî rɨbɔ̀ŋ ze ə nyaʼa fə jwɨ̀ rɨŋga wan we.

³¹Yeso nyaʼa bə̀ndɨ̀ rɨ əbà əbeŋ ze rɨ ə Taì. Wɨ̀ nyaʼa chè ə Sidòn bə̀ chè ɨŋga əbà əbeŋ ze rɨ ə Dèkapolìs nɨ nyaʼa sɨə wò ə sà ze rɨ ə Galiliî.

³²Ənɨ wɨ̀ nyaʼə che ɨŋga Dèkapolìs, bə̂d mɔʼɔ nyaʼa nɨŋ rɨko nɨ nyaʼə bə̀ kə̀b ɨchî nɨ ghàm wò nàʼ ɨ bɔ. Mbɨ nyaʼa nàʼ əne, buʼ ɨbɔ ni wɨ̀ zab mbi ɨ bɔ ɨgwɨ məd.

³³Yeso nyaʼa nɨŋ mbaŋə̀ ze rəkaʼ ɨnɔ̂n bə̂d we, mbɨ wò əsɨ ə cherə. Wɨ̀ nyaʼa pè əŋgu, zɨ̀ ti twi rɨ əbɔ ɨŋga ɨ̀tǒŋ məd, bə̀ chèd mad bètɨ̀ ɨnemɨ məd əŋgu.

³⁴Wɨ̀ nyaʼa neŋ ɨkaŋ, sɔ ɨchû, ghà ɨ bɔ ni, “Efatà,” əne yɨ ni “Fiʼə!”

³⁵Àmei əwu əwən, ɨ̀tǒŋ məd nyaʼa tòʼə̀, ɨnemɨ məd za, wɨ̀ kɔ gham ɨchî chɔ̀m.

³⁶Yeso nyaʼa ghɨ̀ əne, patɨ bə̂d mbe ni tɨ mbɨ tɔ ghà ənû zɔ̂ əmbɨ wə̀d mɔʼɔ. Àyɨə ɨchî nɨ wɨ̀ nyaʼə patɨ mɨ̀mə̌d ni tɨ mbɨ ghà ə, yɨə bə̀ ɨchɨ nɨ mbɨ nyaʼə yènə̀ saʼ ənû ze kwàʼ ənɨ ɨka.

³⁷Bə̂d mbe nyaʼa yiirɨ kwàʼ rɨŋgəʼ, əne ghà ni, “Wɨ̀ fə ghɨ ɨnû jìm ɨchî chɔ̀m. Wɨ̀ fə ghɨ̀ ni mbɨ̀rɨko zu ɨnû bə̀ ghɨ̀ ni mbɨ̀rɨ̀ghàm ghamə.”