Read Fɨso Fi Luk 1 Bible Online

Luk 1 - Fɨso Fi bible

Luk 1

¹Wə̀d kyeŋ Tiofilùs, bə̂d mɨ̀nɔnɔʼ fə ghɨ̀ ɨka nɨ ŋwaʼnɨ ɨnû mbe nɨ nyaʼa ghɨ̌ əkaʼ na.

²Mbɨ nyaʼa ŋwàʼnɨ̀ àmei ɨchî nɨ bə̂d mbe nɨ nyaʼa zə ɨnû mbe tɨ ənɨ mbɨ nyaʼa kɔ nyaʼa gha ɨ na. Bə̂d mbɔ̂ yɨ mbe nɨ nyaʼə ghà ɨkə̂n chɔ̀m.

³Wə̀d kyeŋ Tiofilùs, ɨchî nɨ mə̀ fə bə̀ nɨŋ ə nyumə̀ jeŋgɨ nwèndɨ̀ ɨnû mbɔ̂ tɨ ənɨ mbɨ nyaʼa kɔ, mə kɔndɨ ni zɨə bɔ̀ŋ ni mə̀ bə ŋwaʼnɨ ɨchî nɨ ɨnû mbe nyaʼa yenɨ, nàʼ ɨ ne.

⁴Mə wɨə ŋwaʼnɨ ɨnû mbɔ̂ ɨmbə̀ʼ à kyerɨ rəsìʼ we nɨ yeʼ ɨŋga ɨnû jìm mbe nɨ mbɨ nyaʼa ghà ɨ ne.

⁵Ənɨ Herɔ̀d nyaʼə ɨfɔ̀n ə Jùdeyà, wə̀d mbàn Ŋwìə̀ mɔʼɔ wɨə nyaʼə əŋgu rəbɔʼ mbe nɨ nyaʼə fàʼ ɨŋga ɨwaŋ ə̀fàʼì Àbijà. Ɨkum məd yɨə nyaʼə Zèkàriyà. Ɨkum ɨwi məd yɨə nyaʼə Èlisabèt. Wɨ̀ yɨə nyaʼa rɨŋga ɨnəbɨ Eròn.

⁶Mɨ̀mə̌d mbɔ̂ mɨbe mbɨə nyaʼə ghɨ̀ ɨnû nɨ kuʼnɨ ɨfě Ŋwiə̀. Ɨ mbɨə nyaʼə nùŋə̀ rɨkə rɨ Ŋwìə̀. Ɨ mbɨ nyaʼə bə̀ ghɨ̀ ɨnû jìm mbe nɨ wɨ̀ nyaʼa ghǎ. Chəi mbɨ nyaʼa gu ənû ə mɔʼɔ.

⁷Àyɨə chəi mbɨ nyaʼa berɨ bɔn, ɨmbə̀ʼ ɨghəm nɨ Èlisabèt yɨə nyaʼə kòm əyi. Mɨ̀mə̌d mbɔ̂ mɨ̀be nyaʼa fə nùnə̀.

⁸À nyaʼa əni ə mɔʼɔ ənɨ Zèkàriyà, nɨ nyaʼə wə̀d mbàn Ŋwìə̀, nyaʼə fàʼ ɨfě Ŋwiə̀ ənɨ ə bə̂d rɨŋga ɨwaŋ ə̀fàʼì we nɨ məd nyaʼa ɨŋga nyaʼə fàʼə̀,

⁹Ɨchî nɨ tɨkə rɨ bə̂d mbàn Ŋwìə̀ nyaʼa chwiə, mbɨ nyaʼa sɔ̀ŋ mbaŋ chɔʼ əməd ni à yɨə məd bɨrɨ nyɨ ɨŋga mbàn Ə̀nùŋɨ̀sɨg ɨmbə̀ʼ tɔn ɨneŋ.

¹⁰Ənɨ wɨ̀ nyaʼə tɔ̀n ɨneŋ we, ɨnɔ̂n bə̂d jìm we nɨ nyaʼa əŋgu, wɨə nyaʼə kɔ̀ŋgɨ̀ ə Ŋwiə̀ ɨsɨg.

¹¹Ənɨ wɨ̀ nyaʼə tɔ̀n əne, aŋgɨrə̀ Ə̀nùŋɨ̀sɨg nyaʼa jwɨ̀ ɨfě ɨ bɔ, təm əbà əbɔ ə jɨgɨ ɨkwi ɨjə̀ŋ we nɨ mbɨ nyaʼə tɔ̀n ɨneŋ ɨgun.

¹²Ənɨ Zèkàriyà nyaʼa zə aŋgɨrə̀ we, ənum ə nyaʼa san əməd, wɨ̀ bɔ.

¹³Àyɨə aŋgɨrə̀ we nyaʼa ghà ɨ bɔ ni, “Tɨrə̀ bɔ e, kyɨə Zèkàriyà, ɨmbə̀ʼ ɨghəm nɨ Ŋwìə̀ fə zu e ə̀kɔ̀ŋgɨ̀. E ɨwi Èlisabèt bɨrɨ gywɨ wan mbaŋə̀, à bɨrɨ chu ɨkum məd ni Jɔ̌n.

¹⁴Məd bɨrɨ ghɨ ɨghaʼi swi ɨŋga e fîŋ, bə̀ ghɨ̀ e ɨnyod bɔ̀ŋ. Bə̂d mɨ̀nɔnɔʼ bɨrɨ ghaʼ ɨmbə̀ʼ ɨghəm nɨ mbɨ gywɨ əməd.

¹⁵Wɨ̀ bɨrɨ yeʼ ədabɨ ə wə̀d ɨfě Ə̀nùŋɨ̀sɨg. Kaʼ wɨ̀ bɨrɨ nɔ i mɨnoʼ əgɔ̂ kɨ̀ mɨnoʼ kǎ kǎ. Əzwî ə Zeŋɨ ə bɨrɨ swi ɨŋga məd kɔ rɨ ənɨ mbɨ gywɨ əməd.

¹⁶Wɨ̀ bɨrɨ ghɨ ni mɨ̀Izre nɔnɔʼ wɨrɨ bèŋ ben Ə̀nùŋɨ̀sɨg Ŋwìə̀ mɨ̀mə̌d.

¹⁷Wɨ̀ bɨrɨ wo ɨmbì Ə̀nùŋɨ̀sɨg mbɨ ɨkwɨ əzwî fɔrɨ mbɨ ɨkwɨ ɨka we nɨ Èlaijà nyaʼa berɨ. Wɨ̀ bɨrɨ beŋ fîŋ tɨ mɨ̀mbǎʼ ni mbɨ wɨrɨ ghaʼ mbə bɔn. Wɨ̀ bɨrɨ beŋ fîŋ rɨ bə̂d mbe nɨə ghɨ̀ rɨ̀zuə̀ ni mbɨ berɨ ɨwe ɨchî nɨ mbe nɨə ghɨ̀ ɨnû nɨ kuʼnɨ berɨ. Wɨ̀ bɨrɨ bɨ ghɨ ni bə̂d tekɨ ɨnyod wòm Ə̀nùŋɨ̀sɨg.”

¹⁸Zèkàriyà nyaʼa biirɨ əmbɨ aŋgɨrə̀ we ni, “Mə̀ kɨə wo kyerɨ ənû zɔ̂ rɨ ye? Mə fə nùnə̀. Mɨ ɨwi fə bə̀ nùn i.”

¹⁹Aŋgɨrə̀ we nyaʼa wììrɨ̀ ɨ bɔ ni, “Mɔ̌ yɨə Gebre we nɨə təm ɨfě Ŋwiə̀. À yɨə Ŋwìə̀ tom əmɨ ni mə̀ yeʼe ghàm ɨ ne bə̀ ghà ɨkə̂n chɔ̀m wɔ̂ ɨ ne.

²⁰Zə ni, à bɨrɨ kəm rəziə bə̀ kə̀b ɨchî nɨ ghàm pè əni ze nɨ ɨnû mbɔ̂ bɨrɨ ghɨ̀, ɨmbə̀ʼ ɨghəm nɨ chəi à ben mɨ ɨŋgam. Ɨŋgam we bɨrɨ jwɨ ənɨ rəsìʼ ənɨ nyùmə̀ məd kuʼu.”

²¹Ənɨ mbɨ nyaʼə ghàmbɨ̀ əne, bə̂d mbɨə nyaʼa ɨsɨg wòm ə Zèkàriyà. Mbɨ nyaʼa bid ɨmbə̀ʼ ɨchî nɨ wɨ̀ nyaʼa tan ɨŋga mbàn Ŋwìə̀.

²²Ənɨ wɨ̀ nyaʼa jwɨ ɨsɨg, chəi ənɨ tɨ̀ wɨ̀ nyaʼa ghàm əmbɨ mɨ̀mə̌d. Əne mbɨ nyaʼa kyerɨ ni wɨ̀ fə zə tɨ̀taanɨ njə̀m ɨŋga mbàn Ŋwìə̀. Mbɨ nyaʼa kyerɨ tɨ̀ ənɨ ɨchî nɨ wɨ̀ nyaʼə chwi ɨnweenɨ əmbɨ mɨ̀mə̌d ənɨ mbi ɨbɔ. Ɨ wɨə nyaʼə chwi əne ɨmbə̀ʼ ɨghəm nɨ chəi ənɨ tɨ̀ wɨ̀ nyaʼa ghàm.

²³Ənɨ nyùm ə̀fàʼì məd nyaʼa fə mì i, wɨ̀ nyaʼa wò əwi ɨnuʼ.

²⁴Ənɨ ɨni mɔʼɔ nyaʼa chě, Èlisabèt nɨ nyaʼə ɨwi məd, nyaʼa bɔ̀ŋ ɨbum. Wɨ̀ nyaʼa nə̀m i ɨnyod ɨŋga nəb əmɨg ətân.

²⁵Wɨ̀ nyaʼa ghà ni “À yɨ Ə̀nùŋɨ̀sɨg ghɨ̌ ənû zɔ̂ ənɨ ə num. Wɨ̀ fə ghɨ̀ ɨ̀chɔ̀m ənɨ ə num ɨchî nɨ wɨ̀ chɨ tɨ̀nìd ətu rɨ ɨgwɨ num əkaʼ ə bə̂d.”

²⁶Ənɨ Èlisabèt nyaʼa fə sɨ rɨ̀bùmə̀ əmɨg rɨ̀fuə, Ŋwiə̀ nyaʼa tom aŋgɨrə̀ we nɨ mbɨə tɔŋ ənɨ Gebre ni wɨ̀ wo ə Nazàret nɨ nyaʼa əbà əbeŋ ze rɨ ə Galiliî.

²⁷Wɨ̀ nyaʼa tom əməd əsɨ wan əyi rɨkyerɨ mbaŋə̀ mɔʼɔ nɨ mbɨ nyaʼa nyɨ əmbɨ mbaŋə̀ mɔʼɔ nɨ ɨkum məd nyaʼə Jòsêf. Jòsêf yɨə nyaʼa rɨ ənɨ əghaŋ Ɨfɔ̂n Dèvîd. Ɨkum wan əyi we yɨə nyaʼə Mèri.

²⁸Aŋgɨrə̀ we nyaʼa wò əsɨ məd pè ghà ɨ bɔ ni, “Mə̀ wɨə chàʼrɨ̀ əwe! Ə̀nùŋɨ̀sɨg wɨ mbɨ ne, əne wɨ̀ fə ghɨ̀ ɨ̀chɔ̀m ənɨ ə ne!”

²⁹Ənɨ Mèri nyaʼa zu ənû ze, zɨə nyaʼa tɔb əməd kwàʼ rɨŋgəʼ. Əne wɨ̀ nyaʼa kɔndɨ ɨŋga i fîŋ ni ɨkwɨ ə̀chàʼrɨ̀ wɔ̂ kɨ wi ə?

³⁰Aŋgɨrə̀ we nyaʼa ghà ɨ bɔ ni, “Tɨrə̀ bɔ e, kyɨə Mèri, Ŋwiə̀ fə ghɨ̀ ɨ̀chɔ̀m ənɨ ə ne.

³¹Zə, à bɨrɨ bɔŋ ɨbum, gywɨ̀ wan mbaŋə̀, chu əməd ni Yeso.

³²Wɨ̀ bɨrɨ yeʼ ədabɨ ə wə̀d. Mbɨ bɨrɨ tɔŋ əməd ənɨ Wan Ə̀chè-ɨsɨg. Ə̀nùŋɨ̀sɨg Ŋwìə̀ bɨrɨ nuŋ əməd ənɨ ɨfɔ̀n ɨchî nɨ wɨ̀ nyaʼa nuŋ ə Dèvîd nɨ nyaʼə mbǎʼ məd rəŋwe.

³³Wɨ̀ bɨrɨ tumbɨ bɔn tɨ ənɨ əghaŋ ə Jakɔ̂b koŋ. Kaʼ ənû ɨfɔ̀n əməd ə bɨrɨ nɔ mì i.”

³⁴Mèri nyaʼa biirɨ əmbɨ aŋgɨrə̀ we ni, “Əzɔ̂ ə kɨ wo yeʼ rɨ ye, nɨ chəi mə̀ kɨrɨ kyerɨ mbaŋə̀ ə?”

³⁵Aŋgɨrə̀ we nyaʼa wììrɨ̀ ɨ bɔ ni, “Əzwî ə Zeŋɨ bɨrɨ yeʼe ɨgwɨ ne, əne ɨka Ə̀chè-ɨsɨg bɨrɨ kubrɨ əwe. Mbɨ bɨrɨ tɔŋ wan zeŋɨ we nɨ à bɨrɨ gywɨ ni məd yɨə Wan Ŋwìə̀.

³⁶Zə, Èlisabèt we nɨ yeʼ e əfurɨ fə bɔ̀ŋ wan mbaŋə̀ ənun. Mbɨ nyaʼa ghà ni məd yɨ kòm əyi. Tɨ̀nîn wɨ̀ fə sɨ rɨ̀bùmə̀ əmɨg rɨ̀fuə.

³⁷Kyerɨ ni chəi ənû ə mɔʼɔ nɨ tɨ̀ zɨə chè ə Ŋwiə̀.”

³⁸Mèri nyaʼa ghà ni, “Mɔ̌ yɨə wə̀d ə̀fàʼì Ə̀nùŋɨ̀sɨg. Zɨə ghɨ ənɨ ə num ɨchî nɨ à ghǎ.” Ənɨ wɨ̀ nyaʼa gha əne, Aŋgɨrə̀ we nyaʼa sàŋ əməd wò i.

³⁹Chəi əgha ə nyaʼa saarɨ, Mèri nyaʼa tekɨ ɨnyod kɨ nɔ̀ʼ wò ɨŋga əsɨ ə mɔʼɔ ɨkaŋ ɨwum we rɨ ə Jùdeyà.

⁴⁰Wɨ̀ nyaʼa wò pè nyɨ ɨŋga nəb Zèkàriyà, chàʼrɨ̀ ə Èlisabèt.

⁴¹Ənɨ Èlisabèt nyaʼa zu ə̀chàʼrɨ̀ ə Mèri, wan we nyaʼa gàtɨ̀ ɨŋga ɨ̀bùm məd. Əzwî ə Zeŋɨ nyaʼa swi ɨŋga məd,

⁴²əne wɨ̀ nyaʼa ghà rɨ̀kǎ ni, “Ŋwìə̀ fə zɨ əbɔrəbɔd ɨgwɨ ne əkaʼ məyi, bə̀ zɨ əbɔrəbɔd ɨgun ə wan we nɨ à bɨrɨ gywɨ!

⁴³Ənû ə kyeŋ zɔ̂ ə ghɨ ənɨ ə num ɨmbə̀ʼ ə ye, ni ɨŋgɔb mɨ Ə̀nùŋɨ̀sɨg yeʼe əsɨ num ə?

⁴⁴Ənɨ mə mɨ kəʼ zu e ə̀chàʼrɨ̀, wan wɔ̂ nɨ yeʼ ɨŋga fum ɨbum kə̀ʼ ghaʼ əne gàtɨ̀.

⁴⁵Ŋwìə̀ zɨ əbɔrəbɔd ɨgwɨ ne ɨchî nɨ à ben ni ənû ze nɨ Ə̀nùŋɨ̀sɨg gha ɨ ne ə bɨrɨ jwɨ ənɨ rəsìʼ.”

⁴⁶Mèri nyaʼa ghà ni, “Mɨ fîŋ zɨə yiirɨ Ə̀nùŋɨ̀sɨg;

⁴⁷mɨ fîŋ zɨə ghaʼə ɨmbə̀ʼ ɨchî nɨ Ŋwìə̀ chɨ əmɨ rəŋgəʼ,

⁴⁸ɨmbə̀ʼ ɨghəm nɨ wɨ̀ fə kɔndɨ əmɨ nɨ mə̀ yeʼ ənatɨ wə̀d ə̀fàʼì məd. Ɨ kɔ rɨ̀nîn tɨ̀ghə̀m bə̂d rɨjìm bɨrɨ sɨə tɔŋ əmɨ ənɨ əyi əbɔrəbɔd,

⁴⁹ɨmbə̀ʼ ɨghəm nɨ Ŋwìə̀ nɨ chè ɨghɨjìm fə ghɨ̀ ɨnû kyeŋ mbɔ̂ ənɨ ə num. Məd yɨ we nɨ zeŋɨ màànɨ̀.

⁵⁰Məd wɨə dììrɨ̀ ə bə̂d mbe nɨə wumnɨ əməd, kɔ rɨ ənɨ ɨghəm bə̂d fibɨ̀ wò pè ənɨ wɨ cherə.

⁵¹Wɨ̀ fə ghɨ̀ ɨnû yiirɨ ənɨ mbi ɨbɔ. Wɨ̀ fə jàŋ bə̂d mbe nɨə nɔ̀ ɨnyod ɨmbə̀ʼ tɨkɔndɨ te nɨ yeʼ ɨŋga fîŋ tɨ mɨ̀mə̌d.

⁵²Wɨ̀ fə swi mɨfɔ̂n kyeŋ tɨ ɨgun ɨtən ɨfɔ̀n mɨ̀mə̌d. Wɨ̀ fə bə̀ nɔ̀ɔ̀rɨ̀ ɨnatɨ bə̂d.

⁵³Wɨ̀ fə jə bə̂d njì ənɨ ɨghɨ chɔ̀m, əne fid bə̂d mbɔ̂n, mbɨ wò ɨbɔ zobɨ.

⁵⁴Wɨ̀ fə wèèrɨ̀ wə̀d ə̀fàʼì məd, Izre, ɨchî nɨ wɨ̀ nyaʼa kaʼi ni tə bɨrɨ diirɨ bə̂d.

⁵⁵Wɨ̀ nyaʼa kàʼ ni tə bɨrɨ diirɨ ə Abràham bə̀ dììrɨ̀ bɔn tɨ ənɨ əghaŋ əməd koŋ ɨchî nɨ wɨ̀ nyaʼa ghǎ əmbɨ mba mɨ̀mbǎʼ rəŋwe.”

⁵⁶Mèri nyaʼa chubɨ mbɨ Èlisabèt ɨghabɨ əmɨg ətad. Wɨ̀ nyaʼa chub əne wɨrɨ bə̀ndɨ̀ wò i ɨnuʼ.

⁵⁷Ənɨ nyùmə̀ nyaʼa kùʼ əmbɨ Èlisabèt nɨ gywɨ, wɨ̀ nyaʼa gywɨ wan mbaŋə̀.

⁵⁸Bə̂d rɨ ɨban əkwɨ mbɨ ɨfurɨ məd nyaʼa zu ni Ə̀nùŋɨ̀sɨg fə dììrɨ̀ əməd kwàʼ rɨŋgəʼ, əne mbɨ nyaʼa ghaʼrɨ mbɨ məd.

⁵⁹Ənɨ wan we nyaʼa pe ɨni famɨ, mbɨ nyaʼa yeʼe ɨ ne əməd. Njɨ mbɨ nyaʼa chù əməd ni Zèkàriyà, nɨ yeʼ ɨkum mbǎʼ məd,

⁶⁰àyɨə ɨŋgɔb məd nyaʼa ghà ni, “Kaʼi əne! Mbɨ bɨrɨ tɔŋ əməd ni Jɔ̌n.”

⁶¹Mbɨ nyaʼa ghà ɨ bɔ ni, “Chəi e əfurɨ ə mɔʼɔ berɨ ɨkum wɔ̂.”

⁶²Mbɨ nyaʼa ghɨ̀ ɨnweenɨ əmbɨ mbǎʼ məd biirɨ ni mbɨ naʼ ɨkum wi əmbɨ wan we ə?

⁶³Wɨ̀ nyaʼa ghɨ̀ ənweenɨ biirɨ əba əghɨ. Ənɨ mbɨ nyaʼa naʼ ɨ bɔ, wɨ̀ nyaʼa ŋwàʼnɨ̀ ɨgun ni, “Ɨkum məd yɨə Jɔ̌n.” Bə̂d mɨ̀jìm mbe nɨ nyaʼa əŋgu nyaʼa yiirɨ.

⁶⁴Àmei əwu əwən, ɨchû məd nyaʼa fìʼə̀, ɨnemɨ məd zà, wɨ̀ kɔ gha ɨnû yiirɨ ə Ŋwiə̀.

⁶⁵Bə̂d mɨjìm rɨ ɨban əkwɨ mɨ̀mə̌d nyaʼa bɔ. Mbɨ nyaʼa ghà ɨmbə̀ʼ ɨnû mbɔ̂ jìm ɨŋga ɨsɨ jìm mbe nɨ nyaʼa ɨkaŋ ɨwum we rɨ ə Jùdeyà.

⁶⁶Bə̂d mɨ̀jìm mbe nɨ nyaʼa zu ənû zɔ̂, nyaʼa kɔndɨ ɨnû rəŋgu ɨŋga tə fîŋ biirɨ ni, “Wan wɔ̂ kɨə wo yeʼ ɨkwɨ wan wi ə?” Zɨə zeŋ ni əbɔ ə Ŋwiə̀ ə zɨ ɨgwɨ məd.

⁶⁷Əzwî ə Zeŋɨ nyaʼa swi ɨŋga Zèkàriyà, mbǎʼ Jɔ̌n, əne wɨ̀ nyaʼa ghà ɨkə̂n Ŋwiə̀ ni,

⁶⁸“Tɨ̀ yiirɨ Ə̀nùŋɨ̀sɨg nɨ yeʼ Ŋwìə̀ mɨ̀Izre ɨmbə̀ʼ ɨghəm ni wɨ̀ fə yeʼe ɨmbə̀ʼ weerɨ mbi bə̂d, bə̀ choʼ ɨtu mɨ̀mə̌d.

⁶⁹Wɨ̀ fə nàʼ wə̀d ɨka nɨ bɨrɨ chɨ əwa rəŋgəʼ. Məd yɨ rɨ ənɨ əghaŋ ə Dèvîd nɨ nyaʼə wə̀d ə̀fàʼì məd.

⁷⁰Wɨ̀ nyaʼa fə kàʼ rəŋwe ənjìm mbi bə̂d ɨ̀kə̀n zeŋɨ

⁷¹ni tə bɨrɨ chɨ əwa rɨŋga rɨkyerɨ-ɨbɔ mba bə̂d pə̀n, bə̀ fɔrɨ rɨŋga rɨkyerɨ-ɨbɔ bə̂d mɨjìm mbe nɨə bàn əwa.

⁷²Wɨ̀ nyaʼa ghà ni tə bɨrɨ dììrɨ̀ mba mɨ̀mbǎʼ rəŋwe, bə̀ kɔndɨ fɨso zeŋɨ fe nɨ wɨ̀ nyaʼa sanɨ,

⁷³ɨchî nɨ wɨ̀ nyaʼa kaʼ əmbɨ Abràham, a mbǎʼ rəŋwe

⁷⁴ni tə bɨrɨ chɨ əwa rɨŋga rɨkyerɨ-ɨbɔ mba bə̂d pə̀n, ɨmbə̀ʼ tɨ̀ faʼ ɨ bɔ nɨ chəi ɨbɔɔ,

⁷⁵ɨmbə̀ʼ tɨ chub ɨzeŋɨ zeŋɨ bə̀ chub ɨchî nɨ kuʼnɨ ɨfě məd ɨni jìm mbe nɨ tɨ̀ bɨrɨ chub ɨka.

⁷⁶Àwɔ̀ wan, mbɨ bɨrɨ tɔŋ əwe ni àwɔ̀ yɨə wə̀d ɨ̀kə̀n Ə̀chè-ɨsɨg, ɨmbə̀ʼ ɨghəm nɨ à bɨrɨ chè ɨmbì əmbɨ Ə̀nùŋɨ̀sɨg ɨmbə̀ʼ tekɨ ɨnə̂njɨ̀ ɨ bɔ,

⁷⁷ɨmbə̀ʼ bɨ ghà əmbɨ ə bə̂d ni Ŋwìə̀ bɨrɨ chɨ mbi bə̂d rəŋgəʼ ɨchî nɨ wɨ̀ bɨrɨ waʼ ɨnû rɨbɔ̀ŋ mɨ̀mə̌d.

⁷⁸A Ŋwiə̀ wɨə dììrɨ̀ əwa kwàʼ rɨŋgəʼ. Wɨ̀ bɨrɨ ghɨ̀ ni nyùmə̀ toʼ rɨkaŋ te ɨgwɨ na,

⁷⁹ɨmbə̀ʼ nàʼ ɨzeŋɨ zeŋɨ əmbɨ ə bə̂d mbe nɨ yeʼ ɨŋga ɨsɨ firɨ fɔrɨ əmbɨ mbe nɨə bɔ ɨvɨ, bə̀ nəŋgɨ əwa ɨmbə̀ʼ tɨ̀ chub ənɨ əbɔrəbɔd.”

⁸⁰Wan we nyaʼa kwi, Əzwî ə Ŋwìə̀ ə swi ɨŋga məd. Wɨ̀ nyaʼa chub ɨŋga ɨbad rɨkwàʼi pè əni ze nɨ wɨ̀ nyaʼa chwi i ɨnyod əmbɨ mɨ̀Izre.