Read Fɨso Fi Luk 10 Bible Online

Luk 10 - Fɨso Fi bible

Luk 10

¹Ənɨ mbɨ nyaʼa maanɨ rɨ əwɔ, Ə̀nùŋɨ̀sɨg nyaʼa chɔʼ bə̂d ɨwum sambe chɔ̀b rɨ̀be, əne tom mɨ̀mə̌d mɨbe mɨbe ni mbɨ wo ɨmbì ɨ bɔ ɨŋga ɨsɨ jìm mbe nɨ məd ziə nyaʼa berɨ wo əŋgu. [7]

²Wɨ̀ nyaʼa ghà əmbɨ mɨ̀mə̌d ni, “Ɨghɨ nɨ kwə̀ŋ ə nɔʼ, àyɨə bə̂d ə̀fàʼì ə kə. Əne mbə̀ kɔŋgɨ Ə̀nùŋɨ̀sɨg nɨ berɨ mbeŋ ni wɨ̀ cha bə̂d ə̀fàʼì mbɨ wo kwə̀ŋ ɨghɨ məd.

³Mbə̀ wo ə, àyɨə mbə̀ zə ni, mə wɨə chà əwən ɨsɨg ɨghabɨ ə bɔn njɨ̀g əkaʼ ɨfɔn.

⁴Tɨ mbə̀ beʼ ə fɨ̀tàgɨ, kɨ̀ ə̀bàmɨ̀, kɨ̀ ɨtabɨ. Tɨ mbə̀ chaʼrɨ ə wə̀d mɔʼɔ ɨnə̂njɨ̀.

⁵Mbə mɨ nyɨ ɨŋga nəb mɔʼɔ, mbə̀ be ghà ni, 'Ŋwìə̀ zɨ əbɔrəbɔd ɨgun ə wə̀d jìm we nɨ yeʼ ɨŋga nəb zɔ̂!'

⁶Wə̀d nɨə kə̀b əbɔrəbɔd mɨ yeʼ ɨŋga nəb ze, əbɔrəbɔd ze nɨ mbə̀ ghà ə bɨrɨ ten i mbɨ məd; àyɨə à mɨ yeʼ ni chəi wə̀d nɨə kə̀b əbɔrəbɔd ɨŋga nəb ze, əbɔrəbɔd ze nɨ mbə̀ ghà ə bɨrɨ wɨrɨ bəndɨ yeʼe ɨ nən.

⁷Mbə̀ chub àmei ɨŋga nəb ze nɨ mbə̀ be pè nyɨ ɨŋga. Mbə̀ jɨg bə nɔ àmei ɨghɨ mbe nɨ mbɨ naʼ ɨ nən, ɨmbə̀ʼ ɨghəm nɨ zɨə kùʼ ni mbɨ chwɨ wə̀d ə̀fàʼì. Tɨ mbə̀ nyɨrə nəb.

⁸Mbə mɨ nyɨ ɨŋga əsɨ ə mɔʼɔ mbɨ nɨŋ əwən, mbə̀ jɨg ɨghɨ mbe nɨ mbɨ naʼ ɨ nən.

⁹Mbə̀ vɨ bə̂d əwɔn ɨŋga əsɨ ze, bə̀ ghà əmbɨ ə bə̂d mbe rɨŋga əsɨ ze ni, 'Ənû ɨfɔ̀n ə Ŋwiə̀ ə fə tiinɨ!'

¹⁰Mbə mɨ nyɨ ɨŋga əsɨ ə mɔʼɔ, àyɨə chəi mbɨ nɨŋ əwən, mbə̀ wo ɨgwɨ mɨnə̂njɨ̀ mbe ɨŋga əsɨ ze ghà ni,

¹¹'Ka àbei əgywɨ rɨŋga əsɨ zɔ̂ ɨ nən nɨ tɨ̀ beʼ ənɨ mba ɨwu, tɨ̀ fə kud əbɔʼ nən. Əzɔ̂ yɨ ənweenɨ ni mbə fə ton ɨkə̂n chɔ̀m. Àyɨə mbə kyerɨ ənû zɔ̂ ə mɔʼ ni ənû ɨfɔ̀n ə Ŋwiə̀ fə tiinɨ.'

¹²Mə ghà ɨ nən ni, à bɨrɨ sɨ əni ze nɨ Ŋwìə̀ ə sob mɨsaʼi, wɨ̀ bɨrɨ diirɨ bə̂d mbe rɨ ə Sodòm chè ɨchî nɨ tɨ̀ wɨ̀ dììrɨ̀ bə̂d mbe rɨŋga əsɨ ze!”

¹³“Ŋgəʼ kyeŋ bɨrɨ nyɨ ɨgwɨ ne, àwɔ̀ Kòrazìn! Ŋgəʼ kyeŋ bɨrɨ nyɨ ɨgwɨ ne, àwɔ̀ Bètsaidà. Ɨmbə̀ʼ ɨghəm nɨ à kɨ̀ nɨ ɨnû yiirɨ mbe nɨ mbɨ nyaʼa ghɨ ɨŋga nən, yɨ mbɨ nyaʼa ghɨ ə Taì fɔrɨ ə Sidòn, njɨ bə̂d mbe rəŋgu nyaʼa fə bèŋ tə fîŋ rəŋwe, zɨ̀ tɨkurɨ ɨdì, bə̀ fùʼ əburɨ.

¹⁴Àyɨə à bɨrɨ sɨ əni ze nɨ Ŋwìə̀ ə sob mɨsaʼi, wɨ̀ bɨrɨ dììrɨ̀ bə̂d mbe rɨ ə Taì mbɨ mbe rɨ ə Sidòn chè ɨchî nɨ tɨ̀ wɨ̀ dììrɨ̀ əwən.

¹⁵Əne, àwɔ̀ Kàpenàhom! À wa kɔndɨ ni mbɨ bɨrɨ nɔ əwe chà ɨkaŋ ə? Chə̂, mbɨ bɨrɨ swi əwe màʼ ɨŋga əbeŋ ɨvɨ bə̂d.

¹⁶“Wə̀d mɔʼɔ we nɨ zu ənû ze nɨ mbə̀ gha, fə bə̀ zu əze nɨ mə gha. We nɨ ton əwən, fə bə̀ ton əmɨ. We nɨ ton əmɨ, fə bə̀ ton wə̀d we nɨ nyaʼa tom əmɨ.”

¹⁷Bə̂d mbe ɨwum sambe chɔ̀b rɨ̀be nyaʼa bə̀ndɨ̀ yeʼe mbɨ ə ŋgaʼ. Mbɨ nyaʼa pè ghà ni, “Ə̀nùŋɨ̀sɨg, ka àbei ɨzwî rɨbɔ̀ŋ, ɨ mbɨə nyaʼə zuunɨ əwa ənɨ tɨ̀ nyaʼa ghàm əmbɨ mɨ̀mə̌d ənɨ e ɨkum!”

¹⁸Yeso nyaʼa wììrɨ̀ əmbɨ mɨ̀mə̌d ni, “Mə kə̀ʼ zə ə Satàn nɨ feŋ rɨkaŋ ɨchî nɨ ɨbi mbə̀ŋ ə ŋwàŋə̀.

¹⁹Mbə̀ zə, mə fə nàʼ ɨka ɨ nən ni mbə̀ yen ɨgwɨ ə jɔ, yèn ɨgun mbɨ̀rɨkafuʼ-ɨkon. Mə fə bə̀ nàʼ ɨka ɨ nən ni mbə̀ baŋ ɨka jìm we nɨ wə̀d pə̀n berɨ. Chəi əghɨ ə mɔʼɔ bɨrɨ kundɨ əwən.

²⁰Àyɨə tɨ mbə ghaʼ àmei ni ɨzwî rɨbɔ̀ŋ mbɨə zuunɨ əwən, àyɨə mbə ghaʼ yeʼ ɨmbə̀ʼ ɨghəm nɨ Ŋwìə̀ fə ŋwaʼnɨ tə rɨkum ɨkaŋ.”

²¹À nyaʼa ənɨ ə nyùmə̀ we, Əzwî ə Zeŋɨ ə nyaʼa ghɨ̀ ɨghaʼi swi ɨŋga fîŋ Yeso. Əne wɨ̀ nyaʼa ghà ni, “Mɨ Mbǎʼ, Ə̀nùŋɨ̀sɨg rɨkaŋ fɔrɨ ɨgwɨ ə si, məben-əwe ni à fə nə̀m ɨnû mbɔ̂ rɨ əmbɨ ə bə̂d ɨwe bə̀ fɔrɨ rɨ əmbɨ məkyerɨ ɨnû, sɨ chwiə yeʼ əmbɨ ə bɔn bɔd. Ee, kyɨ mɨ Mbǎʼ, à yɨ ɨchî nɨ à kəbɨ we.

²²“Mɨ Mbǎʼ fə naʼ ɨghɨjìm ɨ num. Chəi wə̀d mɔʼɔ əŋgu nɨ jeŋgɨ kyerɨ Wan chè rɨ ənɨ Mbǎʼ. Chəi bəi wə̀d mɔʼɔ əŋgu nɨ bə jeŋgɨ kyerɨ Mbǎʼ chè rɨ ənɨ ə Wan fɔrɨ wə̀d we nɨ Wan də̀b nɨ chwi əməd ɨ bɔ.”

²³Ənɨ wɨ̀ nyaʼa ghà əne, wɨ̀ nyaʼa bèŋ ghà əmbɨ mə̀mə̀ə̀nɨ̀-ɨnû mbe ənjìm ənjìm ni, “Ŋwìə̀ zɨ əbɔrəbɔd ɨgun əghə ze nɨə zə ɨghɨ mbe nɨ mbə̀n ə zəə!

²⁴Mə ghà ɨ nən ni bə̂d ɨ̀kə̀n nɔnɔʼ mbɨ mɨfɔ̂n nɔnɔʼ nyaʼa kə̀b zə ɨghɨ mbe nɨ mbə̀ə zəə, àyɨə chəi mbɨ nyaʼa zə. Mbɨ nyaʼa bə̀ kəb zu ɨnû mbe nɨ mbə̀ə zuə, àyɨə chəi mbɨ nyaʼa zu.”

²⁵À nyaʼa əni ə mɔʼɔ, əchwiə̀ rɨ̀kə̌ mɔʼɔ nyaʼa wò əsɨ Yeso ɨmbə̀ʼ kwaʼnɨ əməd. Əne wɨ̀ nyaʼa biirɨ ɨ bɔ ni, “Əchwiə̀-ɨnû, mə kɨə wo ghɨ yè bɔŋ jɨg ɨ̀tènɨ̀ rɨ mì ə?”

²⁶Yeso nyaʼa biirɨ ɨ bɔ ni, “Zɨə kɨ ɨŋga tɨkə rɨ Mose ni yè ə? À foŋ zɨə ghà ni ye ə?”

²⁷Əchwiə̀ rɨ̀kə̌ we nyaʼa wììrɨ̀ ni, “À berɨ ghaʼ Ə̀nùŋɨ̀sɨg e Ŋwìə̀ ənɨ e fîŋ jìm, ənɨ e ɨ̀tènɨ̀ jìm, ənɨ e ɨka jìm bə̀ fɔrɨ ənɨ te rɨkɔndɨ rɨjìm. À berɨ bɨ ghaʼ wə̀d nɨ tindɨ ɨban ne ɨchî nɨ à ghaʼ e nyamnyod.”

²⁸Yeso nyaʼa ghà ɨ bɔ ni, “À fə wììrɨ̀ ɨchî chɔ̀m. Sɨə ghɨ əne, à bɨrɨ tènə̀.”

²⁹Àyɨə ɨchî nɨ mbaŋə̀ ze nyaʼə kə̀b chwiə ni ənû ze nɨ tə gha ə kùʼ, wɨ̀ nyaʼa wɨrɨ yì biirɨ əmbɨ Yeso ni, “Wə̀d nɨ tindɨ ɨban num kɨə we?”

³⁰Yeso nyaʼa wììrɨ̀ ɨ bɔ ni, “Mbaŋə̀ mɔʼɔ zɨə nyaʼə swiʼi rɨ ə Jèrusalèm wò ə Jerikò. Wɨ̀ nyaʼa pè feŋ ɨŋga tɨkyerɨ-ɨbɔ mɨjɨ. Mɨjɨ mbe nyaʼa fe ɨghɨ məd jìm bə̀ som əməd wɨ̀ sɨə wo kwɨ. Əne mbɨ nyaʼa saŋ əməd nòd əwən.

³¹Zɨə nyaʼa chè ni wə̀d mbàn Ŋwìə̀ mɔʼɔ nyaʼə swiʼ ɨgwɨ ɨnə̂njɨ̀ we. Ənɨ wɨ̀ nyaʼa zə mbaŋə̀ ze, wɨ̀ nyaʼa bàʼrɨ̀ chè əba ɨnə̂njɨ̀ zə̂.

³²Əne bə̂, mbaŋə̀ mɔʼɔ nɨ nyaʼa rɨŋga ɨnəbɨ Levì nyaʼa bə̀ wò pè əsɨ ze, zə əməd, bə̀ bàʼrɨ̀ chè əba ɨnə̂njɨ̀ zə̂.

³³Àyɨə mbaŋə̀ mɔʼɔ nɨ nyaʼa rɨ ə Sàmàriyà, nɨ nyaʼə yèn i, nyaʼa wò pè əsɨ ze nɨ mbaŋə̀ ze nyaʼa əŋgu. Ənɨ wɨ̀ nyaʼa zə əməd, ə̀kə̀nɨ̀ ə nyaʼa swi ɨŋga fîŋ məd.

³⁴Əne wɨ̀ nyaʼa wò əsɨ mbaŋə̀ ze, sò ɨna məd ənɨ mɨnoʼ, zɔʼ ənɨ mɨwud, kod. Wɨ̀ nyaʼa ghɨ̀ əne, nɨŋ əməd nuŋ ɨgun i jàkas, nɨŋ wò ɨŋga nəb nɨ bə̂d ɨghanɨ ə pè ni əŋgu, nə̀ŋgɨ əməd.

³⁵À nyaʼa əni ze nɨ beenɨ, wɨ̀ nyaʼa chɨ̀ ɨkab chuʼ rɨ̀be, nàʼ əmbɨ wə̀d nəb we, ghà ni, 'Nəŋgɨ əməd, ənɨ mə̀ wɨrɨ bə̀ndɨ̀, mə bɨrɨ wi ɨkab cherə we nɨ à chəkɨ ɨgwɨ məd.'”

³⁶Yeso nyaʼa sɨ nwìə̀ biirɨ ɨ bɔ ni, “Ənɨ e ɨkɔndɨ, à kɨ wi rəbɔʼ bə̂d mbɔ̂ mɨ̀tad nyaʼa chwi ni tə tindɨ ɨban ə mbaŋə̀ ze nɨ nyaʼa feŋ ɨŋga tɨkyerɨ-ɨbɔ mɨjɨ ə?”

³⁷Əchwiə̀ rɨ̀kə̌ we nyaʼa wììrɨ̀ ni, “À yɨ we nɨ nyaʼa diirɨ əməd.” Yeso nyaʼa sɨ ghà ɨ bɔ ni, “Ndə̀ wò ghɨ̀ əndəŋ əndəŋ.”

³⁸Ənɨ Yeso mbɨ mbi mə̀mə̀ə̀nɨ̀-ɨnû nyaʼə yènə̀ wòə̀, wɨ̀ nyaʼa wò pè ɨŋga əsɨ ə mɔʼɔ. Əyi mɔʼɔ nɨ ɨkum məd nyaʼə Màta, nyaʼa nɨŋ Yeso ɨŋga i nəb.

³⁹Màta we nyaʼa berɨ wi aŋgɔb mɔʼɔ nɨ ɨkum məd nyaʼə Mèri. Mèri we nyaʼa chub ɨban ɨwu Ə̀nùŋɨ̀sɨg zwetɨ ənû mbe nɨ wɨ̀ nyaʼə chwiə,

⁴⁰àyɨə Màta wɨə nyaʼə nwìʼ ɨnyod tə̀zìʼ wi ɨmbə̀ʼ tekɨ ɨghɨ əmbɨ mɨ̀mə̌d. Əne wɨ̀ nyaʼa wò ghà əmbɨ Yeso ni, “Ə̀nùŋɨ̀sɨg, à rɨ wa zə e ni wum aŋgɔb fə sàŋ əmɨ ni mə tekɨ ɨghɨ mbɔ̂ tə̀zìʼ ə? Gha ɨ bɔ ni wɨ̀ yeʼe wèèrɨ̀ əmɨ.”

⁴¹Àyɨə Ə̀nùŋɨ̀sɨg nyaʼa wììrɨ̀ ɨ bɔ ni, “Màta, Màta! À wɨə nwìʼ ɨnyod əku bə̀ zəə ŋgəʼ ɨmbə̀ʼ ɨnû nɔnɔʼ.

⁴²Əghɨ nɨ mbɨə kə̀bə̀ mei ze ə mɔʼ. Mèri fə chɨ̀ əba ə chɔ̀m ni chəi mbɨ bɨrɨ nɨŋ rɨ bɔ.”