Read Fɨso Fi Luk 11 Bible Online

Luk 11 - Fɨso Fi bible

Luk 11

¹Yeso wɨə nyaʼə kɔ̀ŋgɨ̀ ə Ŋwiə̀ əsɨ ə mɔʼɔ. Ənɨ wɨ̀ nyaʼa màànɨ, ə̀mə̀ə̀nɨ̀-ɨnû məd mɔʼɔ nyaʼa ghà ɨ bɔ ni, “Ə̀nùŋɨ̀sɨg, chwi ɨchî nɨ mbɨə kɔ̀ŋgɨ̀ ə Ŋwiə̀ ɨ na, àmei ɨchî nɨ Jɔ̌n nyaʼa chwi əmbɨ mbi mə̀mə̀ə̀nɨ̀-ɨnû.”

²Əne wɨ̀ nyaʼa ghà əmbɨ mɨ̀mə̌d ni, “Ənɨ mbə̀ə kɔ̀ŋgɨ̀ ə Ŋwiə̀, mbə̀ gha ni: 'A Mbǎʼ, Ghɨ ni bə̂d wumnɨ e ɨkum, E ənû ɨfɔ̀n ə yeʼe.

³Naʼ ɨghɨjɨg nɨ kuʼnɨ na ɨni jìm.

⁴Waʼ mba ɨnû rɨbɔ̀ŋ, ɨmbə̀ʼ ɨghəm nɨ tɨ̀ wɨə waʼ ɨnû rɨbɔ̀ŋ wə̀d jìm we nɨ gu ənû ɨ na. Tɨrə̀ ben e ni ənû ə mɔʼɔ ə numbɨ əwa.'” [8]

⁵Yeso nyaʼa yì ghà əmbɨ mbi mə̀mə̀ə̀nɨ̀-ɨnû ni, “À mɨ yeʼ nɨ wə̀d mɔʼɔ rəbɔʼ nən berɨ i sə̀ʼ nɨ wɨ̀ wo əsɨ məd ɨzimɨ ka, pè gha ɨ bɔ ni, 'Mɨ sə̀ʼ, chɔʼ chiŋ ŋgə̀ŋ rɨtad naʼ i num,

⁶ɨmbə̀ʼ ɨghəm nɨ mɨ sə̀ʼ mɔʼɔ fə nɔ̀ʼ rɨ əsa əgha yeʼe əkwɨ num, əne chəi mə̀ berɨ əghɨ nɨ naʼ ɨ bɔ ni wɨ̀ jɨg.'

⁷E sə̀ʼ mɨ wììrɨ̀ rɨŋga nəb ni, 'Tɨrə̀ chə e əmɨ! Mə fə fə̀n mɨ nəb. Mɔ̌ mbɨ mbɨ bɔn fə nòkɨ̀ a. Chəi mə bɨrɨ nɔʼ naʼ əghɨ ə mɔʼɔ ɨ ne.'

⁸Mə ghà ɨ nən ni, ka à bè yeʼ ni chəi wɨ̀ bɨrɨ nɔʼ naʼ əghɨ ə mɔʼɔ ɨ bɔ ɨmbə̀ʼ ɨghəm nɨ məd yɨə sə̀ʼ məd, àyɨə wɨ̀ bɨrɨ nɔʼ naʼ əghɨ ze nɨ wɨ̀ kəbɨ ɨmbə̀ʼ ɨghəm nɨ wɨ̀ yim fîŋ rəbə biirɨ i biirɨ.

⁹“Əne mə ghà ɨ nən ni, mbə̀ nɔn, Ŋwìə̀ bɨrɨ naʼ ɨ nən. Mbə̀ kəbə, Ŋwìə̀ bɨrɨ ghɨ̀ ni mbə̀ zə. Mbə̀ goŋgɨ, Ŋwìə̀ bɨrɨ fiʼ ɨ nən.

¹⁰Ɨmbə̀ʼ ɨghəm nɨ wə̀d jìm we nɨ nɔnɨ, Ŋwìə̀ bɨrɨ naʼ ɨ bɔ, we nɨ kə̀bɨ, Ŋwìə̀ bɨrɨ ghɨ̀ ni wɨ̀ zə, we nɨ goŋgɨ, Ŋwìə̀ bɨrɨ fiʼ ɨ bɔ.

¹¹À kɨə mbǎʼ wi rəbɔʼ nən nɨ wan məd mɨ nɔn ɨgwi ɨ bɔ, chəi wɨ̀ naʼ ɨgwi, wɨ̀ nàʼ yeʼ jɔ ə?

¹²Kɨ̀ nɨ wɨ̀ mɨ nɔn ɨbom ŋgub, wɨ̀ nàʼ yeʼ rɨkafuʼ-ɨkon ɨ bɔ ə?

¹³Əne mbə̀n mbe nɨə ghɨ̀ ɨnû rɨbɔ̀ŋ mɨ kyerɨ ɨchî nɨ naʼ ɨghɨ chɔ̀m əmbɨ mbə bɔn, njɨ ə Mbǎʼ nɨ yeʼ ɨkaŋ bɨrɨ kaŋ naʼ Əzwî ə Zeŋɨ əmbɨ ə bə̂d mbe nɨ nɔn ɨ bɔ!”

¹⁴Yeso nyaʼa chɨ̀ əzwî rɨbɔ̀ŋ rɨŋga wə̀d mɔʼɔ nɨ nyaʼə tɨ̀ghàm. Ənɨ əzwî rɨbɔ̀ŋ ze ə nyaʼa jwɨ̌, tɨ̀ghàm we nyaʼa ghàm, əne ɨnɔ̂n bə̂d we nɨ nyaʼa əŋgu nyaʼa yiirɨ.

¹⁵Àyɨə mbɨ mɔʼɔ nyaʼa ghà ni, “À yɨə Belzebùl nɨ yeʼ ɨfɔ̂n ɨzwî rɨbɔ̀ŋ naʼ ɨka ɨ bɔ ni wɨ̀ chɨ ɨzwî rɨbɔ̀ŋ.”

¹⁶Mbɨ mɔʼɔ nyaʼa kəb ni njɨ mbə kwàʼnɨ̀ əməd, əne mbɨ nyaʼa ghà ni wɨ̀ ghɨ ənû ə yiirɨ nɨ chwi ni à yɨə Ŋwìə̀ naʼ ɨka ɨ bɔ.

¹⁷Wɨ̀ nyaʼa kyerɨ tɨkɔndɨ tɨ mɨ̀mə̌d, əne wɨ̀ nyaʼa ghà əmbɨ mɨ̀mə̌d ni, “Əbeŋ ɨfɔ̀n ə mɔʼɔ ə mɨ saanɨ əkəmɨ kəmɨ, kɔ zɔŋ mbənə mbənə, əbeŋ ze ə bɨrɨ beŋ ənɨ rɨ̀fùm. Bə̂d rɨŋga nəb mɨ saanɨ, njɨ nəb ze bɨrɨ jàŋə̀.

¹⁸Ənû ɨfɔ̀n ə Satàn ə mɨ bə̀ saanɨ əkəmɨ kəmɨ, njɨ ənû ɨfɔ̀n ze ə kɨə wo təm rɨ ye ə? Mbə ghà ni à yɨə Belzebùl naʼ ɨka ɨ num ni mə̀ chɨ ɨzwî rɨbɔ̀ŋ.

¹⁹Mə mɨ yeʼə chɨ̀ ɨzwî rɨbɔ̀ŋ ənɨ ɨka nɨ Belzebùl naʼ ɨ num, njɨ mbə bɔn kɨə chɨ ənɨ ɨka nɨ we naʼ əmbɨ mɨ̀mə̌d ə? Mbə̀ kyerɨ ni à yɨ mbə bɔn bɨrɨ saʼ əwən.

²⁰Àyɨə mə mɨ yeʼə chɨ̀ ənɨ ɨka we nɨ Ŋwìə̀ naʼ ɨ num, njɨ zɨə chwi ni ənû ɨfɔ̂n ə Ŋwiə̀ ə fə sɨ i mbɨ nən.

²¹“Mbaŋə̀ ze nɨ berɨ ɨka mɨ yim ɨghɨ bid nəŋgɨ i nəb, chəi wə̀d bɨrɨ betɨ ɨghɨ məd.

²²Àyɨə mbaŋə̀ cherə nɨ berɨ ɨka chè əməd mɨ zɔ̀ŋ mbɨ məd baŋ əməd, wɨ̀ bɨrɨ nɨŋ ɨghɨ bid məd mbe jìm ni wɨ̀ kəʼ nuŋ i fîŋ ɨgun, əne ghàpɨ̀ ɨghɨ mbe nɨ wɨ̀ beʼrɨ.

²³Wə̀d we nɨ chəi əməd mbɨ num yɨ mɨ wə̀d pə̀n. We nɨ chəi wɨə fetɨə mbɨ num wɨə jàŋə̀.

²⁴“Əzwî rɨbɔ̀ŋ ə mɨ fə jwɨ̀ rɨŋga wə̀d, zɨə ghanə yèn ɨsɨ mbe nɨ chəi mɨnib əŋgu, yènə̀ kə̀b əsɨ nɨ zwììrɨ̀. Zɨə mɨ rɨka zə i, zɨə ghà ni, 'Mə bɨrɨ bəndɨ wo ɨŋga nəb ze nɨ mə̀ jwɨ rɨŋga.'

²⁵Zɨ̀ mɨ nɨə yeʼe, zɨ̀ pe zə nəb ze nɨ mbɨ fə zə̌ tekɨ ɨchî chɔ̀m.

²⁶Əne zɨə bɨrɨ wò nɨŋ ɨzwî rɨbɔ̀ŋ cherə sambe nɨ bə̌ chè əməd yeʼe mbɨ mbɨwən, mbɨ wò nyɨ chub ɨŋga nəb ze. Ŋgəʼ ze nɨ bɨrɨ nyɨ ɨgun ə wə̀d we bɨrɨ bə chè ze nɨ wɨ̀ nyaʼə beə zəə.”

²⁷Ənɨ Yeso nyaʼə ghà ɨnû mbɔ̂, əyi mɔʼɔ rɨŋga ɨnɔ̂n bə̂d we nyaʼa gham rɨ̀kǎ, ghà ɨ bɔ ni, “Ŋwìə̀ zɨ əbɔrəbɔd ɨgun əyi we nɨ nyaʼa gywɨ əwe bə̀ nì əwe!”

²⁸Àyɨə Yeso nyaʼa wììrɨ̀ ni, “Ŋwìə̀ bɨrɨ zɨ əbɔrəbɔd yeʼ ɨgun ə bə̂d mbe nɨə zu ɨŋgam məd bə̀ ghɨ̀ ɨnû mbe nɨ wɨə ghàə̀!”

²⁹Ənɨ mɨnɔ̂n bə̂d mbe nyaʼə sɨə nɔʼrɨə wò ɨmbì, Yeso nyaʼa kɔ ghǎ ni, “Ɨghəm bə̂d wɔ̂ rɨ̀nîn wɨə ghɨ̀ ɨnû rɨbɔ̀ŋ. Ɨ wɨə kə̀bə̀ ni mə̀ ghɨ ənû ə yiirɨ, àyɨə chəi ənû ə yiirɨ nɨ mə̀ bɨrɨ ghɨ̀ chè rɨ ənɨ ənû ə yiirɨ ze nɨ nyaʼa ghɨ ənɨ ə Jonà.

³⁰Ɨchî nɨ Jonà yɨə nyaʼə ənweenɨ-ənû əmbɨ bə̂d mbe rɨ ə Ninivè, yɨə bə ɨchî nɨ Wan Wə̀d bɨrɨ bɨ yeʼ ənweenɨ-ənû əmbɨ ɨghəm bə̂d wɔ̂ rɨ̀nîn.

³¹Ɨgwɨ əni ze nɨ Ŋwìə̀ ə sob mɨsaʼi, ɨfɔ̂n əyi we rɨ ə Shebà bɨrɨ nɔʼ zɨ ɨsaʼi ɨgwɨ ɨghəm bə̂d wɔ̂ rɨ̀nîn, ɨmbə̀ʼ ɨghəm nɨ wɨ̀ nyaʼa yeʼe rɨ ɨnwǐ ɨsɨg ɨmbə̀ʼ zu ɨnû ɨwe rɨ əmbɨ Solomòn. Àyɨə mbə̀ zə ni wə̀d mɔʼɔ wɨ əgha nɨ dabə chè ə Solomòn.

³²Ɨgwɨ əni ze nɨ Ŋwìə̀ ə sob mɨsaʼi, bə̂d mbe rɨ ə Ninivè bɨrɨ nɔʼ zɨ ɨsaʼi ɨgwɨ ɨghəm bə̂d wɔ̂ rɨ̀nîn, ɨmbə̀ʼ ɨghəm nɨ ənɨ Jonà nyaʼə ghà ɨŋgam Ŋwiə̀, mbɨ nyaʼa bèŋ tə fîŋ. Àyɨə mbə zə ni wə̀d mɔʼɔ wɨ əgha nɨ dabə chè ə Jonà.”

³³“Chəi wə̀d mɔʼɔ əŋgu nɨ wɨ̀ mɨ che ənam wɨ̀ nə̀m kɨ̀ wɨ̀ kubrɨ əton fɨkyiŋ. Wɨ̀ mɨ chè ənam, wɨ̀ bɨrɨ te yeʼ ɨgun əsɨ nɨ mbɨə te ənam ɨmbə̀ʼ bə̂d mbe nɨ nyɨ ə nəb zə ɨsɨ.

³⁴E ɨghə yɨ ənam əmbɨ e nyamnyod. E ɨghə mɨ yeʼ wɨ chɔ̀m, e ɨnyod jìm bɨrɨ zeŋ. Àyɨə e ɨghə mɨ yeʼ wɨ rɨbɔ̀ŋ, e ɨnyod jìm bɨrɨ fin.

³⁵Əne mbə̀ we ə ni tɨ ɨzeŋɨ zeŋɨ we nɨ yeʼ ɨŋga nən beŋ ənɨ ɨsɨ firɨ.

³⁶Əne e ɨnyod jìm mɨ zeŋ, nɨ chəi əba ə mɔʼɔ ə finə, njɨ e ɨnyod jìm bɨrɨ te ɨchî nɨ ənam ə teə nàʼ ɨzeŋɨ zeŋɨ ɨ ne.”

³⁷Ənɨ Yeso nyaʼə kɨrɨ ghàmə̀, Farisiî mɔʼɔ nyaʼa tɔŋ əməd ni wɨ̀ yeʼe jɨg mbɨ ni. Əne wɨ̀ nyaʼa wò nyɨ ə nəb chubɨ ɨ jɨg.

³⁸Zɨə nyaʼa chè ə Farisiî we nɨ zə ni chəi Yeso nyaʼa so ɨbɔ ɨchî nɨ mɨchî mɨ̀mə̌d chwiə bɔŋ jɨg.

³⁹Əne Ə̀nùŋɨ̀sɨg nyaʼa ghà ɨ bɔ ni, “Tɨ̀nîn mbə̀nə mɨ̀Farisiî mbɨə sòə̀ njìm toʼ bə̀ sòə̀ njìm əkaŋ, àyɨə tə fîŋ ə swi mbɨ əjə fɔrɨ ɨnû ɨzɨg.

⁴⁰Mbə yɨ ɨneŋ! Kaʼ à wa kɨ i wə̀d we nɨ nyaʼa tekɨ əba rɨŋga nyaʼa bə tekɨ əba rəsàŋ ə?

⁴¹Àyɨə mbə̀ naʼ ɨghɨ mbe nɨ yeʼ ɨŋga toʼ bə̀ nàʼ mbe nɨ yeʼ ɨŋga ɨkaŋ əmbɨ ə bə̂d ɨkwaŋ, əne ɨghɨjìm bɨrɨ zeŋ ɨ nən.

⁴²“Ŋgəʼ kyeŋ bɨrɨ nyɨ ɨgwɨ nən mbə̀nə mɨ̀Farisiî! Zɨ̀ bɨrɨ nyɨ ɨmbə̀ʼ ɨghəm nɨ mbə mbɨə ghàpə̀ tɨtiirɨ te nɨ mbɨə tɔŋ ənɨ mint bə̀ ghapɨ ə rue mbɨ tɨkwɨrɨ mbòb jìm ɨsɨ wum, əne nàʼ əsɨ ə fibɨ̀ əmbɨ ə Ŋwiə̀, àyɨə mbə mbɨə waʼ ənû nɨ ghɨ ɨnû nɨ kuʼnɨ mbɨ ənû nɨ ghaʼ ə Ŋwiə̀. Njɨ mbə ghɨ ɨnû mbɔ̂ jìm nɨ chəi mbə̀ waʼ mbɨ mɔʼɔ.

⁴³Ŋgəʼ kyeŋ bɨrɨ nyɨ ɨgwɨ nən mbə̀nə mɨ̀Farisiî! Zɨ̀ bɨrɨ nyɨ ɨmbə̀ʼ ɨghəm nɨ mbə mbɨə ghaʼ ɨtən chɔ̀m ɨŋga nəb tɨ ə̀kàtɨ̀, bə̀ ghaʼə ni bə̂d chaʼrɨ əwən ɨŋga mɨ̀wǐn.

⁴⁴Ŋgəʼ kyeŋ bɨrɨ nyɨ ɨgwɨ nən! Zɨ̀ bɨrɨ nyɨ ɨmbə̀ʼ ɨghəm nɨ mbə mbɨ ɨghabɨ mɨsî nɨ chəi bə̂d ə zəə, əne bə̂d mbɨə yèn ɨgun nɨ chəi mbɨ kyerɨ.”

⁴⁵Əchwiə̀ rɨ̀kə̌ mɔʼɔ nyaʼa wììrɨ̀ ɨ bɔ ni, “Əchwiə̀-ɨnû, à mɨ ghà əne, à fə bə̀ zɔ̀m əwa!”

⁴⁶Yeso nyaʼa ghà ni, “Ŋgəʼ kyeŋ bɨrɨ bɨ nyɨ ɨgwɨ nən, mbə̀nə məchwiə̀ rɨ̀kə̌! Zɨ̀ bɨrɨ nyɨ ɨmbə̀ʼ ɨghəm nɨ mbə mbɨə zɨ̀ ɨghɨ nɨ nid ɨgwɨ ɨtu bə̂d nɨ chəi nɨ tɨ̀ mbɨ bèʼ, àyɨə chəi mbə̀ə bètɨ̀ ɨghɨ mbe ka àbei ənɨ tə fi əbɔ.

⁴⁷Ŋgəʼ kyeŋ bɨrɨ nyɨ ɨgwɨ nən! Zɨ̀ bɨrɨ nyɨ ɨmbə̀ʼ ɨghəm nɨ mbə mbɨə bɔm ɨtu ɨsì bə̂d ɨ̀kə̀n Ŋwiə̀ mbe nɨ mbə mɨ̀mbǎʼ rəŋwe nyaʼa zwiirɨ.

⁴⁸Əne mbə̀ yɨ mɨ̀zərɨmbin fɔrɨ bə̂d nɨ ben ɨnû mbe nɨ mbə mɨ̀mbǎʼ rəŋwe nyaʼa ghɨ̌. Mbɨ nyaʼa zwiirɨ bə̂d ɨ̀kə̀n mbe, mbə sɨ bɔm ɨtu ɨsi mɨ̀mə̌d.

⁴⁹Ŋwìə̀ nyaʼa fə we i əne ghà ɨmbə̀ʼ ənû zɔ̂ ni, 'Mə bɨrɨ cha bə̂d ɨ̀kə̀n bə̀ chà bə̂d tom əsɨ mɨ̀mə̌d. Mbɨ bɨrɨ zwiirɨ mbɨ mɔʼɔ bə̀ nwèndɨ̀ tɨkyerɨ-ɨwu mbɨ cherə.'

⁵⁰Əne mbɨ bɨrɨ biirɨ ənəm ə bə̂d ɨ̀kə̀n Ŋwiə̀ mɨ̀jìm mbe nɨ mbɨ nyaʼa zwiirɨ tɨ ənɨ ɨsɨg nyaʼa kɔ tɨ əmbɨ ɨghəm bə̂d wɔ̂ rɨ̀nîn.

⁵¹Mbɨ bɨrɨ kɔ rɨ ənɨ ənəm ə Ebèl wò pè ənɨ ənəm ə Zèkariyà we nɨ mbɨ nyaʼa zwiirɨ əsàn ɨkwi ɨjə̀ŋ Ŋwiə̀ mbɨ əsɨ ɨwumnɨ. Ee, mə ghà ɨ nən ni mbɨ bɨrɨ biirɨ ənəm ze rɨ əmbɨ ɨghəm bə̂d wɔ̂ rɨ̀nîn.

⁵²“Ŋgəʼ kyeŋ bɨrɨ nyɨ ɨgwɨ nən, mbə̀nə məchwiə̀ rɨ̀kə̌! Zɨ̀ bɨrɨ nyɨ ɨmbə̀ʼ ɨghəm nɨ mbə fə nɨŋ əfiʼ tɨ ənɨ əsɨ nɨ tɨ̀ bə̂d nɨŋ ɨwe. Chəi mbə̀ nyɨ ɨŋga əsɨ ze, àyɨə mbə mbɨə kənə bə̂d mbe nɨə kə̀b nyɨ ni tɨ mbɨ nyɨ ə.”

⁵³Ənɨ Yeso nyaʼa nɔʼ rɨ əsɨ ze, məchwiə̀ rɨ̀kə̌ mbɨ mɨ̀Farisiî nyaʼa kɔ ghambɨ əməd kwàʼ rɨ̀kǎ. mbɨ nyaʼa bə̀ kɔ biirɨ mɨŋgam ɨ bɔ ɨmbə̀ʼ ɨnû nɔnɔʼ.

⁵⁴Ɨ mbɨə nyaʼə kə̀bə̀ ni wɨ̀ gha ənû ə mɔʼɔ ze nɨ bə̌, ɨmbə̀ʼ mbɨ gywɨ əməd.