Read Fɨso Fi Luk 13 Bible Online

Luk 13 - Fɨso Fi bible

Luk 13

¹Bə̂d mɔʼɔ mbɨə nyaʼə əŋgu ənɨ Yeso nyaʼə ghàmə̀. Mbɨ nyaʼa gha ɨ bɔ ɨmbə̀ʼ məGaliliî mbe nɨ Pailèt nyaʼa zwiirɨ ənɨ mbɨ nyaʼə nàʼ ɨghɨ ə̀fà əmbɨ ə Ŋwiə̀.

²Wɨ̀ nyaʼa wììrɨ̀ əmbɨ mɨ̀mə̌d ni, “Mbə wa kɔndɨ ni məGaliliî mbe wa nyaʼa ghɨ̀ ənû nɨ nyaʼa kaŋ bə əku chè məGaliliî mɨjìm, ɨchî nɨ mbɨ nyaʼa zwiirɨ mɨ̀mə̌d ə?

³Mə ghà ɨ nən ni, Chə̂! Mbɨ mɨ ton beŋ ə tə fîŋ, njɨ mbə̀n mɨjìm bɨrɨ bɨ kwɨ.

⁴Mbə bə̀ kɔn ni ye ɨmbə̀ʼ bə̂d mbe wum chɔ̀b famɨ nɨ nəb ɨkaŋ ze rɨ ə Silòàm nyaʼa su ɨgwɨ mɨ̀mə̌d zwiirɨ ə? Mbɨ wa nyaʼa gu ənû nɨ bə chè mbɨ bə̂d mɨjìm mbe nɨ nyaʼə chub ə Jèrusalèm ə?

⁵Mə ghà ɨ nən ni, Chə̂! Mbɨ mɨ ton beŋ ə tə fîŋ, njɨ mbə̀n mɨjìm bɨrɨ bɨ kwɨ.”

⁶Yeso nyaʼa ghà ənû ə mɨgɨ zɔ̂ ni, “Mbaŋə̀ mɔʼɔ nyaʼa kon əzed ə maŋgòrə̀ ɨŋga i mbeŋ vaìn. Wɨ̀ nyaʼə wò nèŋə̀ ni njɨ tə zə tɨtam ɨkaŋ, àyɨə chəi wɨ̀ nyaʼa zə ka àbei fɨ mɔʼ.

⁷Əne wɨ̀ nyaʼa ghà əmbɨ ə mbaŋə̀ ze nɨ nyaʼə nəŋgɨə mbeŋ vaìn ze ni, 'Zə, tɨ̀nîn yɨ ɨghəm ɨwu tad nɨ mɨə yeʼe kə̀bə̀ rɨtam ɨkaŋ əzed ə maŋgòrə̀ zɔ̂, àyɨə chəi mə zə ka àbei fɨtam mɔʼ. Wad ə si. Zɨ̀ kɨə jɨgə si zɔ̂ ətu ə̀kǒ ɨmbə̀ʼ ə ye ə?'

⁸Mbaŋə̀ ze nyaʼa wììrɨ̀ ɨ bɔ ni, 'Masà, saŋ zɨə chub əghəm əwu zɔ̂ ə fibɨ̀. Mə bɨrɨ toŋ ghab, zɨ̀ ɨnyɔrɨ əton.

⁹Zɨ mɨ kɔ rɨtam əghəm əwu, zɨə bɔ̀ŋ. Zɨə mɨ ton kɔ i, à sɨ wàd ə si.'”

¹⁰Yeso wɨə nyaʼə chwi ɨnû ɨŋga nəb ə̀kàtɨ̀ mɔʼɔ əni əkwɨ.

¹¹Əyi mɔʼɔ wɨə nyaʼə əŋgu nɨ əzwî rɨbɔ̀ŋ ə nyaʼa ɨŋga məd. Əzwî ze ə nyaʼa ghɨ̀ ni wɨ̀ wɔn ɨghəm ɨwu wum chɔ̀b famɨ. Wɨ̀ nyaʼa gumə, əne chəi ənɨ tɨ̀ wɨ̀ nyaʼa sem i ɨnyod.

¹²Ənɨ Yeso nyaʼa zə əməd, wɨ̀ nyaʼa tɔŋ əməd ghà ɨ bɔ ni, “Əyî, Ŋwìə̀ fə chɨ̀ əwɔn zɔ̂ rɨ ɨgwɨ ne.”

¹³Wɨ̀ nyaʼa ghà əne, zab mbi ɨbɔ ɨgwɨ məd. Àmei əwu əwən, ɨnyod əyi we nyaʼa sèmə̀, wɨ̀ yiirɨ ə Ŋwiə̀.

¹⁴Mbaŋə̀ ze nɨ nyaʼə chà nəb ə̀kàtɨ̀ ze nyaʼa sə ɨtəm ɨmbə̀ʼ ɨghəm nɨ Yeso nyaʼa vɨ̌ wə̀d əni əkwɨ. Əne wɨ̀ nyaʼa ghà əmbɨ ə bə̂d mbe ni, “Ɨni mbɨ əŋgu rɨ̀fuə nɨ tɨ̀ mbə fàʼ. Mbə̀ yeʼe ɨgwɨ ɨni mbe mbɨ vɨ əwən, kaʼ i ɨgwɨ əni ɨkwɨ.”

¹⁵Ə̀nùŋɨ̀sɨg nyaʼa wììrɨ̀ ɨ bɔ ni “Mbə yɨ ɨbekɨ bə̂d! Ɨmbə̀ʼ wə̀d mɔʼ mɔʼ rəbɔʼ nən wɨə zà əzi rɨkun kɨ̀ i jàkas rɨŋga ɨkam əni əkwɨ, wò chà ni zɨ̀ nɔ mɨnib ə?

¹⁶Əne mbə kə̀b ni tɨ mbɨ za ə əyi wɔ̂ əni əkwɨ ə? Məd yɨə wan tɨ ənɨ əghaŋ ə Abràham nɨ Satàn nyaʼa kod ənɨ ɨghəm ɨwu wum chɔ̀b famɨ.”

¹⁷Ənɨ wɨ̀ nyaʼa wiirɨ əne, ətu ə nyaʼa nìd bə̂d pə̀n məd mɨjìm. Əne bə̂d mbe mɨjìm nyaʼa ghaʼ ɨmbə̀ʼ ɨnû yiirɨ jìm mbe nɨ wɨ̀ nyaʼa ghɨ̌.

¹⁸Yeso nyaʼa biirɨ ni, “Ənû ɨfɔ̀n ə Ŋwiə̀ ə kɨ ɨghabɨ ə ye ə? Mə kɨə wo mɨg ənɨ ə ye ə?

¹⁹Ə zɨ ɨghabɨ ə sǎm ə̀wɔ̀mɨ nɨ mbaŋə̀ mɔʼɔ nyaʼa nɨŋ wò ŋwì ɨŋga i mbeŋ. Zɨə nyaʼa kwi jwɨ̀ ənɨ əzed. Tɨnən nyaʼa kod tə kàn ɨŋga tɨtəb rɨ məd.”

²⁰Yeso nyaʼa yì biirɨ ni, “Mə̀ kɨə wo mɨg ənû ɨfɔ̀n ə Ŋwiə̀ ənɨ ə ye ə?

²¹Ə zɨ ɨghabɨ ɨfuʼ we nɨə ghɨ̀ ni ŋgə̀ŋ kɔʼ, nɨ əyi nyaʼa nɨŋ tɔpɨ mbɨ əburɨ ə ŋgə̀ŋ ɨŋga ɨkaŋ kyeŋ ɨtad, pè ənɨ zɨ kɔʼ ɨjìm.”

²²Ənɨ Yeso nyaʼə wò ə Jèrusalèm, wɨ̀ nyaʼa chè ɨŋga ɨsɨ kyeŋ bə̀ chè ɨŋga mbɨ kwa. Wɨ̀ nyaʼə yènə̀ chwi ɨnû.

²³Wə̀d mɔʼɔ nyaʼa biirɨ ɨ bɔ ni, “Masà, à wa kɨ àmei bə̂d rɨpiî bɨrɨ jwɨ rəŋgəʼ ə?” Yeso nyaʼa wììrɨ̀ əmbɨ mɨ̀mə̌d ni,

²⁴“Mbə̀ kywɨ ənywɨ nyɨ ɨchû nəb we nɨ fandə, ɨmbə̀ʼ ɨghəm nɨ bə̂d mɨ̀nɔnɔʼ bɨrɨ kəb nyɨ, àyɨə chəi ənɨ tɨ̀ mbɨ nyɨ.

²⁵Ənɨ wə̀d nəb fə nɔʼ fə̀n i nəb, mbə bɨrɨ təmbɨ ɨsɨg kɔ goŋgɨ ɨchû nəb ghàə̀ ni, 'Masà, fiʼ nəb ɨ na.' Wɨ̀ bɨrɨ wiirɨ ɨ nən ni, 'Chəi mə̀ kyerɨ əsɨ ze nɨ mbə̀ nɔʼ rəŋgu!'

²⁶Əne mbə bɨrɨ kɔ gha ni, 'Tɨ̀ wɨə nyaʼə jɨgə bə̀ nɔə mbɨ ne. À wɨə nyaʼə bə̀ chwi ɨnû ɨtu ɨzib ɨsɨ mbe nɨ tɨ̀ nyaʼə chub əŋgu.'

²⁷Àyɨə wɨ̀ bɨrɨ gha ni, 'Mə ghà ɨ nən ni chəi mə̀ kyerɨ əsɨ ze nɨ mbə̀ nɔʼ rəŋgu. Əne mbə̀ nɔʼ ə rɨ ɨban num, mbə̀n bə̂d nɨə ghɨ̀ ɨnû rɨbɔ̀ŋ!'

²⁸Mbə bɨrɨ sɨə zə̀ʼə̀ kud əsɔŋ ənɨ mbə̀ zə ə Abràham, Aizìk mbɨ Jakɔ̂b mbɨ ə bə̂d ɨ̀kə̀n Ŋwiə̀ mɨ̀jìm ɨŋga ənû ɨfɔ̀n ə Ŋwiə̀, àyɨə mbɨ tin əwən ɨsɨg.

²⁹Bə̂d bɨrɨ yeʼe rɨ əbà ze nɨ nyùmə̀ ə jwɨ̀ə̀ mbɨ rɨ əbà ze nɨ nyùmə̀ nyɨ ɨkòb, mbɨ bɨrɨ yeʼe rɨ əbà ɨsɨg ze rɨ ətu mbɨ rɨ əba ɨsɨg ze rɨ əton, pè jɨg əchwɨ̂ ɨŋga ənû ɨfɔ̀n ə Ŋwiə̀.

³⁰Əne mbə̀ zə ni, mbɨ mɔʼɔ mbe nɨ sɨ nwìə̀ bɨrɨ yeʼ mbɨ rɨmbì, mbe nɨ yeʼ mbɨ rɨmbì sɨ yeʼ mbe nɨ sɨ nwìə̀.”

³¹À nyaʼa ənɨ ə nyùmə̀ we, mɨ̀Farisiî mɔʼɔ nyaʼa wò əsɨ Yeso pè ghà ɨ bɔ ni, “Nɔʼ əwe rɨ əgha wò əsɨ ə cherə, ɨmbə̀ʼ ɨghəm nɨ Herɔ̀d wɨə kə̀b zwiirɨ əwe.”

³²Wɨ̀ nyaʼa ghà əmbɨ mɨ̀mə̌d ni, “Mbə̀ wo ghà əmbɨ sèŋɨ we ni, 'Zə, mə bɨrɨ wo ɨmbì chɨ̀ ɨzwî rɨbɔ̀ŋ bə̀ vɨ̀ bə̂d rə̀chɔ̀ŋ fɔrɨ ɨsɔ, ɨni nɨə pe tad, mə màànɨ̀ mɨ ə̀fàʼì.'

³³Àyɨə mə berɨ kɔ wo rə̀chɔ̀ŋ fɔrɨ ɨsɔ fɔrɨ əni ze nɨ beenɨ, ɨmbə̀ʼ ɨghəm nɨ zɨ rɨka bɔ̀ŋ i ni wə̀d ɨ̀kə̀n Ŋwìə̀ kwɨ əsɨ ə cherə ze nɨ kaʼi Jèrusalèm.

³⁴“Wəi! Jèrusalèm, Jèrusalèm! À wɨə zwiirɨə bə̂d ɨ̀kə̀n Ŋwiə̀ bə̀ tumbɨə mbe nɨ Ŋwìə̀ tom əsɨ nən ənɨ əti! À kɨ ɨghəm səʼə nɨ mə̀ fə kweʼ kə̀b ni njɨ mə fetɨ mbe bɔn ɨchî nɨ ɨŋgɔŋgub ə fetɨ mbi bɔn əton ti rɨbabɨ̀, àyɨə chəi à ben nɨ mə̀ ghɨ əne!

³⁵Zə, mbɨ fə waʼ e nəb. Mə ghà ɨ ne ni chəi à bɨrɨ wɨrɨ zə əmɨ pè əni ze à gha ni, 'Ŋwìə̀ zɨ əbɔrəbɔd ɨgun ə wə̀d we nɨə yeʼe ənɨ ɨkum Ə̀nùŋɨ̀sɨg!'”