Read Fɨso Fi Luk 14 Bible Online

Luk 14 - Fɨso Fi bible

Luk 14

¹À nyaʼa əni əkwɨ mɨ̀Jû ə mɔʼɔ, Yeso nyaʼa wò jɨg ɨŋga nəb wə̀d kyeŋ mɨ̀Farisiî mɔʼɔ. Ənɨ wɨ̀ nyaʼa chub əŋgu, bə̂d mbɨə nyaʼa nèŋə̀ ni wɨ̀ wa bɨrɨ ghɨ ənû ə mɔʼɔ ə.

²Mbaŋə̀ mɔʼɔ zɨə nyaʼa ɨfě ɨ bɔ nɨ ɨbɔ məd mbɨ ɨwu məd nyaʼa mòrɨ.

³Yeso nyaʼa zə mbaŋə̀ ze, əne biirɨ əmbɨ məchwiə̀ rɨ̀kə̌ mbɨ mɨ̀Farisiî mbe ni, “Tɨkə ə wa chwiə ni mbɨ vɨ wə̀d əni əkwɨ kɨ̀ chə ə?”

⁴Mbɨ nyaʼa kəm rəziə. Əne wɨ̀ nyaʼa nɨŋ mbaŋə̀ ze vɨ̀ əməd, əne ghà ɨ bɔ ni wɨ̀ wò i.

⁵Ənɨ wɨ̀ nyaʼa ghɨ̀ əne, wɨ̀ nyaʼa ghà əmbɨ mɨ̀mə̌d ni, “À kɨə we rəbɔʼ nən nɨ wan məd kɨ̀ nɨ tɨkun əməd ə mɨ feŋ ɨŋga ɨbɨgɨ mɨnib əni əkwɨ nɨ chəi wɨ̀ bɨrɨ chɨ əwu əwən ə?”

⁶Chəi mbɨ nyaʼa berɨ ə̀wììrɨ̀ ənɨ ɨbiirɨ wɔ̂.

⁷Ənɨ Yeso nyaʼa zə ɨchî nɨ bə̂d nyaʼa kə̀b chub əsɨ ze nɨ mbɨ nuŋ əmbɨ ə bə̂d kyeŋ, wɨ̀ nyaʼa ghà ənû ə mɨgɨ zɔ̂ əmbɨ ə bə̂d mbe nɨ mbɨ nyaʼa won mɨ̀mə̌d ni,

⁸“Wə̀d mɔʼɔ mɨ tɔŋ əwe əchwɨ̂ ɨnamɨ, tɨrə̀ chub e əsɨ ze nɨ mbɨ nuŋ əmbɨ ə bə̂d kyeŋ, ɨghə̀m wɨ̀ kə̀ʼ bə̀ tɔŋ wə̀d cherə nɨ chè əwe.

⁹Əne wə̀d we nɨ kəʼ won mbən mbe mɨbe bɨrɨ yeʼe pè ghà ɨ ne ni, 'Naʼ rɨmbin əmbɨ wə̀d wɔ̂.' Ətu ə bɨrɨ nid ɨ ne, əne à nɔ̀ʼ wò chub ɨgun ətən ə kwa.

¹⁰Àyɨə ənɨ mbɨ tɔŋ əwe əsɨ ə mɔʼɔ, ndə̀ wo chub ɨgun ətən ə kwa, ɨmbə̀ʼ ənɨ wə̀d we nɨ tɔŋ əwe yeʼe, wɨ̀ bɨrɨ pe gha ɨ ne ni, 'Mɨ sə̀ʼ, nɔʼ wò ɨkaŋ ə yɨə.' Ənû zɔ̂ ə bɨrɨ naʼ ɨwumnɨ ɨ ne ɨfě bə̂d mɨ̀jìm mbe nɨ wɨ̀ wonɨ,

¹¹ɨmbə̀ʼ ɨghəm nɨ wə̀d jìm we nɨ nɔ i ɨnyod, Ŋwìə̀ bɨrɨ swi əməd, we nɨ swi i ɨnyod, Ŋwìə̀ bɨrɨ nɔ əməd.”

¹²Yeso nyaʼa bə̀ ghà əmbɨ wə̀d we nɨ kəʼ tɔŋ əməd ni, “Ənɨ à tekɨ ɨghɨjɨg ɨ jə bə̂d əziə kɨ̀ ɨzimɨ, tɨrə̀ won e mbe mɨ̀sə̀ʼ, kɨ̀ mbe bɔŋgɔb, kɨ̀ e ɨnəbɨ, kɨ̀ bə̂d mbɔ̂n. À mɨ won tɨkwɨrɨ bə̂d tɔ̂, mbɨ bɨrɨ bɨ tɔŋ əwe, əne wì ənû ze nɨ à ghɨ̌.

¹³Àyɨə ənɨ à kaʼ əchwɨ̂, won bə̂d ɨkwaŋ, won mbe nɨ ɨbɔ nəŋɨ, won mbe nɨə tèʼ ɨwu, bə̀ won mɨfɨgɨ̀.

¹⁴À mɨ ghɨ̀ əne, Ŋwìə̀ bɨrɨ zɨ əbɔrəbɔd ɨgwɨ ne, ɨmbə̀ʼ ɨghəm nɨ chəi ənɨ tɨ mbɨ wì ənû ze nɨ à ghɨ̌. Ŋwìə̀ bɨrɨ wì ənû ze nɨ à ghɨ̌ ənɨ ə nyùmə̀ we nɨ bə̂d mbe nɨə ghɨ̀ ɨnû nɨ kuʼnɨ bɨrɨ zwemə.”

¹⁵Ənɨ mbaŋə̀ mɔʼɔ rəbɔʼ mbe nɨ nyaʼa chubɨ jɨg mbɨ məd, nyaʼa zu ənû zɔ̂, wɨ̀ nyaʼa ghà ɨ bɔ ni, “Ŋwìə̀ zɨ əbɔrəbɔd ɨgun ə wə̀d we nɨ bɨrɨ jɨg əchwɨ̂ ze ɨŋga ənû ɨfɔ̀n əməd!”

¹⁶Ənɨ wɨ̀ nyaʼa gha əne, Yeso nyaʼa ghà ɨ bɔ ni, “Wə̀d mɔʼɔ nyaʼa kàʼ əchwɨ̂ ə kyeŋ ə mɔʼɔ, won bə̂d mɨ̀nɔnɔʼ.

¹⁷Nyùmə̀ nɨ jɨg əchwɨ̂ ze ə nyaʼa kùʼ, əne wɨ̀ nyaʼa tom i wə̀d ə̀fàʼì ni wɨ̀ wo ghà əmbɨ ə bə̂d mbe nɨ wɨ̀ nyaʼa won ni, 'Mbə̀ yeʼe, ɨghɨjìm fə sɨ i ə si.'

¹⁸Àyɨə mɨ̀mə̌d mbe mɨjìm nyaʼa kɔ naʼ ɨŋgam ɨmbə̀ʼ əton nɨ chəi mbɨ bɨrɨ wò. Wɨ̀ rɨtu nyaʼa ghà ɨ bɔ ni, 'Mə fə zon mbeŋ fi, əne mə berɨ wo zə mbeŋ ze. Mə buʼ ɨbɔ ɨ ne ni chəi mə̀ bɨrɨ yeʼe.'

¹⁹Wɨ cherə nyaʼa ghà ni, 'Mə fə zon mbɨ̀rɨkun wum. Mə yɨ əni wo zweʼrɨ. Mə buʼ ɨbɔ ɨ ne ni chəi mə̀ bɨrɨ yeʼe.'

²⁰Wɨ cherə nyaʼa ghà ni, 'Mə cherə namə, əne chəi ɨchî ənɨ tɨ̀ mə yeʼe.'

²¹“Wə̀d ə̀fàʼì we nyaʼa wò ghà ɨnû jìm əmbɨ i mbǎʼ ə̀fàʼì. Mbǎʼ ə̀fàʼì we nyaʼa zu əne, sə ɨtəm, əne ghà əmbɨ i wə̀d ə̀fàʼì we ni, 'Zambɨ jwɨ̀ wò ɨtu ɨzib bə̀ wò ɨgun mɨnə̂njɨ̀ mbe rɨŋga əbeŋ, tɔŋ bə̂d ɨkwaŋ, tɔŋ bə̂d mbe nɨ ɨbɔ nəŋɨ, tɔŋ mɨfɨgɨ̀ bə̀ tɔŋ bə̂d mbe nɨə tèʼ ɨwu.'

²²Wə̀d ə̀fàʼì we nyaʼa ghɨ̀ ənû ze, əne wò ghà ɨ bɔ ni, 'Masà, ənû ze nɨ à ghǎ, mə fə ghɨ̀, àyɨə tɨmbin ə zɨə kɨrɨ i.'

²³Mbǎʼ ə̀fàʼì we nyaʼa ghà ɨ bɔ ni, 'Jwɨə wò ɨgun mɨnə̂njɨ̀ kyeŋ bə̀ wò ɨgun mbe nɨə wò ə mbeŋ, əne nyèŋ bə̂d ni mbɨ yeʼe ɨmbə̀ʼ mɨ nəb swi ə.

²⁴Mə ghà ɨ ne ni, chəi wə̀d mɔʼɔ rəbɔʼ mbe nɨ mə kəʼ won bɨrɨ zweʼrɨ ɨghɨjɨg mbe nɨ mə̀ tekɨ!'”

²⁵À nyaʼa ənɨ ə nyùmə̀ mɔʼɔ, mɨnɔ̂n bə̂d nɨ nyaʼa kwàʼ mbɨ kyeŋ mbɨə nyaʼə beenɨ əbɔʼ Yeso. Əne wɨ̀ nyaʼa bèŋ ghà əmbɨ mɨ̀mə̌d ni,

²⁶“Wə̀d mɔʼɔ we nɨ yeʼe əsɨ num nɨ chəi wɨ̀ ghaʼ əmɨ chè i mbǎʼ mbɨ i nɨŋ, chè i ɨwi mbɨ mbi bɔn, chè mbi bɔŋgɔb mbɨ ti njàbɨ, bə̀ chè ka àbei i ɨ̀tènɨ̀, rɨka kùʼi nɨ yeʼ mɨ ə̀mə̀ə̀nɨ̀-ɨnû.

²⁷Wə̀d mɔʼɔ we nɨ chəi wɨ̀ beʼ e əzed ə baʼnɨ beenɨ əbɔʼ num, rɨka kùʼi nɨ yeʼ mɨ ə̀mə̀ə̀nɨ̀-ɨnû.

²⁸“À kɨə we rəbɔʼ nən nɨə kə̀b bɔm nəb ɨkaŋ, nɨ chəi wɨ̀ be chub ə si kwàʼnɨ̀ ɨnun ɨkab we nɨ wɨ̀ berɨ, ɨ zə ni ɨkab we ə kùʼ nɨ maanɨ nəb ze əŋgu ə?

²⁹Njɨ ənɨ wɨ̀ fə bɔm əchɨ, chəi ənɨ nɨ tɨ̀ wɨ̀ maanɨ nəb ze. Əne bə̂d mbe nɨ zə bɨrɨ sɨə baʼrɨ əməd,

³⁰ghàə̀ ni, 'Mbaŋə̀ zɔ̂ nyaʼə kɔ bɔm nəb, əne chəi ənɨ nɨ tɨ̀ wɨ̀ maanɨ.'

³¹Kɨ̀ à kɨ ɨfɔ̂n wi nɨə wò maʼ bid mbɨ ɨfɔ̀n cherə, nɨ chəi wɨ̀ be chub ə si kwàʼnɨ̀ ni tə we tɨ̀ rə nɨŋ mɨ̀sɔgyɨ̀ chuʼ wum baŋ we nɨ berɨ mɨ̀sɔgyɨ̀ chuʼ ɨwum be ə?

³²À mɨ yeʼ nɨ wɨ̀ zə ni chəi ənɨ tɨ̀ rə baŋ əməd, wɨ̀ bɨrɨ tom bə̂d ənɨ wɨ kɨrɨ i əsa əgha ni mbə̀ maanɨ ənû ze, chub ənɨ əbɔrəbɔd.

³³Əne bə̂, wə̀d mɔʼɔ we rəbɔʼ nən nɨ chəi wɨ̀ ton ɨghɨjìm mbe nɨ wɨ̀ berɨ, rɨka kùʼi nɨ yeʼ mɨ ə̀mə̀ə̀nɨ̀-ɨnû.”

³⁴“Fɨ̀ŋgwaŋ ə bɔ̀ŋ, àyɨə fɨ mɨ fə tu i, mbɨ wɨrɨ ghɨ ye mbɨ fɨwən ni fɨ wɨrɨ nə̀m ə?

³⁵Chəi fɨ wɨrɨ bɔ̀ŋ nɨ tɨ̀ mbɨ zɨ̀ ə si, kɨ̀ ənɨ nɨ tɨ̀ mbɨ bèŋ ənɨ ɨnyɔrɨ. Fɨ bɔ̀ŋ àmei ni mbɨ waʼ. Wə̀d we nɨ tɨ̀ wɨ̀ zu ənû, wɨ̀ zu!”