Read Fɨso Fi Luk 15 Bible Online

Luk 15 - Fɨso Fi bible

Luk 15

¹À nyaʼa əni ə mɔʼɔ, məfetɨ mɨ̀tagsɨ̀ nɔnɔʼ mbɨ ə bə̂d nɨə ghɨ̀ ɨnû rɨbɔ̀ŋ nyaʼa wò fetɨ ɨban ə Yeso ɨmbə̀ʼ zwetɨ ənû ze nɨ wɨ̀ nyaʼə ghàə̀.

²Mɨ̀Farisiî mbɨ məchwiə̀ rɨ̀kə̌ nyaʼa zə əne kɔ zuʼnɨ ghàə̀ ni, “Wə̀d wɔ̂ wɨə nɨŋə bə̂d mbe nɨə ghɨ̀ ɨnû rɨbɔ̀ŋ bə̀ jɨgə mbɨ mɨ̀mə̌d.”

³Ənɨ Yeso nyaʼa zu əne, wɨ̀ nyaʼa ghà ənû ə mɨgɨ zɔ̂ əmbɨ mɨ̀mə̌d ni:

⁴“Wə̀d mɔʼɔ rəbɔʼ nən mɨ berɨ njɨ̀g ɨkɨ fibɨ̀, zɨ fibɨ̀ nim, ka wɨ̀ wa bɨrɨ saŋ i tə̂ ɨwum ə̀bùə chɔ̀b ə̀bùə ɨŋga ɨbad rɨkwàʼi wò kə̀b zɨ fibɨ̀ ze nɨ nimɨ, pè ənɨ wɨ̀ zə ə?

⁵Wɨ̀ nɨə zə̌, wɨ̀ bɨrɨ gywɨ boŋ əmbə̀ʼ, yènə̀ ghaʼə.

⁶Ənɨ wɨ̀ pe ə nəb, wɨ̀ bɨrɨ tɔŋ mbi mɨ̀sə̀ʼ mbɨ ə bə̂d rɨ ɨban əkwɨ, ghà əmbɨ mɨ̀mə̌d ni, 'Mbə̀ yeʼe tɨ̀ ghaʼ ɨchî nɨ mə fə zə mɨ njɨ̀g ze nɨ kə̀ʼ nim.'

⁷Mə ghà ɨ nən ni, à yɨ əndəŋ əndəŋ ni ɨghaʼi bɨrɨ nɔʼ ɨkaŋ ənɨ wə̀d ɨnû rɨbɔ̀ŋ fibɨ̀ beŋ i fîŋ chè ɨchî nɨ wɨ bɨrɨ nɔʼ ɨgwɨ ə bə̂d ɨwum ə̀bùə chɔ̀b ə̀bùə nɨə ghɨ̀ ɨnû nɨ kuʼnɨ nɨ chəi mbɨ berɨ nɨ beŋ tə fîŋ.

⁸“Kɨ̀ à kɨ əyi wi nɨ berɨ ɨkab chuʼ wum, [9] nɨ wɨ fibɨ̀ nim i, nɨ chəi wɨ̀ bɨrɨ che ənam, zə̀ nəb jeŋgɨ kə̀b pè ənɨ wɨ̀ zə ə?

⁹Ənɨ wɨ̀ zə, wɨ̀ bɨrɨ tɔŋ mbi mɨ̀sə̀ʼ mbɨ ə bə̂d rɨ ɨban əkwɨ ghà ni, 'Mbə̀ yeʼe tɨ̀ ghaʼ ɨchî nɨ mə fə zə ɨkab we nɨ kəʼ nim.'

¹⁰Mə ghà ɨ nən ni, à yɨ əndəŋ əndəŋ ni mbɨ̀aŋgɨrə̀ mbɨə ghaʼ ənɨ wə̀d fibɨ̀ tɨ̀ əbɔʼ mbe nɨə ghɨ̀ ɨnû rɨbɔ̀ŋ beŋ i fîŋ.”

¹¹Yeso nyaʼa wò ɨmbì ghà ni, “Mbaŋə̀ mɔʼɔ zɨə nyaʼa əŋgu nɨ berɨ mbi bɔn mbaŋə̀ mɨ̀be.

¹²Wɨ kwa rəbɔʼ mɨ̀mə̌d nyaʼa ghà əmbɨ i mbǎʼ ni, 'Mɨ mbǎʼ, ghapɨ mbe ɨghɨ naʼ mɨ əba.' Mbǎʼ mɨ̀mə̌d nyaʼa ghàpɨ̀ mbi ɨghɨ əmbɨ ə bɔn məd mbe mɨbe.

¹³Ənɨ ɨni mɔʼɔ nyaʼa chě, wan mbaŋə̀ kwa we nyaʼa fèndɨ̀ ɨghɨjìm mbe nɨ mbǎʼ məd nyaʼa naʼ ɨ bɔ, nɨŋ ɨkab we wò ɨŋga əbeŋ ə mɔʼɔ əsa əgha. Ənɨ wɨ̀ nyaʼa pè əŋgu, wɨ̀ nyaʼa chə̀kɨ̀ ɨkab we ɨchî rɨbɔ̀ŋ.

¹⁴Ənɨ ɨkab we nyaʼa mi i, njì kǎ kǎ nyaʼa nyɨ ɨŋga əbeŋ ze, əne wɨ̀ nyaʼa kɔ zə ŋgəʼ.

¹⁵Əne wɨ̀ nyaʼa wo nyɨ ə̀fàʼì əton wə̀d mɔʼɔ ɨŋga əbeŋ ze. Wə̀d we nyaʼa chà əməd ɨŋga i mbeŋ ni wɨ̀ wo jə mɨ̀kuŋə.

¹⁶Wɨ̀ nyaʼa kàŋ kə̀b ni njɨ tə jɨg tɨjɨg mɨ̀kuŋə mbe, àyɨə chəi wə̀d nyaʼa naʼ əghɨ ɨ bɔ ni wɨ̀ jɨg.

¹⁷Ənɨ ɨwe məd nyaʼa wɨrɨ bə̀ndɨ̀ yeʼe, wɨ̀ nyaʼa ghà ɨŋga i fîŋ ni, 'Bə̂d ə̀fàʼì mɨjìm mbe nɨ mɨ mbǎʼ nɨŋɨ mbɨə jɨgə korə ə̀bùʼ ə bùʼ, àyɨə mɔ̌ wɔ̂ əgha kwɨə njì!

¹⁸Mə bɨrɨ nɔʼ wo əsɨ mɨ mbǎʼ pè ghà ɨ bɔ ni, Mɨ mbǎʼ, mə fə ghɨ̀ ənû rɨbɔ̀ŋ əmbɨ ə Ŋwiə̀ bə̀ ghɨ̀ ɨ ne.

¹⁹Chəi mə wɨrɨ kùʼ ni à tɔŋ əmɨ ni mə yɨ e wan. Sɨ nɨŋ əmɨ ɨghabɨ wə̀d ə̀fàʼì mɔʼɔ rəbɔʼ mbe nɨ à nɨŋɨ.'

²⁰Wɨ̀ nyaʼa kɔndɨ əne, nɔ̀ʼ kɔ wo əsɨ i mbǎʼ. “Ənɨ wɨ̀ nyaʼa kɨrɨ əsa əgha, mbǎʼ məd nyaʼa zə əməd, kə̀nə̀, əne nòrə̀ wò gywɨ̀ əməd yimɨ, sɔɔrɨ ndə̀ʼ rɨ məd.

²¹Wan mbaŋə̀ we nyaʼa ghà ɨ bɔ ni, 'Mɨ mbǎʼ, mə fə ghɨ ənû rɨbɔ̀ŋ əmbɨ ə Ŋwiə̀ bə̀ ghɨ̀ ɨ ne. Chəi mə wɨrɨ kùʼ ni à tɔŋ əmɨ ni mə yɨ e wan.'

²²Wɨ̀ nyaʼa ghà əne, àyɨə mbǎʼ məd nyaʼa ghà əmbɨ mbi bə̂d ə̀fàʼì ni, 'Mbə̀ zambɨ wò nɨŋ ngywɨ̌ ze nɨ bɔ̀ŋ chè tɨ rɨjìm, yeʼe zɨ̀ ɨbom ɨ bɔ, zɨ ə karə ə fi əbɔ məd bə̀ zɨ̀ ɨtabɨ ənɨ ɨwu məd.

²³Mbə̀ nɨŋ rɨkun ze nɨ mbɨ jə zɨ̀ jeŋgɨ faŋ yeʼe zwiirɨ, tɨ̀ kud ghɨ̀ ɨghaʼi;

²⁴ɨmbə̀ʼ ɨghəm nɨ mɨ wan wɔ̂ nyaʼa kwɨ, àyɨə tɨ̀nîn ɨ wɨ ɨkǎ, wɨ̀ nyaʼa nim, àyɨə tɨ̀nîn mə fə zə əməd.' Mbɨ nyaʼa ghɨ̀ əne kɔ jɨgə ghaʼə.

²⁵“Ənɨ mbɨ nyaʼə ghɨ̀ əne, wan mbaŋə̀ kyeŋ we wɨə nyaʼa ə mbeŋ. Ənɨ wɨ̀ nyaʼə yeʼe sɨə tindɨ ɨban ə nəb, wɨ̀ nyaʼa zu ənɨ mbɨə kwerə mɨkyî binə.

²⁶Əne wɨ̀ nyaʼa tɔŋ wə̀d ə̀fàʼì mɔʼɔ rəbɔʼ bə̂d ə̀fàʼì mbe biirɨ ɨ bɔ ni, 'À kɨ ənû ə ye ə?'

²⁷Wə̀d ə̀fàʼì we nyaʼa wììrɨ̀ ɨ bɔ ni, 'We aŋgɔb fə yeʼe. Əne e mbǎʼ fə zwiirɨ rɨkun ze nɨ mbɨ jə zɨ̀ jeŋgɨ faŋ ɨmbə̀ʼ ɨghəm nɨ wɨ̀ bə̀ndɨ̀ yeʼe ɨchî chɔ̀m.'

²⁸Aŋgɔb kyeŋ we nyaʼa sə ɨtəm, əne ton ni chəi tə bɨrɨ nyɨ ə nəb. Mbǎʼ məd nyaʼa jwɨ̀ wò buʼ ɨbɔ ɨ bɔ,

²⁹àyɨə wɨ̀ nyaʼa wììrɨ̀ əmbɨ i mbǎʼ ni, 'Zə, ɨghəm ɨwu mbɔ̂ jìm mə fə fàʼ ɨ ne, chəi mə kweʼ ghɨ̀ rɨ̀zuə̀ ɨ ne, àyɨə chəi à kweʼ nàʼ wan gywɨ mɔʼɔ ɨ num ni mə̀ ghɨ ɨghaʼi mbɨ mbɨ mɨ̀sə̀ʼ.

³⁰Àyɨə ənɨ wan wɔ̂ ɨ ne yeʼe, nɨ fə kud mbe ɨghɨ mbɨ ɨ̀kùnɨ̀, à zwiirɨ rɨkun ze nɨ mbɨ jə zɨ̀ jeŋgɨ faŋ ɨ bɔ!'

³¹Mbǎʼ məd nyaʼa wììrɨ̀ ni, 'Wân, àwɔ̀ wɨ e mbɨ num ɨghəm jìm. Ɨghɨjìm mbe nɨ mə̀ berɨ yɨ mbe.

³²Àyɨə zɨə nyaʼa kùʼ ni tɨ̀ ghɨ ɨghaʼi, ɨmbə̀ʼ ɨghəm nɨ we aŋgɔb wɔ̂ nyaʼa kwɨ, àyɨə tɨ̀nîn ɨ wɨ ɨkǎ, wɨ̀ nyaʼa nim, àyɨə tɨ̀nîn mə fə zə əməd.'”