Read Fɨso Fi Luk 17 Bible Online

Luk 17 - Fɨso Fi bible

Luk 17

¹Yeso nyaʼa ghà əmbɨ mbi mə̀mə̀ə̀nɨ̀-ɨnû ni, “Ɨnû mbe nɨə ghɨ̀ ni bə̂d ghɨ ɨnû rɨbɔ̀ŋ berɨ yeʼe, àyɨə ŋgəʼ bɨrɨ nyɨ ɨgun ə wə̀d we nɨ ɨnû mbe chè ənjìm məd yeʼe!

²Zɨə bɨrɨ bɔ̀ŋ ni mbɨ tiŋ ɨti ŋgə̀ŋ ədɔʼ ɨ bɔ wò màʼ əməd ɨŋga rɨ̀bàà, chè ɨchî nɨ tɨ mbɨ sàŋ ni wɨ̀ ghɨ̀ wan kwa mɔʼɔ rəbɔʼ mbɔ̂ ghɨ ənû rɨbɔ̀ŋ.

³Mbə̀ we əwən! “We aŋgɔb mɨ ghɨ̀ ənû rɨbɔ̀ŋ, à ghàm əbɔʼ məd. Wɨ̀ mɨ bèŋ i fîŋ, à waʼ ɨnû rɨbɔ̀ŋ məd.

⁴Wɨ̀ mɨ ghɨ̀ ənû rɨbɔ̀ŋ ənɨ ə ne ɨghəm sambe ɨgwɨ əni, bə̀ yeʼe ghà ɨ ne ɨghəm sambe ni, 'Mə fə beŋ mɨ fîŋ, waʼ mbɨ ɨnû rɨbɔ̀ŋ,' à berɨ waʼ ɨnû rɨbɔ̀ŋ məd.”

⁵Bə̂d tom Ə̀nùŋɨ̀sɨg nyaʼa ghà ɨ bɔ ni, “Ghɨ ni à ɨbenɨ kaanə!”

⁶Ə̀nùŋɨ̀sɨg nyaʼa wììrɨ̀ əmbɨ mɨ̀mə̌d ni, “Mbə mɨ kəʼ berɨ ɨbenɨ nɨ kə ɨghabɨ sǎm ə̀wɔ̀mɨ, njɨ mbə mbe tɨ mbə̀ ghà əmbɨ əzed ə sikamò zɔ̂ ni, 'Chɔʼ rɨ ə si wò kon e ɨŋga rɨ̀bàà,' əne zɨə bɨrɨ zuunɨ əwən.”

⁷“Tɨ̀ wə̀d mɔʼɔ rəbɔʼ nən, nɨ berɨ i wə̀d ə̀fàʼì nɨə niʼ ɨbən kɨ̀ nɨə nə̀ŋgɨ ə njɨ̀g, nɨ bɨrɨ gha ɨ bɔ ənɨ wɨ bə̀ndɨ̀ rɨ ə mbeŋ ni, 'Zambɨ yeʼe jɨg ə'?

⁸Ka wɨ̀ wa bɨrɨ ghà i ɨ bɔ yeʼ ni, 'Tekɨ mbɨ ɨghɨjɨg rɨ ɨkwirɨ, bə̀ tekɨ e ɨnyod yeʼe nàʼ ɨghɨjɨg mbe ɨ num pè ənɨ mə fə jɨg bə̀ nɔ. Mə nɨə fə jɨg bə nɔ, à sɨ bə̀ wò jɨg e bə̀ nɔ e ə?'

⁹Ɨ wɨə wa nàʼə̀ məben-əwe əmbɨ wə̀d ə̀fàʼì we ɨmbə̀ʼ ɨghəm nɨ wɨ̀ ghɨ ənû ze nɨ wɨ̀ gha ɨ bɔ ə?

¹⁰À yɨ əndəŋ əndəŋ mbɨ nən. Ənɨ mbə̀ fə ghɨ̀ ɨnû jìm mbe nɨ mbɨ gha ɨ nən, mbə̀ gha ni, 'Tɨ̀ yɨ àmei bə̂d ə̀fàʼì. Əne tɨ̀ fə ghɨ̀ yeʼ ɨnû mbe nɨ tɨ̀ berɨ nɨ ghɨ̀.'”

¹¹Ənɨ Yeso nyaʼə wò ə Jèrusalèm, wɨ̀ nyaʼa chè ɨŋga mɨgharə̀ Sàmàriyà mbɨ Galiliî.

¹²Ənɨ wɨ̀ nyaʼa wò nyɨ ɨŋga əsɨ ə mɔʼɔ, mbaŋə̀ wum nɨ nyaʼə wɔ̀n əpabɨ nyaʼa wò kumnɨ əməd. Mbɨ nyaʼa təm əsa əgha

¹³kyeŋ rɨ̀kǎ ghà ni, “Yeso, masà, diirɨ əwa.”

¹⁴Ənɨ Yeso nyaʼa zə mɨ̀mə̌d, wɨ̀ nyaʼa ghà əmbɨ mɨ̀mə̌d ni, “Mbə̀ wo chwi ə ɨnyod əmbɨ ə bə̂d mbàn Ŋwìə̀.” Ənɨ mbɨ nyaʼə wòə̀, əpabɨ ze nɨ nyaʼa ɨgun mɨ̀mə̌d ə nyaʼa mì.

¹⁵Ənɨ wɨ̀ fibɨ̀ rəbɔʼ mɨ̀mə̌d nyaʼa zə ni i ɨnyod fə zeŋ i, wɨ̀ nyaʼa bə̀ndɨ̀ wò rəbɔʼ, yènə̀ yiirɨ ə Ŋwiə̀ ənɨ gɨ̂ nɨ kǎ

¹⁶pè gù ɨban ɨwu Yeso, nàʼ məben-əwe ɨ bɔ. Mbaŋə̀ ze yɨə nyaʼə wə̀d rɨ ə Sàmàriyà.

¹⁷Yeso nyaʼa biirɨ ni, “Ɨmbə̀ʼ à yɨə mbaŋə̀ wum nɨ mə kəʼ ghɨ̀ əpabɨ ə mì rɨ ɨgwɨ mɨ̀mə̌d ə? Mbɨ əbuə mbi ə?

¹⁸Chəi wɨ mɔʼɔ nɨ bə̀ndɨ̀ yeʼe yiirɨ ə Ŋwiə̀ chè rɨ ənɨ wə̀d rɨ̀sɔ̀ʼɔ̀ wɔ̂ ə?”

¹⁹Wɨ̀ nyaʼa ghɨ̀ əne ghà əmbɨ ə mbaŋə̀ ze ni, “Nɔʼ rətiə, wò e. E ɨbenɨ fə ghɨ̀ ni à bɔtɨ e.”

²⁰Mɨ̀Farisiî mɔʼɔ nyaʼa biirɨ ə Yeso ɨmbə̀ʼ ə nyùmə̀ we nɨ ənû ɨfɔ̀n ə Ŋwiə̀ ə bɨrɨ yeʼe. Wɨ̀ nyaʼa wììrɨ̀ əmbɨ mɨ̀mə̌d ni, “Chəi ənû ɨfɔ̀n ə Ŋwiə̀ ə bɨrɨ yeʼe mbɨ ɨnweenɨ nɨ bə̂d bɨrɨ zə.

²¹Chəi wə̀d mɔʼɔ bɨrɨ gha ni, 'Zə, əzɔ̂ əgha!' kɨ̀ ni, 'Ə zɨ ə yɨə!' ɨmbə̀ʼ ɨghəm nɨ ənû ɨfɔ̀n ə Ŋwiə̀ ə fə sɨ i əkaʼ nən.”

²²Yeso nyaʼa yì ghà əmbɨ mbi mə̀mə̀ə̀nɨ̀-ɨnû ni, “Nyùmə̀ wɨə yeʼe nɨ mbə bɨrɨ kəb chub ka àbei əni ə mɔʼ mbɨ Wan Wə̀d, àyɨə chəi mbə bɨrɨ zə əmɨ ənɨ ə nyùmə̀ we.

²³Bə̂d bɨrɨ yeʼe pè ghà ɨ nən ni, 'Mbə̀ neŋ ə yɨə!' kɨ ni, 'Mbə̀ neŋ əgha!' Tɨ mbə wò ə. Tɨ mbə̀ bɨ beenɨ ə əbɔʼ mɨ̀mə̌d.

²⁴Ɨchî nɨ ɨbi mbə̀ŋ ə ŋwàŋə̀ teə rɨ əba ɨkaŋ ə fibɨ̀ wò pè ənɨ əzɨ cherə, yɨ bə̀ ɨchî nɨ Wan Wə̀d bɨrɨ wɨrɨ yeʼe.

²⁵Àyɨə wɨ̀ bɨrɨ be zə ŋgəʼ ənɨ ɨnû nɔnɔʼ, ɨghəm bə̂d wɔ̂ ton əməd.

²⁶“Ɨchî nɨ zɨə nyaʼa ənɨ ə nyùmə̀ Noà, yɨə bə̀ ɨchî nɨ zɨə bɨrɨ yeʼ ənɨ Wan Wə̀d bɨrɨ wɨrɨ yeʼe.

²⁷Wə̀d jìm wɨə nyaʼə jɨgə bə̀ nɔə. Ɨ mbɨə nyaʼə namə bə̀ namnə mbə bɔn. Ɨ mbɨə nyaʼə ghɨ̀ əne wò pè əni ze nɨ Noà nyaʼa nyɨ ɨŋga əbaŋ ɨgyɨ̀ ze nɨ Ŋwìə̀ nyaʼa gha ɨ bɔ ni wɨ̀ tekɨ. Mɨnib nyaʼa kubrɨ ɨsɨ, zwiirɨ mɨ̀mə̌d mɨjìm.

²⁸“Àyɨə bə̀ ɨchî nɨ zɨə nyaʼa ənɨ ə nyùmə̀ Lɔ̂t. Ɨ mbɨə nyaʼə jɨgə bə̀ nɔə. Ɨ mbɨə nyaʼə zon ɨghɨ bə̀ fendɨ ɨghɨ. Ɨ mbɨə nyaʼə kon ɨghɨ bə̀ bɔm ə nəb,

²⁹àyɨə ɨgwɨ əni ze nɨ Lɔ̂t nyaʼa jwɨ rɨ ə Sodòm, ɨwid mbɨ sɔlfò nyaʼa nɔʼ rɨkaŋ zwiirɨ mɨ̀mə̌d mɨjìm.

³⁰Àyɨə bə̀ ɨchî nɨ ɨnû bɨrɨ ghɨ̀ əni ze nɨ Wan Wə̀d wɨrɨ yeʼe.

³¹“Əni ze, tɨ wə̀d we nɨ yeʼ ɨdom nəb swiʼi ɨ wo nɨŋ ɨghɨ mbe nɨ yeʼ ɨŋga nəb məd. Əne bə̌, tɨ wə̀d we nɨ yeʼ ə mbeŋ wɨrɨ bə̀ndɨ̀ i rəbɔʼɔ.

³²Mbə̀ kɔndɨ ənû ze nɨ nyaʼa ghɨ ənɨ ɨwi Lɔ̂t!

³³Wə̀d mɔʼɔ we nɨə kə̀b nuŋ i ɨ̀tènɨ̀, bɨrɨ sam ɨ̀tènɨ̀ we, àyɨə we nɨ sam i ɨ̀tènɨ̀ bɨrɨ wɨrɨ jɨg ɨ̀tènɨ̀ we.

³⁴Mə ghà ɨ nən ni ɨzimɨ we, bə̂d mɨbe bɨrɨ yeʼ ɨgun əbàʼ ə mɔʼ, mbɨ nɨŋ wɨ fibɨ̀ sàŋ wɨ fibɨ̀.

³⁵Məyi mɨbe bɨrɨ yeʼə wɔ̀ʼ ə ŋgə̀ŋ ɨnɔ̂n, mbɨ nɨŋ wɨ fibɨ̀ sàŋ wɨ fibɨ̀.[

³⁶Mbaŋə̀ rɨ̀be bɨrɨ yeʼ ə mbeŋ, mbɨ nɨŋ wɨ fibɨ̀ sàŋ wɨ fibɨ̀.”]

³⁷Mə̀mə̀ə̀nɨ̀-ɨnû mbe nyaʼa biirɨ ɨ bɔ ni, “Ə̀nùŋɨ̀sɨg, ənû zɔ̂ ə kɨ wo ghɨ ə yi ə?” Wɨ̀ nyaʼa wììrɨ̀ əmbɨ mɨ̀mə̌d ni, “Əsɨ ze nɨ əvɨ ə nyam ə yeʼ əŋgu, mɨzam bɨrɨ wo fetɨ əŋgu.”