Read Fɨso Fi Luk 22 Bible Online

Luk 22 - Fɨso Fi bible

Luk 22

¹Ənɨ Əchwɨ̂ ə Che-ɨgun ə nyaʼa fə tiinɨ, nɨ mbɨə tɔŋ ənɨ əchwɨ̂ nɨ mbɨə jɨgə ŋgə̀ŋ nɨ chəi ɨfuʼ we nɨə ghɨ̀ ni ŋgə̀ŋ kɔʼ ɨŋga,

²bə̂d kyeŋ mbe rɨ ə mbàn Ŋwìə̀ mbɨ məchwiə̀ rɨ̀kə̌ nyaʼa kɔ kə̀b ɨnə̂njɨ̀ nɨ zwiirɨ ə Yeso ənjìm ənjìm. Mbɨ nyaʼa kəb zwiirɨ əməd ənjìm ənjìm ɨmbə̀ʼ ɨghəm nɨ ɨ mbɨə nyaʼə bɔə ni bə̂d bɨrɨ bu əchɔb.

³Satàn nyaʼa nyɨ ɨŋga fîŋ Judàs we nɨ mbɨ nyaʼə tɔŋ ənɨ Iskàriɔ̀t, nɨ nyaʼa wɨ mɔʼɔ rəbɔʼ mə̀mə̀ə̀nɨ̀-ɨnû Yeso mbe wum chɔ̀b rɨ̀be.

⁴Əne wɨ̀ nyaʼa wò kumnɨ bə̂d kyeŋ mbe rɨ ə mbàn Ŋwìə̀ mbɨ ɨtu kyeŋ mbe nɨə nəŋgɨə mbàn Ŋwìə̀ ɨ taŋ ɨchî nɨ tə bɨrɨ fen ə Yeso əmbɨ mɨ̀mə̌d.

⁵Ənɨ mbɨ nyaʼa zu ənû ze, mbɨ nyaʼa kàŋ ghaʼ, əne ben ni mbɨ bɨrɨ naʼ ɨkab ɨ bɔ.

⁶Wɨ̀ nyaʼa ben nɨ nɨŋ ɨkab we. Əne wɨ̀ nyaʼa kɔ kəb əpan nɨ ghɨ ni mbɨ gywɨ ə Yeso nɨ chəi ɨnɔ̂n bə̂d əŋgu.

⁷Əni ze nɨ mbɨ nyaʼə jɨg Əchwɨ̂ ə Ŋgə̀ŋ ze nɨ chəi ɨfuʼ we nɨə ghɨ̀ ni ŋgə̀ŋ kɔʼ ɨŋga ə nyaʼa yeʼe kùʼ, nɨ yeʼ əni ze nɨ mbɨ nyaʼə kyemə wan njɨ̀g Əchwɨ̂ ə Che-ɨgun.

⁸Yeso nyaʼa tom ə Pità mbɨ Jɔ̌n ghà ni, “Mbə̀ wo tekɨ tɨjɨg Əchwɨ̂ ə Che-ɨgun ɨmbə̀ʼ tɨ̀ jɨg.”

⁹Mbɨ nyaʼa biirɨ ɨ bɔ ni, “À kəbɨ ni tɨ̀ wo tekɨ ɨghɨ mbe ə yi ə?”

¹⁰Wɨ̀ nyaʼa wììrɨ̀ əmbɨ mɨ̀mə̌d ni, “Mbə̀ zə, mbə mɨ nyɨ ɨŋga əsɨ ze, mbaŋə̀ mɔʼɔ nɨ beʼ fɨkyiŋ mɨnib bɨrɨ kɔɔrɨ əwən. Mbə̀ beenɨ əbɔʼ məd wò nyɨ ɨŋga nəb ze nɨ wɨ̀ nyɨ.

¹¹Mbə̀ gha əmbɨ wə̀d nəb ni, 'Əchwiə̀-ɨnû ə biirɨ ni, ətu ə nəb bə̂d rɨ̀sɔ̀ʼɔ̀ nɨ mə bɨrɨ jɨg Əchwɨ̂ ə Che-ɨgun ɨŋga mbɨ mbɨ mə̀mə̀ə̀nɨ̀-ɨnû ə zi ə?'

¹²Wɨ̀ bɨrɨ chwi ətu ə nəb ə kyeŋ ə mɔʼɔ ɨ nən ɨkaŋ, nɨ mbɨ fə zɨ ɨghɨ rɨŋga nəb jìm. Mbə̀ tekɨ ɨghɨjìm ɨ na əŋgu.”

¹³Mbɨ nyaʼa wò pè zə ɨnû mbe àmei ɨchî nɨ Yeso kəʼ gha əmbɨ mɨ̀mə̌d. Əne mbɨ nyaʼa tekɨ tɨjɨg te əŋgu.

¹⁴Nyùmə̀ we nɨ mbɨ nyaʼə jɨg Əchwɨ̂ ə Che-ɨgun ə nyaʼa yeʼe kùʼ, əne Yeso nyaʼa chub ɨ jɨg mbɨ mbi bə̂d tom.

¹⁵Wɨ̀ nyaʼa ghà əmbɨ mɨ̀mə̌d ni, “Mə nyaʼa kàŋ kə̀b nɨ jɨg Əchwɨ̂ ə Che-ɨgun zɔ̂ mbɨ nən bɔŋ mə̀ sɨə zəə ŋgəʼ.

¹⁶Əne mə ghà ɨ nən ni chəi mə̀ bɨrɨ wɨrɨ jɨg tɨjɨg Əchwɨ̂ ə Che-ɨgun pè ənɨ əton ənɨ rɨjɨg tɔ̂ jwɨ ənɨ rəsìʼ ənɨ ə nyùmə̀ we nɨ ənû ɨfɔ̀n ə Ŋwiə̀ ə yeʼe.”

¹⁷Ənɨ wɨ̀ nyaʼa ghà əne, wɨ̀ nyaʼa nɨŋ toʼ mɨ̀nòʼ nàʼ məben-əwe əmbɨ ə Ŋwiə̀ ghà ni, “Mbə nɨŋ mɨnoʼ mbɔ̂ nɔə wèə̀.

¹⁸Mə ghà ɨ nən ni ɨ kɔ rɨ̀nîn chəi mə bɨrɨ wɨrɨ nɔ mɨnoʼ pè ənɨ ənû ɨfɔ̀n ə Ŋwiə̀ ə fə yeʼe.”

¹⁹Ənɨ wɨ̀ nyaʼa ghà əne, wɨ̀ nyaʼa nɨŋ chiŋ ŋgə̀ŋ, nàʼ məben-əwe əmbɨ ə Ŋwiə̀, bəʼrɨ ŋgə̀ŋ ze nàʼ əmbɨ mɨ̀mə̌d ghà ni, “Əzɔ̂ yɨ mɨ nyamnyod nɨ mə̀ naʼ ɨmbə̀ʼ əwən. Mbə sɨə ghɨ̀ əne kɔndɨ əmɨ.”

²⁰Ənɨ mbɨ nyaʼa fə jɨg màànɨ̀, wɨ̀ nyaʼa bə̀ nɨŋ toʼ mɨ̀nòʼ ghà ni, “Toʼ zɔ̂ yɨ fɨso fi fe nɨ Ŋwìə̀ san ənɨ mɨ ənəm ze nɨ mbɨ chəmnɨ ɨmbə̀ʼ əwən.

²¹Àyɨə mbə zə, wə̀d we nɨ fen əmɨ wɨ əgha ɨgun ə tebrə̀ jɨgə mbɨ num.

²²Wan Wə̀d bɨrɨ kwɨ ɨchî nɨ Ŋwìə̀ nyaʼa fə nuŋɨ, àyɨə ŋgəʼ bɨrɨ nyɨ ɨgun ə wə̀d we nɨ fen əməd!”

²³Mbɨ nyaʼa kɔ biirɨ mbənə mbənə ni, à kɨə we rəkaʼ nən nɨ bɨrɨ kaŋ ghɨ ɨkwɨ ənû zɔ̂ ə?

²⁴Mə̀mə̀ə̀nɨ̀-ɨnû Yeso nyaʼa kɔ taŋ ɨmbə̀ʼ we nɨ yeʼ wɨ kyeŋ əkaʼ mɨ̀mə̌d.

²⁵Yeso nyaʼa zu əne ghà əmbɨ mɨ̀mə̌d ni, “Mɨfɔ̂n bə̂d nɨ kaʼi mɨ̀Jû mbɨə nyem ɨnû nyemɨ ɨgwɨ mbə bə̂d, mbe nɨə tùmbɨ̀ mɨ̀mə̌d mbɨə kə̀bə̀ ni mbɨ tɔŋ əwən ni mbə yɨə bə̂d nɨə ghɨ̀ ɨnû chɔ̀m.”

²⁶Àyɨə tɨ̀ zɨə yeʼi əne mbɨ nən. Zɨə bɔŋ ni we nɨ yeʼ wɨ kyeŋ əkaʼ nən berɨ yeʼ ɨghabɨ wɨ kwa. We nɨə chà əwən bə̀ yeʼ ɨghabɨ wə̀d ə̀fàʼì.

²⁷We nɨ yeʼ wɨ kyeŋ kɨ wi ə? À kɨ we nɨ chubɨ jɨg, kɨ̀ we nɨə nàʼ ɨghɨjɨg ə? Kaʼ à wa kɨ i we nɨ chubɨ jɨg ə? Mə wɨ əkaʼ nən ɨghabɨ ə wə̀d ə̀fàʼì.

²⁸“Mbə mbɨə nyaʼa mbɨ num ənɨ mɨ̀nyùmə̀ jìm mbe nɨ mbɨ nyaʼə kwàʼnɨ̀ əmɨ.

²⁹Ɨchî nɨ mɨ mbǎʼ fə naʼ ənû ɨfɔ̀n ɨ num, mə bɨrɨ bɨ naʼ ɨ nən,

³⁰ɨmbə̀ʼ mbə̀ jɨg bə̀ nɔ ɨgun mɨ tebrə̀ ɨŋga əmɨ ənû ɨfɔ̀n. Mbə bɨrɨ bɨ chub ɨgun ɨtən ɨfɔ̂n ɨ saʼ mɨnəbɨ mɨ̀Izre mbe wum chɔ̀b rɨ̀be.”

³¹“Saimòn, Saimòn!, Zə, Satàn fə biirɨ əmbɨ ə Ŋwiə̀ ni wɨ̀ naʼ ɨka ɨ bɔ wɨ̀ zweʼrɨ əwən, əne kùtɨ̀ əwən ɨchî nɨ mbɨə kùtɨ̀ə̀ ŋgə̀ŋ.

³²Àyɨə mə fə kɔ̀ŋgɨ̀ ə Ŋwiə̀ ɨgwɨ ne ni tɨ e ɨbenɨ bɔd i. Ənɨ à wɨrɨ bèŋ e fîŋ ben əmɨ, à ghɨ̀ ni fîŋ tɨ mbe bɔŋgɔb wɨrɨ kàànɨ̀.”

³³Pità nyaʼa wììrɨ̀ ɨ bɔ ni, “Mə fə tekɨ mɨ ɨnyod ni mə bɨrɨ nyɨ ndəŋ mbɨ ne, bə̀ kwɨ mbɨ ne.”

³⁴Yeso nyaʼa wììrɨ̀ ɨ bɔ ni, “Mə ghà ɨ ne, àwɔ̀ Pità ni, chəi ɨnoŋgub bɨrɨ tɔŋ rə̀chɔ̀ŋ pè ənɨ à fə gha ɨghəm tad ni chəi à kyerɨ əmɨ.”

³⁵Yeso nyaʼa biirɨ əmbɨ mbi mə̀mə̀ə̀nɨ̀-ɨnû ni, “Ənɨ mə̀ nyaʼa tom əwən ghà ni tɨ mbə̀ nɨŋ ə fɨ̀tàgɨ, kɨ̀ ə̀bàmɨ̀, kɨ̀ ɨbi, kɨ̀ ɨtabɨ, mbə wa nyaʼa kwaŋ əghɨ ə mɔʼɔ ə?” Mbɨ nyaʼa wììrɨ̀ ni, “Chə̂.”

³⁶Wɨ̀ nyaʼa ghà əmbɨ mɨ̀mə̌d ni, “Àyɨə tɨ̀nîn, wə̀d we nɨ berɨ fɨ̀tàgɨ, nɨŋ, we nɨ berɨ ə̀bàmɨ̀, nɨŋ. We nɨ chəi wɨ̀ berɨ ɨbi, fen i ngywɨ̌ maʼi zon wɨ mɔʼɔ.

³⁷Mə ghà ɨ nən ni ɨŋgam Ŋwiə̀ we nɨ gha ni, 'Mbɨ nyaʼa fɔtɨ əməd əbɔʼ bə̂d mbe nɨə ghɨ̀ ɨnû rɨbɔ̀ŋ,' ə berɨ jwɨ ənɨ rəsìʼ, ɨghəm nɨ ɨnû jìm mbe nɨ mbɨ nyaʼa ŋwaʼnɨ ɨmbə̀ʼ əmɨ berɨ jwɨ ənɨ rəsìʼ.”

³⁸Mbɨ nyaʼa ghà ɨ bɔ ni, “Ə̀nùŋɨ̀sɨg, à yɨ tɨbi rɨ̀be tɔ̂.” Wɨ̀ nyaʼa wììrɨ̀ ni, “Tɨ ə kùʼ əne.”

³⁹Yeso nyaʼa jwɨ̀ wò ɨkaŋ Ɨwum mɨ̀Olìf, ɨchî nɨ wɨ̀ nyaʼə mɨə ghɨ̀ə̀. Mə̀mə̀ə̀nɨ̀-ɨnû ɨməd nyaʼa beenɨ əbɔʼ məd.

⁴⁰Wɨ̀ nyaʼa pè əŋgu ghà əmbɨ mɨ̀mə̌d ni, “Mbə̀ kɔŋgɨ ə Ŋwiə̀ ni tɨ ə̀kwàʼnɨ̀ ə nyɨ i ɨgwɨ nən.”

⁴¹Ənɨ wɨ̀ nyaʼa ghà əne, wɨ̀ nyaʼa wò ɨmbì rɨpiî, ɨghabɨ ɨchî nɨ wə̀d maʼ ɨti, pè chìndɨ̀ ɨtu ɨnywɨ ə si, kɔ̀ŋgɨ̀ ə Ŋwiə̀ ghà ni,

⁴²“Mɨ Mbǎʼ, à mɨ ghaʼ, tɨrə̀ ben e ni mə̀ zə ŋgəʼ zɔ̂, àyɨə ghɨ yeʼ ənû ze nɨ à kə̀bɨ, kà i əze nɨ mə̀ kəbɨ.” [

⁴³Aŋgɨrə̀ nyaʼa jwɨ̀ rɨkaŋ yeʼe naʼ ɨka ɨ bɔ.

⁴⁴Ɨchî nɨ wɨ̀ nyaʼa ɨŋga ŋgəʼ kyeŋ, wɨ̀ nyaʼa jeŋgɨ kɔ̀ŋgɨ̀ ə Ŋwiə̀ ənɨ i fîŋ jìm. Mɨnimə məd mbɨə nyaʼə chəmbɨ ə si ɨghabɨ ənəm.] [12]

⁴⁵Ənɨ wɨ̀ nyaʼa nɔʼ rɨ kɔŋgɨ ə Ŋwiə̀, wɨ̀ nyaʼa wò əsɨ mbi mə̀mə̀ə̀nɨ̀-ɨnû pè zə mɨ̀mə̌d ənɨ mbɨ nyaʼə gwenə. Ɨ mbɨə nyaʼə gwen ɨmbə̀ʼ ə̀kə̀nɨ̀ ze nɨ nyaʼa swi ɨŋga fîŋ tɨ mɨ̀mə̌d.

⁴⁶Wɨ̀ nyaʼa zə əne, ghà əmbɨ mɨ̀mə̌d ni, “Mbə kɨə gwen ɨmbə̀ʼ ə ye ə? Mbə nɔʼ kɔ̀ŋgɨ̀ ə Ŋwiə̀ ni tɨ ə̀kwàʼnɨ̀ ə nyɨ i ɨgwɨ nən.”

⁴⁷Ənɨ Yeso nyaʼa kɨrɨ ghàmə̀, ɨnɔ̂n bə̂d nyaʼa yeʼe. À yɨə Judàs, nɨ nyaʼa wɨ̀ mɔʼɔ rəbɔʼ mə̀mə̀ə̀nɨ̀-ɨnû mbe wum chɔ̀b rɨ̀be, nyaʼa chè ɨmbì. Wɨ̀ nyaʼa chè wò ɨban ə Yeso ɨmbə̀ʼ sɔɔrɨ ndə̀ʼ məd.

⁴⁸Àyɨə Yeso nyaʼa ghà ɨ bɔ ni, “Judàs, à wa bɨrɨ nɨŋ ənû nɨ sɔɔrɨ ndə̀ʼ fèn Wan Wə̀d ə?”

⁴⁹Ənɨ mə̀mə̀ə̀nɨ̀-ɨnû mbe nɨ nyaʼa mbɨ məd nyaʼa zə ənû ze nɨ nyaʼa wo ghɨ̀, mbɨ nyaʼa biirɨ ɨ bɔ ni, “Ə̀nùŋɨ̀sɨg, tɨ̀ wa zɔŋ mɨ̀mə̌d ənɨ ta rɨbi ə?”

⁵⁰Ənɨ mbɨ nyaʼa ghà əne, wɨ mɔʼɔ rəbɔʼ mɨ̀mə̌d nyaʼa ŋwì ɨbi kwa ə̀tǒŋ rɨ əbà əbɔ ə jɨgɨ wə̀d ə̀fàʼì ətu ɨgwɨ ə bə̂d mbàn Ŋwìə̀.

⁵¹Àyɨə Yeso nyaʼa ghà ni, “Zɨə kùʼ əne.” Ənɨ wɨ̀ nyaʼa ghà əne, wɨ̀ nyaʼa bètɨ̀ ətǒŋ ə mbaŋə̀ ze, vɨ̀ əməd.

⁵²Yeso nyaʼa ghà əmbɨ ə bə̂d kyeŋ mbe rɨ ə mbàn Ŋwìə̀, əmbɨ mbe nɨ nyaʼə nəŋgɨə mbàn Ŋwìə̀ fɔrɨ əmbɨ ə bə̂d kyeŋ mbe rɨŋga əbeŋ nɨ nyaʼa wo gywɨ əməd ni, “Mbə sɨ yeʼe gywɨ əmɨ mbɨ mɨbi fɔrɨ ɨtum mbàŋ ɨghabɨ ni mə yɨ ɨjɨ ə?

⁵³Mə wɨə nyaʼa mbɨ nən ɨni jìm ɨŋga mbàn Ŋwìə̀. Chəi mbə nyaʼa gywɨ əmɨ. Àyɨə ə nyùmə̀ fə kuʼi, nɨ wə̀d we nɨə tùmbɨ̀ ɨsɨ firɨ fə naʼ ɨka ɨ nən.”

⁵⁴Mbɨ nyaʼa gywɨ̀ ə Yeso wò mbɨ məd ɨŋga nəb ətu ɨgwɨ ə bə̂d mbàn Ŋwìə̀. Pità wɨə nyaʼə beenɨ əbɔʼ tɨgharɨgha.

⁵⁵Ənɨ mbɨ nyaʼa nepɨ ɨwid ɨŋga ɨkye ɨkam we, chub ə si ɨnɔ̂n, Pità nyaʼa wò chub əbɔʼ mɨ̀mə̌d.

⁵⁶Wan əyi ə̀fàʼì mɔʼɔ nyaʼa zə əməd ɨchî nɨ wɨ̀ nyaʼa chub əsɨ ze nɨ ɨwid nyaʼə berɨə. Wɨ̀ nyaʼa toŋ əghə ɨgwɨ məd ghà ni, “Mbaŋə̀ zɔ̂ bə̂ wɨə kəʼ mbɨ Yeso.”

⁵⁷Àyɨə Pità nyaʼa ton i ghà ni, “Əyi wɔ̂, chəi mə̀ kyerɨ əməd.”

⁵⁸Əmad ə nɨə zombɨ, mbaŋə̀ mɔʼɔ nyaʼa zə Pità ghà ni, “Àwɔ̀ bə̂ yɨ wɨ̀ mɔʼɔ rəbɔʼ mɨ̀mə̌d.” Àyɨə Pità nyaʼa wììrɨ̀ ni, “Mbaŋə̀, ka mɔ̌ yɨ əmɨ wɨ̀ mɔʼɔ rɨ əbɔʼ mɨ̀mə̌d!”

⁵⁹Ənɨ əkɔb ə nyùmə̀ ə nyaʼa chè ɨghabɨ ə awà fìbɨ̀, mbaŋə̀ cherə nyaʼa rəbə nyeŋ i nyeŋɨ ghà rɨ̀kǎ ni, “À yɨ rəsìʼ ni mbaŋə̀ zɔ̂ zɨə bə̀ kəʼ mbɨ Yeso, ɨmbə̀ʼ ɨghəm nɨ məd yɨ rɨ ə Galiliî.”

⁶⁰Àyɨə Pità nyaʼa wììrɨ̀ ni, “Mbaŋə̀, chəi mə kyerɨ ənû ze nɨ àwɔ̀ ə ghàə̀.” Ənɨ wɨ̀ nyaʼa kɨrɨ ghàmə̀, ɨnoŋgub nyaʼa tɔŋə.

⁶¹Ə̀nùŋɨ̀sɨg nyaʼa bèŋ neŋ ə Pità əwu əwən. Əne Pità nyaʼa kɔndɨ ɨŋgam Ə̀nùŋɨ̀sɨg, ɨchî nɨ wɨ̀ nyaʼa gha ɨ bɔ ni, “Bɔŋ ɨnoŋgub sɨə tɔŋə, rə̀chɔ̀ŋ à bɨrɨ fə ton əmɨ ɨghəm tad.”

⁶²Wɨ̀ nyaʼa kɔndɨ əne, jwɨ̀ wò ɨsɨg chweŋ mɨsɨ kwàʼ rɨ̀kǎ.

⁶³Bə̂d mbe nɨ nyaʼə nəŋgɨ ə Yeso, nyaʼa baʼrɨ əməd bə̀ som əməd.

⁶⁴Mbɨ nyaʼa kod əghə əməd biirɨ ɨ bɔ ni, “Kaŋ wə̀d we nɨ ku e!”

⁶⁵Mbɨ nyaʼa ghà tɨkwɨrɨ ɨŋgam nɔnɔʼ ɨmbə̀ʼ əməd, zɔ̀m əməd.

⁶⁶Ənɨ ɨtuʼ nyaʼa chɨgɨ, bə̂d kyeŋ mbe rɨŋga əbeŋ, bə̂d kyeŋ mbe rɨ ə mbàn Ŋwìə̀ mbɨ məchwiə̀ rɨ̀kə̌ nyaʼa wò nàànɨ̀, əne nɨŋ Yeso wò ɨfě mə̀saʼ əbeŋ pè ghà ni,

⁶⁷“Àwɔ̀ mɨ yeʼ Wə̀d we nɨ Ŋwiə̀ zɔʼɔ, ghà ɨ na.” Wɨ̀ nyaʼa wììrɨ̀ əmbɨ mɨ̀mə̌d ni, “Mə mɨ gha ɨ nən, chəi mbə̀ bɨrɨ benɨ.

⁶⁸Mə mɨ bə̀ biirɨ ənû mɔʼɔ ɨ nən, chəi mbə̀ bɨrɨ wììrɨ̀.

⁶⁹Àyɨə ɨ kɔ rɨ̀nîn wò ɨmbì, Wan Wə̀d bɨrɨ chub əbà əbɔ ə jɨg ə Ŋwìə̀ we nɨ berɨ ɨka jìm.”

⁷⁰Mɨ̀mə̌d mɨjìm nyaʼa biirɨ ɨ bɔ ni, “Əne àwɔ̀ yɨə Wan Ŋwìə̀ ə?” Wɨ̀ nyaʼa wììrɨ̀ əmbɨ mɨ̀mə̌d ni, “Mbə fə ghà ni mə yɨ wɨwən.”

⁷¹Mbɨ nyaʼa ghà ni, “Tɨ̀ kɨə wɨrɨə kə̀b mɨ̀zərɨmbin ye ə? Tɨ̀ fə zu ɨnû mbe nɨ jwɨ rɨ ɨchû məd mbǎ mbǎ.”