Read Fɨso Fi Luk 3 Bible Online

Luk 3 - Fɨso Fi bible

Luk 3

¹À nyaʼa ɨŋga ɨghəm ɨwu wum chɔ̀b rɨtân nɨ Tiberiùs nyaʼə Kaisà, Pontiùs Pailèt yɨə nyaʼə gɔmnà ə Jùdeyà, Herɔ̀d wɨə nyaʼə tùmbɨ̀ ə Galiliî, aŋgɔb məd Filip wɨə nyaʼə tùmbɨ̀ ɨba ɨbeŋ mbe rɨ ə Ɨturià fɔrɨ ə Trakonotìs, Lisaniàs wɨə nyaʼə tùmbɨ̀ ə Àbìlenè.

²Anas mbɨ Kaifàs yɨə nyaʼə ɨtu ɨgwɨ ə bə̂d mbàn Ŋwìə̀, Ŋwìə̀ nyaʼa chà ɨkə̂n əmbɨ Jɔ̌n we nɨ nyaʼə wan Zèkàriyà ənɨ wɨ̀ nyaʼa ɨŋga ɨbad rɨkwàʼi.

³Wɨ̀ nyaʼa wò ɨŋga ɨbeŋ jìm mbe nɨ nyaʼa ɨban ɨgyɨ̂ Jodàn, yènə̀ ghà ɨŋgam Ŋwiə̀ ni bə̂d beŋ tə fîŋ nɨŋ mɨnib ɨmbə̀ʼ Ŋwìə̀ waʼ ɨnû rɨbɔ̀ŋ mɨ̀mə̌d.

⁴Ənû ze ə nyaʼa ghɨ̀ àmei ɨchî nɨ wə̀d ɨ̀kə̀n Ŋwìə̀ Aizayà nyaʼa ŋwaʼnɨ ni, “Wə̀d mɔʼɔ wɨə kyeŋ ɨŋga ɨbad rɨkwàʼi ghàə̀ ni, 'Mbə̀ tekɨ ɨnə̂njɨ̀ əmbɨ Ə̀nùŋɨ̀sɨg. Mbə̀ tekɨ mɨnə̂njɨ̀ məd mbɨ təm!

⁵Mbɨ berɨ swe ɨmeʼ jìm, swi tɨwum kyeŋ mbɨ tɨwum kwa jìm, ghɨ̀ ni mɨnə̂njɨ̀ mbe nɨ ŋgɔndə, mbɨ təm, swe tɨbɨgɨ jìm bə̀ nàmnɨ̀ mɨnə̂njɨ̀.

⁶Bə̂d mɨjìm bɨrɨ zə ɨchî nɨ Ŋwìə̀ ə chɨə bə̂d rəŋgəʼ!'”

⁷Jɔ̌n wɨə nyaʼə ghà əmbɨ mɨnɔ̂n bə̂d mbe nɨ nyaʼa wò ni wɨ̀ naʼ mɨnib əmbɨ mɨ̀mə̌d ni, “Mbə yɨə jɔ tɨ rɨbɔ̀ŋ! À kɨə we patɨ əwən ni mbə̀ norə tɨ ənɨ ə ŋgəʼ ze nɨə yeʼe ə?

⁸Mbə̀ ghɨ̀ ɨnû mbe nɨ chwiə ni mbə̀ fə bèŋ tə fîŋ. Tɨ mbə̀ kɔ ghà ə mbənə mbənə ni, 'Tɨ̀ yɨə bɔn tɨ ənɨ əghaŋ ə Abràham'. Mə ghà ɨ nən ni, Ŋwiə̀ we tɨ̀ wɨ̀ nɨŋ əti zɔ̂ bèŋ ənɨ ə bɔn Abràham.

⁹Ka àbei rɨ̀nîn, Ŋwìə̀ fə boŋ jam ɨban ɨghaŋ ɨzed. Əne wɨ̀ bɨrɨ wad ɨzed jìm mbe nɨ chəi mbɨ kɔ rɨtam chɔ̀m màʼ ɨŋga ɨwid.”

¹⁰Mɨnɔ̂n bə̂d mbe nyaʼa biirɨ ɨ bɔ ni, “Əne tɨ̀ kɨə wò ghɨn ye ə?”

¹¹Wɨ̀ nyaʼa wììrɨ̀ əmbɨ mɨ̀mə̌d ni, “Wə̀d we nɨ berɨ ngywɨ̌ rɨ̀be naʼ zɨ fìbɨ̀ əmbɨ we nɨ chəi wɨ̀ berɨ. We nɨ berɨ ɨghɨjɨg bə̀ ghɨ̀ əndəŋ əndəŋ.”

¹²Məfetɨ mɨ̀tagsɨ̀ nyaʼa bə̀ wò əsɨ məd ni wɨ̀ naʼ mɨnib əmbɨ mɨ̀mə̌d. Mbɨ nyaʼa pè biirɨ ɨ bɔ ni, “Əchwiə̀-ɨnû, tɨ̀ ghɨ ye ə?”

¹³Wɨ̀ nyaʼa ghà əmbɨ mɨ̀mə̌d ni, “Tɨ mbə nɨŋ ə ɨkab nɨ chè we nɨ mbɨ sob ni mbə̀ nɨŋ.”

¹⁴Mɨ̀sɔgyɨ̀ mɔʼɔ nyaʼa bə̀ biirɨ ɨ bɔ ni, “À yeʼ mbǎ, tɨ̀ kɨ wò ghɨ ye ə?” Wɨ̀ nyaʼa ghà əmbɨ mɨ̀mə̌d ni, “Tɨ mbə fè ə ɨkab rɨ əmbɨ wə̀d mɔʼɔ ənɨ ɨkǎ, kɨ ənɨ mɨghab. Mbə ghaʼ ɨnun ɨkab we nɨ mbɨə chwɨ əwən əŋgu.”

¹⁵Ɨchî nɨ bə̂d mɨ̀jìm nyaʼə wòmə̀ ni Wə̀d we nɨ Ŋwìə̀ zɔʼɔ bɨrɨ yeʼe, mbɨ nyaʼa kɔndɨ ɨŋga tə fîŋ ni ɨghəm Jɔ̌n yɨə Wə̀d we nɨ Ŋwìə̀ zɔʼɔ.

¹⁶Jɔ̌n nyaʼa wììrɨ̀ əmbɨ mɨ̀mə̌d mɨjìm ni, “Mə wɨə nàʼ mɨnib ɨ nən, àyɨə wə̀d we nɨə yeʼe ənɨ mɨ njìm ə dabə chè əmɨ. Mɨ rɨka kùʼ əmɨ nɨ za mɨniʼ ɨtabɨ məd. Məd bɨrɨ cha Əzwî ə Zeŋɨ fɔrɨ ɨwid ɨgwɨ nən.

¹⁷Əsɔ twi rɨ̀kwè fə sɨ ɨkye əbɔ məd nɨ kyeŋ ɨjɔd rəbɔʼ kywɨ̀. Wɨ̀ mɨ kyeŋ, wɨ̀ bɨrɨ fetɨ ti kywɨ̀ chà ɨŋga ŋgə̌n, sɨ tɔ̀n ɨjɔd ɨŋga ɨwid rɨ nìmə.”

¹⁸Jɔ̌n wɨə nyaʼə chwi ɨnû əmbɨ ə bə̂d ənɨ tɨkwɨrɨ ɨnə̂njɨ̀ nɔnɔʼ. Ɨ wɨə nyaʼə bə̀ gha ɨkə̂n chɔ̀m əmbɨ mɨ̀mə̌d.

¹⁹Wɨ̀ nyaʼa ghàm əbɔʼ Herɔ̀d nɨ nyaʼə gɔmnà, ɨmbə̀ʼ ɨghəm nɨ wɨ̀ nyaʼa nam ə Hèrɔdiàs nɨ nyaʼə ɨwi aŋgɔb məd. Wɨ̀ nyaʼa bə̀ ghàm əbɔʼ məd, ɨmbə̀ʼ ɨghəm nɨ ɨ wɨə nyaʼə ghɨ̀ ɨnû rɨbɔ̀ŋ nɔnɔʼ.

²⁰Herɔ̀d nyaʼa yì ɨnû rɨbɔ̀ŋ mbe ɨchî nɨ wɨ̀ nyaʼa gywɨ ə Jɔ̌n zɨ̀ ə ndəŋ.

²¹Ənɨ Jɔ̌n nyaʼa fə naʼ mɨnib əmbɨ ə bə̂d mbe mɨjìm, wɨ̀ nyaʼa bə̀ naʼ əmbɨ Yeso. Ənɨ Yeso nyaʼə kɔŋgɨ ə Ŋwiə̀, ɨkaŋ nyaʼa fìʼə̀,

²²əne Əzwî ə Zeŋɨ ə nyaʼa swiʼi yeʼe ɨgwɨ məd ɨghabɨ tə̀bə̀ŋə. Gɨ̂ mɔʼɔ nyaʼa ghàm rɨkaŋ ghà ni, “Àwɔ̀ yɨ mɨ wan nɨ mə̀ ghaʼi kwàʼ rɨŋgəʼ. Mɨ fîŋ ə bɔ̀ŋ əku ɨmbə̀ʼ əwe.”

²³Yeso nyaʼa kɔ e ə̀fàʼì ənɨ wɨ̀ nyaʼa ɨghabɨ ɨghəm ɨwu ɨwum tad. Bə̂d mbɨə nyaʼə kɔndɨə ni məd yɨə nyaʼə wan Jòsêf, nɨ nyaʼə wan Heli,

²⁴nɨ nyaʼə wan Matǎt, nɨ nyaʼə wan Levì, nɨ nyaʼə wan Melkì, nɨ nyaʼə wan Janai, nɨ nyaʼə wan Jòsêf,

²⁵nɨ nyaʼə wan Matatiàs, nɨ nyaʼə wan Amòs, nɨ nyaʼə wan Nahùm, nɨ nyaʼə wan Eslì, nɨ nyaʼə wan Nagaì,

²⁶nɨ nyaʼə wan Mǎt, nɨ nyaʼə wan Matatiàs, nɨ nyaʼə wan Semeìn, nɨ nyaʼə wan Josèk, nɨ nyaʼə wan Jodà,

²⁷nɨ nyaʼə wan Jòanàn, nɨ nyaʼə wan Resà, nɨ nyaʼə wan Zèrubabèl, nɨ nyaʼə wan Sheàtièl, nɨ nyaʼə wan Nerì,

²⁸nɨ nyaʼə wan Melkì, nɨ nyaʼə wan Adî, nɨ nyaʼə wan Kosàm, nɨ nyaʼə wan Elmadàm, nɨ nyaʼə wan Er,

²⁹nɨ nyaʼə wan Jòsuà, nɨ nyaʼə wan Èliezà, nɨ nyaʼə wan Jorìm, nɨ nyaʼə wan Matǎt, nɨ nyaʼə wan Levì,

³⁰nɨ nyaʼə wan Simiòn, nɨ nyaʼə wan Judàs, nɨ nyaʼə wan Jòsêf, nɨ nyaʼə wan Jonàm, nɨ nyaʼə wan Èliakìm,

³¹nɨ nyaʼə wan Meleà, nɨ nyaʼə wan Menà, nɨ nyaʼə wan Matatà, nɨ nyaʼə wan Natàn, nɨ nyaʼə wan Dèvîd,

³²nɨ nyaʼə wan Jesè, nɨ nyaʼə wan Obèd, nɨ nyaʼə wan Boàz, nɨ nyaʼə wan Salmɔ̀n, nɨ nyaʼə wan Nashɔ̀n,

³³nɨ nyaʼə wan Àminadàb, nɨ nyaʼə wan Admîn, nɨ nyaʼə wan Arnî, nɨ nyaʼə wan Hezrɔ̀n, nɨ nyaʼə wan Perès, nɨ nyaʼə wan Judàs,

³⁴nɨ nyaʼə wan Jakɔ̂b, nɨ nyaʼə wan Aizìk, nɨ nyaʼə wan Abràham, nɨ nyaʼə wan Terà, nɨ nyaʼə wan Nahǒ,

³⁵nɨ nyaʼə wan Serùg, nɨ nyaʼə wan Reù, nɨ nyaʼə wan Pelèg, nɨ nyaʼə wan Ebà, nɨ nyaʼə wan Shelà,

³⁶nɨ nyaʼə wan Kainàn, nɨ nyaʼə wan Afazad, nɨ nyaʼə wan Shêm, nɨ nyaʼə wan Noà, nɨ nyaʼə wan Lamèk,

³⁷nɨ nyaʼə wan Mètuselà, nɨ nyaʼə wan Enɔ̀k, nɨ nyaʼə wan Jarèd, nɨ nyaʼə wan Mahalalîl, nɨ nyaʼə wan Kenàn,

³⁸nɨ nyaʼə wan Enos, nɨ nyaʼə wan Sêt, nɨ nyaʼə wan Adàm, nɨ nyaʼə Wan Ŋwìə̀.