Read Fɨso Fi Luk 6 Bible Online

Luk 6 - Fɨso Fi bible

Luk 6

¹À nyaʼa əni əkwɨ mɨ̀Jû ə mɔʼɔ, Yeso mbɨ mbi mə̀mə̀ə̀nɨ̀-ɨnû mbɨə nyaʼə che ɨŋga mbeŋ kywɨ-kɔ̀ʼ, [3] mə̀mə̀ə̀nɨ̀-ɨnû ɨməd mbɨə nyaʼə yènə̀ pààrɨ̀ə̀ rɨtam kywɨ̀ mɔʼɔ, fiirɨə ɨŋga tə rɨkyerɨ-ɨbɔ, kurə.

²Àyɨə mɨ̀Farisiî mɔʼɔ nyaʼa ghà ni, “Mbə̀ kɨə ghɨ̀ ɨnû nɨ chəi ta rɨkə chwi ni mbɨ ghɨ əne əni əkwɨ ɨmbə̀ʼ ə ye ə?”

³Yeso nyaʼa wììrɨ̀ ni, “Chəi mbə̀ kɨrɨ foŋ ənû ze nɨ ɨfɔ̀n Dèvîd nyaʼa ghɨ̌, ənɨ njì rɨ nyaʼa zaŋ əməd bə̀ zaŋə bə̂d mbe nɨ nyaʼa mbɨ məd ə?

⁴Wɨ̀ nyaʼa wò nyɨ ɨŋga nəb Ŋwiə̀, [4] nɨŋ ŋgə̀ŋ ze nɨ mbɨ nyaʼa nuŋ ənɨ əghɨ ə̀fà ɨfě Ŋwiə̀ jɨg, bə̀ nàʼ zɨ mɔʼɔ əmbɨ bə̂d mbe nɨ nyaʼa mbɨ məd, nɨ chəi ta rɨkə chwi ni wə̀d mɔʼɔ jɨg ŋgə̀ŋ ze, chè rɨ ənɨ ə bə̂d mbàn Ŋwìə̀ ə?”

⁵Wɨ̀ nyaʼa yì ghà əmbɨ mɨ̀mə̌d ni, “Wan Wə̀d yɨ Ə̀nùŋɨ̀sɨg fɔrɨ ɨgwɨ əni əkwɨ.”

⁶À nyaʼa əni əkwɨ mɨ̀Jû ə cherə, Yeso nyaʼa wò nyɨ ɨŋga nəb ə̀kàtɨ̀ kɔ chwi ɨnû. Mbaŋə̀ mɔʼɔ nyaʼa əŋgu nɨ əbɔ ə jɨg əməd ə nyaʼa nə̀ŋɨ.

⁷Məchwiə̀ rɨ̀kə̌ mɔʼɔ mbɨ mɨ̀Farisiî mɔʼɔ mbɨə nyaʼa əŋgu. Ɨ mbɨə nyaʼə neŋ əməd ɨ zə ni wɨ̀ wa bɨrɨ vɨ bə̂d əni əkwɨ ə. Ɨ mbɨə nyaʼə neŋ əne ɨmbə̀ʼ mbɨ zə ɨchî nɨ tɨ̀ mbɨ zɨ̀ ɨsaʼi ɨgwɨ məd,

⁸àyɨə Yeso nyaʼa kyerɨ tɨkɔndɨ mɨ̀mə̌d. Əne wɨ̀ nyaʼa ghà əmbɨ ə mbaŋə̀ ze nɨ əbɔ əməd ə nyaʼa nə̀ŋɨ ni, “Nɔʼ rətiə yeʼe təm əgha.” Mbaŋə̀ ze nyaʼa nɔ̀ʼ wò təm ɨfě mɨ̀mə̌d.

⁹Əne Yeso nyaʼa ghà əmbɨ mɨ̀mə̌d ni, “Mə wɨə biirɨ ɨ nən ni tɨkə ə wa chwiə ni tɨ̀ ghɨ̀ ɨ̀chɔ̀m əni əkwɨ, kɨ̀ ni tɨ̀ ghɨ ɨbə ə? Tɨ wa chwiə ni tɨ̀ chɨ wə̀d rəŋgəʼ, kɨ̀ ni tɨ̀ nimnɨ wə̀d ə?”

¹⁰Wɨ̀ nyaʼa ghɨ̀ əne, nèŋ mɨ̀mə̌d mɨjìm kad, sɨ ghà əmbɨ mbaŋə̀ ze nɨ əbɔ əməd ə nyaʼa nə̀ŋɨ ni, “Sem e əbɔ.” Wɨ̀ nyaʼa sèm, əne əbɔ əməd ə nyaʼa wɨrɨ kà i.

¹¹Àyɨə məchwiə̀ rɨ̀kə̌ mbe mbɨ mɨ̀Farisiî mbe nyaʼa sə ɨtəm kwàʼ rɨŋgəʼ, əne mbɨ nyaʼa kɔ ghambɨ mbənə mbənə ɨmbə̀ʼ ɨnû nɨ tɨ̀ mbɨ ghɨ̀ mbɨ Yeso.

¹²À nyaʼa əni ə mɔʼɔ, Yeso nyaʼa wò ɨkaŋ ɨwum ɨ kɔŋgɨ ə Ŋwiə̀. Wɨ̀ nyaʼa kɔŋgɨ ə Ŋwiə̀ ɨzimɨ we jìm.

¹³Ənɨ ɨtuʼ nyaʼa chɨgɨ, wɨ̀ nyaʼa tɔŋ mbi mə̀mə̀ə̀nɨ̀-ɨnû, chɔʼ mbɨ wum chɔ̀b rɨ̀be rəkaʼ mɨ̀mə̌d. Wɨ̀ nyaʼa tɔŋ mbe ənɨ ə bə̂d tom. Mbe nɨ wɨ̀ nyaʼa chɔʼɔ yɨə:

¹⁴Saimòn, nɨ wɨ̀ nyaʼa chu əməd ni Pità mbɨ aŋgɔb məd nɨ nyaʼə Andrù. Wɨ̀ nyaʼa bə̀ chɔʼ ə Jems, Jɔ̌n, Filip, Bàtòlòmiù,

¹⁵Matiù, Tomas, Jems we nɨ nyaʼə wan Alfaùs, Saimòn nɨ mbɨ nyaʼə tɔŋ ənɨ Mɨ̀taku,

¹⁶Judàs we nɨ nyaʼə wan Jems, mbɨ Judàs Iskàriɔ̀t we nɨ nyaʼa fen əməd.

¹⁷Yeso nyaʼa swiʼ rɨkaŋ ɨwum we mbɨ ə bə̂d tom mbe pè təm əsɨ ɨbad mbɨ ɨnɔ̂n mə̀mə̀ə̀nɨ̀-ɨnû ɨməd fɔrɨ mbɨ ɨnɔ̂n bə̂d nɨ nyaʼa kwàʼ wɨ kyeŋ nɨ nyaʼa nɔʼ rɨŋga ɨsɨ jìm mbe rɨ ə Jùdeyà fɔrɨ ə Jèrusalèm fɔrɨ ɨban rɨ̀bàà we rɨ ə Taì mbɨ ə Sidòn.

¹⁸Mbɨ nyaʼa wò zu ɨnû mbe nɨ Yeso nyaʼə ghàə̀. Mbɨ nyaʼa bə̀ wò ni wɨ̀ vɨ ɨwɔn mɨ̀mə̌d. Wɨ̀ nyaʼa bə̀ chɨ̀ ɨzwî rɨbɔ̀ŋ rɨŋga bə̂d mbe nɨ ɨzwî rɨbɔ̀ŋ nyaʼə chəə mɨ̀mə̌d.

¹⁹Ɨnɔ̂n bə̂d we jìm nyaʼa wɨə kə̀b betɨ əməd, ɨmbə̀ʼ ɨghəm nɨ ɨka wɨə nyaʼə jwɨ̀ rɨ ənɨ məd vɨ̀ə̀ mɨ̀mə̌d mɨjìm.

²⁰Yeso nyaʼa nɔ̀ɔ̀rɨ̀ əghə nèŋ mbi mə̀mə̀ə̀nɨ̀-ɨnû ghà ni, “Ŋwìə̀ zɨ əbɔrəbɔd ɨgwɨ nən, mbə̀n bə̂d ɨkwaŋ, ɨmbə̀ʼ ɨghəm nɨ à yɨə mbə̀nə bɨrɨ jɨg ənû ɨfɔ̀n ə Ŋwiə̀.

²¹Ŋwìə̀ zɨ əbɔrəbɔd ɨgwɨ mbə̀n mbe nɨ njì ə zaŋə rɨ̀nîn, ɨmbə̀ʼ ɨghəm nɨ mbə bɨrɨ jɨg kod. Ŋwìə̀ zɨ əbɔrəbɔd ɨgwɨ mbə̀n mbe nɨə chweŋ mɨsɨ rɨ̀nîn, ɨmbə̀ʼ ɨghəm nɨ mbə̀ bɨrɨ chəʼrɨ.

²²“Ŋwìə̀ zɨ əbɔrəbɔd ɨgwɨ nən, əwù ze nɨ bə̂d ə bàn əwən, chɨ̀ə̀ əwən rəkaʼ mɨ̀mə̌d, zɔ̀m əwən, bə̀ ghàə̀ ni mbə̀ yɨə bə̂d mbe nɨə ghɨ̀ ɨnû rɨbɔ̀ŋ, ɨmbə̀ʼ ɨghəm nɨ mbə̀ ben Wan Wə̀d!

²³Mbə̀ ghaʼ əwən əni ze nɨ ənû ze ə bɨrɨ ghɨ̀. Ɨghaʼi we ghɨ ni mbə̀ sɨə tòmbə̀, ɨmbə̀ʼ ɨghəm nɨ ɨchɔʼ ə̀fàʼì kyeŋ wɨ ɨ nən ɨkaŋ. À yɨə bə̀ ɨchî nɨ mɨ̀mbǎʼ mɨ̀mə̌d rəŋwe nyaʼa ghɨ̌ ənɨ ə bə̂d ɨ̀kə̀n Ŋwiə̀.

²⁴Àyɨə ŋgəʼ kyeŋ bɨrɨ nyɨ ɨgwɨ nən, mbə̀n mbe nɨ berɨ mbɔ̂n, ɨmbə̀ʼ ɨghəm nɨ mbə̀ fə berɨ ɨghɨ mbe nɨə ghɨ̀ə̀ ni mbə̀ chub ɨŋga chɔ̀m.

²⁵Ŋgəʼ kyeŋ bɨrɨ nyɨ ɨgwɨ nən, mbə̀n mbe nɨ fə jɨg kod rɨ̀nîn, ɨmbə̀ʼ ɨghəm nɨ njì rɨ bɨrɨ kɨrɨ zaŋ əwən. Ŋgəʼ kyeŋ bɨrɨ nyɨ ɨgwɨ nən, mbə̀n mbe nɨə chəʼə rɨ̀nîn, ɨmbə̀ʼ ɨghəm nɨ mbə bɨrɨ kə̀nə̀ bə̀ dì.

²⁶“Ŋgəʼ kyeŋ bɨrɨ nyɨ ɨgwɨ nən, əwù ze nɨ bə̂d mɨ̀jìm ə ghà ɨnû chɔ̀m ɨmbə̀ʼ əwən, ɨmbə̀ʼ ɨghəm nɨ à yɨ əndəŋ əndəŋ nɨ mɨ̀mbǎʼ mɨ̀mə̌d rəŋwe nyaʼa ghɨ ənɨ ə bə̂d ɨ̀kə̀n mɨghab.

²⁷“Àyɨə mə ghà ɨ nən, mbə̀n mbe nɨə zwetɨə ənû ze nɨ mɨə ghàə̀ ni: Mbə̀ ghaʼ mbə bə̂d pə̀n bə̀ ghɨ̀ ɨ̀chɔ̀m ənɨ ə bə̂d mbe nɨə bàn əwən.

²⁸Mbə̀ zɨ əbɔrəbɔd ɨgun ə bə̂d mbe nɨə zɨ̀ə̀ ndɔ̀n ɨgwɨ nən, bə̀ kɔ̀ŋgɨ̀ ə Ŋwìə̀ ɨgwɨ mbe nɨə zɔ̀m əwən.

²⁹Wə̀d mɔʼɔ mɨ nìb e ɨnwa, à bèŋ əba zɨə chwi ɨ bɔ. Wə̀d mɔʼɔ mɨ nɨŋ e ngywɨ̌ maʼi, bə sàŋ e ngywɨ̌ bòm ɨ bɔ.

³⁰Wə̀d mɔʼɔ mɨ nɔn əghɨ rɨ ne, naʼ ɨ bɔ. Wə̀d mɔʼɔ mɨ nɨŋ mbe ɨghɨ, tɨrə̀ wɨrɨ biirɨ e ɨghɨ mbe.

³¹Ənû ze mbə̀ kə̀b ni bə̂d cherə ghɨ ənɨ ə nən, mbə̀ bə ghɨ̀ ənɨ mɨ̀mə̌d.

³²“À mɨ yeʼə ghaʼə àmei bə̂d mbe nɨə ghaʼ əwe, əze ə kɨə wò weerɨ əwe ənɨ ə ye ə? Ka àbei bə̂d mbe nɨə ghɨ̀ ɨnû rɨbɔ̀ŋ, ɨ mbɨə ghaʼə bə̂d mbe nɨə bə̀ ghaʼə mɨ̀mə̌d.

³³À mɨ yeʼə ghɨ̀ ɨ̀chɔ̀m àmei ənɨ ə bə̂d mbe nɨə ghɨ̀ ɨ̀chɔ̀m ənɨ ə ne, əze ə kɨə wò weerɨ əwe ənɨ ə ye ə? Ka àbei bə̂d mbe nɨə ghɨ̀ ɨnû rɨbɔ̀ŋ, ɨ mbɨə bə̀ ghɨ̀ àmei əne.

³⁴À mɨ yeʼə chɔʼ ɨkab nàʼ əmbɨ ə bə̂d mbe nɨ bɨrɨ wi ɨ ne, əze ə kɨə wò weerɨ əwe ənɨ ə ye ə? Ka àbei bə̂d mbe nɨə ghɨ̀ ɨnû rɨbɔ̀ŋ, ɨ mbɨə chɔʼ ɨkab bə̀ nàʼ əmbɨ ə bə̂d mbe nɨə ghɨ̀ ɨnû rɨbɔ̀ŋ. Ɨ mbɨə wɨrɨə nɨŋ ɨnun we nɨ mbɨ kəʼ nàʼ.

³⁵Àyɨə mbə ghaʼ mbə bə̂d pə̀n bə̀ ghɨ̀ ɨ̀chɔ̀m ənɨ mɨ̀mə̌d. Mbə̀ bə chɔʼ ɨkab nàʼ əmbɨ bə̂d mbe nɨ chəi mbɨə wòmə̀ ni mbɨ bɨrɨ wi ɨ nən. Mbə mɨ ghɨ̀ əne, mbə bɨrɨ berɨ ɨchɔʼ ə̀fàʼì kyeŋ bə̀ yeʼ bɔn Ə̀chè-ɨsɨg, ɨmbə̀ʼ ɨghəm nɨ məd wɨə ghɨ̀ ɨ̀chɔ̀m ənɨ ə bə̂d mbe nɨ chəi mbɨə nàʼ məben-əwe ɨ bɔ. Ɨ wɨə bə̀ ghɨ̀ ɨ̀chɔ̀m ənɨ mbe nɨə ghɨ̀ ɨzɨg.

³⁶Mbə̀ diirɨ bə̂d àmei ɨchî nɨ ə Mbǎʼ ə dììrɨ̀ə̀ bə̂d.

³⁷“Tɨ mbə̀ saʼ ə bə̂d cherə, ɨmbə̀ʼ tɨ Ŋwìə̀ bɨ saʼ i əwən. Tɨ mbə̀ chə̀kɨ̀ ə rɨkum bə̂d, ɨmbə̀ʼ tɨ Ŋwìə̀ bɨ chəkɨ i tən. Mbə̀ waʼ ɨnû rɨbɔ̀ŋ bə̂d, ɨmbə̀ʼ Ŋwìə̀ bə waʼ mbən.

³⁸Mbə̀ naʼ ɨghɨ əmbɨ ə bə̂d, əne Ŋwìə̀ bɨrɨ bɨ naʼ ɨ nən. Ŋwìə̀ bɨrɨ nàʼ ɨ nən chè ɨchî nɨ mbə̀ kə̀ʼ nàʼ. Mbɨ bɨrɨ nyem ɨghɨ mbe ə si, fɔtɨ chìʼrɨ̀, mbɨ swi sɨə gwè ɨŋga əghɨ ə ngywɨ ze nɨ yeʼ ɨŋga te rɨtaʼi, ɨmbə̀ʼ ɨghəm nɨ ɨghɨ ze nɨ mbə̀ mɨg nàʼ əmbɨ ə wə̀d cherə yɨə bə̀ àmei əzɨ əwən ze nɨ mbɨ berɨ bɨ mɨg nàʼ ɨ nən.”

³⁹Wɨ̀ nyaʼa bə̀ yì ghà ənû ə mɨgɨ zɔ̂ əmbɨ mɨ̀mə̌d ni, “Tɨ̀ ɨfɨgɨ yim mbàŋ əmbɨ wɨ cherə ə? Ɨmbə̀ʼ mɨ̀mə̌d mɨjìm bɨrɨ feŋ ɨŋga ɨbɨgɨ ə?

⁴⁰Chəi ə̀mə̀ə̀nɨ̀-ɨnû chè wə̀d we nɨ chwi ɨnû ɨ bɔ, àyɨə wə̀d jìm we nɨ mbɨ jeŋgɨ chwi ɨnû ɨ bɔ bɨrɨ yeʼ ɨghabɨ we nɨ chwi ɨnû ɨ bɔ.

⁴¹“Əton nɨ àwɔ̀ ə zə əchəb əghɨ ze nɨ yeʼ ɨŋga ɨghə we aŋgɔb, àyɨə chəi àwɔ̀ zə əkwirɨ ɨwəŋ ze nɨ yeʼ ɨŋga e ɨghə kɨ ɨmbə̀ʼ ə ye ə?

⁴²Kɨ̀ tɨ̀ à ghà əmbɨ we aŋgɔb ni, 'Aŋgɔb, sɨ mə chɨ əchəb əghɨ ze nɨ yeʼ ɨŋga e ɨghə,' nɨ chəi àwɔ̀ ə zə əkwirɨ ɨwəŋ ze nɨ yeʼ ɨŋga we ə? Àwɔ̀ yɨ əbekɨ ə wə̀d! Fə be chɨ̀ əkwirɨ ɨwəŋ ze nɨ yeʼ ɨŋga e ɨghə, əne à bɨrɨ zə ɨsɨ ɨchî chɔ̀m bɔŋ chɨ əchəb əghɨ ze nɨ yeʼ ɨŋga ɨghə we aŋgɔb.

⁴³“Chəi əzed ə chɔ̀m ə kɔ rɨtam rɨbɔ̀ŋ. Chəi əzed rɨbɔ̀ŋ ə bə̀ kɔ rɨtam chɔ̀m.

⁴⁴Ɨ mbɨə kyerɨ əzed tɨ ənɨ rɨtam məd. Chəi təŋgwin njəŋ ə kɔ əkwebɨ. Chəi fə̀kyi ə bə̀ kɔ mɨ̀namsɨ̀.

⁴⁵Wə̀d chɔ̀m wɨə dù ɨnû chɔ̀m tɨ ɨŋga i fîŋ ze nɨ swi mbɨ ɨnû chɔ̀m. Wə̀d rɨbɔ̀ŋ wɨə bə̀ dù ɨnû rɨbɔ̀ŋ tɨ ɨŋga i fîŋ ze nɨ swi mbɨ ɨnû rɨbɔ̀ŋ, ɨmbə̀ʼ ɨghəm nɨ ɨchû wɨə ghà yeʼ ɨnû mbe nɨ swi ɨŋga fîŋ.

⁴⁶“Mbə̀ kɨə tɔŋ əmɨ ni, 'Ə̀nùŋɨ̀sɨg, Ə̀nùŋɨ̀sɨg', àyɨə chəi mbə̀ə ghɨ̀ ɨnû mbe nɨ mɨə gha ɨ nən ɨmbə̀ʼ ə ye ə?

⁴⁷Mə bɨrɨ chwi ɨchî nɨ wə̀d jìm we nɨ yeʼe əsɨ num, zu mɨ ɨŋgam, bə̀ ghɨ̀ ɨnû mbe nɨ mɨə ghàə̀, yeʼ ɨ nən.

⁴⁸Wɨ̀ yɨ ɨghabɨ ə mbaŋə̀ nɨə bɔmə nəb. Wɨ̀ nyaʼa toŋ əchɨ zɨə nyɨ ə si, əne bɔm əchɨ ze ɨgun ɨwɔ̌. Ɨgyɨ̂ nyaʼa swi gwèə̀, chè nun nəb ze, àyɨə chəi nəb ze nyaʼa wùrɨ, ɨmbə̀ʼ ɨghəm nɨ mbɨ nyaʼa bɔm ɨchî chɔ̀m.

⁴⁹Wə̀d we nɨə zuə, àyɨə chəi wɨə ghɨ̀ ɨnû mbe yɨ ɨghabɨ ə mbaŋə̀ ze nɨ nyaʼa bɔm nəb ɨgun ə si nɨ chəi wɨ̀ nyaʼa zi əchɨ. Ɨgyɨ̂ nyaʼa swi gwèə̀, chè nun nəb ze, zɨ̀ buʼ əwu əwən. Ɨgyɨ̂ we nyaʼə bəə chə̀kɨ̀ə̀ nəb ze.”