Read Fɨso Fi Luk 9 Bible Online

Luk 9 - Fɨso Fi bible

Luk 9

¹Yeso nyaʼa tɔŋ mə̀mə̀ə̀nɨ̀-ɨnû mbe wum chɔ̀b rɨ̀be, nàʼ ɨka əmbɨ mɨ̀mə̌d ni mbɨ chɨ ɨzwî rɨbɔ̀ŋ jìm bə̀ vɨ ɨwɔn.

²Wɨ̀ nyaʼa tom mɨ̀mə̌d ni mbɨ wo yènə̀ ghà ɨmbə̀ʼ ənû ɨfɔ̀n ə Ŋwiə̀, bə̀ yènə̀ vɨ̀ə̀ bə̂d əwɔn.

³Wɨ̀ nyaʼa ghà əmbɨ mɨ̀mə̌d ni, “Ənɨ mbɨə wòə̀, tɨ̀ mbə nɨŋ ə əghɨ ə mɔʼɔ, kɨ̀ à kɨ ə mbàŋ, kɨ̀ ə̀bàmɨ̀, kɨ̀ ŋgə̀ŋ, kɨ ɨkab. Tɨ mbə̀ bɨ nɨŋ ə ngywɨ̌ rɨ̀be.

⁴Mbə mɨ pè nyɨ ɨŋga nəb mɔʼɔ, mbə̀ chub àmei ɨŋga nəb ze pè əni ze nɨ mbə̀ə nɔ̀ʼə̀.

⁵À mɨ yeʼ nɨ chəi mbɨ nɨŋ əwən əsɨ ə mɔʼɔ, mbə̀ kud əgywɨ tɨ ənɨ mbə ɨwu ənɨ mbə̀ə jwɨ̀ə̀, ɨmbə̀ʼ əze ə bɨrɨ yeʼ ənweenɨ əmbɨ mɨ̀mə̌d ni mbɨ fə ton ɨkə̂n chɔ̀m.”

⁶Mə̀mə̀ə̀nɨ̀-ɨnû mbe nyaʼa jwɨ̀ wò chè ɨŋga ɨsɨ nɔnɔʼ, yènə̀ ghà ɨkə̂n chɔ̀m bə̀ yènə̀ vɨ̀ə̀ bə̂d ɨsɨ jìm.

⁷Ənɨ Herɔ̀d we nɨ nyaʼə tùmbɨ̀ ə Galiliî nyaʼa zu ɨnû jìm mbe nɨ nyaʼa ghɨ̌, ətu əməd ə nyaʼa bùùrɨ̀ ɨmbə̀ʼ ɨghəm nɨ bə̂d mɔʼɔ mbɨə nyaʼə ghàə̀ ni Jɔ̌n we nɨ nyaʼə nàʼ mɨnib fə zwemə.

⁸Mbɨ mɔʼɔ mbɨə nyaʼə ghà ni Èlaijà fə wɨrɨ yeʼe i. Mbɨ cherə mbɨə nyaʼə ghàə̀ ni wə̀d ɨ̀kə̀n Ŋwìə̀ mɔʼɔ rəbɔʼ mbɨ rəŋwe fə wɨrɨ zwemə.

⁹Herɔ̀d nyaʼa ghà ni, “Mə nyaʼa sob ətu ə Jɔ̌n, əne mbaŋə̀ zɔ̂ nɨ mɨə zu ɨnû mbɔ̂ ɨmbə̀ʼ əməd kɨə we ə?” Ɨ wɨə nyaʼə kə̀bə̀ ni njɨ tə zə ə Yeso.

¹⁰Ənɨ bə̂d tom mbe nyaʼa bəndɨ, mbɨ nyaʼa ghà ɨnû mbe nɨ mbɨ nyaʼa ghɨ̌ əmbɨ Yeso. Əne wɨ̀ nyaʼa nɨŋ mɨ̀mə̌d mbɨ wo àmei mɨ̀mə̌d mɨ̀mə̌d ɨŋga əsɨ ə mɔʼɔ nɨ mbɨ nyaʼə toŋ ənɨ Bètsaidà.

¹¹Ənɨ mɨnɔ̂n bə̂d mbe nyaʼa zu ni ɨ wɨ əŋgu, mbɨ nyaʼa beenɨ əbɔʼ məd. Wɨ̀ nyaʼa nɨŋ mɨ̀mə̌d, ghà ɨmbə̀ʼ ənû ɨfɔ̀n ə Ŋwiə̀ əmbɨ mɨ̀mə̌d bə̀ vɨ̀ bə̂d mbe nɨ nyaʼa wo ni wɨ̀ vɨ mɨ̀mə̌d.

¹²Ənɨ əfub ə nyaʼa sɨə bɨ̀gə̀, mə̀mə̀ə̀nɨ̀-ɨnû mbe wum chɔ̀b rɨ̀be nyaʼa wò gha ɨ bɔ ni, “Gha ɨnɔ̂n bə̂d wɔ̂ wo ɨŋga ɨsɨ mbe nɨ yeʼ ɨban ɨban, bə̀ wò ɨŋga mbeŋ ɨmbə̀ʼ mbɨ kəb ɨghɨ mɔʼɔ jɨg bə̀ kə̀b ɨsɨ nɨ ni əŋgu, ɨmbə̀ʼ ɨghəm nɨ tɨ̀ wɨ əgha əsɨ nɨ chəi bə̂d əŋgu.”

¹³Wɨ̀ nyaʼa ghà əmbɨ mɨ̀mə̌d ni, “Mbə naʼ əghɨ ə mɔʼɔ əmbɨ mɨ̀mə̌d ni mbɨ jɨg.” Mbɨ nyaʼa wììrɨ̀ ɨ bɔ ni, “Tɨ̀ berɨ àmei chiŋ ŋgə̀ŋ rɨ̀tân mbɨ əgwi ə be, kɨrɨ ni tɨ̀ wò zon ɨghɨjɨg əmbɨ ɨnɔ̂n bə̂d wɔ̂ jìm.”

¹⁴Mbaŋə̀ te nɨ nyaʼa əŋgu nyaʼa ɨghabɨ chuʼ rɨ̀tân. Yeso nyaʼa ghà əmbɨ mbi mə̀mə̀ə̀nɨ̀-ɨnû ni, “Mbə ghɨ̀ mbɨ chub ə si ɨkəm ɨkəm ɨghabɨ ɨwum tân ɨŋga əkəm ə fibɨ̀.”

¹⁵Mbɨ nyaʼa ghɨ̀ əne. Əne bə̂d mbe mɨ̀jìm nyaʼa chub ə si.

¹⁶Ənɨ mbɨ nyaʼa chubɨ, Yeso nyaʼa nɨŋ chiŋ ŋgə̀ŋ te rɨ̀tân mbɨ əgwi ze əbe, nèŋ ɨkaŋ, kɔ̀ŋgɨ̀ ə Ŋwiə̀, bəʼrɨ, nàʼ əmbɨ mə̀mə̀ə̀nɨ̀-ɨnû mbe ni mbɨ te ɨfě ɨnɔ̂n bə̂d we.

¹⁷Mbɨ nyaʼa nɨŋ te, əne mɨ̀mə̌d mbe mɨ̀jìm nyaʼa jɨg kod. Mə̀mə̀ə̀nɨ̀-ɨnû mbe nyaʼa fetɨ tɨkə te nɨ nyaʼa buʼu, tɨ swi mbɨ̀rɨkaʼ wum chɔ̀b rɨ̀be.

¹⁸À nyaʼa əni ə mɔʼɔ nɨ Yeso nyaʼə kɔ̀ŋgɨ̀ ə Ŋwiə̀ rə̀zìʼ wi, mə̀mə̀ə̀nɨ̀-ɨnû ɨməd nyaʼa chub ɨban məd. Əne wɨ̀ nyaʼa biirɨ əmbɨ mɨ̀mə̌d ni, “Bə̂d kɨə ghàə̀ ni mɔ̌ yɨə we ə?”

¹⁹Mbɨ nyaʼa wììrɨ̀ ni, “Bə̂d mɔʼɔ mbɨə ghàə̀ ni àwɔ̀ yɨə Jɔ̌n we nɨ nyaʼə nàʼ mɨnib. Mbɨ cherə mbɨə ghàə̀ ni àwɔ̀ yɨ Èlaijà. Mbɨ cherə ghàə̀ ni àwɔ̀ yɨə wə̀d ɨ̀kə̀n Ŋwìə̀ mɔʼɔ rəbɔʼ mbɨ rəŋwe nɨ fə wɨrɨ zwemə.”

²⁰Ənɨ mbɨ nyaʼa ghà əne, wɨ̀ nyaʼa biirɨ əmbɨ mɨ̀mə̌d ni, “À yeʼ mbə̀nə, mbə ghà ni mɔ̌ yɨə we?” Pità nyaʼa wììrɨ̀ ni, “Àwɔ̀ yɨə Wə̀d we nɨ Ŋwìə̀ zɔʼɔ.”

²¹Yeso nyaʼa sɨ jeŋgɨ patɨ mɨ̀mə̌d ni tɨ mbɨ tɔ gha ə ənû zɔ̂ əmbɨ wə̀d mɔʼɔ.

²²Wɨ̀ nyaʼa ghà ni, “Wan Wə̀d berɨ jeŋgɨ zə ŋgəʼ, bə̂d kyeŋ mbe rɨŋga əbeŋ, bə̂d kyeŋ mbe rɨ ə mbàn Ŋwìə̀ mbɨ məchwiə̀ rɨ̀kə̌ bɨrɨ ton əməd. Mbɨ bɨrɨ zwiirɨ əməd. À sɨ ɨgwɨ ɨni tad, Ŋwìə̀ zwemnɨ əməd.”

²³Wɨ̀ nyaʼa ghà əmbɨ mɨ̀mə̌d mɨjìm ni, “Wə̀d mɔʼɔ mɨ kəb yeʼe əbɔʼ num, wɨ̀ ton ɨnû mɔʼɔ mbe nɨ nyamnyod məd ə feenɨə, bèʼ i əzed ə baʼnɨ ɨni jìm beenɨ əbɔʼ num,

²⁴ɨmbə̀ʼ ɨghəm nɨ wə̀d mɔʼɔ we nɨə kə̀b nuŋ i ɨ̀tènɨ̀ bɨrɨ sam ɨ̀tènɨ̀ we. We nɨ sam i ɨ̀tènɨ̀ ɨmbə̀ʼ əmɨ bɨrɨ wɨrɨ jɨg ɨ̀tènɨ̀ we.

²⁵Njìm ze nɨ wə̀d bɨrɨ jɨg kɨə ye, əwu ze nɨ wɨ̀ berɨ ɨsɨg wɔ̂ jìm, əne nim kɨ̀ sam i ɨ̀tènɨ̀ ə?

²⁶Ətu ə mɨ nìd wə̀d mɔʼɔ ɨmbə̀ʼ əmɨ fɔrɨ ɨmbə̀ʼ mɨ ɨŋgam, ətu ə Wan Wə̀d ə bɨrɨ bɨ nìd ɨmbə̀ʼ əməd ənɨ wɨ̀ yeʼe ɨghabɨ ɨfɔ̀n mbɨ ɨka we nɨ Mbǎʼ naʼ ɨ bɔ bə̀ fɔrɨ mbɨ ɨwumnɨ we nɨ mbɨ̀aŋgɨrə̀ zeŋɨ bə̀ nàʼ ɨ bɔ.

²⁷Mə ghà rəsìʼ ɨ nən ni chəi bə̂d mɔʼɔ rəbɔʼ mbɔ̂ nɨ təmbɨ əgha bɨrɨ kwɨ pè ənɨ mbɨ fə zə ənû ɨfɔ̀n ə Ŋwiə̀.”

²⁸À nyaʼa ɨghabɨ ə kàb fibɨ̀ nɨ Yeso nyaʼa gha ɨnû mbɔ̂, wɨ̀ nyaʼa nɨŋ ə Pità mbɨ Jɔ̌n fɔrɨ ə Jems, mbɨ kɔʼ wò ɨkaŋ ɨwum ɨ wò kɔŋgɨ ə Ŋwiə̀.

²⁹Ənɨ wɨ̀ nyaʼə kɔ̀ngɨ̀ə̀, ɨfě məd nyaʼa kwepə, ngywɨ̌ rɨ məd nyaʼa sɨə fuə teenɨə.

³⁰Mbɨ nɨ zə, mbaŋə̀ rɨ̀be nyaʼa sàʼ jwɨ̀ kɔ ghambɨ mbɨ Yeso. Mbaŋə̀ te yɨə nyaʼə Mose mbɨ Èlaijà.

³¹Ɨ mbɨə nyaʼə te ɨghabɨ mbɨ̀aŋgɨrə̀. Mbɨ nyaʼa pè ghà ɨmbə̀ʼ ɨchî nɨ Yeso bɨrɨ kwɨ ə Jèrusalèm, ɨchî nɨ Ŋwìə̀ nyaʼa fə tekɨ nùŋ.

³²Pità mbɨ ə bə̂d mbe nɨ nyaʼa mbɨ məd nyaʼa feŋ əŋgwenɨ, àyɨə ənɨ mbɨ nyaʼa nɔʼɔ, mbɨ nyaʼa zə ɨchî nɨ Yeso nyaʼə teə bə̀ zə mbaŋə̀ te rɨ̀be nɨ nyaʼa təmbɨ mbɨ məd.

³³Ənɨ mbaŋə̀ te nyaʼə sàŋ ə Yeso, Pità nyaʼa ghà əmbɨ Yeso ni, “Masà, zɨə bɔ̀ŋ ni tɨ̀ wɨ əgha. Tɨ̀ bɨrɨ kod mɨŋwenɨ tad, wɨ fibɨ̀ ɨ ne, wɨ fibɨ̀ əmbɨ Mose, wɨ fibɨ̀ əmbɨ Èlaijà.” Wɨ̀ nyaʼa ghà əne, àyɨə chəi wɨ̀ nyaʼa kyerɨ ənû ze nɨ wɨ̀ nyaʼə ghàə̀.

³⁴Ənɨ wɨ̀ nyaʼə kɨrɨ ghàmə̀, pàʼ mɔʼɔ nyaʼa kubrɨ mɨ̀mə̌d. Mə̀mə̀ə̀nɨ̀-ɨnû mbe nyaʼa bɔ ɨmbə̀ʼ ɨchî nɨ pàʼ ze nyaʼa kubrɨ mɨ̀mə̌d.

³⁵Gɨ̂ mɔʼɔ nyaʼa jwɨ̀ rɨŋga pàʼ ze ghà ni, “Wɔ̂ yɨ mɨ Wan nɨ mə chɔʼɔ, mbə̀ zu ənû ze nɨ wɨə ghàə̀!”

³⁶Ənɨ gɨ̂ ze nyaʼa fə ghamɨ màànɨ̀, mbɨ nyaʼa sɨ zə àmei Yeso rə̀zìʼ wi. Mbɨ nyaʼa kəm rəziə ɨmbə̀ʼ ɨnû mbɔ̂. Chəi mbɨ nyaʼa gha ɨnû mɔʼɔ rəbɔʼ mbe nɨ mbɨ nyaʼa zə ənɨ ə nyùmə̀ we.

³⁷À nyaʼa əni ze nɨ beenɨ, ənɨ mbɨ nyaʼa swiʼi rɨkaŋ ɨwum we, ɨnɔ̂n bə̂d nɨ nyaʼa kwàʼ wɨ kyeŋ nyaʼa wò kumnɨ əməd.

³⁸Mbɨ nɨ zə, mbaŋə̀ mɔʼɔ rɨŋga ɨnɔ̂n bə̂d we nyaʼa kyeŋ ghà ni, “Əchwiə̀-ɨnû, mə buʼ ɨbɔ ɨ ne ni à neŋ mɨ wan mbaŋə̀, ɨmbə̀ʼ ɨghəm nɨ mə berɨ àmei məd wɔ̂ mɔʼ.

³⁹Əzwî rɨbɔ̀ŋ ə zɨə yim əməd wɨ̀ sàʼə̀ kyeŋə rɨ̀kǎ. Ə zɨə gywɨ̀ əməd tum ə si, bə̀ ghɨ̀ rɨjo jwɨ̀ rɨ ɨchû məd. Əzwî ze ə zɨə chə əməd kwàʼ rɨŋgəʼ. Chəi zɨə ghaʼ nɨ kɨə sàŋ əməd!

⁴⁰Mə kə̀ʼ buʼ ɨbɔ əmbɨ mbe mə̀mə̀ə̀nɨ̀-ɨnû ni mbɨ chɨ əzwî ze, àyɨə chəi ənɨ tɨ̀ mbɨ chɨ̀.”

⁴¹Yeso nyaʼa wììrɨ̀ ni, “Chəi ɨghəm bə̂d wɔ̂ tɨ̀nîn berɨ ɨbenɨ. Ɨ mbɨə ghɨ̀ ɨnû nɨ chəi mbɨ kuʼnɨ. Mə kɨə wo chubɨ mbɨ nən, kɨ̀ bè yim fîŋ mbɨ nən ənɨ əgha nɨ sa rɨ ye ə?” Ənɨ wɨ̀ nyaʼa ghɨ̀ əne, wɨ̀ nyaʼa ghà əmbɨ mbaŋə̀ ze ni, “Nɨŋ e wan yeʼe əgha.”

⁴²Ənɨ wan we nyaʼə yènə̀ yeʼe, əzwî rɨbɔ̀ŋ ze nyaʼa yim əməd tum ə si, kɔ chiʼ əməd. Àyɨə Yeso nyaʼa gham əbɔʼ əzwî rɨbɔ̀ŋ ze, vɨ̀ wan we, wɨrɨ naʼ əmbɨ mbǎʼ məd.

⁴³Bə̂d mbe mɨjìm nyaʼa yiirɨ ɨchî nɨ mbɨ nyaʼa zə ɨka Ŋwiə̀. Ənɨ bə̂d mbe nyaʼə kɨrɨ yiirɨ ɨnû jìm mbe nɨ Yeso nyaʼa ghɨ̌, wɨ̀ nyaʼa ghà əmbɨ mbi mə̀mə̀ə̀nɨ̀-ɨnû ni,

⁴⁴“Mbə̀ zu ɨŋgam wɔ̂ wɨ̀ jeŋgɨ nyɨ ɨŋga mbə ɨtu. Ɨŋgam rəŋgu yɨ ni mbɨ bɨrɨ fen Wan Wə̀d əmbɨ ə bə̂d.”

⁴⁵Mbɨ nyaʼa zu ɨŋgam rəŋgu, àyɨə chəi ɨtu mɨ̀mə̌d nyaʼa kɨrɨ zeŋ. Ŋwìə̀ nyaʼa fə nə̀m ɨŋgam we rɨ əmbɨ mɨ̀mə̌d ɨmbə̀ʼ tɨ mbɨ kyerɨ əwən. Mbɨ nyaʼa bə̀ bɔ nɨ biirɨ ɨŋgam we rɨ əmbɨ Yeso.

⁴⁶Mə̀mə̀ə̀nɨ̀-ɨnû Yeso nyaʼa sàʼ kɔ taŋ ɨmbə̀ʼ we nɨ yeʼ wɨ kyeŋ əkaʼ mɨ̀mə̌d.

⁴⁷Yeso nyaʼa kyerɨ ənû ze nɨ mbɨ nyaʼə kɔndɨ ɨŋga tə fîŋ, əne wɨ̀ nyaʼa nɨŋ wan kwa nuŋ ɨban ni,

⁴⁸ghà əmbɨ mə̀mə̀ə̀nɨ̀-ɨnû mbe ni, “Wə̀d mɔʼɔ we nɨ nɨŋ wan kwa ɨghabɨ wɔ̂ ənɨ mɨ ɨkum, fə bə̀ nɨŋ əmɨ. We nɨ nɨŋ əmɨ fə bə̀ nɨŋ wə̀d we nɨ nyaʼa tom əmɨ. Əne we nɨ yeʼ wɨ kwa əkaʼ mbə̀n mbɔ̂ mɨ̀jìm, yɨ we nɨ yeʼ wɨ kyeŋ.”

⁴⁹Jɔ̌n nyaʼa ghà ni, “Masà, tɨ̀ kə̀ʼ zə wə̀d mɔʼɔ nɨə chɨ̀ ɨzwî rɨbɔ̀ŋ ənɨ e ɨkum, əne tɨ̀ kə̀ʼ kə̀b nɨ təmnɨ əməd ɨmbə̀ʼ ɨghəm nɨ ka məd yɨ i wɨ mɔʼɔ rəbɔʼ na.”

⁵⁰Yeso nyaʼa gha ɨ bɔ ni, “Tɨ mbə təmnɨ ə məd, ɨmbə̀ʼ ɨghəm nɨ wə̀d we nɨ chəi wɨ̀ ton əwən, wɨ i mbɨ nən.”

⁵¹Ənɨ ɨni nyaʼa sɨə tiinə nɨ Ŋwìə̀ nyaʼa wo nɨŋ ə Yeso ɨkaŋ, wɨ̀ nyaʼa nuŋ ɨŋga i fîŋ ni tə berɨ wo ə Jèrusalèm.

⁵²Əne wɨ̀ nyaʼa cha bə̂d ɨ̀kə̀n ɨmbì ɨ bɔ ni mbɨ wo nyɨ əsɨ ə mɔʼɔ ə Sàmàriyà ɨmbə̀ʼ tekɨ ɨghɨjìm bɔŋ wɨ̀ sɨə yeʼe.

⁵³Àyɨə chəi bə̂d mbe rɨ əsɨ ze nyaʼa nɨŋ əməd, ɨmbə̀ʼ ɨghəm nɨ zɨə nyaʼa fə zeŋ ni ɨ wɨə wò yeʼ ə Jèrusalèm.

⁵⁴Ənɨ mə̀mə̀ə̀nɨ̀-ɨnû ɨməd nyaʼa zə ənû ze, mbɨ nyaʼa biirɨ ni, “Ə̀nùŋɨ̀sɨg, à wa kəb ni tɨ̀ gha Ŋwìə̀ cha ɨwid rɨkaŋ ni wɨ yeʼe ton mɨ̀mə̌d ə?” [5]

⁵⁵Mbɨ nyaʼa ghà əne, Yeso beŋ ghàm əbɔʼ mɨ̀mə̌d. [6]

⁵⁶Əne mbɨ nyaʼa chè wò ɨŋga əsɨ ə cherə.

⁵⁷Ənɨ Yeso mbɨ mbi mə̀mə̀ə̀nɨ̀-ɨnû nyaʼə yèn ɨgwɨ ɨnə̂njɨ̀, wə̀d mɔʼɔ nyaʼa ghà ɨ bɔ ni, “Mə bɨrɨ beenɨ əbɔʼ ne ɨsɨ jìm mbe nɨ àwɔ̀ ə wò əŋgu.”

⁵⁸Yeso nyaʼa ghà ɨ bɔ ni, “Kyerɨ ni mɨ̀seŋə ə berɨ tə rɨbɨgɨ, tɨnən bə̀ berɨ tə kàn, àyɨə chəi Wan Wə̀d berɨ əsɨ nɨ nuŋ e ətu əŋgu.”

⁵⁹Wɨ̀ nyaʼa ghà əmbɨ wɨ̀ cherə ni, “Beenɨ əbɔʼ num.” Àyɨə we nyaʼa ghà ni, “Masà, sɨ mə be wò tweŋ mɨ mbǎʼ.”

⁶⁰Yeso nyaʼa wììrɨ̀ ɨ bɔ ni, “Saŋ ɨvɨ bə̂d tweŋ mbə ɨvɨ bə̂d. À yeʼ ɨmbə̀ʼ əwe, ndə̀ wo saʼ ni ənû ɨfɔ̀n ə Ŋwiə̀ ə zɨə yeʼe.”

⁶¹Wɨ̀ cherə nyaʼa ghà ni, “Mə bɨrɨ beenɨ əbɔʼ ne, kyɨ Ə̀nùŋɨ̀sɨg, àyɨə sɨ mə be wò ndàʼnɨ̀ mbɨ ə bə̂d mbe nɨ yeʼ əkwɨ num.”

⁶²Yeso nyaʼa wììrɨ̀ ɨ bɔ ni, “Chəi wə̀d we nɨ yim əsɔ kɔ faʼi, wɨrɨ bèŋ nèŋ rəbɔʼɔ, kùʼ nɨ nyɨ ɨŋga ənû ɨfɔ̀n ə Ŋwiə̀.”