Read Fɨso Fi Jɔ̌n 18 Bible Online

Jɔ̌n 18 - Fɨso Fi bible

Jɔ̌n 18

¹Ənɨ Yeso nyaʼa fə kɔŋgɨ ə Ŋwiə̀ màànɨ̀, wɨ̀ nyaʼa nɔ̀ʼ mbɨ mbi mə̀mə̀ə̀nɨ̀-ɨnû mbɨ wò baanɨ ɨmeʼ we nɨ mbɨ nyaʼə tɔŋ ənɨ ə Kidròn wo ɨnjin. Mbeŋ mɨ̀olìf mɔʼɔ nyaʼa əsɨ ze. Mbɨ nyaʼa wò nyɨ ɨŋga mbeŋ ze.

²Judàs we nɨ nyaʼa fen ə Yeso nyaʼa kyerɨ əsɨ ze, ɨmbə̀ʼ ɨghəm nɨ Yeso wɨə nyaʼə kɨə wò əŋgu mbɨ mbi mə̀mə̀ə̀nɨ̀-ɨnû.

³Judàs nyaʼa kyerɨ əne, wò əŋgu mbɨ ɨnɔ̂n mɨ̀sɔgyɨ̀ fɔrɨ mbɨ ə bə̂d mbe nɨ nyaʼə nəŋgɨə mbàn Ŋwìə̀. À yɨə bə̂d kyeŋ mbe rɨ ə mbàn Ŋwìə̀ mbɨ mɨ̀Farisiî nyaʼa tom mɨ̀mə̌d. Mbɨ nyaʼa wò əŋgu mbɨ ɨnam, mbɨ əkaʼi fɔrɨ mbɨ ɨghɨ bid.

⁴Yeso nyaʼa kyerɨ ɨnû jìm mbe nɨ bɨrɨ ghɨ̀ ənɨ ə ni, əne wɨ̀ nyaʼa wò ɨmbì pè biirɨ əmbɨ mɨ̀mə̌d ni, “Mbə kɨə kə̀b əwe ə?”

⁵Mbɨ nyaʼa wììrɨ̀ ɨ bɔ ni, “Tɨ̀ wɨə kə̀b ə Yeso we rɨ ə Nazàret.” Yeso nyaʼa ghà əmbɨ mɨ̀mə̌d ni, “À yɨə mɔ̌ wɔ̂.” Judàs we nɨ nyaʼa fen əməd nyaʼa bə̀ təm əŋgu mbɨ mɨ̀mə̌d.

⁶Ənɨ Yeso nyaʼa gha əmbɨ mɨ̀mə̌d ni, “À yɨə mɔ̌ wɔ̂,” mbɨ nyaʼa wò rəbɔʼɔ rəbɔʼɔ gùùrɨ̀ ə si.

⁷Yeso nyaʼa yi biirɨ əmbɨ mɨ̀mə̌d ni, “Mbə kɨə kə̀b əwe ə?” Mbɨ nyaʼa wììrɨ̀ ni, “Tɨ̀ wɨə kə̀b ə Yeso we rɨ ə Nazàret.”

⁸Yeso nyaʼa ghà əmbɨ mɨ̀mə̌d ni, “Mə fə ghà ɨ nən ni à yɨə mɔ̌ wɔ̂. Mbə mɨ yeʼə kə̀b əmɨ, mbə̀ saŋ ni mbɨ mə̀mə̀ə̀nɨ̀-ɨnû mbɔ̂ wò əwən.”

⁹Wɨ̀ nyaʼa ghà əne ɨmbə̀ʼ ɨŋgam we nɨ wɨ̀ nyaʼa be ghà wɨ jwɨ ənɨ rəsìʼ ni, “Mɨ Mbǎʼ, chəi mə nimnɨ wə̀d mɔʼɔ rəbɔʼ mbe nɨ à nyaʼa naʼ ɨ num.” [12]

¹⁰Saimon Pità nɨ nyaʼa yim ɨbi bid, nyaʼa sùŋ ɨbi we rɨ ə baʼ, kwa ə̀tǒŋ rɨ əbà əbɔ ə jɨgɨ ə̀bòʼò ətu ɨgwɨ ə bə̂d mbàn Ŋwìə̀. Ɨkum ə̀bòʼò ze yɨə nyaʼə Malkùs.

¹¹Yeso nyaʼa ghà əmbɨ Pità ni, “Wɨrɨ zɨ̀ e ɨbi ə baʼ. Kaʼ à wa kɨ i əzum rɨmbin nɨ nɔ rɨŋga toʼ ze nɨ mɨ Mbǎʼ naʼ ɨ num ə?”

¹²[13] Mɨ̀sɔgyɨ̀ mbe mbɨ ətu mbe nɨ nyaʼa ɨgwɨ mɨ̀mə̌d fɔrɨ bə̂d mbe nɨ nyaʼə nəŋgɨ ə mbàn Ŋwìə̀ nyaʼa gywɨ̀ ə Yeso kod.

¹³Mbɨ nyaʼa bè nɨŋ əməd wò əsɨ Anas. Anas yɨə nyaʼə ɨchɨ Kaifàs nɨ nyaʼə ətu ɨgwɨ ə bə̂d mbàn Ŋwìə̀ əghəm əwù ze.

¹⁴À yɨə Kaifàs nyaʼa kəərɨ bə̂d mbe nɨ nyaʼə tekɨ ɨnû ɨŋga əbeŋ mɨ̀Jû ni zɨə bɨrɨ kaŋ bɔ̀ŋ əku ənɨ wə̀d mɔʼ kwɨ ɨgwɨ ətu ə bə̂d mɨjìm.

¹⁵Saimon Pità mbɨ ə̀mə̀ə̀nɨ̀-ɨnû cherə nyaʼə beenɨ əbɔʼ ə Yeso. Ɨchî nɨ ətu ɨgwɨ ə bə̂d mbàn Ŋwìə̀ nyaʼa kyerɨ ə̀mə̀ə̀nɨ̀-ɨnû cherə we, wɨ̀ nyaʼa beenɨ əbɔʼ ə Yeso bə̀ wò nyɨ ɨŋga ɨkye ɨkam ətu ɨgwɨ ə bə̂d mbàn Ŋwìə̀,

¹⁶àyɨə Pità nyaʼa təm ɨsɨg ənjìm ɨnuʼ ɨkam we. Ə̀mə̀ə̀nɨ̀-ɨnû cherə we, nɨ ətu ɨgwɨ ə bə̂d mbàn Ŋwìə̀ nyaʼa kyerɨ əməd, nyaʼa bə̀ndɨ̀ wò ɨsɨg, pè ghàmbɨ̀ mbɨ wan əyi ə̀fàʼì we nɨ nyaʼə nəŋgɨ ɨchû ɨkam. Wɨ̀ nyaʼa ghɨ̀ əne nɨŋ ə Pità mbɨ nyɨ ɨŋga ɨkam we.

¹⁷Wan əyi ə̀fàʼì we nɨ nyaʼə nəŋgɨ ɨchû ɨkam we nyaʼa biirɨ əmbɨ Pità ni, “Ɨmbə̀ʼ àwɔ̀ yɨə bə̀ wɨ mɔʼɔ rəbɔʼ mə̀mə̀ə̀nɨ̀-ɨnû mbaŋə̀ zɔ̂ ə?” Pità nyaʼa wììrɨ̀ ni, “Chə̂, ka mə yɨ əmɨ wɨ mɔʼɔ rəbɔʼ mɨ̀mə̌d.”

¹⁸Ɨfə wɨə nyaʼə kɔə, əne bə̂d ə̀fàʼì ətu ɨgwɨ ə bə̂d mbàn Ŋwìə̀ mbɨ ə bə̂d mbe nɨ nyaʼə nəŋgɨə mbàn Ŋwìə̀, nyaʼa nepɨ ɨwid kyi. Mbɨ nyaʼa nepɨ əne, təmbɨ ɨban ɨ zɔ ə. Pità nyaʼa bə̀ təm əbɔʼ mɨ̀mə̌d ɨ zɔ i.

¹⁹Ətu ze ɨgwɨ ə bə̂d mbàn Ŋwìə̀ nyaʼa biirɨ ɨnû əmbɨ Yeso ɨmbə̀ʼ mə̀mə̀ə̀nɨ̀-ɨnû ɨməd bə̀ biirɨ ɨmbə̀ʼ ɨnû mbe nɨ wɨ̀ nyaʼə chwi.

²⁰Yeso nyaʼa wììrɨ̀ ɨ bɔ ni, “Mə wɨə nyaʼa kɨə ghàm əsaŋ əsaŋ əmbɨ wə̀d jìm. Mə wɨə nyaʼə chwi ɨnû ɨŋga nəb tɨ ə̀kàtɨ̀ bə̀ chwi ɨŋga mbàn Ŋwìə̀ ənɨ mɨ̀nyùmə̀ jìm. Mbɔ̂ yɨ ɨsɨ mbe nɨ mɨ̀Jû mɨ̀jìm ə fetɨə. Chəi mə nyaʼə ghà ənû ə mɔʼɔ ənə̀mə.

²¹Əton nɨ à biirɨ ɨŋgam ɨ num kɨ ɨmbə̀ʼ ə yè ə? Biirɨ əmbɨ ə bə̂d mbe nɨ nyaʼa zu ɨnû mbe nɨ mə nyaʼə ghàə̀. Biirɨ əmbɨ mɨ̀mə̌d ni mə kɨə nyaʼə ghàə̀ ni yè ə? Mbɨ kyerɨ ənû ze nɨ mə̀ nyaʼə ghàə̀.”

²²Ənɨ wɨ̀ nyaʼa gha ənû zɔ̂, wə̀d mɔʼɔ rəbɔʼ mbe nɨ nyaʼə nəŋgɨ ə mbàn Ŋwìə̀, nɨ nyaʼa təm ɨban ɨban, nyaʼa zwi əbɔ ɨfě ɨ bɔ biirɨ ni, “À kɨ ɨchî nɨ à berɨ wiirɨ ɨŋgam əmbɨ ətu ɨgwɨ ə bə̂d mbàn Ŋwìə̀ ə?”

²³Yeso nyaʼa wììrɨ̀ ɨ bɔ ni, “À mɨ yeʼ nɨ mə̀ kəʼ ghà ənû rɨbɔ̀ŋ ə mɔʼɔ, ghà ənû rəŋgu əmbɨ wə̀d jìm. À nɨə yeʼ nɨ mə kəʼ ghàm ɨchî chɔ̀m, njɨ à nib əmɨ ɨmbə̀ʼ ə yè ə?”

²⁴Anas nyaʼa ghɨ̀ əne kod əməd chà əsɨ Kaifàs nɨ nyaʼə ətu ɨgwɨ ə bə̂d mbàn Ŋwìə̀.

²⁵Pità nyaʼa kɨrɨ təm əsɨ ze ɨ zɔ i. Əne bə̂d mɔʼɔ rəbɔʼ mbe nɨ nyaʼa əŋgu mbɨ məd nyaʼa biirɨ ɨ bɔ ni, “Ɨmbə̀ʼ àwɔ̀ yɨ bə ə̀mə̀ə̀nɨ̀-ɨnû mɔʼɔ rəbɔʼ mə̀mə̀ə̀nɨ̀-ɨnû mbaŋə̀ zɔ̂ ə?” Pità nyaʼa ton i ghà ni, “Chə̂, ka mə yɨ əmɨ wɨ mɔʼɔ rəbɔʼ mɨ̀mə̌d.”

²⁶Wə̀d ə̀fàʼì ətu ɨgwɨ ə bə̂d mbàn Ŋwìə̀ mɔʼɔ, nɨ nyaʼə əfurɨ ə mbaŋə̀ ze nɨ Pità kəʼ sob ə̀tǒŋ ə məd, nyaʼa biirɨ ni, “Ɨmbə̀ʼ mə kəʼ zə əwe mbɨ məd ɨŋga mbeŋ mɨ̀olìf ə?”

²⁷Pità nyaʼa yi ton i. Àmei əwu əwən, ɨnoŋgub nyaʼa tɔŋə.

²⁸Ɨtuʼ nyaʼa mɨ chɨg i chɨg ɨ, bə̂d mbe nɨ nyaʼə tekɨ ɨnû ɨŋga əbeŋ mɨ̀Jû nyaʼa nɨŋ ə Yeso rɨ əkwɨ Kaifàs wò mbɨ məd ə tɔʼ gɔmnà. Chəi mbɨ nyaʼa nyɨ ɨŋga tɔʼ ze, ɨmbə̀ʼ ɨghəm nɨ mbɨ nyaʼa kəb chub ɨzeŋɨ zeŋɨ ɨmbə̀ʼ jɨg Əchwɨ̂ ə Che-ɨgun.

²⁹Əne Pailèt nyaʼa jwɨ̀ wò kumnɨ mɨ̀mə̌d ɨsɨg, biirɨ əmbɨ mɨ̀mə̌d ni, “Ɨsaʼi we nɨ mbə̀ zɨ ɨgun ə mbaŋə̀ zɔ̂ kɨ ni ye ə?”

³⁰Mbɨ nyaʼa wììrɨ̀ ɨ bɔ ni, “À mɨ yeʼ nɨ chəi wɨ̀ kəʼ gù ənû, njɨ chəi tɨ̀ nɨŋ əməd yeʼe naʼ ɨ ne.”

³¹Pailèt nyaʼa ghà əmbɨ mɨ̀mə̌d ni, “Mbə̀ nɨŋ əməd mbənə mbənə wò saʼ əməd ɨchî nɨ tə rɨkə chwiə.” Bə̂d mbe nɨ nyaʼə tekɨ ɨnû ɨŋga əbəŋ mɨ̀Jû nyaʼa wììrɨ̀ ɨ bɔ ni, “Chəi ta rɨkə chwiə nɨ tɨ̀ zwiirɨ wəd.”

³²Ənû zɔ̂ ə nyaʼa ghɨ̀ ɨmbə̀ʼ ənû ze nɨ Yeso nyaʼa ghǎ de ɨchî nɨ wɨ̀ berɨ chè bɔŋ kwɨ ə jwɨ ənɨ rəsìʼ.

³³Pailèt nyaʼa wɨrɨ wò nyɨ ɨŋga tɔʼ, əne ghà ni mbɨ nɨŋ ə Yeso yeʼe nàʼ ɨ ni. Ənɨ mbɨ nyaʼa nɨŋ yeʼe, wɨ̀ nyaʼa biirɨ ɨ bɔ ni, “Àwɔ̀ kɨ ɨfɔ̂n mɨ̀Jû ə?”

³⁴Yeso nyaʼa wììrɨ̀ ni, “Ɨbiirɨ wɔ̂ kɨə kaŋ we, kɨ̀ à kɨə bə̂d cherə gha ɨnû ɨ ne ɨmbə̀ʼ əmɨ ə?”

³⁵Pailèt nyaʼa wììrɨ̀ ni, “Mɔ̌ wa kɨə Jû ə? À yɨ mbe bə̂d mbɨ ə bə̂d kyeŋ mbe rɨ ə mbàn Ŋwìə̀ naʼ əwe ɨ num. À gu ənû ə ye ə?”

³⁶Yeso nyaʼa wììrɨ̀ ni, “Kaʼ mɨ ənû ɨfɔ̀n yɨ i rɨŋga ɨsɨg wɔ̂. À kɨ nɨ mɨ ənû ɨfɔ̀n yɨə kəʼ rɨŋga ɨsɨg wɔ̂, njɨ bə̂d mbe nɨə beenɨ əbɔʼ num bɨrɨ zɔ̀ŋ ɨmbə̀ʼ tɨ mɨ̀Jû gywɨ ə əmɨ. Àyɨə ka mɨ ənû ɨfɔ̀n yɨ i rɨŋga ɨsɨg wɔ̂.”

³⁷Pailèt nyaʼa biirɨ ɨ bɔ ni, “Əne, àwɔ̀ yɨ ɨfɔ̂n ə?” Yeso nyaʼa wììrɨ̀ ni, “À fə ghà ni mɔ̌ yɨ ɨfɔ̂n. Mbɨ nyaʼa gywɨ əmɨ, mə yeʼe ɨŋga ɨsɨg ɨmbə̀ʼ ənû zɔ̂ ə mɔʼ. Ənû ze yɨ nɨ ghɨ ni bə̂d kyerɨ rəsìʼ. Wə̀d mɔʼɔ we nɨ ben rəsìʼ wɨə zu ənû ze nɨ mɨə ghàə̀.”

³⁸Pailèt nyaʼa biirɨ ɨ bɔ ni, “Təsìʼ kɨ ə ye ə?” Ənɨ Pailèt nyaʼa biirɨ əne, wɨ̀ nyaʼa yi jwɨ̀ wò əsɨ ə bə̂d mbe nɨ nyaʼə tekɨ ɨnû ɨŋga əbeŋ mɨ̀Jû, pè ghà əmbɨ mɨ̀mə̌d ni, “Chəi mə̀ zə ənû ə mɔʼɔ ze nɨ wɨ̀ gǔ.

³⁹Àyɨə mbə berɨ mbə mɨchî əbeŋ mɔʼɔ nɨ chwi ni mbə mɨ biirɨ, mə bɨrɨ chɨ wə̀d ndəŋ fibɨ̀ saŋ ənɨ ə nyùmə̀ we nɨ mbɨə jɨgə Əchwɨ̂ ə Che-ɨgun. Əne mbə wa kə̀b ni mə chɨ ɨfɔ̂n mɨ̀Jû saŋ ə?”

⁴⁰Mbɨ nyaʼa kyeŋ rɨkǎ ghà ni, “Chə̂, kaʼi mbaŋə̀ zɔ̂! Tɨ̀ kə̀b yeʼ ə Barabas.” Barabas yɨə nyaʼə ɨjɨ bagɨ.