Read Fɨso Fi Jɔ̌n 21 Bible Online

Jɔ̌n 21 - Fɨso Fi bible

Jɔ̌n 21

¹Ənɨ ɨnû mbɔ̂ nyaʼa fə che i, Yeso nyaʼa yì chwi i ɨnyod əmbɨ mbi mə̀mə̀ə̀nɨ̀-ɨnû ɨban ə sà ze rɨ ə Tìberiàs. Wɨ̀ nyaʼa chwi ənɨ ɨnə̂njɨ̀ wɔ̂:

²Saimon Pità mbɨ Tomas, nɨ mbɨ nyaʼə bə̀ tɔŋ ənɨ ə Didimùs, əne yɨ ni wan ŋwìə̀, mbɨ Natanaèl, nɨ nyaʼa rɨ ə Kanà ə Galiliî, mbɨ ə bɔn Zebèdiî mbɨ mə̀mə̀ə̀nɨ̀-ɨnû Yeso cherə be nyaʼa əsɨ ə mɔʼ.

³Saimon Pità nyaʼa ghà əmbɨ mɨ̀mə̌d ni, “Mə wɨə wo gywɨ əgwi.” Mbɨ nyaʼa ghà ɨ bɔ ni, “Tɨ̀ bɨrɨ wò mbɨ ne.” Əne mɨ̀mə̌d mɨjìm nyaʼa jwɨ̀ wò nyɨ əbaŋ ɨgyɨ̀ kɔ màʼ tə kɨ̀, àyɨə chəi mbɨ nyaʼa gywɨ əghɨ ə mɔʼɔ ɨzimɨ we.

⁴Ənɨ ɨtuʼ nyaʼə sɨə chɨgə, Yeso nyaʼa təm əŋgo ə sà ze, àyɨə chəi mə̀mə̀ə̀nɨ̀-ɨnû mbe nyaʼa kyerɨ ni à yɨə Yeso.

⁵Wɨ̀ nyaʼa ghà əmbɨ mɨ̀mə̌d ni, “Mbɨ bɔn, mbə wa fə gywɨ̀ əgwi ə mɔʼɔ ə?” Mbɨ nyaʼa wììrɨ̀ ni, “Chə̂.”

⁶Wɨ̀ nyaʼa ghà əmbɨ mɨ̀mə̌d ni, “Mbə maʼ tə kɨ̀ əbà əbɔ ə jɨgɨ, mbə bɨrɨ gywɨ əzɨ ə mɔʼɔ.” Mbɨ nyaʼa màʼ kɨ̀ te gywɨ̀ əgwi ə nɔnɔʼ. Chəi ɨchî nɨ tɨ̀ mbɨ nyaʼa suŋ kɨ̀ te chà ɨŋga əbaŋ ɨmbə̀ʼ ɨghəm nɨ əgwi ze ə nyaʼa kàŋ nɔʼ əku.

⁷Ə̀mə̀ə̀nɨ̀-ɨnû we nɨ Yeso nyaʼa ghaʼi nyaʼa ghà əmbɨ Pità ni, “À yɨ Ə̀nùŋɨ̀sɨg!” Ənɨ Saimon Pità nyaʼa zu ni à yɨ Ə̀nùŋɨ̀sɨg, wɨ̀ nyaʼa wɨrɨ zɨ̀ ti ngywɨ̌, tòm ɨgyɨ̀ wò əsɨ Yeso. Wɨ̀ nyaʼa bè chɨ̀ ti ngywɨ ɨmbə̀ʼ ɨghəm nɨ wɨ̀ nyaʼa wo fàʼ.

⁸Mə̀mə̀ə̀nɨ̀-ɨnû mbə nyaʼa beenɨ ɨŋga əbaŋ ɨgyɨ̀. Mbɨ nyaʼə yènə̀ sùŋə̀ kɨ̀ ze nɨ əgwi ə nyaʼa swi ɨŋga, ɨmbə̀ʼ ɨghəm nɨ chəi ŋgò ə sà ze nyaʼa sa rɨ əsɨ ze nɨ mbɨ nyaʼə əŋgu. Əgha ə nyaʼa àmei ɨghabɨ mɨ̀metà ɨkɨ fibɨ̀.

⁹Ənɨ mbɨ nyaʼa jwɨ əsaŋ, mbɨ nyaʼa zə ɨwid kyi əŋgu mbɨ əgwi ɨgun ɨwid we. Mbɨ nyaʼa bə̀ zə ŋgə̀ŋ.

¹⁰Yeso nyaʼa ghà əmbɨ mɨ̀mə̌d ni, “Mbə̀ yeʼe mbɨ əgwi ə mɔʼɔ ze nɨ mbə̀ cherə gywɨ̀ə̀.”

¹¹Saimon Pità nyaʼa wò nyɨ əbaŋ ɨgyɨ̀ ze, sùŋ kɨ̀ ze chà əŋgo ə sà ze. Əgwi ə kyeŋ ə nyaʼa swi ɨŋga kɨ̀ ze. Əgwi ze yɨə nyaʼə ɨkɨ fibɨ̀ mbɨ ɨwum tân chɔ̀b rɨtad. Ka à bè yeʼi ni əgwi ze ə nyaʼa nɔʼ əku, chəi kɨ̀ ze nyaʼa sandə.

¹²Yeso nyaʼa ghà əmbɨ mɨ̀mə̌d ni, “Mbə̀ yeʼe sobrɨ ənə̂d.” Chəi wə̀d mɔʼɔ rəbɔʼ mə̀mə̀ə̀nɨ̀-ɨnû mbe nɨ tɨ̀ wɨ̀ nyaʼa yim fîŋ biirɨ ɨ bɔ ni, “Àwɔ̀ kɨə we?” ɨmbə̀ʼ ɨghəm nɨ mɨ̀mə̌d mɨjìm nyaʼa kyerɨ ni à yɨ Ə̀nùŋɨ̀sɨg.

¹³Yeso nyaʼa wò nɨŋ ŋgə̀ŋ ze mbɨ əgwi ze nàʼ əmbɨ mɨ̀mə̌d.

¹⁴Ɨghəm wɔ̂ yɨ ɨghəm nɨ pe tad nɨ Yeso nyaʼa jwɨ ɨfě mə̀mə̀ə̀nɨ̀-ɨnû mbe ənɨ Ŋwìə̀ nyaʼa fə zwemnɨ əməd.

¹⁵Ənɨ mbɨ nyaʼa fə sobrɨ ənə̂d, Yeso nyaʼa biirɨ əmbɨ Pità ni, “Saimòn, àwɔ̀ wan Jɔ̌n, à ghaʼ əmɨ chè bə̂d mbɔ̂ ə?” Pità nyaʼa wììrɨ̀ ɨ bɔ ni, “Ee, kyɨ Ə̀nùŋɨ̀sɨg, à kyerɨ ni mə ghaʼ əwe.” Yeso nyaʼa ghà ɨ bɔ ni, “Jə mbɨ bɔn njɨ̀g.”

¹⁶Yeso nyaʼa yì biirɨ ɨ bɔ ənɨ ɨghəm nɨ pe be ni, “Saimòn, àwɔ̀ wan Jɔ̌n, à ghaʼ əmɨ ə?” Pità nyaʼa wììrɨ̀ ɨ bɔ ni, “Ee, kyɨ Ə̀nùŋɨ̀sɨg, à kyerɨ ni mə ghaʼ əwe.” Yeso nyaʼa gha ɨ bɔ ni, “Nəŋgɨ tɨ njɨ̀g.”

¹⁷Yeso nyaʼa yì biirɨ ɨ bɔ ənɨ ɨghəm nɨ pè tad ni, “Saimòn, àwɔ̀ wan Jɔ̌n, à ghaʼ əmɨ ə?” Pità nyaʼa kə̀n ɨmbə̀ʼ ɨchî nɨ Yeso nyaʼa biirɨ ɨ bɔ ənɨ ɨghəm nɨ pè tad ni, “À ghaʼ əmɨ ə?” Əne wɨ̀ nyaʼa wììrɨ̀ əmbɨ Yeso ni, “Ə̀nùŋɨ̀sɨg, à kyerɨ ɨnû jìm. À kyerɨ ni mə ghaʼ əwe!” Yeso nyaʼa ghà ɨ bɔ ni, “Jə tɨ njɨ̀g.

¹⁸Mə ghà rəsìʼ ɨ ne ni ənɨ à nyaʼə ŋgwàʼ wə̀d, à wɨə nyaʼə zɨ̀ə̀ te ngywɨ̌ wò əsɨ ze nɨ à nyaʼa ghaʼ nɨ wò əŋgu. Àyɨə ənɨ à bɨrɨ fə nùn e, à bɨrɨ sem mbe ɨbɔ, wə̀d cherə zɨ̀ ngywɨ̌ ɨgwɨ ne, kod əwe nɨŋ wò əsɨ ze nɨ chəi à kəb nɨ wò.”

¹⁹Yeso nyaʼa ghà ənû zɔ̂ ɨ chwi ɨkwɨ ɨvɨ we nɨ Pità bɨrɨ kwɨ ɨmbə̀ʼ wumnɨ ə Ŋwiə̀. Ənɨ Yeso nyaʼa ghàm əne, wɨ̀ ghà ɨ bɔ ni, “Beenɨ əbɔʼ num!”

²⁰Pità nyaʼa bèŋ zə ə̀mə̀ə̀nɨ̀-ɨnû we nɨ Yeso nyaʼa ghaʼi, nɨ nyaʼə beenɨ əbɔʼ mɨ̀mə̌d. Ə̀mə̀ə̀nɨ̀-ɨnû wɔ̂ yɨ we nɨ nyaʼa tiinɨ ɨban ə Yeso ənɨ mbɨ nyaʼə jɨgə əne biirɨ ɨ bɔ ni, “Ə̀nùŋɨ̀sɨg, à kɨə we nɨ bɨrɨ fen əwe ə?”

²¹Ənɨ Pità nyaʼa zə əməd, wɨ̀ nyaʼa biirɨ əmbɨ Yeso ni, “Ə̀nùŋɨ̀sɨg, à yeʼ ɨmbə̀ʼ mbaŋə̀ zɔ̂ ə?”

²²Yeso nyaʼa wììrɨ̀ ɨ bɔ ni, “Mə mɨ kə̀b ni wɨ̀ chub ɨka pè ənɨ mə̀ wɨrɨ yeʼe, əze ə kɨə ye ɨ ne ə? Beenɨ əbɔʼ num!”

²³Ɨŋgam we nɨ wɨ̀ nyaʼa ghǎ nyaʼa jàŋ əkaʼ bə̂d mbe nɨ nyaʼə beenɨ əbɔʼ Yeso ni chəi ə̀mə̀ə̀nɨ̀-ɨnû wɔ̂ bɨrɨ nɔ kwɨ. Àyɨə chəi Yeso nyaʼa ghà ni chəi wɨ̀ bɨrɨ nɔ kwɨ. Wɨ̀ nyaʼa ghà yeʼ ni, “Mə mɨ kə̀b ni wɨ̀ chub ɨkǎ pè ənɨ mə̀ wɨrɨ yeʼe, əze ə kɨə ye ɨ ne ə?”

²⁴Ə̀mə̀ə̀nɨ̀-ɨnû wɔ̂ yɨ we nɨə ghà ɨnû mbɔ̂. Məd yɨ we nɨ bə̀ ŋwàʼnɨ̀ ə si. Tɨ̀ kyerɨ ni ənû ze nɨ wɨ̀ ghǎ yɨ ənû rəsìʼ.

²⁵Ɨnû nɔnɔʼ cherə mbɨ əŋgu nɨ Yeso nyaʼa ghɨ̌. À kɨ nɨ mbɨ nyaʼa ŋwaʼnɨ ɨnû mbe jìm, njɨ mə kɔndɨ ni chəi ɨsɨg wɔ̂ jìm kuʼ nɨ tɨ̀ mbɨ nùŋ ɨ̀ŋwàʼnɨ̀ mbe ɨŋga.