Read Fɨso Fi Jɔ̌n 3 Bible Online

Jɔ̌n 3 - Fɨso Fi bible

Jɔ̌n 3

¹Mbaŋə̀ mɔʼɔ zɨə nyaʼə əŋgu nɨ nyaʼə Farisiî rəbɔʼ ə mbe nɨ nyaʼə tekɨ ɨnû ɨŋga əbeŋ mɨ̀Jû. Ɨkum məd yɨə nyaʼə Nikodemùs.

²Mbaŋə̀ zɔ̂ nyaʼa wò əsɨ Yeso ɨzimɨ pè ghà ɨ bɔ ni, “Əchwiə̀-ɨnû, tɨ̀ ə kyerɨ ni àwɔ̀ yɨ əchwiə̀-ɨnû we nɨ Ŋwìə̀ tom. Chəi wə̀d mɔʼɔ əŋgu nɨ tɨ̀ wɨ̀ ghɨ̀ ɨnû yiirɨ mbɔ̂ nɨ àwɔ̀ ə ghɨ̀ə̀, kɨrɨ ənɨ Ŋwìə̀ wɨ mbɨ məd.”

³Yeso nyaʼa wììrɨ̀ ɨ bɔ ni, “Mə ghà rəsìʼ ɨ ne ni chəi wə̀d mɔʼɔ əŋgu nɨ tɨ̀ wɨ̀ nyɨ ɨŋga ənû ɨfɔ̀n ə Ŋwiə̀, kɨrɨ ənɨ mbɨ wɨrɨ gywɨ əməd ɨghəm cherə.”

⁴Nikodemùs nyaʼa biirɨ ɨ bɔ ni, “Mbɨ kɨə wo gywɨ wə̀d ɨghəm cherə rɨ ye əwù ze nɨ wɨ̀ fə nun əwi ə? Ɨ we tɨ wɨ̀ wɨrɨ nyɨ ɨŋga ɨbum ɨŋgɔb məd ənɨ ɨghəm nɨ pe be, ɨŋgɔb wɨrɨ gywɨ əməd ɨghəm cherə ə?”

⁵Yeso nyaʼa wììrɨ̀ ni, “Mə ghà rəsìʼ ɨ ne ni chəi wə̀d nɨ tɨ̀ wɨ̀ nyɨ ɨŋga ənû ɨfɔ̀n ə Ŋwiə̀, kɨrɨ ənɨ mbɨ wɨrɨ gywɨ əməd ɨghəm cherə ənɨ mɨnib bə̀ fɔrɨ ənɨ Əzwî ə Ŋwìə̀.

⁶Wə̀d we nɨ bə̂d mɨ̀sɔŋɨchù gywɨ əməd yɨə wə̀d mɨ̀sɔŋɨchù, àyɨə Əzwî ə Ŋwiə̀ ə zɨə gywɨ əzwî ze nɨ yeʼ ɨŋga bə̂d.

⁷Tɨrə̀ bid e ɨchî nɨ mə̀ gha ɨ ne ni, 'Mbɨ berɨ wɨrɨ gywɨ bə̂d ɨghəm cherə.'

⁸Ɨfə wɨə chèə̀ wò əbà ze nɨ wɨ̀ kəbɨ, əne àwɔ̀ wɨə zu ɨchî nɨ wɨə kùmə̀, àyɨə chəi à kyerɨ əsɨ ze nɨ wɨə yeʼe rəŋgu kɨ̀ əsɨ ze nɨ wɨə wò əŋgu. À yɨ ɨchî nɨ zɨə yeʼ mbɨ wə̀d we nɨ Əzwî ə Ŋwiə̀ ə yeʼ ɨŋga məd.”

⁹Nikodemùs nyaʼa biirɨ ni, “Ənû zɔ̂ ə kɨə wo che rɨ ye?”

¹⁰Yeso nyaʼa wììrɨ̀ ɨ bɔ ni, “Àwɔ̀ yɨə wə̀d nɨə chwi ɨnû əmbɨ mɨ̀Izre, əne chəi à kyerɨ ɨnû mbɔ̂ ə?

¹¹Mə wɨə ghà rəsìʼ ɨ ne ni tɨ̀ wɨə ghà ɨnû mbe nɨ tɨ̀ kyerɨ, bə̀ ghàə̀ mbe nɨ tɨ̀ fə zə, àyɨə chəi mbə̀ ben ɨnû mbe nɨ tɨə ghàə̀.

¹²Mə fə ghàm ɨ nən ɨmbə̀ʼ ɨnû mbe nɨə ghɨ̀ ɨgwɨ ə si, àyɨə chəi mbə̀ benɨ. Mbə̀ kɨə wo ben rɨ ye, əwù ze nɨ mə gham ɨ nən ɨmbə̀ʼ ɨnû mbe nɨə ghɨ̀ ɨkaŋ ə?

¹³Chəi wə̀d mɔʼɔ nɨ kɨrɨ wo ɨkaŋ, chè rɨ ənɨ Wan Wə̀d nɨ nyaʼa swiʼ rɨkaŋ.

¹⁴Ɨchî nɨ Mose nyaʼa nɔ jɔ brɔnz ɨkaŋ əzed ɨŋga ɨbad rɨkwàʼi, yɨə bə̀ ɨchî nɨ mbɨ berɨ nɔ Wan Wə̀d,

¹⁵ɨmbə̀ʼ wə̀d jìm we nɨ ben əməd we tɨ̀ wɨ̀ jɨg ɨ̀tènɨ̀ rɨ mì.

¹⁶“Ŋwìə̀ nyaʼa kàŋ ghaʼ ɨsɨg, əne wɨ̀ nyaʼa chà i Wan we mɔʼ, ɨmbə̀ʼ tɨ wə̀d mɔʼɔ we nɨ ben əməd nim i, àyɨə wɨ̀ jɨg ɨ̀tènɨ̀ rɨ mì.

¹⁷Ŋwìə̀ nyaʼa tom i Wan ɨŋga ɨsɨg, kaʼi ni wɨ̀ zɨ ɨsaʼi ɨgwɨ ə bə̂d rɨŋga ɨsɨg, àyɨə ni bə̂d rɨŋga ɨsɨg mbe tɨ̀ mbɨ chè ənjìm məd jwɨ̀ rəŋgəʼ.

¹⁸Chəi Ŋwìə̀ ə zɨ̀ ɨsaʼi ɨgwɨ ə bə̂d mbe nɨ ben əməd. Wɨ̀ fə zɨ̀ yeʼ ɨgwɨ mbe nɨ chəi mbɨ ben əməd, ɨmbə̀ʼ ɨghəm nɨ chəi mbɨ ben Wan Ŋwìə̀ we mɔʼ.

¹⁹Ɨsaʼi we nɨ yeʼ ɨgun ə bə̂d yɨ ni ɨzeŋɨ zeŋɨ fə yeʼe ɨŋga ɨsɨg, àyɨə bə̂d fə chwi ni mbə ghaʼ yeʼ ɨsɨ firɨ chè ɨzeŋɨ zeŋɨ, ɨmbə̀ʼ ɨghəm nɨ ɨ mbɨə kɨrɨ ghɨ̀ ɨnû rɨbɔ̀ŋ.

²⁰Wə̀d jìm we nɨə ghɨ̀ ɨnû rɨbɔ̀ŋ wɨə bàn ɨzeŋɨ zeŋɨ. Chəi wɨə yeʼe ɨŋga ɨzeŋɨ zeŋɨ ɨmbə̀ʼ tɨ bə̂d zə ə ɨnû rɨbɔ̀ŋ məd.

²¹Àyɨə bə̂d mbe nɨə ghɨ̀ ɨnû nɨ kuʼnɨ mbɨə wò ɨŋga ɨzeŋɨ zeŋɨ ɨmbə̀ʼ bə̂d zə ni à yɨə Ŋwìə̀ ə nàʼ ɨka ni mbɨ ghɨ ɨnû mbe nɨ mbɨə ghɨ̀ə̀.”

²²Ənɨ Yeso nyaʼa fə gha ɨnû mbɔ̂, wɨ̀ nyaʼa nɔ̀ʼ mbɨ mbi mə̀mə̀ə̀nɨ̀-ɨnû mbɨ wò ə Jùdeyà. Wɨ̀ nyaʼa pè chub əŋgu mbɨ mɨ̀mə̌d bə̀ nàʼ mɨnib əmbɨ ə bə̂d.

²³Jɔ̌n wɨə nyaʼə bə̀ nàʼ mɨnib əmbɨ ə bə̂d ə Aenòn ɨban ə Salìm. Ɨ wɨə nyaʼə nàʼ mɨnib əŋgu ɨmbə̀ʼ ɨghəm nɨ mɨnib nyaʼa nɔʼ əŋgu. Bə̂d nyaʼə wò əsɨ məd, wɨ̀ nàʼ mɨnib əmbɨ mɨ̀mə̌d.

²⁴Ənû zɔ̂ ə nyaʼa ghɨ̀ bɔŋ mbɨ nyaʼə sɨə zɨ ə Jɔ̌n ə ndəŋ.

²⁵Mə̀mə̀ə̀nɨ̀-ɨnû Jɔ̌n mbɨ ə Jû mɔʼɔ nyaʼa kɔ taŋ ɨmbə̀ʼ ənû nɨ so ɨnyod bə̀ sò ɨghɨ bɔŋ wumnɨ ə Ŋwiə̀.

²⁶Mə̀mə̀ə̀nɨ̀-ɨnû Jɔ̌n nyaʼa wò əsɨ məd pè ghà ɨ bɔ ni, “Əchwiə̀-ɨnû, mbaŋə̀ ze nɨ nyaʼa mbɨ ne ɨnjin ɨgyɨ̂ Jodàn, nɨ à nyaʼa gha ɨmbə̀ʼ əməd, wɨ əgha nàʼə̀ mɨnib. Bə̂d mɨ̀jìm mbɨə wò əsɨ məd!”

²⁷Jɔ̌n nyaʼa wììrɨ̀ ni, “Chəi ənɨ tɨ̀ wə̀d berɨ əghɨ ə mɔʼɔ kɨrɨ ni à yɨə Ŋwìə̀ naʼ ɨ bɔ.

²⁸Mbə yɨ mbɨ mɨ̀zərɨmbin ni mə nyaʼa fə ghà ni, 'Ka mɔ̌ yɨ əmɨ Wə̀d we nɨ Ŋwìə̀ zɔʼɔ, àyɨə Ŋwìə̀ nyaʼa chà əmɨ ɨmbì ɨ bɔ.'

²⁹Wə̀d we nɨ berɨ ɨgən yɨ ɨnom ɨgən. Ɨsə̀ʼ ɨnom ɨgən mɨ təm ɨban zu ənɨ wɨə ghàmə̀, wɨ̀ bɨrɨ kaŋ ghaʼ kwàʼ rɨŋgəʼ ɨmbə̀ʼ ɨghəm nɨ wɨ̀ zu gɨ̂ ɨnom ɨgən we. Əne ɨghaʼi ə kàŋ swi ɨŋga mɨ fîŋ.

³⁰Ɨnû məd berɨ sɨə wò ɨmbì, mbɨ mɔ̌ sɨə wò rə̀bɔ̀ʼɔ̀.

³¹“Wə̀d we nɨ yeʼe rɨkaŋ ə chè bə̂d mɨjìm. We nɨ yeʼe rɨ ɨgwɨ ə si yɨə wə̀d rɨ ɨgwɨ ə si. Məd wɨə ghà àmei ɨnû rɨ ɨgwɨ ə si. Wə̀d we nɨ yeʼe rɨkaŋ ə chè bə̂d mɨ̀jìm.

³²Məd wɨə ghàə̀ ɨnû mbe nɨ wɨ̀ fə zə bə̀ zu, àyɨə chəi wə̀d nɨ ben ənû ze nɨ wɨə ghàə̀.

³³Wə̀d we nɨ ben ənû ze nɨ wɨ̀ ghǎ fə bə̀ ben ni ənû ze nɨ Ŋwìə̀ ghǎ yɨ rəsìʼ.

³⁴Ɨŋgam we nɨ wə̀d we nɨ Ŋwìə̀ tom ə ghàə̀ yɨ rɨ əmbɨ ə Ŋwiə̀, ɨmbə̀ʼ ɨghəm nɨ Əzwî ə Ŋwìə̀ ə zɨ ɨgwɨ məd nɨ chəi ənɨ tɨ̀ mbɨ mɨ̀g.

³⁵Mbǎʼ ə ghaʼ i Wan əne wɨ̀ fə sàŋ ɨnû jìm ɨŋga tɨkyerɨ-ɨbɔ məd.

³⁶Wə̀d we nɨ ben Wan Ŋwìə̀ fə jɨg ɨ̀tènɨ̀ rɨ mì. Ka wə̀d we nɨ chəi wɨə zuunɨ ə Wan Ŋwìə̀ bɨrɨ jɨg i ɨ̀tènɨ̀, àyɨə Ŋwiə̀ bɨrɨ sə ɨtəm əbɔʼ məd.”