Read Fɨso Fi Jɔ̌n 5 Bible Online

Jɔ̌n 5 - Fɨso Fi bible

Jɔ̌n 5

¹Ənɨ nyùmə̀ mɔʼɔ nyaʼa chě, Yeso nyaʼa kɔʼ wò ə Jèrusalèm ɨmbə̀ʼ jɨg əchwɨ̂ ə mɨ̀Jû ə mɔʼɔ.

²Ətuŋ ə mɔʼɔ nɨ mbɨ nyaʼə tɔŋ ənɨ ɨŋgam mɨ̀Hibrù ni Betzatà nyaʼa ə Jèrusalèm. Wɨ nyaʼa ɨban ɨchû ɨkam we nɨ mbɨ nyaʼə tɔŋ ənɨ Ɨchû Ɨkam Njɨ̀g. Ɨchû ɨkam we nyaʼa berɨ ɨ̀tâŋ tân.

³Bə̂d əwɔn, ɨnɔ̂n kyeŋ nyaʼə kɨə nòkɨ̀ ɨŋga ɨ̀tâŋ mbe. Bə̂d əwɔn mbe yɨə nyaʼə mɨfɨgɨ̀, bə̂d nɨə tèʼ ɨwu mbɨ ə bə̂d nɨ nyaʼa buʼrə. [Mbɨ nyaʼə chub əŋgu ɨ wòm ni aŋgɨrə̀ nɔm mɨnib,

⁴ɨmbə̀ʼ ɨghəm nɨ aŋgɨrə̀ Ə̀nùŋɨ̀sɨg nyaʼə kɨə swiʼə wò ɨŋga ətuŋ ze pè nɔm mɨnib. Zɨə nyaʼa chwi ni wə̀d əwɔn we nɨ nyaʼa be nyɨ ɨŋga ətuŋ ze, ənɨ aŋgɨrə̀ we nyaʼa nɔm mɨnib mbe, nyaʼa bɔtɨ rɨ ənɨ əwɔn ze nɨ wɨ̀ nyaʼə wɔ̀nə̀.] [4]

⁵Mbaŋə̀ mɔʼɔ nyaʼa əŋgu nɨ nyaʼa fə wɔn ɨghəm ɨwu ɨwum tad chɔ̀b famɨ.

⁶Ənɨ Yeso nyaʼa zə əməd, wɨ̀ nyaʼa kyerɨ ni wɨ̀ nyaʼa fə nokɨ əŋgu əgha ə se. Əne wɨ̀ nyaʼa biirɨ ɨ bɔ ni, “À wa kəb bɔtɨ ə?”

⁷Mbaŋə̀ ze nɨ nyaʼə wɔ̀nə̀ nyaʼa wììrɨ̀ ɨ bɔ ni, “Masà, chəi mə berɨ wə̀d mɔʼɔ nɨ zɨ əmɨ ɨŋga ətuŋ zɔ̂ ənɨ aŋgɨrə̀ nɔm mɨnib. Bɔŋ mə sɨə nyɨ ɨŋga, wə̀d cherə fə bè nyɨ.”

⁸Yeso nyaʼa gha ɨ bɔ ni, “Nɔʼ rətiə, nɨŋ e matə̀, yèn wò e.”

⁹Àmei əwu əwən, mbaŋə̀ ze nyaʼa bɔtɨ, əne wɨ̀ nyaʼa nɔ̀ʼ nɨŋ i matə̀ yèn wò i. Əni ze yɨə nyaʼə əni əkwɨ mɨ̀Jû.

¹⁰Əne bə̂d mbe nɨ nyaʼə tekɨ ɨnû ɨŋga əbeŋ mɨ̀Jû nyaʼa biirɨ əmbɨ ə mbaŋə̀ ze nɨ Yeso nyaʼa vɨ əməd ni, “Tə̀chɔ̀ŋ yɨ əni əkwɨ, əne chəi ta rɨkə chwi ni à beʼ e matə̀ ɨgwɨ əni zɔ̂.”

¹¹Wɨ̀ nyaʼa wììrɨ̀ əmbɨ mɨ̀mə̌d ni, “Mbaŋə̀ ze nɨ vɨ əmɨ kə̀ʼ ghà ɨ num ni, 'Nɨŋ e matə̀, yèn wò e.'”

¹²Mbɨ nyaʼa biirɨ ɨ bɔ ni, “Mbaŋə̀ zɔ̂ nɨ kə̀ʼ gha ɨ ne ni à nɨŋ e matə̀, yèn wò e kɨə we?”

¹³Chəi mbaŋə̀ ze nɨ nyaʼa bɔtɨ nyaʼa kyerɨ wə̀d we nɨ vɨ əməd, ɨmbə̀ʼ ɨghəm nɨ Yeso nyaʼa fə suŋgɨ rɨ əsɨ ze fɔrɨ ni ɨnɔ̂n bə̂d nyaʼa fə fetɨ əŋgu.

¹⁴Ənɨ əmad ə nyaʼa zombɨ, Yeso nyaʼa zə mbaŋə̀ ze nɨ wɨ̀ kə̀ʼ vɨ̀ əməd ɨŋga mbàn Ŋwìə̀, əne wɨ̀ nyaʼa ghà ɨ bɔ ni, “Zə, à fə bɔtɨ e! Tɨrə̀ wɨrɨ ghɨ e ənû rɨbɔ̀ŋ, ɨmbə̀ʼ tɨ ənû nɨ bə chè əzɔ̂ ə nyɨ i ɨgwɨ ne.”

¹⁵Mbaŋə̀ ze nyaʼa nɔ̀ʼ wò i, pè ghà əmbɨ ə bə̂d mbe nɨ nyaʼə tekɨ ɨnû ɨŋga əbeŋ mɨ̀Jû ni à yɨə Yeso kə̀ʼ vɨ əwi.

¹⁶Mbɨ nyaʼa zu əne kɔ nwendɨ tɨkyerɨ-ɨwu Yeso, ɨmbə̀ʼ ɨghəm nɨ wɨ̀ nyaʼa vɨ wə̀d əni əkwɨ.

¹⁷Àyɨə Yeso nyaʼa wììrɨ̀ əmbɨ mɨ̀mə̌d ni, “Mɨ Mbǎʼ wɨə kɨrɨ faʼə yeʼe pè rə̀chɔ̀ŋ, əne mɔ̌ bə̂, mə wɨə bə̀ kɨrɨ faʼə.”

¹⁸Ɨŋgam wɔ̂ nɨ Yeso nyaʼa ghamɨ nyaʼa ghɨ̀ ni bə̂d mbe nɨ nyaʼə tekɨ ɨnû ɨŋga əbeŋ mɨ̀Jû kɔ kə̀b ɨnə̂njɨ̀ nɨ zwiirɨ əməd. Chəi mbɨ nyaʼa kəb zwiirɨ əməd àmei ɨmbə̀ʼ ɨchî nɨ wɨ̀ nyaʼa gu ɨkə əni əkwɨ, mbɨ nyaʼa bə̀ kə̀b zwiirɨ əməd ɨmbə̀ʼ ɨghəm nɨ ɨ wɨə nyaʼə gha ni Ŋwìə̀ yɨ i Mbǎʼ, əne wɨ̀ nyaʼa kə̀b chwi ni tə wɨ əndəŋ əndəŋ mbɨ ə Ŋwiə̀.

¹⁹Yeso nyaʼa ghà əmbɨ ə bə̂d mbe nɨ nyaʼə tekɨ ɨnû ɨŋga əbeŋ mɨ̀Jû ni, “Mə ghà rəsìʼ ɨ nən ni, chəi ənɨ tɨ̀ Wan ghɨ̀ ənû ə mɔʼɔ ənɨ i ɨghəm. Məd wɨə ghɨ̀ àmei ɨnû mbe nɨ wɨ̀ zə ənɨ Mbǎʼ ə ghɨ̀ə̀. Ənû ze nɨ Mbǎʼ ə ghɨ̀ə̀, Wan bɨrɨ bɨ ghɨ̀.

²⁰Wɨ̀ bɨrɨ ghɨ̀ ɨmbə̀ʼ ɨghəm nɨ Mbǎʼ ə ghaʼ i Wan, əne ɨ wɨə chwi ɨnû jìm mbe nɨ wɨə ghɨ̀ ɨ bɔ. Wɨ̀ bɨrɨ chwi ɨnû kyeŋ ɨ bɔ nɨ che mbɔ̂, əne mbə bɨrɨ yiirɨ.

²¹Ɨchî nɨ Mbǎʼ ə zwemnɨ ə bə̂d bə̀ nàʼ ɨ̀tènɨ̀ əmbɨ mɨ̀mə̌d yɨə bə ɨchî nɨ Wan ə nàʼ ɨ̀tènɨ̀ əmbɨ wə̀d we nɨ wɨ̀ ghaʼi.

²²Chəi Mbǎʼ ə saʼə wə̀d mɔʼɔ. Wɨ̀ fə naʼ ɨka jìm əmbɨ ə Wan ni wɨ̀ saʼ bə̂d.

²³Wɨ̀ fə ghɨ̀ əne ɨmbə̀ʼ bə̂d mɨjìm wumnɨ Wan ɨchî nɨ mbɨə wumnɨ ə Mbǎʼ. Kaʼ wə̀d we nɨ chəi wɨə wumnɨ ə Wan, wɨə bə̀ wumnɨ i Mbǎʼ we nɨ nyaʼa tom Wan.

²⁴“Mə ghà rəsìʼ ɨ nən ni wə̀d we nɨ zu mɨ ɨŋgam, əne ben wə̀d we nɨ nyaʼa tom əmɨ, fə jɨg ɨ̀tènɨ̀ rɨ mì. Chəi mbɨ bɨrɨ saʼ əməd, àyɨə wɨ̀ fə jwɨ̀ rɨ ɨchû ɨvɨ, jɨg ɨ̀tènɨ̀.

²⁵Mə ghà rəsìʼ ɨ nən ni nyùmə̀ wɨə yeʼe, əne nyùmə̀ rəŋgu fə yeʼe i, nɨ ɨvɨ bə̂d bɨrɨ zu gɨ̂ Wan Ŋwìə̀. Mbe nɨ zu bɨrɨ wɨrɨ tènə̀.

²⁶Ɨchî nɨ ɨ̀tènɨ̀ yeʼ ɨŋga Mbǎʼ ziə, məd wɨə nàʼ ɨ̀tènɨ̀ əmbɨ ə bə̂d, əne wɨ̀ fə bə̀ ghɨ̀ ni Wan nàʼ ɨ̀tènɨ̀ əmbɨ ə bə̂d.

²⁷Mbǎʼ fə bə̀ nàʼ ɨka ɨ bɔ ni wɨ̀ saʼ bə̂d, ɨmbə̀ʼ ɨghəm nɨ məd yɨə Wan Wə̀d.

²⁸Tɨ əzɔ̂ ə yeʼi ənû ə yiirɨ ɨ nən. Nyùmə̀ wɨə yeʼe nɨ bə̂d mɨjìm mbe nɨ yeʼ ɨŋga mɨ̀sì bɨrɨ zu gɨ̂ məd

²⁹əne jwɨ̀ rɨŋga mbə mɨ̀sì. Bə̂d mbe nɨ nyaʼə ghɨ̀ ɨnû chɔ̀m bɨrɨ zwemə jɨg ɨ̀tènɨ̀, àyɨə mbe nɨ nyaʼə ghɨ̀ ɨnû rɨbɔ̀ŋ bɨrɨ zwemə Ŋwìə̀ zɨ̀ ɨsaʼi ɨgwɨ mɨ̀mə̌d.

³⁰Chəi ənû ə mɔʼɔ nɨ tɨ̀ mə ghɨ̀ ənɨ mɨ ɨka. Mə wɨə saʼə bə̂d àmei ɨchî nɨ Ŋwìə̀ ghà ɨ num, əne mə wɨə saʼə mɨ̀mə̌d ɨchî nɨ kuʼnɨ, ɨmbə̀ʼ ɨghəm nɨ chəi mɨə ghɨ̀ ənû ze nɨ mə kəbɨ. Mə wɨə ghɨ̀ yeʼ əze nɨ wə̀d we nɨ tom əmɨ kəbɨ.”

³¹Yeso nyaʼa yì ghà əmbɨ ə bə̂d mbe nɨ nyaʼə tekɨ ɨnû ɨŋga əbeŋ mɨ̀Jû ni, “Mə mɨ yeʼə ghà ɨnû ɨmbə̀ʼ mɨ ɨghəm, njɨ chəi bə̂d bɨrɨ ben ɨnû mbe.

³²Àyɨə wə̀d mɔʼɔ wɨ əŋgu nɨə ghà ɨnû ɨmbə̀ʼ əmɨ. Mə kyerɨ ni ɨnû mbe nɨ məd ə ghàə̀ yɨ ɨnû rəsìʼ.

³³Mbə nyaʼa tom bə̂d əsɨ Jɔ̌n, əne wɨ̀ nyaʼa ghà rəsìʼ ɨmbə̀ʼ əmɨ ɨ nən.

³⁴Kaʼi ni bə̂d berɨ gha ɨnû ɨmbə̀ʼ əmɨ, àyɨə mə wɨə ghà mbe nɨ Jɔ̌n nyaʼa ghǎ ɨmbə̀ʼ mbə̀ jwɨ rəŋgəʼ.

³⁵Jɔ̌n yɨə nyaʼa ɨghabɨ ənam nɨ nyaʼə teə ghɨ̀ ɨsɨ zeŋə. Mbə nyaʼa ghaʼ nɨ chub ɨŋga ɨzeŋɨ zeŋɨ we nɨ məd nyaʼa ghɨ ni wɨ te. Əne mbə nyaʼa chub àmei ənɨ ɨkə nyumə̀.

³⁶Ɨnû mbɔ̂ nɨ mɨə ghàə̀ yɨ mɨ̀zərɨmbin ɨ num. Mbɨ chè mbe nɨ Jɔ̌n nyaʼə ghà ɨmbə̀ʼ əmɨ. Ɨnû mbe nɨ Mbǎʼ zɨ ɨŋga tum rɨkyerɨ-ɨbɔ ni mə maanə, əne yɨ mbe nɨ mɨə ghɨ̀ə̀, ɨ mbɨə chwiə ni à yɨə Mbǎʼ nyaʼa tom əmɨ.

³⁷Mbǎʼ we nɨ nyaʼa tom əmɨ yɨə bə̀ ə zərɨmbin ɨ num. Chəi mbə̀ kweʼ zu gɨ̂ məd kɨ̀ bè zə ɨfě məd.

³⁸Chəi ɨŋgam məd ɨŋga tə fîŋ, ɨmbə̀ʼ ɨghəm nɨ chəi mbə̀ ben əməd we nɨ wɨ̀ nyaʼa tomɨ.

³⁹Mbə mbɨə kàŋə̀ jeŋgɨə kwembɨ Ə̀ŋwàʼnɨ̀ ə Ŋwiə̀ ɨmbə̀ʼ ɨghəm nɨ mbə̀ kɔndɨ ni mbə bɨrɨ zə ɨchî nɨ jɨg ɨ̀tènɨ̀ rɨ mì ɨŋga ə̀ŋwàʼnɨ̀ ze. Mbə̀ kyerɨ ni ə̀ŋwàʼnɨ̀ ze əjìm ə zɨə ghà ɨmbə̀ʼ əmɨ,

⁴⁰àyɨə chəi mbə̀ ben nɨ yeʼe əsɨ num ɨmbə̀ʼ jɨg ɨ̀tènɨ̀.

⁴¹“Chəi mə̀ be kəb ni bə̂d yiirɨ əmɨ.

⁴²Àyɨə mə kyerɨ əwən kwàʼ ɨchî chɔ̀m. Mə kyerɨ ni chəi mbə̀ ghaʼ ə Ŋwiə̀ rɨŋga tə fîŋ.

⁴³Mə fə yeʼe ənɨ ɨkum mɨ Mbǎʼ, əne chəi mbə̀ nɨŋ əmɨ, àyɨə wə̀d mɔʼɔ mɨ yeʼe ənɨ i ɨghəm, mbə bɨrɨ nɨŋ əməd.

⁴⁴Mbə̀ kɨə wo ben rɨ ye, ənɨ mbə̀ə wumnɨ àmei mbə bɔŋgɔb, nɨ chəi mbə kəb ni Ŋwìə̀, nɨ mei we mɔʼ wumnɨ əwən ə?

⁴⁵Tɨ mbə̀ kɔndɨ ə ni mə bɨrɨ zɨ ɨsaʼi ɨgwɨ nən ɨfě Mbǎʼ. À yɨə Mose we nɨ mbə̀ nuŋ tə rɨkɔndɨ ɨgwɨ məd bɨrɨ zɨ ɨsaʼi ɨgwɨ nən.

⁴⁶Mbə̀ mɨ nyaʼa ben ə Mose, njɨ mbə bɨrɨ bɨ ben əmɨ, ɨmbə̀ʼ ɨghəm nɨ Mose nyaʼa ŋwàʼnɨ̀ ɨmbə̀ʼ əmɨ.

⁴⁷Àyɨə ɨchî nɨ chəi mbə̀ nyaʼa ben ɨnû mbe nɨ wɨ̀ nyaʼa ŋwaʼnɨ, mbə kɨə wo ben mbe nɨ mə̀ gha ɨ nən rɨ ye ə?”